17
Doton te Tesalonika
1 Minokit si Pablo aw si Silas doton te Ampipolis aw Apolonya. Dimoton dan te Tesalonika. Doen sebad simbahan te Judiyo kidoen. 2 Migsimba si Pablo so yan se ketanem din. Migtoladà sikandin te kagi te Timanem kidoen te simbahan te kelikit te Sebado taman te telo simana. 3 Miglebad-lebad heman sikandin te kagi te Timanem insolat amon ontò dan kelebetan te keilangan pemilangen aw imetayan se Misiyas isogò te Timanem, aw penga niyan meantay heman lekat te nematay. Minikagi sikandin, “Si Jesus se Misiyas insogò te Timanem, sìyan intoladà ko kenyo.”
4 Doen menge Judiyo nemenal aw migpesakop diyà ki Pablo aw si Silas. Nemenal heman se medita otaw kenà Judiyo egsalig diyà te Timanem aw medita heman bayi melangkaw. 5 Meneng miningà se menge Judiyo kenà egpemenal, aw pigtipon dan se menge doma medaet otaw wedad eg-inangen dan. Pegkedita dan, migsamok dan kidoen, aw dimoton dan te balay i Jason amon dekepen dan kidoen si Pablo aw si Silas aw ibingen dan doton te menge otaw netipon. 6 Meneng kinità dan olò si Jason aw menge doma otaw egpemenal, aw yan se inibing dan doton te menge konsiyal. Minikagi dan, “Dimini den se otaw migsamok te kedita te otaw te keneyonan. 7 Mig-ogpà den dan doton ki Jason. Limàpang dan te punù te selotan si Cesar, so doen son dan olò sebad se lomowan, aw yan si Jesus.”
8 Nayan, ontò neopal se menge konsiyal aw kedita te doma otaw te pegdineg dan kenyan. 9 Penga niyan, doen kwarta insawol i Jason aw menge doma otaw egpemenal, aw migpakang dan te eked pegsamok si Pablo aw si Silas. Penga niyan, nekelowà dan.
Doton te Berya
10 Pegkedelem niyan, impekesayo te menge otaw egpemenal si Pablo aw si Silas, aw dimoton dan te Berya. Pegdateng dan doton, dimoton dan te simbahan te Judiyo. 11 Kenà iling te tege Tesalonika se menge otaw doton te Berya, so ontò measeb se tege Berya egpenenalan te kagi te Timanem. Kelikit te aldaw, migbasa dan te kagi te Timanem insolat amon ketegahan dan aw benal se intoladà i Pablo. 12 Medita se Judiyo nemenal, aw doen heman menge Griego meama aw bayi melangkaw eleg nemenal. 13 Sagwa netaga-taga se menge Judiyo kenà egpemenal doton te Tesalonika te migtoladà si Pablo te kagi te Timanem doton te Berya, dimoton dan heman amon megsamok dan. 14 Yan impekesayo te menge otaw egpemenal si Pablo pesalo doton te dagat. Meneng si Silas aw si Timoteo mig-ogpà pa doton te Berya. 15 Doen doma otaw timaking ki Pablo taman te Atenas. Peg-olì dan doton te Berya, inindanan dan si Silas aw si Timoteo te intogon dan i Pablo te ayas dan domoton te Atenas.
Doton te Atenas
16 Dalem te pegtagad i Pablo doton te Atenas, ontò nepuluk se pedowan din, so ontò medita se inotaw egdogsoan te otaw eg-ogpà kidoen. 17 Migpebelaw-belaway si Pablo te menge Judiyo aw menge doma otaw egsalig diyà te Timanem doton te simbahan dan. Kelikit te aldaw, migpebelaw-belaway heman si Pablo te menge otaw netelaan din doton te pedyanan. 18 Doen menge menenoladà sakop te menge Epicuriano aw Estoiko migdindil ki Pablo. Migtompuyus se sebad, kagi din, “Wedad besi ontong te intoladà te metibelisì sìyan.”
Doen doma minikagi, “Egtoladà besi tepad te menge doma timanem egsimbahen doton te mediyò ogpeanan.” Minikagi dan kenyan so migtoladà si Pablo tepad ki Jesus aw keentayan.
19 Inibing dan si Pablo doton te tiponanan te obanen aw pinemoyò dan sikandin, kagi dan, “Indani kay aw eden se kaling toladà nikaw. 20 Doen intoladà no wedà day palos dinegi. Lebadi iyan diyà kenami.”
21 Yan se inikagi dan, so se ibeg te tege Atenas aw ibeg heman te menge doma otaw eggemaw kidoen, gayed dan eg-indan aw egpenenalan te kaling toladà, so yan se ketanem dan. 22 Penga niyan, timindeg si Pablo doton te monà te kedita te obanen netipon. Minikagi sikandin, “Penenalan kaw tege Atenas. Netegahan ko te ontò kaw measeb te pegsimba niyo, 23 so peglegeb ko dini te Atenas, kinità ko se medita dogsoanan niyo. Doen heman sebad sinolatan te kagi, ‘Dogsoanan te timanem wedà tadon ketegahi.’ Nayan, se Timanem egdogsoan niyo pengkey wedà niyo ketegahi, sikandin se itoladà ko den kenyo. 24 Eked sikandin peg-ogpà diyà te lowang te simbahan inangen te otaw, so sikandin se mig-inang te keneyonan aw kedita niyan, aw sikandin se Pengolo te kedita doton te langit aw dini heman te tanà. 25 Wedad palos puluk din itabang te otaw kandin, so sikandin se egpemegay te kedita diyà kenitadon, pengkey pedowan tadon aw omol. 26 Ininang te Timanem se sebad otaw si Adam, aw sikandin se kemonaan te kedita te otaw eg-ogpà dini te kebelad te keneyonan. Tapay piglalang te Timanem se kenamay aw temanan te ogpeanan dan. 27 Ininang te Pengolo se kedita niyan amon mengemahà se kedita tadon kandin aw kitaen tadon sikandin, so kenà mediyò se Timanem diyà te teg sebad-sebad kenitadon.
28 ‘Lekat te ibeg te Timanem timebaw kidon, aw timilles kidon, aw timayod kidon lamig songkani.’
Iling te insolat te sebad doma niyo biyasa, kagi din,
‘Tengke Timanem se kedita tadon.’
29 Aw benal sikitadon se tengke Timanem, eked kepakay aw meg-aneng-aneng kidon te Timanem se iling te inotaw ininang te bolawan aw selapì aw bato pinelasan te otaw biyasa. 30 Pengkey kedengan pinebeyaan te Timanem se eg-inangen te otaw so wedà dan pa ketaga-taga kandin, meneng songkani impunù din te megselsel se kedita te otaw, 31 so tapay den pinemallì te Timanem se aldaw te peg-okom te kedita te otaw. Doen den pinemallì din meg-okom, aw metòlid se peg-okom din. Metoman iyan, so inantay sikandin te Timanem lekat te nematay.”
32 Pegdineg dan te doen neantay lekat te nematay, doen menge otaw nebebayat aw migtompuyus. Meneng minikagi se menge doma, “Toledai kay todà te modi aldaw.”
33 Penga niyan, nesayo si Pablo. 34 Meneng doen menge doma otaw nemenal te Timanem aw timaking ki Pablo. Yan se sebad obanen kidoen si Dionisio, aw sebad bayi si Damaris, aw menge doma otaw eleg nemenal.