1 Nayan, menge kedowa ko, ontò mèpiya se keido te Timanem kenitadon, aw yan se doun te megpunù a den kenyo te keilangan betel niyo ibegay se pegkeotawun niyo diyà te Timanem dalem te doen pa pedowan niyo. Aw ibegay niyo se pegkeotawun niyo diyà kandin, kinewaen din iyan, aw ipetaga-taga niyo te melobos se pedowan niyo te pegsimba niyo kandin. 2 Ikà niyo egtaking te ketanem te otaw kenà egpenimanem. Meneng pemoyoi niyo te inangen te Timanem kaling se aneng-aneng niyo amon metòlid se eg-inangen niyo. Yan ketegahan niyo aw eden se ibeg te Timanem inangen niyo, so mèpiya iyan, aw kelubahan din, aw wedad kolang niyan.

3 Tandà te pegsogò te Timanem kanak, doen den ipunù ko diyà te kedita niyo egpemenal. Ikà niyo egpelangkaw-langkaw. Meneng keilangan metòlid se aneng-aneng niyo tepad te mebatog niyo inangen tandà te kebiyasa imbegay te Timanem kenyo te pegsalig niyo diyà kandin. 4 Pengkey medita se kinemoloan diyà te lawa te otaw, meneng netibok se kedita niyan diyà te sebad lawa, aw doen kekemowan te kedita te kinemoloan diyà te lawa. 5 Iling heman kenyan, pengkey medita kidon egpemenal, meneng pegsebad tadon diyà ki Cristo, neinang kidon iling te lawa din amon megpetebangay kidon iling te pegpetebangay te menge kinemoloan diyà te lawa. 6 Yan, so medita se kemolò te kebiyasa imbegay te Timanem diyà te teg sebad-sebad kenitadon tandà te tabang din, keilangan gemiten tadon iyan amon megpetebangay kidon. Aw binegayan kaw te Timanem te kebiyasa te pegkeliwat te kagi te Timanem, keilangan komeliwat kaw te kebenalan insalig din kenyo. 7 Aw binegayan kaw te kebiyasa te pegtelaban, keilangan megtelaban kaw. Aw biyasa kaw egtoladà, keilangan megtoladà kaw. 8 Aw biyasa kaw egpekagsen te pedowan te doma otaw egpemenal, yan se keilangan inangen niyo. Aw ibeg te Timanem memegay kaw diyà te doma otaw nelimahan, keilangan bowasag kaw kandan. Aw inangen kaw te Timanem pengolo diyà te doma otaw, keilangan measeb kaw te pegpengolo niyo. Aw isogò kaw te Timanem menabang te doma otaw nelidò, keilangan meluba se pedowan niyo te pegtabang niyo kandan.

9 Aw keidowan niyo se doma otaw, keilangan melobos se pedowan niyo. Peg-eked kaw te medaet, meneng taking kaw ontò te mèpiya. 10 Tandà te pegpesakop niyo diyà ki Cristo, neinang kaw den iling te telekedowa, aw yan keilangan megpedekelay kaw te pedowan. Keilangan meagka se pedowan te kedita niyo te pegpesegmanay. 11 Ikà niyo egketaka te pegtolò niyo te Pengolo tadon, meneng keilangan measeb kaw, aw keilangan magsen heman se pedowan niyo. 12 Keilangan meluba kaw so doen egpelimanan niyo. Aw pemilangen kaw, pedeleg kaw te pegtaking niyo ki Cristo. Pedeleg kaw se pegtawal-tawal. 13 Pegtabang kaw te menge doma sakop te Timanem nelimahan. Pegsagman kaw heman te menge otaw mepanaw.

14 Pemoyò kaw diyà te Timanem te keidowan din se otaw egpemilang kenyo. Ikà niyo egpemoyò te detengan dan te medaet, meneng pegtawal-tawal kaw te keidowan din dan. 15 Aw doen keluba te doma otaw, keilangan meluba kaw heman doma kandan. Aw doen kepuluk te doma otaw, keilangan mepuluk kaw heman doma kandan. 16 Se kedita niyo migpesakop diyà ki Cristo, keilangan megsebad kaw te pedowan. Ikà niyo egpelangkaw-langkaw, meneng mèpiya aw megpeketagad kaw meg-inang te sagkep inang. Ikà niyo eg-aneng-aneng te sikiyo olò se netaga-taga te kebenalan.

17 Pengkey doen otaw meg-inang te medaet diyà kenyo, ikà niyo eg-inang te medaet diyà kandan. Pegpekeaseb kaw meg-inang te ontò mèpiya eked silahi te doma otaw. 18 Pegpekeaseb kaw te pegsebad te pedowan niyo diyà te kedita te doma otaw. 19 Menge kedowa ko egkedekelan ko te pedowan, ikà niyo egmalit te menge otaw eg-inang te medaet diyà kenyo, meneng pebeyai niyo sikandan, so Timanem se megpelumun kandan. Doen kagi te Timanem insolat,