1 Ḿpʋ́ɣʋ́ Moisi tɛlǝsɑ Ɩsɛɣɛlɩ nyǝ́mɑ kɛ tǝ tǝnɑ nti Tɑcɑɑ tʋ-ɩ tɔ.

2 Pǝ wɑɑlɩ kɛ́ ɩ tɑsɑ kpekɑ nyɔɔŋ nyǝ́mɑ kɛ tɛlǝsʋɣʋ kɛ Tɑcɑɑ kʋyɔɣɔtʋtʋ lɛntǝnɑɑ tɔtɔ sɩ: 3 Ye yʋlʋ sɩɩ nɔɣɔ sɩ ɩ lɑkɩ Tɑcɑɑ kɛ kɔtɑɣɑ. Yɑɑ ɩ kisiɣi pʋlʋpʋɣʋ Ɩsɔ tɔɔ. Pǝ fɛɩ sɩ ɩ́ sɛkɩ pǝ lɑpʋ. Pǝ wɛɛ sɩ ɩ́ lɑ pǝ tǝnɑ mpi pǝ lɩɩnɑ ɩ nɔɣɔ tɔ. 4 Ye ɩsɩɩ pɛɛlɔ wɛ ɩ cɑɑ tǝyɑɣɑ tɑɑ, nɑ ɩ́ sɩɩ ɩ nɔɣɔ kɛ Ɩsɔ ɩsɛntɑɑ sɩ, ɩ kɑ́ lɑ pʋlʋ, 5 nɑ cɛcɛ nɩɩ, nɑ ɩ́ tɑ́ kisinɑ-ɩ. Pǝ wɛɛ kɛ́ sɩ ɩ́ tǝŋ teitei ɩsɩɩ ɩ sɩɩʋ tɔ. 6 Amɑ ye ɩ kisinɑ-ɩ kʋyɑkʋ ŋkʋɣʋ kpɑkpɑɑ, ɩlɛ ɩ yele pǝ tɔm. Tɑcɑɑ kɑɑ pɔɔsɩ-ɩ. Mpi tɔ, ɩ cɑɑ kisinɑ-ɩ.

7 Ye ɩsɩɩ pɛɛlɔ hulinɑ nɔɣɔ sɩɩʋ nɑ pǝ́cɔ́ ɩ sɑɑ. 8 Ɩlɛnɑ ɩ pɑɑlʋ nɩɩ-tɩ nɑ ɩ́ tɑ́ kisinɑ-ɩ pǝ wɛɛ sɩ ɩ lɑ ɩsɩɩ ɩ sɩɩʋ tɔ. 9 Amɑ ye ɩ kisinɑ-ɩ kʋyɑkʋ ŋkʋɣʋ kpɑkpɑɑ, ɩlɛ ɩ yele pǝ tɔm. Tɑcɑɑ kɑɑ pɔɔsɩ-ɩ. 10 Ye ɩsɩɩ ɑlʋ leelu, yɑɑ wei nɑ ɩ pɑɑlʋ pɑ yɑwɑ tɔ, ɩ sɩɩ nɔɣɔ. Pǝ wɛɛ sɩ ɩ́ lɑ-kɛɣɛ. 11 Mpʋ tɔ, ye ɩsɩɩ ɑlʋ wei ɩ wɛnɑ pɑɑlʋ tɔ ɩ sɩɩ nɔɣɔ sɩ ɩ́ kɑ́ lɑ pʋlʋ, 12 nɑ ɩ pɑɑlʋ tɑ́ kisinɑ-ɩ. Ɩsɩɩ ɩ lɑpɑ ɩsǝnɑ ɩ sɩɩwɑ tɔ. 13 Ye ɩ pɑɑlʋ kisinɑ-ɩ kʋyɑkʋ ŋkʋɣʋ kpɑkpɑɑ, ɩlɛ ɩ yele pǝ tɔm. Tɑcɑɑ kɑɑ pɔɔsɩ-ɩ. Mpi tɔ, ɑpɑlʋ kisinɑ-ɩ. 14 Mpʋ tɔ, ye ɩsɩɩ ɑlʋ cɑɑ ɩ sɩɩ nɔɣɔ sɩ ɩ lɑkɩ pʋlʋpʋ, ɩ pɑɑlʋ wɛnɑ mpɑɑʋ sɩ ɩ́ tisinɑ-ɩ, yɑɑ ɩ́ kisinɑ-ɩ. 15 Amɑ ye ɩ nɩɩwɑ nɑ ɩ́ tɑ́ kisinɑ-ɩ kʋyɑkʋ ŋkʋɣʋ kpɑkpɑɑ. Ɩlɛ ɩ hʋlǝnɑ ɩ sum ntɛ́ sɩ ɩ tisɑɑ. 16 Amɑ ye wɑɑlɩ wɑɑlɩ kɛ́ ɩ lɑŋlɛ tɑ hɛɛnɑ ɩ ɑlʋ sɩ ɩ́ tɑɑ lɑ ɩsɩɩ ɩ sɩɩwɑ tɔ. Ɩlɛ Tɑcɑɑ kɑɑ pɔɔsɩ ɑlʋ, ɩ pɑɑlʋ nyʋɣʋ tɑɑ kɛ́ pɩɩ mǝlɩ. 17 Kʋsǝsɩɩtʋ nti Tɑcɑɑ sɩɩwɑ ɑlɑɑ nɑ pɛɛlɑɑ pɑ nɔɔsɩ sɩɩʋ tɔm tɑɑ tɔɣɔlɛ.