7
Tudtuchun Cha Iyaawi
(Mat. 15:1-9)
1 Si osaʼn eɏgew, lachagup cha Pariseo ya cha uchum un mimistulun chi lintog un lampeɏpuʼd Jerusalem, ummoycha kan Jesus. 2 Ot intullongcha cha uchum un disipulus Jesus un manga-mangan un kiisaw chi imacha. Achipuncha tiluttuwa cha ugalichaʼn Judio un mambiɏucha yan, asicha ot mangan. 3 Ti cha Pariseo ya cha losan un Judio, tuttuwaoncha ugalin cha iyaawi un achipuncha mangan lu achipuncha mambiɏu. 4 Ya achipuncha bo kalon cha uchum un makan un mangin-an si mekit lu achipuncha ulaon byebyaɏan. Ked achu bo uchum un ugalin cha iyaawi un tuttuwaoncha, isun chi in-ilonchaʼn man-uɏas si byanga ya kanchilu ya mangkiwas si tasa ya chuyug.
5 Ot ilimus cha Pariseo ya cha mimistulun chi lintog kan Jesus “Puggey cha disipuluslu un achipuncha tuttuwaon chi ugali un tilawid taku kan cha leɏpuwan taku, ngim manganchaʼn kiisaw chi imacha?”
6 Summongbyat si Jesus un kalala, “Tuttuwa imbyegan Apudyus kan propeta Isaiah mipanggop kan chikayuʼn taguʼn aginpapati. Kalan chi inggilin Isaiah,
‘Cha taguʼn alla, chaychayawoncha sakon si tupokcha,
ngim adchayuwan chi somsomokcha kan sakon.
7 Lappun simbin chi malaychayawancha kan sakon, ti siyad itudtuchucha ugali un killingwan cha tagu, ked kalanchaʼn bilinku.’* 7:7 v. 6-7, Isaiah 29:13
8 Lan-awichenyu bilin Apudyus ked siya popotpotanyu ugalin cha tagu.”
9 Ot intuɏuy Jesus un langibyega, “Lalaing kayu un langiwalin si bilin Apudyus taplu siya bo tuttuwaonyu ugaliyu. 10 Ti kalan chi bilin Moses, ‘Potgom cha amam kan ilam,’ ked ‘Lu silu mangeɏaweg si amala ya ilala, masapuɏʼn mapatoy.’† 7:10 Exodus 20:12, Deuteronomy 5:16
11 “Ngim ha itudtuchuyu ked sabyali. Ti kalanyu lu awed mituɏung chi tagu kan cha amala kan ilala ibyegala kan chicha, ‘allaya chi ituɏungku ngim Korban (piolaʼn uguchon, uwan Apudyus), ked achipun masapuɏʼn idchela chicha.’ 12 Ked lu hachi ibyegala, ipalityu si ing-inggala un tumuɏung kan cha amala kan ilala. 13 Ked gapu si cha ug-ugali un itudtuchuyu si achuʼn tagu, lambyalin un liwalin chi ugud Apudyus. Ya achu cha kokòonyu un kamatchi,” kalan Jesus kan chicha.
Ha Kopya Un Mampeɏwing Si Tagu
14 Ilayagen Jesus cha amod un tagu kasin ot kalala kan chicha, “Chongɏonyu losan chi alla ta maawatanyu. 15 Chakampun un mikam-ot chi tagu mampeɏwing kan siya, ngim ha mibyeɏan chi tupokla. 16 Chongɏonyu lu liingaan kayu.”
17 Lapalos pun, tilelan Jesus cha tagu ot lilumlok si byeɏoy, lakaimus cha disipulusla lu silu pion chi pangngaliglaʼn ibyega. 18 Kalan Jesus kan chicha, “Ha lappun malunglungyu? Ha achipunyu bo maawatan un ha lumlok si tupok chi tagu ked achipunla chimkon chi tagu? 19 Ti achipun umoy si somsomokla ngim mangoy si buwangla ked lummoswa.” (Ha piolaʼn uguchon ked mampeɏkas cha losan un makan).
20 Intuɏuyla kalan un, “Ha mibyeɏan chi tagu ked siya mampeɏwing kan siya. 21 Ti somsomok chi tagu meɏpuwan cha lawwing un kopya, un isun chi kilagatkat, chegchegas, akaw, pumatoy, 22 agum, kilalawwing, silisikap, apos, mangkiyakiyap, lilalastug ya uchum un liluluku. 23 Losan cha alla ked lampeɏpu si somsomok chi tagu ked siya mampeɏwing si tagu kan Apudyus.”
Ha Pammatin Chi Osaʼn Byebyai
(Mat. 15:21-28)
24 Tilelan Jesus chi hachiʼn ili ot ummoy si iliʼn sakupon chi Tyre. Lilumlok si osaʼn byeɏoy ked achipunla pion un maammuwan un awed siya, ngim achipunla misulib chi kaawedla. 25 Inggew chi osaʼn byebyai un ha alakla ked latimu. Chingngeɏla pun un awed si Jesus udchi, kakma ummoy si awechela. Lampalintuming si sangwalanla, 26 ot langkadkachegu ta peɏyawola aɏan un inggew si alakla. Ha allaʼn byebyai ked liyalak ud Phoenicia un sakupon chi Syria ya Grego ugudla. 27 Inyalig Jesus un langibyega kan siya, “Masapuɏʼn un-ulaon pakalan cha alak, ti chakampun un ustu lu ipakan chi kalon chi alak si asu.”
28 Ot summongbyat chi byebyai, “O, Apu, ngim ulay bo cha asu si guweb chi lamisaan ked kaloncha bugta un machachak cha alak.”
29 Ot kalan Jesus kan siya, “Bibiɏu songbyatlu! Makwaʼn ingkan, tilelan chi aɏan chi alaklu.” 30 Ummoyon uwacha ot inchesala alaklaʼn uumbog, lummawa aɏan kan siya.
Ha Lamalin-awaan Jesus Si Leɏakiʼn Latuɏong Ya Laumeɏ
31 Tilelan Jesus chi iliʼd Tyre ot langoy ud Sidon un ummoy si byeybyey ud Galilee ya sakupon Decapolis. 32 Illiyoy cha tagu kan Jesus chi osaʼn leɏakiʼn latuɏong ya laumeɏ. Langkadkachegucha kan siya ta appachela otyan ta lumin-awa.
33 Inyachayun Jesus siya kan cha amod un tagu, ot illiggala cha gammatla si ingan chi leɏaki. Ot tummuppa ot appachela chilan chi leɏaki. 34 Lantanged ud langit ot summaw-ot, ot kalala kan siya, “Ephphatha!” (Piolaʼn uguchon, “Miwalitka”). 35 Ot kakma lakaan chi tuɏongla ya umeɏla ot lamot-agen chi manggigingala.
36 Bililin Jesus chicha ta achipuncha ibyegbyega. Ngim ulay lu bililinla chicha, ilam-amodcha imbyegbyega. 37 Patungedcha laschaaw, un kalancha, “Losan un killingwala ked bibiɏu. Ti pilalin-awala tuɏongla ya umeɏla.”