Ɩɩ nɑɑkɩ tɔm kʋpɑntʋ kpɑɑllʋ

kɔŋnɑ ntɛɣɛ pɔ́ɔ́ŋ nyɔɔŋ tɑɑ.

Hɛɛsʋɣʋ tɔm kɛ ɩ́ kpɑɑlǝɣɩ.

Yutɑ nyǝ́mɑ mɛ,

ɩ́ tɔɣɔ Ɩsɔ ɑcimɑ.

Ɩ́ ponɑ-ɩ mpi ɩ́ kɑ sɩɩwɑ sɩ ɩ́ hɑɑ-ɩ tɔ.

Kolontu wei ɩ tʋkɑɣɑ-mɛɣɛ wɑhɑlɑ tɔ,

pǝ pɛlɑ ɩ niŋ, ɩ kɑɑ tɑsɑ mpʋ.

2 Hei Ninifi, kolontu kpɑɑkɩ nyɑ́ tɔɔ.

Ɩ́ kpɑɣɑ yoou wontu,

pɑɑ wei ɩ́ sǝŋ ɩ tǝsǝŋlɛ nɑ ɩ́ feŋ hɑpɛɛ.

Ɩ́ tɔɣɔ ɑpɑlʋtʋ.

3 Tɑcɑɑ kɑ́ mǝŋnɑ Yɑkɔpʋ lʋlʋɣʋ nyǝ́mɑ

kɛ teeli wei pɑɑ wɛnɑ lɔŋ tɔ ɩ tɑɑ.

Mpi tɔ, ɩ́ pǝsɑ kɛ́ ɩsɩɩ

lɛsɛŋ tʋɣʋ ŋku ŋmɩɩlɑɑ koolɑɑ,

ɩlɛnɑ pɑ́ wɑkǝlɩ tɔ.

4 Kolontunɑɑ kɔŋ kɛ́ nɑ pɑ́ sɛɛsɑ

pɑ kpɑlǝŋ nɑ pɑ wontu kususuutu tǝcǝŋcǝŋ.

Pɑ yoou kɛɛkɛnɑɑ mʋɣɩ kɔkɔ nɑ pɑ́ teɣetiɣi

pɑ ŋmɑntɑɑsɩ kɛ yoou wule.

5 Kɛɛkɛnɑɑ ŋmɑɑkɩ hɑpɛɛ tɔɔ kɛ́,

pɑ tɔŋ nɔnɔɔsɩ tɛɛ,

ɩsɩɩ pɑ lɔɣɔ kɑhulɑsɩ,

yɑɑ tɛʋ nyǝɣǝsʋɣʋ.

6 Ninifi wulɑʋ yɑɑwɑ ɩ yoolɑɑ nyʋɣʋ nyǝ́mɑ

nɑ pɑ́ puki nɑ pǝ́ coki-wɛ.

Kolontu sewɑ nɑ ɩ́ kpǝtǝnɑ koluŋɑ nɑ ɩ́ cɔɔsǝnɑ-kɛ.

7 Ḿpʋ́ɣʋ́ pɑ cɑŋsɑ pusi hɔɣɔlʋɣʋ tɔɔ ɩcɑtɛ

nɔnɔɔsɩ nɑ pɑ́ lɛɛkɩ kɑwulɑɣɑ tǝyɑɣɑ.

8 Pɑ tɛmɑ ɩcɑtɛ tɔm,

Pɑ kuu tǝ yǝlɑɑ,

Tǝ ɑlɑɑ kpɑ pɑ lɑŋɑ

nɑ pɑ́ cɑsǝɣɩ kɑpusi kɛ sɔsɔm.

9 Ɩsɩɩ lʋm cɑɑtʋɣʋ ɑkɔlɑ nɑ pǝ kpeŋ tɔ.

Ḿpʋ́ɣʋ́ Ninifi nyǝ́mɑ lɩɩ ɩcɑtɛ tɑɑ nɑ pɑ́ seeki

nɑ pɑ́ kpɛɛsǝɣɩ-wɛ sɩ pɑ́ sǝŋ.

Amɑ nɔɣɔlʋ tɑ pǝsɩ.

10 Kolontu kuu wʋlɑ nɑ liɣitee nyǝɣǝtʋ.

Pǝnɑ wontu kʋpɑmpɑntʋ pǝ kɑɑwɑ ɩcɑtɛ tɑɑ kɛ́,

pǝ fɛɩ tɛm.

11 Pɑ ŋmɩɩlǝɣɩ nɑ pɑ́ kuuki pǝ tǝnɑ

tǝkpɑtɑkpɑtɑ nɑ pɑ́ wɑkǝlǝɣɩ.

Ɩlɛnɑ ɩcɑtɛ yǝlɑɑ tǝnɑ lɔɔkɩ ɑpɑlʋtʋ

nɑ pɑ ɩsɛntɑɑ lɑɣɑsǝɣɩ.

Pɑ nɔɔhɛɛ nukiɣi nɑ pɑ tɔnǝŋ seliɣi.

12-13 Ninifi wɛ kɛ́ ɩsɩɩ tɔɣɔlɑɣɑ pʋ́ʋ́ɣʋ́ ŋku

kʋ tɑɑ kɑ lɩɩkɩ nɑ kɑ́ yɛlɩ nɑ kɑ́ kpɑ wontu

nɑ kɑ́ cǝlɩ nɑ kɑ́ kɔnɑ kɑ ɑlʋ nɑ kɑ piyɑ kɛ

nɑntʋ nɑ kɑ́ sɔɣɔtǝnɑ-kʋ tɔ.

Ɩcɑtɛ ńtɛ́ tǝ tɛmnɑ weɣe nɔɔnɔɔ?

14 Ḿpʋ́ɣʋ́ Tomɑ tǝnɑ tʋ Tɑcɑɑ tɔmɑ sɩ:

Mɑɑ pɑɑsǝnɑ Ninifi,

nɑ mɑ́ yele nɑ kɔkɔ nyɑɣɑ ɩ yoou kɛɛkɛnɑɑ,

nɑ pǝ́ kʋ ɩ yoolɑɑ nɑ mɑ́ sɩɩ ɩ lɛɛkʋɣʋ kɛ tǝnɑɣɑ.

Nɔɣɔlʋ kɑɑ tɑsɑ ɩ tillɑɑ ŋmɑkǝlʋɣʋ tɔm nɩɩʋ.