1 Ummoyon si Jesus si hachiʼn ili ot langulin si ilila, kiladwaan cha disipulusla. 2 Sabyechu pun, ummoy lantudtuchu si Jesus si sinagoga, ked achu cha laschaaw si chingngeɏcha siya ot kalancha, “Simma langachaɏan chi taguʼn alla kan cha laoy? Simma langealad chi kilalaingla? Ya simmaga in-ilolaʼn mangwa si lakaskaschaaw? 3 Chakampun kamman un siya hachiʼn kalupinteɏ? Chakampun kamman un siya alak Mary ya sulud cha James, Joseph, Judas ya Simon? Chakampun kamman un alla cha byebyaiʼn suludla kan chitaku?” Ot achipuncha impotog siya.

4 Kalan Jesus kan chicha, “Mapotgen chi propeta si uchum un ili, ngim achipun mapotgen si mismuʼn ilila ya mismuʼn kabyeɏoyla.” 5 Achipun langwa si lakaskaschaaw si Jesus udchi, malaksig kan cha akit un lasakit un langipatayala si imala ot lummin-awacha. 6 Ot laschaaw siya ti achipun cha tagu lamati kan siya.

Ot lilikwos Jesus cha ili-ili un lantudtuchu. 7 Oli pun ilayagela cha lasawaɏan si chuwaʼn disipulusla ot illidchela chicha si kalobbongan un mameɏyaw kan cha aɏan ot silinchodwala imbuun chicha. 8 Bililinla chichaʼn kalala, “Achi kayu mangiyawit ulay silu lu mambyaat kayu, ha sekud abus. Achi kayu mambyaɏun, achi kayu mampasiking, ya achi kayu mangiyawit si pilak. 9 Mansancheɏ kayu ngim achi kayu mangawit si mansukatyu. 10 Lu awed mammangili kan chikayu, iinggew kayu si byeɏoyla, inggala telanyu hachiʼn ili. 11 Lu gumatong kayu si iliʼn achipun chikayu mangiliyon ya achipuncha chumngeɏ kan chikayu, telanyu ked pukpukanyu tapuk si ikiyu ta mangagammuwancha un kigedcha gey si machusaancha.”

12 Ot ummoycha imbyegbyega kan cha tagu un masapuɏʼn mambyabyawicha kan cha byasuɏcha. 13 Pileɏyawcha cha achuʼn aɏan ya ilapɏusancha cha achuʼn lasakit ot lummin-awacha.

14 Chingngeɏn Ari Herod chi pin-an cha Jesus kingwa ti pin-an cha tagu ibyegbyega ngachen Jesus. Kalancha uchum, “Siya si John un Mambubunyeg un ummuli latagu. Hachi gapulaʼn awed chi pallakabyelinla un mangwa si lakaskaschaaw.”* 6:14 Ha allaʼn Herod ked Herod Antipas un alak Ari Herod un ari si kabyen-og Jesus. Ha ustuʼn title ked tetrarco ngim cha somsomok cha iRome, ha kasasaedla ked isun chi ari. 15 Kalan bod cha uchum, “Siya si Elijah.” Ked kalan bo cha uchum un, “Siya osaʼn propeta, un isun cha propeta si sin-eɏgew.”

16 Ngim chingngeɏn pun Herod cha alla, kalala, “Si John un impasiwatku, ked ummuli latagu!” 17 Ti Herod mismu lampachokma kan John ot impabyaɏudla. Killingwala cha alla gapu kan Herodias un asawan chi suludlaʼn Philip, ti ilasawala bo. 18 Ti pin-an John imbyegbyega kan Herod un, “Lappun kalobbongam un mangasawa si asawan chi suludlu.” 19 Ot amod chi lanlalawwing Herodias kan John, ked piolaʼn ipaotoy siya. Ngim lappun makwala, 20 ti ummogyat si Herod kan John ti ammula un lalintog ya laapudyusan un tagu ked sileɏaklibyela siya. Lu chongɏon Herod siya, abulichu somsomokla, ngim pipiolaʼn chochongɏon si John.

21 Oli pun chilumtong chi wayan Herodias. Gummatong pu eɏgew un liyalakan Herod, ilayagela cha langangatun opisyeɏ, cha papangat cha susuɏchachu ya cha papangat ud Galilee. 22 Ot lilumlok chi alak Herodias un byebyeɏasang ot lansala, ot laslas-om cha Herod ya cha mangilila.

Ot kalan Herod si byebyeɏasang, “Kochewom lu silu piom, ked idchok kan sika.” 23 Ot insapatala bo kan siya, “Ulay lu silu kochewom kan sakon ked idchok, ulay kagodwan cha ili un iturayak.”

24 Lummawa byebyeɏasang ot ummoyla ilimus kan ilala, “Simma kochewok?”

Ot kalan ilala, “Ha uɏun John un Mambubunyeg.”

25 Ot chilechesan chi byebyeɏasang un langulin kan Ari ot kalala. “Piok un idchom kan sakon si sala mapepeɏatun uɏun John un Mambubunyeg.”

26 Laasusu si Ari Herod ngim gapu ta insapatala si sangwalan cha mangilila, mabiin un achipun malungpeɏ si insapatala. 27 Ot kakmala imbuun chi osaʼn suɏchachula ta igetongla uɏun John. Ummoy chi suɏchachu ot siliwatla uɏun John si byabyayɏuchen. 28 Ot inggetongla lapepeɏatuʼn uɏun John, ot illidchola si hachiʼn byebyeɏasang ot illidchon chi byebyeɏasang kan ilala. 29 Chingngeɏn pun cha disipulus John chi lakwa, ummoycha illaɏa lechegla ot illimboncha.

30 Langulin cha apostoles kan Jesus. Imbyegacha kan siya losan un killingwacha ya intudtuchucha. 31 Gapu ta amod cha taguʼn gumatogatong ya umoyo-oyon, lappun timpuchaʼn mangan. Ot kalan Jesus kan chicha, “Intaku tumalin si lugeɏʼn makwaʼn umillong takù akit.” 32 Ot lallugencha si byangka un ummoy tummalin si lugeɏ un lappun tagu.

33 Ngim achu cha taguʼn langitullong si ummoyolancha ot immatulancha chicha. Ot cha lampeɏpu si losan un ili, sintotodchakchaʼn langoy si teɏanteg ot ummulacha gummatong si lugeɏ un ayan cha Jesus. 34 Lummogsed pun si Jesus si byangka, intullongla cha amo-amod un tagu, ot kilacheguwala chicha, ti isucha keɏlilu un lappun mangayyuwan kan chicha. Ot illugin Jesus un laludtuchu kan chicha si achuʼn byaleg.

35 Alla pun un lummaschom, kummatam cha disipulus Jesus kan siya ot kalancha, “Allaʼn lummaschom, ked alla taku si lugeɏʼn lappun byebbyeɏoy. 36 Paoyolom cha tagu ta umoycha kan cha adchaliyan un ili mangngila si kaloncha.”

37 Ngim summongbyat si Jesus, “Chikayu mamakan kan chicha.”

Kalancha kan siya, “Piom un uguchon chikami umoy ngumila si tilapay un paseɏn chi chuwanggasut un denari ked ipakanmi kan chicha?”† 6:37 Si Greek chuwaʼn gasut un denario. Osaʼn denario ked byetug chi mangeɏgew un tangchen.

38 Ilimus Jesus kan chicha, “Piga awed un tilapay? Ingkayu u itullong.”

Langchas cha pun, kalancha, “Awed chi limaʼn tilapay ya chuwaʼn ikan.”

39 Bililin Jesus cha disipulusla un paamuyoncha cha tagu un maup-uppun si komkompay. 40 Ot ummamuy cha taguʼn laup-uppun si singgagasut ya sillilimampuɏu. 41 Ot illaɏan Jesus chi hachiʼn limaʼn tilapay ya chuwaʼn ikan, ot lantanged ud langit, lanyaman kan Apudyus. Pilispis-igla tilapay ya ikan ot illidchola kan cha disipulusla ta iwaɏascha kan cha tagu. 42 Langancha losan ot lassugcha. 43 Ot chilagup cha disipulusla cha lasaweɏ ot laplaplu lasawaɏan si chuwaʼn langaya. 44 Lasuɏuk si limallibu cha langan un lelleɏaki, achipun libilang cha byebbyebyai ya cha aalak.

45 Lagamput pun chi lamakalan Jesus kan cha tagu, kakman Jesus lallugalon cha disipulusla si byangka ta umun-ulacha chumemang si byeybyey un umoy ud Bethsaida. Ot pilaoyonla cha tagu. 46 Pilaoyonla ked chicha, lalagecha siya si osaʼn bilig ta umoy malluwalu.

47 Alla pun un lumabi, inggew chi byangka si gawan chi byeybyey, ked os-ossaan si Jesus si bilig. 48 Intapla cha disipuluslaʼn mampampaligat un mangipaoyon si byangka ti liyabot chi amod un bidbid. Alla pun un wiswisngit, ummoy si Jesus kan chichaʼn lalidtidchaɏan si lap-at chi chelum. Lausala otyan chicha, 49-50 ngim intullongcha pun siya un malidtidchaɏan si lap-at chi chelum, sintutukingcha si ogyatcha ti kalancha pun lu kamɏog.

Ot kakman Jesus gilingaan chicha, un kalala, “Achi kayu umogyat! Sakon laoy. Achi kayu manchaleg!” 51 Ot lakalugen kan chicha si byangka, ot gummilok chi bidbid. Ot patunged laslaschaaw cha disipulusla, 52 ti ulay intullongcha lampaachuwan Jesus si tilapay, achipuncha laawatan chi piolaʼn ibyega mipanggop si kilabyelinla, ti latangkin chi somsomokcha.

53 Chummemangcha pun si byeybyey, gummatongcha si sakup chi Gennesaret, ot impungodcha byangkacha. 54 Lummawacha pun si byangka, kakman cha tagu immatulan si Jesus. 55 Ot sintotodchakchaʼn ummoy si losan un iliʼn adchaliyan. Ot chingngeɏcha pun, biluligencha cha lasakit ta iyoycha si inggewala. 56 Ulay lu chiluʼn lugeɏʼn ayala, iyoycha cha lasakit si maup-uppulan cha tagu, ot langkadkachegucha kan siya ta samela gey appachen cha lasakit chi sanggayachen chi anchuʼn silupla. Ot cha losan un langapped lummin-awacha.