1 Oli ked intullongku Keɏlilu un langubyed si hachiʼn pituʼn bobod chi lalulukut un papin. Si langubyachela si ummun-ulaʼn bobod, chingngeɏk chi imbyegan chi osa kan cha hachiʼn opat un parsua un isun chi gingan chi kuchuɏ, un kalala, “Wilu!” 2 Ot intullongku mamputilak un kabyayuʼn lummoswa. Ked awed chi langakabbyayu un lalangchon si peɏsuk un umoyla igubyat. Ya laidchen bo si korona, ot lallubbyat un umoy makagubyat kan cha losan un kabusuɏla ked siya mangɏog.

3 Ot ilubyachen pun bo chi hachiʼn keɏlilu mikadwaʼn bobod, chingngeɏk bo gingan chi mikadwaʼn parsua un kalala bo, “Wilu!” 4 Ot lummoswa bo mancheɏaeg un kabyayu. Ked ha langakabbyayu, laidchen si chakeɏʼn sabli ya pallakabyelin un manyam-an si timpuyug cha tagu utla pita ta mampipillatoy cha tagu.

5 Ot ilubyachen pun bo chi hachiʼn Keɏlilu mikatluʼn bobod, chingngeɏk bo gingan chi mikatluʼn parsua un kalala, “Wilu!” Ot intullongku bo lummoswaʼn mangngitit un kabyayu, ked ha langakabbyayu, ilooglela kikilluwan. 6 Ot chingngeɏk bo ginga un isun chi leɏpu si illinggewan cha opat un parsua, un kalala, “Mainggi allaʼn pita, ked ha ngilan chi singkiluʼn bilayu, paseɏn chi labbu si masin-eɏgew, ya siya bo isun chi ngilan chi tiɏuʼn kiluʼn gakaw. Ngim achipun ngumatu ngilan chi byeyas ya apɏus.”

7 Ilubyachela pun bo mikapat un bobod, chingngek bo gingan chi mikapat un parsua un kalala bo “Wilu!” 8 Ot intullongku boʼn lummoswa osaʼn kabyayu un ha chutchutla, kumukupas chi putilakla, ked ha ngachen chi langakabbyayu, Otoy. Ot litun-ud chi hachiʼn langachalan si Hades un inggewan cha latoy. Ot laidchencha si kalobbongan un mamatoy kan cha tagu si ingkapatla utla pita un ha makwaancha, mapatoy si gubyat cha uchum, ya matoy cha uchum si uɏat, ya matoy bo cha uchum si sakit, ya otoyon bo cha atap un ayam cha uchum.

9 Ilubyachen pun bod chi hachiʼn Keɏlilu mikalimaʼn bobod, intullongku bo si pon-ed chi altar un sosoggencha si michatun kan Apudyus cha kalichodwan cha taguʼn lapatoy gapu si langitudtuchuwancha si ugud Apudyus ya lalistiguwancha si katuttuwaala. 10 Ot impokawcha, “Apudyus un Mallakabyelin, lappun miyisuwan chi kilabiɏum ya kilatuttuwan cha imbyegam, awed imusonmi kan sika. Kam-amman chi manguisam kan cha taguʼn achipun mamati utla pita, ya malusaam kan chicha gapu si lamatoyancha kan chikami?” 11 Oli ked laidchencha losan si mamputilak un luput, ot imbyegan Apudyus un umillongcha yan inggala man-oochas losan cha lapatoy un biɏun taku boʼn mansimbi kan Apudyus, un isun bod chi lapatoyancha.

12 Ilubyachen pun bod chi Keɏlilu mikalom un bobod. Chummita si amod, ya ngummitit chi ilit un isun chi kangititan un luput. Ya chummeɏaeg bo buɏan un isun chi kilacheɏaeg chi chaɏa. 13 Ked cha losan un bituwon, lan-od-odchegcha si pita un isun chi matok-agen cha bungan chi kayu lu bumali. 14 Ked ha langit, laumas un isun chi malukutan chi papin. Ya losan cha bibbilig ya pitaʼn langgawa si byeybyey, liyatuncha losan.

15 Oli ked ummawid cha losan un tagu, pati cha losan un Ari ya losan un ap-apu si lubung ya ulay bo cha losan un pangat cha suɏchachu ya losan un byabyaklang, ya ulay cha mansosokeɏ ya cha awed saedcha ya cha lappun saedcha. Losancha ummawid un ummoycha mantaɏu si bibbilig, lilliyang ya chopchopɏas. 16 Ked pilokawancha bibbilig ya chopchopɏas un illinggewancha,* 6:16 Hosea 10:8; Luke 23:29-30 un kalancha, “Makchey kayuʼn bibbilig ya chopchopɏas ta matap-ulan kami ta achi chikami itullong si hachiʼn umaammuy un Ari ud langit, ya ta achipunmi magikla malusaan chi hachiʼn Keɏlilu kan chikami! 17 Ti allaʼn gummatong chi amod un sumangaancha. Ked sala malusaancha kan cha tagu utla pita, ked lappun ossaan si makalasat.”