1 ꞌTuꞌtu dilu danu, a ngwurꞌdal ꞌdar ngwanni ngwuru ngweleny na mbumbunga giki ngwujaꞌri ndi ari aar ꞌrinye Yicung. 2 Aar ape aar giki aar okta aar gwe ele aar ätädä Bilatijing gwanni gwuru deleny.

3 Anni ma Yäwüdä gwanni gwuma gwurlanu Yicu gwe engga ndi ari lima obalu Yicu ye gwadi aar ꞌrinye, ngwügwäꞌränï ngwäyänü ngwüꞌdïꞌrï ngwape bartad nggwoo gwuru buta ꞌdï täꞌrïl (30) ngwügwäꞌräcï ngwurꞌdala ngwoo ngwuru ngweleny na mbumbunga ngwuje ci, 4 “Äny gwuma ärrï yiꞌral yiki äny gwuma gwurlanu yïn ye yidi dïjï dijaw nono.”

Aar ci, “Änyängä lätï mine ange yunga yiru!”

5 No, ngwugatu bartadalu kobanu ngwüꞌtü. Ngwube ele ngwogworenyani.

6 A ngwurꞌdal ngwanni ngwuru ngweleny ape bartadalu nggwoo aar ari, “Bartad nggwee ngwudi yïn gwuru gwaꞌti jaw giyobo ndi ji kiꞌdu gidi gobo.” 7 Aar gekajidi ngwujaꞌri ndi ari aar ngwe ellang dïyängü didi gur gati gaꞌriji yimoya ati aar gu gatu ngwüjü ngwuru Garany. 8 Ngwaalu ngwudi gatidi ngwoo ngwuma aar je ätädä ngwürïny ngwani Dïyäng didi Yïn ngwuma gu ani gwurꞌtal ꞌdi gomon gidi gweneng. 9 No, ngwujaꞌri ngwuma ätï ngwäyänü ngwanni ngwondaja ngwe dïjïr dani Ärmïyä gwanni gwaru, “Lima ape bartad gwuru buta ꞌdï täꞌrïl (30) gwanni gwüllï gwe ngwüjï ngwudi Yïjïräyïl ngindeng, 10 gwuma aar ape gwuma aar gwe ellang dïyängü didi gur gati gaꞌriji yimoya anaku car nyi gu Deleny.” 27.10 Jäkärïyä 11.12–13; Ärmïyä 19.1–13; Ärmïyä 32.6–9

11 A gaji nggoo, a Yicu dünäcï Bilatijingalu gwuru deleny. A Bilatij otacalu ngwuci, “Nga gwuru deleny didi Ngwüyäwüde?”

Ngwuci, “Yäy yiru gu anaku ara gu!”

12 Anni ma ngwurꞌdal ngwanni ngwuru ngweleny na mbumbunga üꞌrïdä ngwujaꞌri nono ngwuru yiꞌduru, ngwugwugwundi ngwuje ꞌti gwäꞌräcänü. 13 A be Bilatij otacalu ngwuci, “Nga gwaꞌti ꞌdingina ngwujaꞌri ngwee ngwüꞌrïdädärä je nono?” 14 Aaꞌti Yicu gwäꞌräcänü ngwaꞌti aru ꞌdang. A ngwaalu elalu deleny de gwulleny.

15 Ati be deleny äbräjï giyomon yidi yïꞌrïnyïnä ndi gwäꞌdäcï ngwüjü dïjälü deꞌte pu diju korkon danni dïmïnäär. 16 A be gur geꞌte ji gigeꞌtaar korkon ndi ari gati äbïngïnï ngwüjänü gani Barabaj. 17 Anni ma ngwüjï ngwonyadu oꞌrajidalu, a je Bilatij otacalu ngwuje ci, “Ngaa lïmïnü nga je gwäꞌdäcä yärüngälü, Barabajingalu walla Yicung gwanni Gwubrutaar yelenya?” 18 Ndi ari Bilatij gwülïngïdï ngindenga gwäpïjäär Yicung yïꞌdünyü.

19 Anni ju Bilatij ndi jalu gididuꞌrala didi pï yelenya, a daw düngün ükäcä ngwujaꞌri ngwuci, “Aaꞌti nga gwa akani dïjü nono ndoo, diru dïjï dijaw nono dilingid dïtïny diki daꞌti nyi gäbïcä gwene gwani nginde.”

20 A be ngwurꞌdal ngwanni ngwuru ngweleny na mbumbunga ïcäjï ngwüjü aar je gwürlï aar mïnï ndi aar je gwäꞌdäcä Barabajingalu aar be ꞌrinye Yicung.

21 A je be Bilatij otacalu, “Ngaa lïmïnä yärüng ngwüjï ngwee rom nga je gwäꞌdäcälü?”

Aar ci, “Barabaj.”

22 A je be Bilatij otacalu, “Nyi be ärrï Yicunga gwanni Gwubrutaar yelenya?”

A be ngindenga ꞌdar ari, “Pädï küꞌrï!”

23 A je deleny otacalu, “Ange gwuru, yiꞌral yiru ange yärrüng je yiki?”

Aar be ürrï dula gwulleny aar ari, “Pädï küꞌrï!”

24 Anni ma deleny dani Bilatij engga ndi ari yiꞌral giyee yäꞌtüdï yadi elada gweere yadi manni ele ndi gäbïcï ngwüjü aar ꞌdïꞌrï güündä, ngwüꞌdïꞌrï ngwape yaw ngwuni ngwuy nono ngwäyänü ngwüjï ngwari, “Äny gwujaw nono gïyïn yidi dïjï ndee, ombajar je yalu yiru!”

25 A ngwüjï ondaci ꞌdar aar ari, “Yïn yüngün aar ji giyigoꞌro yärï na gïyïjï yärï!”

26 A je be Bilatij gwäꞌdäcä Barabajingalu ngwube ape Yicung aar pï lacal le ngwätädä ngwüjü aar gwe ele ndi pä küꞌrï.

27 A be gwuꞌtulu gwudi deleny dani Bilatij ape Yicung aar gwe ele ngwuꞌdun ngwudi yeleny aar gwäꞌrä giꞌdu gidi gwuꞌtulungalu ꞌdar aar gwäꞌräjï Yicung nono. 28 Aar gwallada ngwureda ngwüngün aar giki direda duri. 29 Aar ꞌräjï ngwügä dirꞌta aar je ülläcï kiꞌra aar gïꞌtïjï guura gidi yeleny kuy gidi gaama aar üllïcänü yïdäpängä ati aar ari, “Agannar Delenya didi Ngwüyäwüd!” 30 Aar gwonynya nono aar apada guura ati aar ge pï kiꞌrala. 31 Anni ma aar gu ärrï yïdäpängä, aar gwallada direda danni digikaar aar gekaci ngwureda ngwüngün aar gwe ele ndi pä küꞌrï.

32 Anni ma aar ji ndi ele, aar mbudi gurnga le geꞌte gidi ngwaalu ngwani Giruwan gani Jamaan, aar üpïyï güüꞌrï yiima ye. 33 Aar obani ngwaalu ngwani Jüljüjä (ngwani ngwaalu ngwudi guya gidi giꞌra gidi dïjï).* 27.33 Ngwaalu ngwo ngwuru gidotr ngwuru nono guya gidi giꞌra gidi dïjï. 34 Aar ätädä Yicung diꞌrica dïlägänänü ngwujiꞌrindi ngwe nunnu ngwïyï, anni mung je ngille, ngwuꞌdonya ndi ïyï. 35 Anni ma aar pädä küꞌrï, aar ape ngwureda ngwüngün aar gu gatada yuꞌru aar je giginanu. 27.35 Mäjïmür 22.18 36 Aar jalu ngenone aar gu etadi. 37 Kiꞌrala küꞌrï, ngwujaꞌri ngwanni ngwugekajajaar gu ngwüllïnä ngwaru nu, YICU GWURU NGGWEE, GWURU DELENY DIDI NGWÜYÄWÜD. 38 Aar je pä ngwuꞌram ngwe rom, deꞌte kaama na deꞌte kängïr. 39 Ngwüjï ngwanni ngwumillidu kayalu ngeno, aar lo ngwujaꞌri ngwonyadu aar ci yiꞌra yegen gwoꞌroꞌdong gwoꞌroꞌdong 40 aar ari, “Nga nggwee gwanni gwaru gwadi pädä gobalu nga ꞌdïꞌrïyälü yomon täꞌrïl, gïlängïdïyä be ligoꞌro lunga! Üllädälü küꞌrälä, manari nga gwuru gwanni gwuru Gïjï gidi Ngwaalu!”

41 A ngwurꞌdal ngwanni ngwuru ngweleny na ngwoorta ngwudi yobo na mbumbunga ärrï Yicung yïdäpängä ꞌto aar ari, 42 “Nginde gwügïlängïdïyä ngwüjü ngwuꞌter ngwuꞌti be burna ndi gïlängïdïyï ligoꞌro lüngün. Nginde gwaru gwuru Deleny didi Yïjïräyïl! Gäbïcä ngwüllädälü gwenene küꞌrälä gwa ar gu be ämnädä Ngwaalu. 43 Nginde gwämnäcä Ngwaalinga, a be Ngwaalu gïlängïdïyï gweneno manari gwümïnïng, ndi ari nginde gwaru, ‘Äny gwuru Gïjï gidi Ngwaalu!’ ” 44 A gu ngwuꞌram ngwoo ngwüpädäär je ngwe gïyüꞌrï lo ꞌto.

45 ꞌTuꞌtu gilingen lïdünälä ꞌdi a gaji ele ngwuru täꞌrïl (3) a dïrïm elalu mogeny gïdïyängälü ꞌdar. 46 Gaji giru täꞌrïl (3) a Yicu gatu dula gwulleny ngwari Yïbrïyängä, “Eloye, Eloye lama jabaktani?” 27.46 Mäjïmür 22.1 Yani ndi ari, “Ngwaalu ngwüny, Ngwaalu ngwüny, nga gwuma arra miny gatani?”

47 Anni ma gu ngwüjï ꞌdingini ngwoko ngwanni ngwüdünädälä ngeno, aar ari, “Nginde gwurnida Ïlïyäng.” 48 Kaji nggoo no, a dïjï deꞌte ꞌdenggegenanu, gwalajanu ngwapa lïbä ngwurtiyi giyaanu yula ngwugekaji gidirula ngwudingaci Yicung ngwïyï. 49 A be ngwüjï ngwoko ari, “Gäbïcär ꞌdi aar engga manari Ïlïyä gwila gwung gïlängïdïyï.”

50 Anni ma Yicu gatu dulala gwulleny mana, a lïgïꞌrïm ꞌtü.

51 A gaji geꞌte geꞌte nggoo, a dired danni düllïyärälü gïdrü kobanu ngwüdïrïtïnänü ꞌtuꞌtu kiꞌrala ꞌdi ngwobani koralu ngwuranu rom, a dïyäng lagadalu a yoꞌrr upanu tütrüd. 52 A ngwumomo ïgtänälü na ngwanginu ngwudi ngwüjï ngwonyadu ngwanni ngwujuꞌru ngwayu gwerre, ꞌdïꞌrïꞌtälü ngwumidu. 53 Aar ꞌtüdä ngwumomanu, anni ma Yicu ꞌdïꞌrï, aar ele aar änï kündär ganni gijuꞌru a je ngwüjï ngwonyadu engga.

54 Anni ma kumndan gidi gwuꞌtulu giꞌdu küüꞌrï tudini (100) a lanni lijaar le ndi etadi ndi Yicung, engga dïyäng ngwulagadalu aar engga yiꞌral ꞌdar giyee yima ji, a je yedeny eny gwulleny aar ari, “ꞌDidanu nginde gwuru Gïjï gidi Ngwaalu!”

55 Ngwaw ngwonyadu ngwuju ngenone ndi ombajidi ngwüdünü ngwaalu ngwolanu. Ngwugwujana Yicung ꞌtuꞌtu Jälïl aar äpïjï yiiru. 56 ꞌDenggenanu, Märïyäm gwani Mäjïdälïyä gwuju, na Märïyäm nanni gwudi Yagub na Yüjïb, na nanni gwudi yïjï yidi Jäbädï.

57 Anni ma ngwaalu ru digera, a gur geꞌte gïnänü ila ngwaalu ngwani Rama gani Yüjïb, nginde gwuru ꞌto dooꞌra didi Yicu. 58 Ngwelaci Bilatijing ngwotacalu ngwanginu ngwe ngwudi Yicu. A Bilatij dinga ngwujaꞌri ndi ari aar je ätädä. 59 A Yüjïb ape ngwangina gwudi Yicu ngwuje pä direda nono dijaw nono diru lari. 60 Ngwape ngwugeꞌte gidimomanu düngün danni diyang dïpïdïng koꞌrr ngwüdätïꞌrïyä goꞌrralu gipa ngwügwüꞌrübäjï kïyï gidi dimomo ngwele. 61 A Märïyäm gwani Mäjïdälïyä na Märïyäm mana gwuꞌter, aar ji ndi jalu ngenone aar gwomajidanu dimomonga le.

62 Bïgänü nggwoo, anni ma gomon gidi Jaꞌrimani ele, a ngwurꞌdal ngwanni ngwuru ngweleny na Ngwübärrïjï oꞌrajidalu ndi Bilatij aar ci, 63 “Gwani deleny, änyängä lidiwayina ngwujaꞌri ngwudi diꞌduru ndoo daꞌtina ayu ndi ari gwaru, ‘Gwadi ayi ngwube jalu yomon täꞌrïl gwa aar be ꞌdïꞌrïyälü gwumidu.’ 64 Yäy gu no, dïngädï ngwujaꞌri aar etadi gidimomo ꞌdi a yomon ru täꞌrïl nunnu aaꞌti ngwooꞌra ngwüngün ngwila ngwape ngwangina ngwüngün yuꞌrimi la be ci ngwüjü nu gwuma ꞌdïꞌrï giyiꞌranyanu. Ïꞌdäjänü nggwee gwudi gwodaning gwa be kani ndi ïꞌdäjänü gwudi gwerreng.”

65 A je be Bilatij ci, “Apar ngwangida, ïndär ngaa etadi gidimomo anaku mïnä gu.” 66 No, aar ele aar acaji dimomo mama aar ngïdä aar geꞌtani ngwangida ndi aar gu etadi.