1 जे ख्वाराए ते, ‘परमेस्‍वरए ओदया झन कुधु घताक लिद गे मनी झन पाप गेदोया की’ है जेलिज़्‍याखेहो। 2 हिताव ते माःक। गे पापस सर्‍यो फ्या·द पापए जूँनी सिधुवर काराव फरी पापल जन्‍न्‍या? 3 जे ज़ जेसैंज़्‍या, गे येसु ख्रीसए उमिनत गेसछैंसिक ओलस तोबो ताद, सिप ज़ गेसिके। 4 है जैद किताव ख्रीसए सिउ ओक्‍याँलाई खादरल याझाःव, हिताव ज़ गे मनी ख्रीसए उमिनत गेसछैंसिक ङ़ादाङाव गेक्‍याँ खादरल बाके। खाली हो वाज़ माःक, किताव ओबाबु परमेस्‍वरए ओसक्तीनी सिउनी ओसोव, हिताव ज़ गे मनी सोद साःरो येमल गेबाज़्‍या।

5 सिन्‍यात ओलस तोबो गेताकिन, साःरोल पुलुस्‍न्‍यात मनी ओलस तोबो ज़ गेताज़्‍या। 6 आव ब सैंच्‍यो, नो ङ़ादाङाव पाप दोज़्याव गेक्‍याँ ख्रीसस क्रुसत सिप ज़ सिके, हाःकिन पाप धूँल गेमाले। 7 काराव ल्‍यो ताकिन सिउ मिँ पापए उधूँल मालिद फुर्सुल ताज़्या। 8 गे ख्रीसस सिप गेसिउए, ‘ओलस साःरो जुनील पुलुसोर ब गेताके’ लिद गेयुँ हुप्‍द ले। 9 ख्रीस सिउनी ओसैंसिउत फरी खर्क ज़ सिन्‍या माले। होए ओक्‍याँत सिन्‍याए ओहक फरी तान्‍या माले। 10 नो तखेप उसिउ गेपापए उजूँनी ज़, नो सिउनी पुलुसो उजिउ ते परमेस्‍वरए उजूँनी ज़ बाँचिज़्‍या। 11 हिताव ज़ जे मनी ‘गे पाप दान्‍यात सिद, येसु ख्रीसनी जींदो ताद, आव गेजिउ परमेस्‍वरए उजूँनी बाँचिज़्‍या’ लिन्‍या चेतैव ताके।

12 है जैद जे आव जेजिउत कुबाना बानी धूँल लिद जेमन लागिउ य़ेनदा ताबाच्‍यो। 13 पाप दान्‍यादा जेखँ जेकुइलाई फरी बाव ताएच्‍यो। बुरू, ‘गेलाई सिउनी बाँचैज़्‍याव नँ ज़’ लिद जेक्‍याँ भरी परमेस्‍वरलाई चरैःद, उयुँलाव मिताव य़ेन दान्‍यादा जेक्‍याँर थाँच्‍यो। 14 जे कानुन धूँल माताद परमेस्‍वरए ओअसिक धूँल जेतावए, जे जेक्‍याँत पापए ओहक माताव परिके।

15 जे ख्वाराए ते, ‘कानुन धूँल माताद असिक धूँल गेलिज़्यावए पाप गेदोदी ब ओताज़्‍याव ची ओल्‍यो’ है जेलिज़्‍याखेहो। हिताव ते माःक। 16 काता जे, जोए ओपाँ भैंःद ओसेवा जेदोज़्‍या, होए ओनोकोरर जेताज़्‍याव जेमासैंए रो? मादान्‍या य़ेन दाद होत ज़ जेलिकिन सिन्‍या सजाल परिन्‍या जेले। फरी परमेस्‍वरए ओपाँ जेभैंःकिन ते ओङ़ाक उयुँलाव मितावर थ॰रिन्‍या जेले। 17 जे ङ़ादा मादान्‍या य़ेनर दाद पापए ओबाँदार जेल्‍यो। अब ते परमेस्वरए ओपाँ किताव जेथैव, हिताव ज़ नो पाँत लिद जेयुँ स्‍यानी ज़ जेदोज़्‍या। आवए उजूँनी परमेस्‍वरलाई धन्‍याबाद लिज़्‍या। 18 जे पापए ओसेवानी पुलुस्‍द चाव य़ेन दान्‍यादा परमेस्वरए ओसेवा दान्‍यार ताद जेले।

19 आव ङापाँ कसा मातीधुर लिद जेतीधुन्‍या पाँनी ज़ ङापाँज़्‍या। किताव ङ़ादाकिन जेखँ जेकुइए युँ माजामो माचाव य़ेन दावका दाव लिद होए ओबाँदा जेजैसिज़्‍याव, हिताव ज़ अबकिन ते नो जेखँ जेकुइलाई परमेस्वरए ओय़ेन दाव परींद होए ओसेवा दान्‍या जेजैसिकिन उमिनताव छैंवर जेतारिज़्या। 20 जे ङ़ादा मादान्‍या य़ेन दाद पापए ओबाँदा जेजैसिक, परमेस्वरए ओय़ेन दान्‍या जात्त ज़ जेमाचेतैज़्‍याव। 21 है जैद आज्‍याल ते नो ङ़ादाङाव जेदोव य़ेनलाई जेचेतैक जेलाज ब हुज़्‍या। नो ङ़ादाङाव जेदोव भरिए जेलाई यादा माजैचिक्‍यो, झन सिन्‍याल वाज़ ओझाःचिज़्‍याव। 22 अब ते जे नो पापए ओसेवा दान्‍यानी पुलुस्‍द परमेस्वरए ओसेवा दान्‍यार ताद जेले। ननी ओफाइदा ऩेथो लिज़्‍या — परमेस्वरए उयुँलाव मिताव छैंवर जेतानाज़्‍या, स़ोनो अजम्‍बरी जुनी ब जेदैरिज़्‍या। 23 पापए ओजेला नर्ग लिज़्‍या, परमेस्वरए ओयासिज़्‍याव बरदान ते गेप्रभु येसु ख्रीसनी अजम्‍बरी जुनी लिज़्‍या।