3
Ninifi ɩcɑtɛ mpusi tǝŋsʋɣʋ
1 Ninifi ɩcɑtɛ tɔm tɛɛsǝnɑ mpusi kɛlɛ.
Yʋlʋkʋlɛ nɑ kɑloolɑɣɑ nɑ mʋsʋŋ su tǝ tɑɑ
kɛ́ nɑ tǝ yǝlɑɑ kɛ lɛɛkǝlɑɑ.
2 Ɩ́ nɩɩ tǝ tɑɑ ɑkpɑtɛɛ wulɑ,
nɑ yoou kɛɛkɛnɑɑ tɑŋ,
nɑ kpɑɣɑnǝŋ ɑcʋwɑ.
3 Kpɑɣɑnǝŋ cɑɣɑlɑɑ nikɑɑ,
nɑ lɑɣɑlɛɛ mʋɣɩ kɔkɔ,
nɑ ŋmɑntɑɑsɩ ŋmɛlǝsǝɣɩ.
Sǝtɑɑ nɑ mpɑ pǝ kʋwɑ tɔ,
pɑ sɔɣɔtɑ pɑɑ timpi.
Pɑ kɑɑ huwɑ huwɑ,
pɑ coki yǝlɑɑ, pɑ fɛɩ kɑlʋɣʋ.
Fɛɛlɛ pɩɩwɑ Ninifi nyǝ́mɑ
4 Ninifi kɛ́ ɑpɑlɑɑ tǝnɑ ɑlʋ kɛ́,
ɩ teu nɑ ɩ topotopo tǝmɑ kɛ ɩ hɔŋɑɣɑnɑ piitimnɑɑ,
nɑ ɩ́ ŋmɑkǝlǝɣɩ yǝlɑɑ nɑ ɩ tɩɩtʋ.
5 Ḿpʋ́ɣʋ́ Tomɑ tǝnɑ tʋ Tɑcɑɑ tɔmɑ sɩ:
Pǝ tɔɔ kɛ́ mɑɑ pɑɑsǝnɑ-mɛ nɑ mɑ́ cɛ
mǝ wontu nɑ mɑ́ sɩɩnɑ mǝ luuŋ tɛɛ.
Piitimnɑɑ ɩ́ nɑ́ ɩsǝnɑ pǝ pɑsɑ-mɛ tɔ.
6 Mɑɑ tuu-mɛɣɛ ɑfǝlɑ tɑɑ
nɑ yǝlɑɑ pɑɑkǝnɑ-mɛ.
7 Pɑ tǝnɑ mpɑ pɑɑ nɑ-mɛ tɔ,
pɑɑ seeki nɑ pɑ́ tɔŋ sɩ:
Ninifi pǝsɑ ncɑɑlɛ.
Awe nɑ́ wɛnɑ tǝ pǝtɔɔtǝlɛ sɩ ɩ kɑ́ puɣusi-tɛ?
Mpi pɩɩ mɑɣɑnɑ Tɛɛpɩ ɩcɑtɛ tɔ pɩɩ mɑɣɑnɑ Ninifi nyǝntɛ
8 Ninifi ɩcɑtɛ nyɑ́,
n hʋʋ sɩ n tɛɛ Tɛɛpɩ ɩcɑtɛ nte tǝ wɛ Nili pɔɣɔ tɑɑ,
nɑ lʋm tɑmɑ-tɛɣɛ kotɑɣɑ nɑ pǝ kentɑ-tɛ tɔ?
9 Yoou ɩ́ tiiwɑ, Ɩtiyopii, nɑ Puti,
nɑ Lipii pɑ kɔŋnɑ nɑ pɑ́ sǝnɑ-tɛ.
10 Pɑɑ nɑ mpʋ,
pɑ kuu pɛlɛ pɑ ɑcɑlɛɛ yǝlɑɑ nɑ pɑ́ tɛɛnɑ.
Pɑ tʋ pɑ nyʋɣʋ nyǝ́mɑ kɛ ɑlukpɑlɑ.
Ɩlɛnɑ pɑ́ tɔ tɛtɛ nɑ pɑ́ tɑlǝnɑ-wɛ.
Pɑ nɑŋɑ pɑ piyɑ kɛ hɑpɛɛ kɔŋkɔmǝŋ tɔɔ.
11 Ninifi pǝ tɑlɑ nyɑɣɑlɛ sɩ,
wʋsɑsɩ ɩ́ kʋ-ŋ sʋlʋm tǝlɛ nɑ pǝ́ kǝlɩ-ŋ.
N kɑ́ pɛɛkɩ tǝcɔɔsǝlɛ sɩ,
ń fiti nyɑ́ kolontunɑɑ, n kɑɑ nɑ́.
Ninifi ɩɩ pǝsǝɣɩ sɩ ɩ́ kisi
12 Nyɑ́ koloosi ɑcɑlɛɛ wɛ kɛ́
ɩsɩɩ fiki tʋɣʋ pee pɩɩkʋɣʋ,
nɑ pɑ́ nyɑmsɩ-kʋ, nɑ pee hotiɣi tɔɣɔlɑɑ nɔɔsɩ tɑɑ tɔ.
13 Acɑmisi tike kɛ pǝ kɑɑ-ŋ.
Ɩcɑtɛ nɔnɔɔsɩ toŋ nyǝnsɩ,
tʋlǝɣɩ sɩ tǝɣɩ yem.
Mpi tɔ, kɔkɔ nyɑɣɑ kʋkɑlǝsǝŋ.
14 Ninifi nyǝ́mɑ mɛ,
ɩ́ lú lʋm.
Ɩ́ puu tɛtʋ, nɑ ɩ́ loo pilikinɑɑ,
nɑ ɩ́ tɑɣɑnɩ mǝ koluŋɑ.
15 Amɑ mǝ ɩcɑtɛ kɔkɔ kɑ́ nyɑɣɑnɑ-mɛ,
yɑɑ pɑ́ kʋ-mɛɣɛ yoou tɑɑ.
Pɑɑ wɑkǝlɩ-mɛɣɛ ɩsɩɩ
kɑhʋsɩ tɔkʋɣʋ hɑtʋ tɔ.
Ɩcɑtɛ yǝlɑɑ sɑɑlǝɣɩ yem
Mǝ ɩcɑtɛ yǝlɑɑ kɑ́ nyǝpǝlǝɣɩ kɛ́ ɩsɩɩ kʋtoloŋ sɛsɛkʋ.
16 Mǝ tɑɑtǝlɑɑ pɑɣɑlɛ kɑ tɛɛwɑ ɩsɔtʋlʋŋɑsɩ.
Pɑ nǝɣǝsǝnɑ ɩsɩɩ kʋtoloŋ kʋlʋɣʋ tɔ.
Amɑ pǝ sɑɑlɑ yem kɛ́ nɔɔnɔɔ.
17 Mǝ tɔɔ feŋlɑɑ, nɑ mǝ ɑkewenɑɑ wɛ kɛ́ ɩsɩɩ
kʋtoloŋ cɑkʋɣʋ koluŋɑ pɔɣɔlɛɛ
tɑɑ kɛ́ wɑtʋ wɑɑtʋ tɔ.
Ilim hɑŋǝɣɩ ɩlɛnɑ kʋ́ yɑ,
n tɑ nyɩ timpi kʋ tɛɛnɑɑ tɔ.
Asɑlɑʋ wei ɩ fɛɩ tɑɣɑnʋɣʋ tɔ
18 Asilii wulɑʋ,
nyɑ́ wɑɑlɩ nyǝ́mɑ toowɑ tɑm tɔɔ tom.
Nyɑ yoolɑɑ sɔsɑɑ nɑ́ hǝntɑɑ nɑ pǝ sumɑ.
Nyɑ́ yǝlɑɑ yɑ pɔ́ɔ́ŋ tɑɑ,
nɔɣɔlʋ kɑɑ tɑsɑ-wɛɣɛ kpeɣeluɣu.
19 Pǝ kʋ-ŋ ɩsɑɣɑkʋɣʋ kɛ́.
Pǝ́cɔ́ nyɑ́ wɑkǝlʋɣʋ kɑɑ tɑɣɑnɩ.
Pɑ tǝnɑ mpɑ pɑɑ nɩɩ nyɑ́ tɔm tɔ,
pɑɑ kpɑsɩ ɑmʋkǝŋ kɛ́.
Mpi tɔ, yǝlɑɑ tǝnɑ tɔɣɔnɑ nyɑ́ yʋlʋkʋlɛ
tɑm nyǝntɛ ntɛ́ tǝ kʋnyɔŋ.