1 Lagamput pun losan cha hachi, intullongku bo opat un angheles un sumisiked si opat un sulin chi lubung. Ked sosonchoncha bidbid ta achipun mabidbichen ulay siluʼn lugeɏ utla pita, byeybyey ya ulay siluʼn kalasi un kayu. 2 Chicha angheles un piliyeɏn Apudyus un langidchen si pallakabyelin un manyam-an si pita ya byeybyey. Ot intullongku osaʼn anghel un lampeɏpu si sumileɏan ilit, un ilooglela meɏkan chi matattaguʼn Apudyus. Ked lampokaw kan cha hachiʼn opat un angheles, 3 kalala, “Achiyu yam-alon chi pita, byeybyey ya kakkayu inggala mameɏkaan chi kichey cha losan un mansimbi kan Apudyus.” 4 Ot chingngeɏk bo bilang cha hachiʼn lameɏkaan chi kicheycha, ked umoychaʼn 144,000 ked leɏpucha losan si galak cha hachiʼn simpuɏu ya chuwaʼn alak Israel.

5-8 Umoy un simpuɏu ya chuwaʼn libu cha lameɏkaan si kacha osaʼn kapuun cha hachiʼn simpuɏu ya chuwan galak Israel. Ked simpuɏu ya chuwaʼn libu lameɏkaan si galak Judah, ya ulay bo galak Reuben, galak Gad, Asher, Naphtali, Manasseh, Simeon, Levi, Issachar, Zebulun, Joseph ya Benjamin.

9 Oli ked kasilak lallangɏanga ot intullongku cha achu-achuʼn tagu un lappun makabilang si kilaachucha! Mansabsabyali leɏpuwancha, wechewed cha lampeɏpu si losan un kilapuun cha tagu si lubung ya kaili-ili un awed cha losan un kalasin cha ugud. Ked losancha summisiked si sangwalan chi hachiʼn umaammuy un Ari ya hachiʼn Keɏlilu, ked lasilupancha losan si mamputilak ya mampàochoncha si tubun chi iyug un mangipain-ancha si galascha. 10 Ked chilakeɏcha gingacha un kalancha, “Machaychayaw si Apudyus takuʼn umaammuy un Ari taku, ya hachiʼn Keɏlilu, ti lappun uchum si Malagu kan chitaku lu achi abus chicha.”

11 Ot cha losan un angheles un lasikesiked ya langalligu si umaammuy un Ari ya cha hachiʼn mangipangpangu ya cha hachiʼn opat un parsua, ked losan cha lampalintuming un malayaw kan Apudyus, 12 un kalancha, “Allaya katuttuwaan! Sikaʼn Apudyus, kalobbongam un machaychayaw ti sika kangatuwan ya kalaingan, ya alla bo pallakabyelinlu ti lappun achi makwa kan sika. Ked manyaman kami kan sika ya chaychayawonmi sika si ing-inggala! Amen.”

13 Oli ked lan-imus kan sakon chi osa kan cha hachiʼn mangipangpangu un kalala, “Ammum lu silu cha hachiʼn lasilupan si mamputilak, ya himma lampeɏpuwancha?”

14 Ot summongbyatak, “Lappun ammuk Apu, ngim sika sin-ammu.”

Ot kalala bo kan sakon, “Chicha cha taguʼn lamati un lapampaligatan ud pita, un silaksakancha luputcha si chaɏan chi hachiʼn Keɏlilu, ked siya pummutilakala un kaiyaligela lauɏasan cha byasuɏcha. 15 Ked ha awechencha si sangwalan Apudyus un umaammuy un Ari, ta mansimbicha kan siya si templola si ileɏgew ya lilabi. Ked si Apudyus un umaammuy un Ari, pasig iinggew un mangalikun kan chicha. 16 Ked achipuncha mabitin si ing-inggala, ya achipuncha bo mauwaw, ya achipuncha kasin mailitan ya malingtan. 17 Ti hachiʼn Keɏlilu un langgagawa si hachiʼn umaammuyan chi Ari, ked siya isun chi mangayyuwan kan chicha, ked siya mangipuyut kan chicha si igew chi mailum un chegsi un mangatod si mallalayun un biyeg.* 7:17 Psalm 23:1-2 Ya pulasan bo Apudyus cha losan un luwacha ta lappun kasincha chumauyan.”