1 Oli pun ilugud Jesus chi pangngalig alla kan chicha, “Tuttuwa allaʼn ibyegak kan chikayu. Ha taguʼn achipun lumlok si sawang chi pukochen cha keɏlilu, ngim sumakay si sabyaliʼn chaɏan, ked man-aakaw ya tulisan. 2 Ngim ha taguʼn mangoy si ustuʼn sawang, siya man-aayyuwan kan cha keɏlilu. 3 Ked ha man-aachug si sawang iwalitla para kan siya. Ked chongɏon cha keɏlilu gingala lu ayagela chi ngachencha, ked ipalawala chicha. 4 Ked lu illawala chicha, siya mamangpangu ked tun-uchon cha keɏlilu siya ti milasincha gingala. 5 Achipuncha tun-uchon lu sabyali ngim umawidcha, ti achipuncha milasin chi gingala.” 6 Ngim achipun cha tagu laawatan chi piolaʼn ibyega chi allaʼn pangngalig.

7 Oli pun kasin lan-ugud si Jesus, “Tuttuwa allaʼn ibyegak kan chikayu. Sakon chi sawang un lumlokan cha keɏlilu. 8 Losan un ummun-ula lu sakon ked man-aakaw ya tulisan, ngim achipun cha keɏlilu chingngeɏ chicha. 9 Sakon chi sawang. Lu silu lumlok mangoy kan sakon, matatagu ya makwaʼn lumlok ya lumawa umoy mangan.

10 “Umali man-aakaw ta man-akaw, pumatoy ya manyam-an. Ngim sakon, ummaliyak ta idchek cha tagu si biyeg, biyeg un lappun mangkuɏangala.”

11 Sakon chi bibiɏuʼn man-aayyuwan. Ha bibiɏuʼn man-aayyuwan ichuyala biyegla mipagapu kan cha keɏlilula. 12 Ha matangchelan un man-aachug, telala ya umawid lu itullongla cha atap un ayam un umali, ti chakampun un ustun man-aayyuwan ya singkuwa kan cha keɏlilu. Ked ha atap un ayam, kalola uchum un keɏlilu ya pilabuɏakala chicha. 13 Umawid chi matangchelan ti siyad gamgamala tangchenla kan achipunla kekengaan cha keɏlilu. 14 Sakon chi bibiɏu un man-aayyuwan. Ammuk cha keɏliluk ya am-ammucha bo sakon. 15 Ked isula boʼn tagammuwak si Ama, ya tagammuk bo si Ama ked ichuyak chi biyegku para kan cha keɏlilu. 16 Awed cha uchum un keɏliluk un achipun lilamung si pukochen alla.* 10:16 Ha keɏlilu un ibyegbyegan Jesus si alla, ked cha achun tagu un chakampun un Judio, cha Gentil. Masapuɏʼn ayagek bo chicha ta chongɏoncha gingak, ked mambyalincha man-ossaan un ayyuwalan chi ossaan un man-aayyuwan.

17 “Ay-ayatolak si Ama ti sisasagalaak un mangichuya si biyegku, ti mataguwak kasin. 18 Lappun makaaɏa chi biyegku. Ichuyak si piok. Kalobbongak un mangichuya si biyegku ya kalobbongak boʼn aɏan kasin. Ti siya imbilin Amak un kook.”

19 Gapu si imbyegan Jesus kan chicha, langkangkalasi somsomok cha Judio ot lagodwacha. 20 Achu kan chicha langibyegbyegan, “Allat chi aɏanla! Latingang siya! Payuggey chochongɏon siya lù?”

21 Ngim kalan cha uchum, “Chakampun si katla ugud chi laaɏan! Ha chadchawat gey ya kaalon aɏan chi kuɏap chi tagu?”

22 Ummagilid pun, inggew chi Piyastan chi Mangikagasmokan si Langichatulan si Templo ud Jerusalem. 23 Ot malidtidchaɏan si Jesus si sawang chi templo, un ngadloncha Kallangan Solomon.† 10:23 Ha kallangan Solomon ked ugud un mauseɏ si umichungan, eɏwa ya mantaklang un lugeɏ un umichungan cha tagu. Ha tukudla ked 12 meters. 24 Ot ilalibungbungan cha Judio siya ot ilimuscha, “Kam-amma mangibyeg-am si katuttuwaan? Ibyegam chi tuttuwa! Ha sika si Kristu?”

25 Summongbyat si Jesus, “Imbyegak kabbo kan chikayu, ngim achipunyu sakon pilatpati. Ha kawachin lampeɏpu si kalobbongan Amak chi mampaloklok si mipanggop kan sakon. 26 Ngim achi kayu pun mamati, ti chakampun si keɏliluk chikayu. 27 Ti chongɏon cha keɏliluk chi gingak ya ammuk bo chicha ya tun-uchoncha sakon. 28 Ked idchek chicha si biyeg un mallalayun ked achipun cha pulus misila kan Apudyus. Ked lappun makapɏos kan chicha kan sakon. 29 Si Amak un langatod kan chicha kan sakon ked siya kangatuwan si losan‡ 10:29 Ha ibyegala si uchum un manuscript si Greek: Cha impiyeɏn Amak kan sakon ked kangatuwancha losan. ya lappun makapɏos kan chicha kan Ama, ti ayyuwalala chicha. 30 Sakon ya si Ama, os-ossaan kami.”

31 Langagamkam cha Judio kasin si byetu ta bintukoncha siya. 32 Ot kalan Jesus, “Achu killingwak un mangkabyaɏu un impakwan Ama kan sakon si sangwalanyu. Ked silu kan cha alla gapun chi mamintukanyu kan sakon?”

33 Ot summongbyatcha un kalancha, “Chakampun si cha bibiɏuʼn killingwam chi mamintukanmi kan sika, ngim gapu si ilugudluʼn sumupling kan Apudyus. Ti tagu ka abus, ked lambyalilom Apudyus chi long-eglu!”

34 Ot kalan Jesus, “Liigili si lintogyuʼn Judio un kalan Apudyus, ‘Chikayu, apudyus kayu bo.’§ 10:34 Psalm 82:6 35 Ammu taku un katuttuwaan chi losan un liigili si ugud Apudyus. Ked cha aappu taku un langidchela si ugudla, ked ilawagela chicha un apudyus. 36 Sakon, chilutukalak kan Ama ot imbuulak utla lubung. Ot gapu ta imbyegak un sakon chi Alak Apudyus, ibyegayuʼn lan-uguchak si sumupling kan Apudyus? 37 Lu achipunku koon cha kawachin Amak, achipun masapuɏʼn patiyolak. 38 Ngim lu kook cha kawachin Amak, ulay lu achipunyu sakon patiyon, patiyonyu otyan cha pin-ak koon ta mapaloklokanyu un awed si Amak kan sakon ya awechak si Ama.”

39 Oli pun, pilachascha bo chokmaan siya, ngim pummuɏupuɏ ummawid. 40 Ot ummoy kasin si Jesus si chomangon chi chewwang un Jordan, si lugeɏʼn lambunyagen John ot illinggew udchi. 41 Ot achu cha taguʼn ummoy kan siya ot kalancha, “Lappun lakaskaschaaw si killingwan John, ngim tuttuwa losan cha imbyegbyegala mipanggop kan Jesus.” 42 Ot achu cha taguʼn lamati kan siya udchi.