1 Keilangan tomolò se kedita te otaw te menge opisyal te gobirno, so wedad otaw meinang pengolo singed aw inangen sikandin te Timanem pengolo. Ininang te Timanem pengolo se kedita dan. 2 Aw mato se otaw te menge opisyal te gobirno, iling te mato sikandin te punù te Timanem, so ininang dan te Timanem pengolo, aw yan se doun te ipelumun se otaw mato kandan. 3 Aw mèpiya se inangen tadon, eked kidon kelemitan te menge otaw egpengolo. Meneng keilangan melemitan se menge otaw eg-inang te medaet. Aw ibeg niyo eked kaw kelemitan te menge opisyal te gobirno, peg-inang kaw te mèpiya aw yan iduyun kaw dan, 4 so ininang dan te Timanem pengolo amon mèpiya se keogpà niyo. Meneng aw eg-inang kaw te medaet, keilangan melemitan kaw, so ontò dan megpelumun kenyo. Ininang dan te Timanem pengolo amon megpelumun dan te menge otaw eg-inang te medaet. 5 Yan se doun te keilangan tomolò kaw te menge opisyal te gobirno, kenà olò amon eked kaw pelumuni te Timanem, meneng keilangan tomolò kaw, so netegahan niyo te mèpiya iyan.

6 Yan heman se doun te keilangan mayad kidon te mihoras, so sogounun te Timanem se kedita te opisyal egtoman te menge punù te gobirno. 7 Yan bayad kaw te kedita te kemolò te mihoras ipebayad te gobirno. Tolò kaw te menge opisyal te gobirno, aw pemasa kaw heman kandan.

8 Ikà niyo egpengotang amon wedad salà niyo. Meneng ikà niyo palos egwedad te pegpedekelay niyo te pedowan, so aw dakel se pedowan te otaw diyà te doma, timoman den sikandin te kedita te punù ingkeliwat i Moises. 9 Doen punù insolat, “Ikà niyo eglakad. Ikà niyo egbonò. Ikà niyo egpenakaw. Ikà niyo eg-ingà.” Doen heman menge doma punù insolat, meneng netibok se kedita niyan diyà te sebad punù seini, “Kedekeli niyo te pedowan se doma otaw iling te peg-aneng-aneng niyo te kenyo pegkeotawun.” 10 Aw dakel se pedowan tadon diyà te doma otaw, wedad palos medaet inangen tadon diyà kandan. Yan aw dakel se pedowan tadon diyà te doma otaw, meketolò kidon te kedita te punù ingkeliwat i Moises.

11 Seini se keilangan inangen tadon, so netegahan tadon te agpet den domateng se aldaw te kelowaan egpelimanan tadon. Eked kepakay aw iling kidon te otaw neketedogi, meneng keilangan megpeketagad kidon, so lomikò si Cristo te eked kenamay. Kenà iling te kedengan te kaling pegpesakop tadon diyà ki Cristo, so mig-aneng-aneng kidon te menamay pa se peglikò din. 12 Iling te agpet den lomaklak se kengitngit aw domateng se aldaw, so agpet den se peglikò i Cristo. Doun niyan, keilangan lomengà kidon meg-inang te medaet, aw keilangan meg-inang kidon te metòlid. Yan megpeketagad kidon iling te sondalo gayed egpeketagad. 13 Keilangan tomalag mèpiya se eg-inangen tadon amon metaga-taga se kedita te otaw te wedad medaet mekeyàyà kenitadon. Ikà niyo eg-iling te otaw egsamok, aw eglasing, aw eglayok te kenà kandan esawa, aw metibayi wedad yàyà. Ikà niyo egdindil. Ikà niyo eg-ingà. 14 Meneng peg-iling kaw te eg-inangen te Pengolo tadon si Jesu Cristo. Ikà niyo eg-aneng-aneng tepad te pegtoman niyo te medaet ibeg te lawa niyo.