1 है जैद गेयुँ गेसुहुबोनी परमेस्‍वरए ओङ़ाक गेगल्‍ती माल्‍यो धर्मी गेथ॰रिउए, गेप्रभु येसु ख्रीसनी परमेस्‍वरस गेखैज़्‍या। 2 गेयुँ गेसुहुबोनी ज़ नो गेप्रभुए गेल्‍योदा उयुँ गराँद ओबाबु परमेस्‍वरस साःरो सर्‍यो जैद ओयासिउए गे नत ज़ गेलिज़्या। ननी ज़ गे स्‍वर्गताव आसत गेयुँ हुप्‍द रेंव ज़ गेलिज़्‍या। 3 नाः वाज़ माःक, जो मिताव दुख उहुदी ब गेयुँ गेमासतेए, काराव ल्‍यो ताकिन नो दुखराए गेलाई माबले·सिउ, झन थ॰रिउ ज़ जैसिज़्‍याव। 4 थ॰रिउ युँए फरी, पाखो जैव दोज़्‍याव। पाखो ताव मिँए ओआस झन घ्योःनाज़्‍या। 5 गे आव आसत निरास तान्‍या गेमाले, काराव ल्‍यो ताकिन परमेस्‍वरए छैंव उपुरूस याद नो छैंव पुरूसनी गेयुँल ओमया थुद नैद्यासिउ।

6 गेनी काता ज़ माजैधुन्‍यार गेलिज़्याक, थिक ओगोइँव बेलाक ज़ ख्रीसए गे पापीराए जूँनी उजिउ झाःद्यासिक्‍यो। 7 मिँराए ताकिन ते चाव मिँए उजूँनी ब सुए ज़ उजिउ झाःद मायो, खाली बनै घ्योःव उयुँ उलिकिन वाज़ कैताराक बनै चाव मिँए उजूँनी उजिउ झाःद्याव ब धुव। 8 खाली परमेस्‍वरए ते गेल्‍योदा उयुँ उलिज़्याव आनी ज़ रैंःज़्‍या — गे पापीर गेलिज़्‍याक ज़ ख्रीसए गेजूँनी उजिउ झाःद्यासिक्‍यो। 9 है जैद नो उझीनी ज़ परमेस्‍वरए ओङ़ाक उयुँलाव मिताव ओजैसिउए, नोए ओल्‍योनी ज़ परमेस्‍वरए ओसजानी ब पुलुस्‍न्‍या गेले। 10 गे निताव ओलकिन तँदा लिज़्‍यावराए गेजूँनी उजिउ झाःद्याद ओबाबु परमेस्‍वरस ओसखैसिउए, गे परमेस्‍वरस खैवराए गेजूँनी ते दाद ओमायासिज़्‍याव काता ची लिज़्‍यादा? काता ज़ माले। ओल सिउनी सोद परमेस्‍वरस उलिज़्‍यावए गेलाई मनी बाँचैसिज़्याव। 11 हो वाज़ माःक, गेप्रभु येसु ख्रीसनी परमेस्‍वरस गेखैवए, परमेस्‍वरए ओङ़ाक गेयुँर होलाँ ताद रेंव ज़ गेलिज़्‍या।

12 आव मानुवात तोबो मिँए ल्‍योनी ज़ पाप पसिके। ननी ज़ सिन्‍या ब ताके। हाःकिन प़ाइँए पाप यादोवए प़ाइँ सिन्‍या ताकेर। 5:12 उत ३:६ 13 मोसाए ओकानुनकिन ङ़ादा ज़ आव मानुवात पाप पसिद उलिज़्‍याव। खाली नो कानुन ओमातावा पै नो यादोव पापए ओहिसाप ब ओमालिज़्याव। 14 हितावत ब आदमए ओपालाकिन मोसाए ओपालाक पै सिउ ज़ यालिज़्‍याव। नोराए आदमए ओदोव पाप मिताव यामादोदी ब सिउ ज़ परिके। है जैद किताव आदमए ओदोव हुनानी प़ाइँलाई ताके, हिताव ज़ छींनी हुज़्‍याव ख्रीसए उहुनानी मनी प़ाइँलाई ज़ ताके।

15 खाली आदमए ओदोव पाप परमेस्‍वरए ओदया स्‍यासो ते माले। आदमए ओदोव पापनी कुधुए सिन्‍या सजा दैकेर। येसु ख्रीसए ओदोव हुनानी परमेस्‍वरए ओदया ताद प़ाइँए बाँचिन्‍या असिक दैकेर। 16 हो मिताव ज़ परमेस्‍वरए ओल्‍योनी गेदैज़्‍याव असिक आदमए उहुनानी गेदैज़्‍याव स्‍यासो माःक। आदमए उहुनानी परमेस्‍वरए ओसजाल प़ाइँ ज़ परिकेर। ख्रीसए उहुनानी ते नोराए कुधु पाप यादोव तादी ब परमेस्‍वरए उयुँ नाद उयुँलाव मितावर थ॰रिज़्यार। 17 तोबोए ओदोव पापए हुनानी प़ाइँ सिन्‍याल परिकेर। परमेस्‍वरए ओदयानिकाव असिक दैद ओङ़ाक धर्मी थ॰रिउराए ते होकिन झन येसु ख्रीसए उहुनानी अजम्‍बरी जुनी दैज़्‍यार।

18 है जैद तोबो पापनी प़ाइँ ज़ परमेस्‍वरए ओसजा दैन्‍या ताकेर। हो मिताव ज़ तोबो धर्मलाव य़ेननी प़ाइँए ज़ फुर्सुल ताद साःरो जुनी दैन्‍या ताकेर। 19 काराव ल्‍यो ताकिन किताव परमेस्‍वरए ओपाँ तोबोए ओमाभैंःवनी कुधु ज़ याखत ल्‍योर थ॰रिकेर, हिताव ज़ परमेस्‍वरए ओपाँ तोबोए ओभैंःवनी कुधु ज़ याखत माल्‍यो छैंवर थ॰रिकेर।

20 मिँ भरी प़ाइँ पापीर ज़ लिज़्यार लिन्‍या सतैंद्यान्‍याए जूँनी परमेस्‍वरए कानुन जैक्‍यो। हितावत ब नो पाप खा कुधु ओताव, नोकिन झन परमेस्‍वरए ओदया कुधु ज़ ताके। 21 किताव ङ़ादा प़ाइँ मिँर पाप धूँल ताद सिन्‍या सजाल परिकेर, हिताव ज़ परमेस्‍वरए ओदयानी नो भरी त़ोसिद, गेप्रभु येसु ख्रीसनी परमेस्‍वरस सखैसिद, अजम्‍बरी जुनी दैन्‍यार गेताज़्‍या।