1 Si lalidtidchaɏalan Jesus, intullongla leɏakiʼn liyalak un kuɏap. 2 Ot ilimus cha disipulusla kan siya, “Mistulu, silu lakabyasuɏ si lakuɏapan chi allaʼn leɏaki? Siya willu cha chachakkeɏla?”

3 Ot summongbyat si Jesus, “Chakampun si byasuɏla willu byasuɏn cha chachakkeɏla lakuɏapala. Lakuɏap siya ta mipain-an chi kilabyelin Apudyus kan siya. 4 Masapuɏʼn koon taku cha ipakawachin chi langibuun kan sakon si eɏgew, ti lu chumtong chi labi lappun waya takuʼn mangwa. 5 Si kaawedkud chi pita, sakon chi silaw un mansilaw si somsomok cha tagu.”

6 Ilugud ked Jesus laoy, tummuppa si pita ot inggamosla, pummitok pun, impakpakla si atan chi lakuɏap. 7 Ot kalala kan siya, “Ingka mancheup si lalabbungan ud Siloam.” (Ha pion chi Siloam un uguchon ked libuun). Ot ummoy chi kuɏap lancheup ot langulin un makatullong.

8 Si intullong cha cheegla ya cha taguʼn siya hachiʼn lampalpalimus, kalancha, “Chakampun oyya si laoy chi taguʼn pin-a umaammuy utla un mampalpalimus?” 9 Kalan cha uchum, “O, siya!”

Ngim kalan bo cha uchum, “Lai, man-issu-issucha abus.”

Ot kalan chi lakuɏap, “Sakon chi hachi.”

10 Ot ilimuscha kan siya, “Simma in-ilom un makatullong si sala lu?”

11 Ot summongbyat, “Inggew chi taguʼn Jesus chi ngachenla, tiluppaala tapuk ot inggamosla, pummitok pun, impakpakla si atak. Ot imbuunla sakon un umoy mancheup si lalabbungan ud Siloam. Ot ummoyak lancheup ot kakmaak lantullong!”

12 Ot kalancha kan siya, “Chimma tagun hachi lù?”

Kalala, “Chakpun ammu.”

13 Oli pun, illiyoycha hachiʼn leɏakiʼn lakaan chi kuɏapla si igew cha Pariseo. 14 Gapu ta Sabyechuʼn eɏgew un man-illongan cha Judio chi langigamosan Jesus si pitok un langaanla si kuɏapla. 15 Oli pun, ilimus cha Pariseo lu simma lakwa kan siya, un lakatullong. Ot kalala kan chicha, “Impakpakla pitok si atak ot imbuunla sakon un umoy mancheup, ot si sala lakatullongak.”

16 Kalan cha uchum un Pariseo, “Chakampun si lampeɏpu kan Apudyus chi tagun alla, ti achipunla tuttuwaon chi lintog mipanggop si Sabyechuʼn eɏgew un man-illongan.”

Ngim kalan bo cha uchum, “Ma in-ilon chi taguʼn malagbyasuɏ un mangwa si katchin lakaskaschaaw un isun cha alla?” Langkangkalasi somsomokcha.

17 Ot kasin cha bo ilimus si hachiʼn tagu, “Simma mibyegam mipanggop kan siya ti allaʼn kilaanla kuɏaplu lù?”

Insongbyatla, “Osaʼn propeta siya.”

18 Ngim achipun cha papangat cha Judio lamati un sigud un lakuɏap chi hachiʼn leɏaki, ot si sala makatullong inggalà impaayegcha cha amala kan ilala. 19 Ot ilimuscha kan chicha, “Ha laoy chi alakyu un kalanyuʼn liyalak un kuɏap? Lu siya, simma in-ilolaʼn makatullong si salaoy?”

20 Ot summongbyat cha chachakkeɏla un kalancha, “Tuttuwaʼn alakmi siya ya tuttuwaʼn lisigud un kuɏap si liyalakala. 21 Ngim achipunmi ammu lu hilu in-ilolaʼn makatullong si sala ya silu langaan si kuɏapla. Imusonyu kan siya, ti lootong mit ya ammula isongbyatla!” 22 Laoy chi imbyegan cha chachakkeɏla ti umogyatcha kan cha papangat cha Judio. Ti lantutuɏagencha un lu silu mangibyegan Jesus chi Kristu, peɏyawoncha si sinagogan cha Judio. 23 Siya langibyeg-an cha chachakkeɏla un, “Lootong mit, imusonyu kan siya!”

24 Oli pun impidwa cha ilayagen chi leɏakiʼn lakaan chi kuɏapla ot kalancha kan siya, “Isapatam si sangwalan Apudyus un ibyegam chi katuttuwaan! Ammumiʼn malagbyasuɏ hachiʼn tagu!”

25 Ot kalan chi leɏaki, “Achipunku ammu lu malagbyasuɏ willu achipun. Ngim ha abus un tagammuk, sigud un lakuɏapak ked si sala makatullongak.”

26 Ot kalancha kan siya, “Simma kingwala kan sika? Simma in-ilolaʼn langaan si kuɏaplu?”

27 Ot kalala bo, “Imbyegak kabbo kan chikayu, ngim achipunyu patiyon. Puggey, ha pionyuʼn chongɏon kasin? Ha pionyu boʼn mambyalin disipulusla?”

28 Ot langig-iggaancha siya un kalancha, “Sika disipulusla ngim disipulus chikami kan Moses. 29 Ammumin lakaugud si Apudyus kan Moses, ngim lu hachiʼn tagu, achipunmi ammu lu silu leɏpuwala.”

30 Ot kalala kan chicha, “Maschaawak kan chikayu! Achipunyu ammu leɏpuwala, ngim kilaanla kuɏapku! 31 Ammu taku mit un achipun Apudyus chongɏon cha malagbyasuɏ. Ngim lu silu manchayaw kan siya ya mangwa si piola, siya chongɏola. 32 Lalipud si chamchamun chi lubung, lappun ladngeɏ si tagu un langaan si kuɏap chi osaʼn liyalak un kuɏap. 33 Lu chakampun kan Apudyus chi leɏpuwala, achipun makakopya si kamatla.”

34 Silongbyatancha siya, “Liyalakkaʼn malagbyasuɏ, ked puggey chikami tudtuchuwan?” Ot pileɏyawcha siya si sinagoga.

35 Chingngeɏn pun Jesus chi lakwa kan siya, singngitla siya ot inchesala pun, kalala, “Ha mamatika kan Sakon un Alak chi Tagu?”

36 Ot kalan chi hachiʼn leɏaki, “Apu, silu lait un tagu ta mamatiyak kan siya!”

37 Ot kalan Jesus kan siya, “Intullonglu siya, ti siya makaug-uggud kan sika!”

38 Ot kalala, “Apu, mamatiyak!” Ot lampalintuming lanchayaw kan siya.

39 Ot kalan Jesus, “Ummaliyak utla pita ta kuisok cha tagu, ta cha lakuɏap ked makatullong. Ngim cha mangibyegaʼn makatullong, ked sissiyan makukuɏapcha.”

40 Chingngeɏn cha uchum un Pariseo un likaslang si hachi chi ilugudla ot ilimuscha, “Piom un uguchon, lakuɏap kami bo?”

41 Oli pun kalan Jesus kan chicha, “Lu lakuɏap kayu, lappun otyan mambyasbyasuɏanyu. Ngim allat pun un kalanyuʼn makatullong kayu, piolaʼn uguchon un sissiyan mambyasbyasuɏ kayu.”