1 Ḿpʋ́ɣʋ́ Tɑcɑɑ tɔmɑ Moisi sɩ: 2 Polo nɑ ń hɔ Mɑtiyɑŋ nyǝ́mɑ ŋkpɑŋʋɣʋ kɛ ɩsɑɣɑtʋ nti pɑ lɑpɑ Ɩsɛɣɛlɩ nyǝ́mɑ tɔ tǝ tɔɔ. Pǝ wɑɑlɩ kɛ́ n kɑ́ kpe nyɑ́ nyǝ́mɑ cɔlɔ. 3 Mpʋɣʋlɛ Moisi tɔmɑ sɑmɑɑ sɩ: Mǝ tɑɑ lɛlɑɑ ɩ́ suu pɑ yoou wontu nɑ pɑ́ polo nɑ pɑ yoonɑ Mɑtiyɑŋ nyǝ́mɑ, nɑ pɑ́ lɛɛtɩ-wɛ ɩsɩɩ Tɑcɑɑ sɩɩʋ tɔ. 4 Mpʋ tɔ, ɩ́ lǝsɩ pɑɑ kpekǝle nte tǝ tɑɑ kɛ́ yoolɑɑ iyɑɣɑ (1000).

5 Ḿpʋ́ɣʋ́ pɑ lǝsɑ pɑɑ Ɩsɛɣɛlɩ kpekǝle nte tǝ tɑɑ kɛ́ yoolɑɑ iyɑɣɑ (1000). Ɩlɛnɑ pǝ́ kpɛntɩ iyisi nɑɑnʋwɑ nɑ nɑɑlɛ (12000). 6 Nɑ pɑ́ tilinɑ pɑ tǝnɑɣɑ yoou. Ɩlɛnɑ kɔtʋlʋ Ɩlɑsɑɑ pǝyɑlʋ Pɛŋhɑsɩ kpɛnnɑ Ɩsɔ wontu nɑ tutuuŋ wei pɑɑ hʋlɩ nɑ pɑ́ cɑɑlɩ yoou tɔ. 7 Ḿpʋ́ɣʋ́ pɑ tii Mɑtiyɑŋ nyǝ́mɑ tɛtʋ tɔɔ, ɩsɩɩ Tɑcɑɑ kɑ heeluɣu Moisi nɑ ɩ́ tɛlǝsɩ-wɛ tɔ, nɑ pɑ́ kpiisi ɑpɑlɑɑ tǝnɑ. 8 Pɑ kʋwɑ tɔtɔɣɔ Mɑtiyɑŋ ɑwulɑɑ kɑkpɑsɩ: Ɩfi, nɑ Lekem, nɑ Suuu, nɑ Huuu, nɑ Lepɑ, nɑ pǝ kpɛnnɑ Peyɔɔ pǝyɑlʋ Pɑlɑɑm. 9 Nɑ pɑ́ kpɑ sɑlǝkɑ kɛ pɑ ɑlɑɑ, nɑ pɑ piyɑ, nɑ pɑ́ kuu pɑ tɔlɑ nɑ pɑ kɑlǝkǝŋ nɑ pɑ wɛnɑʋ tǝnɑ. 10 Nɑ pɑ́ sɔ pɑ ɑcɑlɛɛ nɑ pɑ cɑcɑkǝŋ kɛ kɔkɔ. 11 Ḿpʋ́ɣʋ́ pɑ tɛɛnɑ wontu nɑ yǝlɑɑ nɑ tɔlɑ nnɑ pɑ kuuwɑ tɔ. 12 Ɩlɛnɑ pɑ́ ponɑ pǝ tǝnɑɣɑ pɑ tǝsikile kɛ Mowɑpʋ tɛtɛkǝlɛ tɑɑ, kɛ Yɑɑtɑnɩ pɔɣɔ nɔɣɔ, kɛ Yeliko ɩsɛntɑɑ. Nɑ pɑ́ hʋ́lɩ́ Moisi nɑ kɔtʋlʋ Ɩlɑsɑɑ nɑ Ɩsɛɣɛlɩ kpekǝle tǝnɑ.

13 Ḿpʋ́ɣʋ́ Moisi nɑ Ɩlɑsɑɑ, nɑ Ɩsɛɣɛlɩ nyʋɣʋ nyǝ́mɑ lɛlɑɑ pɑ lɩɩwɑ tǝsikile nɑ pɑ́ suli-wɛ. 14 Tǝnɑɣɑlɛ Moisi mʋ pɑ́ɑ́nɑ́ nɑ yoolɑɑ nyɔɔŋ nyǝ́mɑ. Ɩsɩɩ iyisi iyɑɣɑ (1000) nyɔɔŋ nyǝ́mɑ, nɑ nɩɩnʋwɑ (100) nyɔɔŋ nyǝ́mɑ mpɑ pɑ lɩɩnɑ yoou tɔ. 15 Nɑ ɩ́ pɔɔsɩ-wɛ sɩ: Pepe tɔɔ kɛ́ ɩ́ tɑ́ kʋ́ ɑlɑɑ? 16 Pǝyele ɩ́ nyǝ́mɑ teu sɩ, Mɑtiyɑŋ ɑlɑɑ mpɛɣɛ Pɑlɑɑm puɣusɑɑ, nɑ pɑ́ sʋsɩ Ɩsɛɣɛlɩ nyǝ́mɑ kɛ ɩsɑɣɑtʋ sɔsɔɔntʋ tɑɑ, nɑ pɑ́ wɑkǝlǝnɑ Tɑcɑɑ kɛ Peyɔɔ tɔm tɑɑ. Mpʋ pǝ kɔnnɑ yʋlʋkʋsǝkʋ kɛ Ɩsɔ yǝlɑɑ tɔɔ. 17 Pǝ tɔɔ tɔ, ɩ́ kʋ́ ɑpɑlʋpiyɑ nɑ ɑlɑɑ mpɑ pɑ tɛmɑ sɑɑʋ tɔ. 18 Ye ɩ́ nɔkɑɑ, ɩlɛ ɩ́ sɩɩ mǝ tǝɣɩ yomɑɑ kɛ pɛɛlɑɑ mpɑ pɑ tɑ nyǝntɑ ɑpɑlɑɑ tɔ. 19 Pǝ kɑɑsɑ mǝ tɑɑ mpɑ pɑ kʋwɑ yǝlɑɑ, yɑɑ pɑ tokinɑ sǝtɑɑ tɔ, pɑɑ cɑɣɑ tǝsikile wɑɑlǝɣɩ kʋyɛɛŋ nɑɑtosompɔɣɔlɑɣɑ kɛ́. Ɩlɛnɑ pɑ́ lɑ ɑsilimɑ kɛɛlʋɣʋ kɔtɑɣɑ kɛ kʋyɑkʋ tooso nyǝŋkʋ wule. Nɑ pǝ́ kpɛŋnɑ pɑ yomɑɑ mpɑ pɑ sɩɩ pɑ tɩ tɔ. 20 Nɑ pɑ́ lɑ ɑsilimɑ kɛɛlʋɣʋ kɔtɑɣɑ tɔtɔɣɔ wontu kususuutu nɑ tɔnǝŋ nyǝntʋ, nɑ pǝ́ŋ hʋntʋ nyǝntʋ, yɑɑ nti pɑ sɑɑkɑ tɑɑsɩ tɔ.

21 Pǝ wɑɑlɩ kɛ́ kɔtʋlʋ Ɩlɑsɑɑ tɔmɑ ɑpɑlɑɑ mpɑ pɑ polɑ yoou tɔ sɩ kʋsǝsɩɩtʋ nti Tɑcɑɑ tɛlǝsɑ Moisi tɔɣɔlɛ sɩ: 22-23 Pǝ kpɑɣɑʋ wontu nti tɩɩ nyɑkɩ kɔkɔ tɔ, ɩsɩɩ wʋlɑ nɑ liɣitee nyǝɣǝtʋ, nɑ nyǝɣǝlʋɣʋ kʋsɛɛmʋɣʋ, nɑ nyǝɣǝlʋɣʋ mɑɣɑmɑɣɑ, nɑ nyǝɣǝtʋ lɛntɩ. Nɑ wontu nti tǝ yɔkǝɣɩ, ɩsɩɩ somtu tɔ. Ɩ́ kɑ́ nyɑɑlɩ-tɩ nɑ kɔkɔ kɛ́ nɑ ɩ́ lii-tǝɣɩ kɔtɑɣɑ lʋm tɑɑ. Ye kɔkɔ kʋnyɑɣɑtʋ, ɩlɛ ɩ́ lii tǝlɛɣɛ kɔtɑɣɑ lʋm tɑɑ tike. 24 Ye ɩ́ cɔtɑ mǝ wontu kɛ kʋyɑkʋ nɑɑtosompɔɣɔlɑɣɑ wule, ɩlɛ mǝ ɑsilimɑ kɛɛlɑɑ kɛlɛ. Ɩ́ sʋʋ tǝsikile tɑɑ.

25 Ḿpʋ́ɣʋ́ Tɑcɑɑ tɔmɑ Moisi sɩ: 26 Nyɑnɑ Ɩlɑsɑɑ, nɑ Ɩsɛɣɛlɩ nyɔɔŋ nyǝ́mɑ, ɩ́ kɑlɑ pǝ tǝnɑ mpi ɩ́ kpɑwɑ yoou tɑɑ tɔ. Pǝ kpɑɣɑʋ yǝlɑɑ nɑ pǝ tɔlɑ tɔ. 27 Ɩlɛnɑ ɩ́ tɑlɑ pǝ tɑɑ kɛ́ cɑlɩ. Yoou potɑɑ kɛ hɔɣɔlʋɣʋ, nɑ lɛlɑɑ kɛ lɛŋkʋ. 28 Nɑ ɩ́ lǝsɩ yoolɑɑ nyǝm tɔɔ kɛ́ mpi pǝ kɛ́ mɑ tǝtɔɣɔlɛ tɔɣɔ yʋlʋ kʋlʋm kɛ yǝlɑɑ nɑsǝlɛ nɑ nɩɩnʋwɑ (500) tɔɔ, nɑ tɔlɑ kɛ mpʋ tɔtɔ. 29 Nɑ ɩ́ cɛlɑ kɔtʋlʋ Ɩlɑsɑɑ. 30 Ye pǝ kɑɑsɑ Ɩsɛɣɛlɩ nyǝ́mɑ lɛlɑɑ nyǝm, ɩlɛ ɩ́ lǝsɩ mpi pǝ wɛɛ sɩ, pɛlɛ pɑ́ lǝsɩ tɔɣɔ yǝlɑɑ nɩɩlɛ nɑ nɑɑnʋwɑ tɔɔ kɛ́ yʋlʋ kʋlʋm. Nɑ tɔlɑ kɛ mpʋ tɔtɔ, nɑ ɩ́ cɛlɑ pǝ tǝnɑɣɑ Lefii nyǝ́mɑ mpɑ pɑ pɑɑsǝɣǝnɑ Ɩsɔ cokǝle tɔ.

31 Ḿpʋ́ɣʋ́ Moisi nɑ Ɩlɑsɑɑ pɑ lɑpɑ teitei ɩsɩɩ Tɑcɑɑ heeluɣu-wɛ tɔ. 32 Tɔlɑ wenɑ pɑ kuuwɑ kolontunɑɑ tɛ́ tɔ, ɑ kɑɑsɑ heeŋ nɑ pǝ́ŋ kɛ iyisi nɑsǝtoso nɑ nɩɩtoso nɑ nɑɑnʋwɑ nɑ kɑkpɑsɩ (675000) 33 nɑ nɑɑŋ kɛ iyisi nɩɩtoso nɑ nɑɑnʋwɑ nɑ nɑɑlɛ (72000) 34 nɑ kpɑŋɑsɩ kɛ iyisi nɩɩtoso nɑ kʋlʋm (61000) 35 nɑ pɛɛlɑɑ mpɑ pɑ tɑ nyǝntɑ ɑpɑlɑɑ tɔɣɔ iyisi hiu nɑ nɑɑnʋwɑ nɑ nɑɑlɛ (32000). 36 Heeŋ nɑ pǝ́ŋ wei pɑ cɛlɑ yoolɑɑ tɔ, ɩ kpɛntɑ iyisi ŋmʋnʋɣʋ nɩɩnʋwɑ nɑ hiu nɑ nɑɑnʋwɑ nɑ nɑɑtosompɔɣɔlɑɣɑ nɑ nɑsǝlɛ nɩɩnʋwɑ (337500). 37 Nɑ pɑ́ lǝsɩ Tɑcɑɑ nyǝnɑ kɛ nɑsǝtoso nɑ nɩɩtoso nɑ nɑɑnʋwɑ nɑ kɑkpɑsɩ (675). 38 Nɑɑŋ kɛ iyisi hiu nɑ nɑɑnʋwɑ nɑ nɑɑtoso (36000) nɑ Tɑcɑɑ nyǝŋ kɛ nɩɩtoso nɑ nɑɑnʋwɑ nɑ nɑɑlɛ. 39 Kpɑŋɑsɩ kɛ iyisi hiu nɑ nɑɑnʋwɑ nɑ nɑsǝlɛ nɩɩnʋwɑ (30500). Tɑcɑɑ nyǝnsɩ kɛ nɩɩtoso nɑ kʋlʋm. 40 Yǝlɑɑ kɛ iyisi nɑɑnʋwɑ nɑ nɑɑtoso (16000). Tɑcɑɑ nyǝ́mɑ kɛ hiu nɑ nɑɑnʋwɑ nɑ nɑɑlɛ. 41 Ḿpʋ́ɣʋ́ Moisi cɛlɑ Ɩsɔ nyǝm kɛ kɔtʋlʋ Ɩlɑsɑɑ, ɩsɩɩ Tɑcɑɑ kɑ heeluɣu-ɩ tɔ. 42-43 Mpi pɑ cɛlɑ Ɩsɛɣɛlɩ nyǝ́mɑ lɛlɑɑ tɔ, pǝ nɑ yoolɑɑ nyǝm pǝ kʋlʋm kɛ́. Heeŋ nɑ pǝ́ŋ kɑ wɛ iyisi ŋmʋnʋɣʋ nɑ nɩɩnʋwɑ nɑ hiu nɑ nɑɑnʋwɑ nɑ nɑɑtosompɔɣɔlɑɣɑ nɑ nɑsǝlɛ nɑ nɩɩnʋwɑ (337500). 44 Nɑɑŋ kɛ iyisi hiu nɑ nɑɑnʋwɑ nɑ nɑɑtoso (36000). 45 Kpɑŋɑsɩ kɛ iyisi hiu nɑ nɑɑnʋwɑ nɑ nɑsǝlɛ nɑ nɩɩnʋwɑ (30500), 46 nɑ pɛɛlɑɑ kɛ iyisi nɑɑnʋwɑ nɑ nɑɑtoso (16000). 47 Ḿpʋ́ɣʋ́ Moisi lǝsɑ pɛɛlɑɑ tɔɔ kɛ́ yʋlʋ kʋlʋm kɛ nɩɩlɛ nɑ nɑɑnʋwɑ tɔɔ, nɑ tɔlɑ kɛ mpʋ tɔtɔ, ɩsɩɩ Tɑcɑɑ kɑ heeluɣu-ɩ tɔ, nɑ ɩ́ cɛlɑ Lefii nyǝ́mɑ mpɑ pɑ pɑɑsɑɣɑnɑ Ɩsɔ cokǝle tɔ.

48 Ḿpʋ́ɣʋ́ yoolɑɑ iyisi iyɑɣɑ (1000) nyɔɔŋ nyǝ́mɑ, nɑ nɩɩnʋwɑ (100) nyɔɔŋ nyǝ́mɑ, pɑ kotɑ Moisi kiŋ, 49 nɑ pɑ́ heeli-ɩ sɩ: Tǝ kɑlɑ yoolɑɑ sǝkpemɑ, pɑ wɛ pɑ nɔɣɔ tɑɑ, nɔɣɔlʋ tɑ lɑ ɑsɑɑlɑ. 50 Pǝ tɔɔ kɛ́ tǝ kɔŋnɑ Tɑcɑɑ kɛ kʋhɑɑŋ kɛ wʋlɑ ɑlukpɑlisi, nɑ pǝ kpɑsɩ, nɑ kukuwee, nɑ ŋkpɑnyɑpǝlɑsɩ, nɑ lɩɩtʋ, nti tǝ hikɑɑ tɔ sɩ pǝ́ hɩɩsɩ tɑ ɩsɑɣɑtʋ. 51 Ɩlɛnɑ Moisi nɑ kɔtʋlʋ Ɩlɑsɑɑ pɑ́ mʋ wʋlɑ wontu nti pɑ kɔnɑɑ tɔ. 52 Wontu nti yoolɑɑ mpɛ pɑ kɔnɑɑ tɔ, tǝ kpɛntɑ kiloonɑɑ nɩɩnʋwɑ nɑ nɩɩtoso nɑ nɑɑnʋwɑ. 53 Pǝ kɑɑsɑ yoolɑɑ sǝkpemɑ, ɩlɛnɑ pɑɑ wei ɩ́ sɩɩnɑ ɩ tǝɣɩ wontu nti ɩ kuuwɑ tɔ. 54 Ḿpʋ́ɣʋ́ Moisi nɑ Ɩlɑsɑɑ pɑ sɩɩ wʋlɑ wontu nti yoolɑɑ hɑwɑ tɔɣɔ Ɩsɔ cokǝle tɑɑ sɩ, Tɑcɑɑ ɩ́ tɑɑ sɔɔ Ɩsɛɣɛlɩ nyǝ́mɑ tɔɔ.