1 Penga niyan, nesayo si Pablo lekat te Atenas aw dimoton te Korinto. 2 Kinità din kidoen se sebad Judiyo si Akilas timebaw doton te Ponto, kaling dimateng lekat te Italya sipat esawa din si Priscila, so migpunù se selotan si Claudio te mesayo se kedita te Judiyo lekat te Roma kapital te Italya. Gimemaw si Pablo diyà kandan. 3 Mig-ogpà diyà kandan aw migpetelebanay dan, so sikandan se otaw biyasa eg-inang te balay eg-etepan te penenaktun, onawa te eg-inangen i Pablo. 4 Kelikit te Sebado, gayed egpeinsaay si Pablo te menge otaw doton te simbahan te Judiyo amon doen menge Judiyo memenal aw pengkey kenà Judiyo. 5 Meneng pegdateng i Silas aw si Timoteo lekat te Masidonya, yan gayed den migtoladà si Pablo te menge Judiyo te kagi te Timanem te kelikit te aldaw, aw se intoladà din kandan, si Jesus se Misiyas insogò te Timanem. 6 Meneng neopal se menge Judiyo ki Pablo, aw migtompuyus dan kandin. Penga niyan, imbuya-buya i Pablo se saol din amon ketegahan dan te doen salà dan, so wedà dan pemenal. Minikagi sikandin, “Aw ipelumun kaw, inday kenyo aw yan se ibeg niyo. Wedad labut ko. Lekat seini, megtoladà a te menge otaw kenà Judiyo.”

7 Penga niyan, nesayo si Pablo lekat te simbahan te Judiyo, aw minalin doton te balay te sebad otaw kenà Judiyo si Tito Justo egtolò te ibeg te Timanem. Tangkil te simbahan te Judiyo se balay din. 8 Se egpengibing te simbahan te Judiyo si Crispo, nemenal te Pengolo sipat kedita te otaw eg-ogpà diyà te balay din. Nemenal heman se medita doma otaw doton te Korinto aw binonyagan dan.

9 Tengà te delem, migpekità se Pengolo diyà ki Pablo, aw minikagi diyà kandin, “Ikà egkelemitan. Ikà eglengà te pegtoladà, meneng ebey ka pa pegtoladà, 10 so egtebangan ta. Wedad otaw megpeeleg kamno, so medita pa se otaw memenal kanak dini te Korinto.”

11 Penga niyan, mig-ogpà si Pablo doton te Korinto lamig te sebad se omay aw enem se bolan, aw migtoladà sikandin te kagi te Timanem diyà te otaw eg-ogpà kidoen.

12 Pegkeinang i Galio gobirnador doton te Gresya, migsebad se menge Judiyo kenà egpemenal, aw dinakep dan si Pablo, aw inibing dan doton ki Galio amon insaen. 13 Minikagi dan, “Kolang se intoladà din tepad te pegsimba diyà te Timanem, so eked tadon iyan kepakay toloen.”

14 Mikagi peden si Pablo, meneng minikagi si Galio diyà te menge Judiyo, “Simpana sikandin se metibaet aw metibonò, yan menenalan a kenyo. 15 Meneng aw olò kaw megpebelaw-belaway tepad te pegtoladà niyo, aw kemonaan niyo, aw punù egtoloen niyo, sikiyo se meg-osay kenyan, so eked a keibeg meg-osay aw iling kenyan.”

16 Penga niyan, impekesayo din dan. 17 Penga niyan, dinakep te menge otaw kenà Judiyo se sebad egpengibing te simbahan te Judiyo si Sostenes. Binadas dan sikandin doton te lowà te oseyanan. Meneng wedà pegsagman si Galio kenyan.

18 Nenamay si Pablo mig-ogpà doma te menge otaw egpemenal kidoen te Korinto. Pegkesayo din, timaking heman si Akilas aw esawa din si Priscila. Binolo si Pablo doton te Sengkriya, so yan se pengilala te tinoman din den se pakang din diyà te Timanem. Penga niyan, simakay se telo dan te dakel belangay pesalo doton te Sirya. 19 Pegdateng dan doton te Efeso, tinenanan i Pablo si Akilas aw si Priscila, so dimoton si Pablo te simbahan te Judiyo aw migtoladà kidoen. 20 Ibeg dan meg-ogpà si Pablo kidoen kandan te menamay, meneng wedà keibeg si Pablo kenyan. 21 Pegkesayo i Pablo kidoen, minikagi sikandin, “Aw meibeg se Timanem, lomikò a dini kenyo.”

Penga niyan, simakay si Pablo te dakel belangay lekat te Efeso. 22 Pegdateng din doton te Sesarya, dimeleg doton te Jerusalem amon gomemaw te menge otaw egpemenal kidoen. Penga niyan, dimoton te Antyokya. 23 Pegkenamay-namay din kidoen, nesayo todà. Timeped sikandin te menge ogpeanan doton te kebelad te Galasya aw Frigya amon entagen din se pedowan te menge otaw egpemenal.

24 Doen sebad Judiyo si Apolos lekat te Alejandriya dimateng doton te Efeso. Mèpiya se pegtoladà din aw biyasa sikandin te kagi te Timanem. 25 Netegahan din se ibeg te Pengolo. Pengkey ontò sikandin measeb eg-indan, aw metòlid se pegtoladà din tepad te Pengolo, meneng olò tepad te pegbonyag i Juan Memonyagay se netegahan din. 26 Wedà pegketalaw si Apolos te pegtoladà doton te simbahan te Judiyo. Pegdineg i Priscila aw si Akilas kandin, impetaking dan sikandin doton te balay dan amon megtoladà dan kandin te benal kagi te Timanem wedà din ketegahi. 27 Sagwa neibeg si Apolos domoton te Gresya, migtabang kandin se menge otaw nemenal doton te Efeso. Simolat dan doton te menge otaw dotonan din amon segmanen dan sikandin. Pegdateng din doton te Gresya, mèpiya se pegtabang din te menge otaw nemenal pineokit te tabang te Timanem kandin. 28 Pegtoladà din, linebad-lebad din se kagi te Timanem amon ketegahan te menge Judiyo te si Jesus se Misiyas insogò te Timanem. Yan dinaeg din se menge Judiyo migdindil kandin kidoen te keditaan te otaw.