1 Anni ma Yicu medaji ngwujaꞌri ngwüngün ngwee ꞌdar ngwube ci ngwoꞌra ngwüngün, 2 “Ngaa lïlïngïdï gu ndi ari yomon giyoo yijalu rom yidi Yïꞌrïnyïnä yidi Dambdani a Gïjï gidi Dïjï dümnä ga aar ge ji guy ge ga aar pä küꞌrï.”

3 A ngwurꞌdal ngwanni ngwuru ngweleny ꞌdar na mbumbunga oꞌrajidalu ngwuꞌdun ngwudi yeleny ngwudi dirꞌdal danni diru giꞌra dani Giyaba 4 aar gu gegeꞌte yiꞌral awa aar määtä Yicung nyïm aar ꞌrinye. 5 Aar be ari, “Aaꞌti ya aar je ärrï giyomon giyee yidi yïꞌrïnyïnä ndi ari ngwüjï ngwa ꞌdïꞌrï güündä.”

6 Gaji giju ge Yicu Bidaniya ngwuꞌdun ngwudi gur gani Jamaan gwanni gwuru Daamu gwerre, 7 a daw deꞌte ila dapana gïbüngä giru goꞌrr gidi yila yiru giꞌreꞌreny yonyadu ngwiliny ngwila ngwuje bäläjï Yicung kiꞌranu gwundralu direl de gïdïmbür ndi eny.

8 Anni ma gu ngwooꞌra ngwüngün engga yiꞌral giyee no, aar kanu aar ari, “Geradalu gwani ange gwudi yila giyee? 9 Yila giyee yaadi ïllïnï ngwilinya ngwonyadu aar je ätädä ngwuwaya.”

10 A gu Yicu lenge ngwuje ci, “Ngaa larra ngaa be äbïngïnï dayanu ndee? Diminy ärrïjï yiꞌral yanni yijaw. 11 Ngaa la ji ngwuwayinga le giyomonalu ꞌdar a be äny, a la ꞌtüdï ladi ji giyomonalu ꞌdar. 12 Anni bäläjüng ngwangina ngwüny yila nono, yärrüng je ndi ari aar nyi geꞌte mama gwani gatidi gwüny. 13 Nggwa je ci ꞌdidanu, ma ngwüjï ondaji ngwujaꞌri ngwe ngwanni ngwujaw gïdïdlä ꞌdar, ngwaꞌti ngwa dodani yiꞌral giyee yärrä je daw ndee.”

14 A gur geꞌte ngwooꞌranu ngwudi Yicu ngwoo ꞌdï na rom (12) gani Yäwüdä Äjïgärïyütï ele ngwurꞌdal ngwanni ngwuru ngweleny 15 ngwuje ci, “Giru ange giny ätädä nunnu nga je mätäjä Yicung?” No aar ïꞌräcï bartad gwuru buta ꞌdï täꞌrïl (30) aar ätädä. 16 ꞌTuꞌtu gaji nggoo, ati Yäwüdä iye gomon ganni gadi je ge mätïjï.

17 Gomon ganni giru giꞌra gidi Yïꞌrïnyïnä yidi Ligiꞌra, a ngwooꞌra ngwudi Yicu ila aar otacalu, “Nga gwümïnä ne ar gu gïꞌtïjï ngwaalinga mama a gu ape Yïꞌrïnyïnä yidi Dambdani?”

18 A je Yicu ci, “Ändär kündär ngaa ele kur geꞌte ngaa ci, ‘Doorta daru gaji güngün gima ji gito nyii ladi ape Yïꞌrïnyïnä yidi Dambdani ngwooꞌra ngwe ngwüny ngwuꞌdun ngwunga.’ ” 19 A ngwooꞌra ele aar ärrï yiꞌral anaku ca je gu Yicu aar gegeꞌta yiꞌral mama yidi yïꞌrïnyïnä yidi Dambdani.

20 Anni ma ngwaalu ru digera, aar ndralu yirel ye ndi eny ngwooꞌra ngwe ngwüngün ngwuru ꞌdï na rom (12). 21 Anni ma aar ji ndi eny, a Yicu ari, “Nggwa je ci ꞌdidanu gweꞌte nggwo ꞌdanggalanu gwadiny gwe gwurlanu.”

22 Aar runi gwulleny aar ꞌdïꞌrä ndi otacalu lere lere, “Gwani Deleny, äny gwuro?”

23 A je Yicu ci, “Nginde gwanni gwuduwajiiny gwe yona kiny geꞌte pu, gwuru gwanni gwadiny gwe gwurlanu. 24 Gïjï gidi Dïjï dümnä gadi ele anaku üllïnäär gu kitabanu a be wäj bi gïdïjï danni dadi gwurlanu Gïjï ge gidi Dïjï dümnä! Yaadi jayani adinari dima ꞌti lïngïnä.”

25 A be Yäwüdä gwanni gwadi gwurlanu nginde gwe ci, “Gwani doorta, ꞌdidanu aaꞌti äny gwa ru?”

A Yicu ci, “Yäy nga gwuma gu ari ligoꞌro le lunga.”

26 Anni ma aar ji ndi eny, a Yicu ape gona ngwuci Ngwaalinga yäy ꞌtu ngwüꞌränü ngwätädä ngwoꞌra ngwüngün ngwuje ci, “Apar aang eny, ngwanginu ngwüny ngwuru ngwee.”

27 Ngwoꞌre ngwape ginya ngwuci Ngwaalinga yäy ꞌtu ngwuje ätädä ngwuje ci, “Ïyär gu nga nga ꞌdar. 28 Yïn yüny yiru giyee yani gekajidi* 26.28 Yitab yooko yati ari gwanni gwuyang. yanni yïrädälü gwani ngwüjï ngwonyadu gwani düdänïnïjï ngwüjänü ndi ke gwegen. 29 Nggwa je ci nggwa ꞌti a be gwa ïyï yügïrï aꞌtur ꞌtuꞌtu gomon gidi gweneng ꞌdi a gaji ila ganni gadi ar je ge ïyï yanni yiyang gwüpäng giyelenyanu yidi Papa gwüny.”

30 Anni ma aar geꞌte delnga, aar ꞌtü aar allu Kidotr gidi Ngwümïnïtï.

31 A je be Yicu ci, “Dilunga didi gweneng, ngaa ꞌdar la oꞌre kay ndiny gwujani ndi ari yüllïnä yaru nu,

33 A Butruj ci, “Manari la oꞌre ꞌdar aar ang gatani, nggwaꞌti gwa ang gatani.”

34 A Yicu ci, “ꞌDidanu nggwa ang ci dilunga didi gweneng gwerre gwerre ndi gokto urri, a gwuny nyïꞌrïnï yomonanu täꞌrïl.”

35 A be Butruj ari, “Manari aar ani yiꞌrany nda gwa ayi, nggwa ꞌti gwa ang nyïꞌrïnï aꞌtur.” A gu ngwooꞌra ꞌdar ari ꞌto no.

36 A Yicu ꞌdïꞌrï aar ele ngwooꞌra ngwe ngwüngün aar ele ngwaalu gwani Jujimani ngwuje ci, “Jaralu ngene nyi ni ꞌdonggalu ngenone nyi otaca Ngwaalingalu.” 37 Ngwapani Butrujing na yïjï rom yidi Jäbädï ngwuruni gwulleny a ligor pänü. 38 Ngwuje ci, “Lingeno lüny lirunu gwulleny lani yiꞌrany jaralu ngene ar jalu ngwäy ngwe.”

39 Ngwüꞌtänü ꞌdenggen gwooko ngwüjürbälü ngwümïꞌrä giꞌra güngün gïdïyäng ngwotaci ngwaalingalu ngwari, “Papa gwüny, manari yädï gu, äbräjïny yiꞌrendenya giyee a be aaꞌti yani nono anaku bupi nyi gu, aar be ru anaku bupa gu.”

40 Ngwube kwodalu ngwooꞌra ngwüngün ngwuje mbuji ngwundru. Ngwube ci Butrujing, “Nga nga laꞌti burna ndi ar jalu ngwäy ngwe gaji geꞌte pu ꞌdogo?” Ngwuje ci, 41 “Jaralu ngwäy ngwe ngaa otaci Ngwaalingalu ndi ari aaꞌti dijegoꞌrr da je ïdäjï. Lïgïꞌrïm lojema nono a be ngwanginu ngwamiꞌratu.”

42 A Yicu oꞌre ngwüꞌtänü mana ndi otaca Ngwaalingalu ngwuje ci, “Gwani Papa gwüny, manari gay gaꞌti ndi äbrï yiꞌrendenya giyee ndi ari yinje ïyï, gäbïcä je aar gu ru anaku bupa gu.”

43 Ngwukwodalu ngwooꞌra ngwüngün ngwuje mbuji ngwuma oꞌre ngwuma ndri ndi ari ngwuma je yar apani ngwäy. 44 No ngwuje gatani ngwoꞌre komon ganni giralu täꞌrïl ndi otaci Ngwaalingalu ngwujaꞌri ngweꞌte ngweꞌte. 45 Ngwoꞌraci ngwoꞌra ngwüngün ngwuje ci, “Ngaa gilona ndi ndri ngaa gatu düwä? Ärär be gaji gima be ila gito ganni gadi aar ge gwurlanu Gïjï gidi Dïjï dümnä aar ätädä ngwüjü ngwanni ngwuki. 46 ꞌDïꞌrälü ar ele! Gwanni gwadiny gwe gwurlanu gwuma obana!”

47 Anni mung jina ndi ondaji, a Yäwüdä ngwooꞌranu ngwükäjäär je ngwoo ngwuru ꞌdï na rom (12) obana ngwapana ngwüjï ngwe ngwonyadu ngwugwodananu yalal ye na yuura, ngwükäjä je ngwurꞌdal ngwanni ngwuru ngweleny na mbumbunga. 48 A je be Yäwüdä gwanni gwadi gwurlanu Yicu gwe enggacana giꞌremna ndi ari, “Gwanni gwadiny aganni giyinenanu, gur giru be ngaa be määtä.” 49 A gu Yäwüdä eladanu ndi Yicu ngwuci, “Nggwagannanga gwani Doorta!” Ngwaganni giyenenanu.

50 A Yicu ci, “Gwani dimaad, ärrï je yanni yïndädä gu.” A be ngwüjï ꞌdonggada, aar üꞌrü Yicungalu cïꞌdüd aar määtä. 51 A gur geꞌte ngwüjänü ngwanni ngwujaar Yicunga le gwalla galala nggee mïꞌrï dïnädä didi dirꞌdal danni diru giꞌra ngwüꞌrïdä länï lüngün.

52 A Yicu ci, “Gwäꞌräjä galala gunga käl güngün! Ndi ari ꞌdar lanni lati gwalli galala, ga aar ge ayi. 53 Nga gwaru nggwa ꞌti burna ndi päcï Papangalu gwüny aar nyi ükäcä yïꞌrrä ngwüüꞌrï ngwonyado? 54 A be adinari aar gu ru no, a be ngwujaꞌri ngwanni ngwüllïnä ngwa be ätä ngwäyänü awa giyiꞌral yanni yaru aar gu ru no?”

55 Gaji nggoo a Yicu ondaci ngwüjü ngwuje ci, “Ngaa lïꞌtüdï yalal yanu na yuura ndiny määtä, ngaa laru nggwüꞌdïꞌrïyä yärä? A lati pa ji yomon ꞌdar ngwämrä ngwudi gobo nyi enggaci ngwüjü ngwujaꞌri ngwudi Ngwaalu nyii ꞌti mätï! 56 A be yiru gu giyee no ꞌdar ndi ari aar ätï ngwäyänü yanni yüllïnä kitabanu gidi ngwïjïr!” A be ngwooꞌra ngwüngün abri ꞌdar aar badaji!

57 A be ngwüjï ngwoo ngwuma määtä Yicung, aar be ape aar gwe ele gidirꞌdal diru giꞌra dani Giyaba a gu ngwoorta ngwudi yobo na mbumbunga oꞌrajidalu. 58 A be Butruj gwujani gwüꞌtüdänü ꞌdi aar obani kubanu gidi dirꞌdal ndoo diru giꞌra. Ngwänï aar jalu ngwangidanga le nunnu ngwengga yiꞌral yadi ruꞌtaa.

59 A ngwurꞌdal ngwanni ngwuru ngweleny na ꞌdar lidi ngwämrä aar mïnï ngwujaꞌralu ngwadi aar je üꞌrïdä Yicung nono yiꞌduru aar gu ꞌrinyida. 60 Aar je be ꞌti mbuja yere ngwüjï ngwapaar je ngwonyadu nunnu aar üꞌrïdä yiꞌduru nono. A be gwodanalu a ngwüjï ila rom 61 aar ari, “Aꞌri nggwee gwaru, ‘Äny gwa pä gobalu nggee gidi Ngwaalu giny odada mana yomon täꞌrïl.’ ”

62 A be dirꞌdal danni diru giꞌra ꞌdïꞌrï ngwüdünälä ngwotaci Yicungalu ngwuci, “Nga gwäꞌtüdï gwadi ondaji ngwujaꞌri ngwere ngwujaꞌri ngwee ngwaraar ngwe ꞌdunggunga? Ngwujaꞌri ngwuru ange ngwee ngwaru ngwe ngwüjï ꞌdunggunga?” 63 A be Yicu gwugwundi. A dirꞌdal danni diru giꞌra ci, “Äny gwümïꞌridïyängä yiꞌrany Ngwaalu ngwe ngwanni ngwumidu, enggaci nje manari nga gwuru gwanni Gwubrutaar yelenya Gïjï gidi Ngwaalu.”

64 A Yicu ci, “Yäy yiru gu anaku ara gu! A be nggwa je ci ꞌdar ndi ari gweere, ngaa la engga Gïjü gidi Dïjï dümnä gijalu kaama gidi Ngwaalu ngwanni ngwuru yiima ga aang engga güllü gïyïbäꞌrälä kerala.”

65 A dirꞌdal ndoo diru giꞌra diriti ngwuredanu ngwüngün ngwondaji ngwari, “Nginde gwuma ondaji ngwujaꞌri ngwanni ngwukiya ngwürïnyänü ngwudi Ngwaalu, a lïmïnä mana ngwüjü ngwonyadu ngwedang. Ngaa lima ꞌdingini long Ngwaalinga gwüngün nggwee gwaru nggwe. 66 Ngaa laraa?”

Aar ci, “Gwädï gu yiꞌrany nono!”

67 Aar be gwonynya ngwäyänü, aar pï yiꞌrundu ye yegen. A loko pï ngwurke ngwe. 68 Aar ari, “Allija yïjïrä nga gwanni Gwubrutaar yelenya nje enggaci yärü gwanni gwümïꞌrïdängä?”

69 Kaji nggoo a Butruj ji ndi jalu poor kubanu, a dïnäd diru gera ila ngwuci, “Ngaa liju ꞌto Yicunga le gwudi Jälïlïng.”

70 A je Butruj nyïꞌrïnädä ꞌdar ngwari, “Nggwa ꞌti lïngïdï ngwujaꞌri ngwee ngwondaja ngwe.”

71 Ngwüꞌtü gïlängïr poor a dïnäd deꞌte lenge mana ngwuci ngwüjü ngwanni ngwuju ngenone, “Aꞌri nggwee gwujaar Yicunga le gwudi Najrang!”

72 A Butruj oꞌre ngwünyïꞌrïnï yomonanu rom ngwümïꞌrï yiꞌrany ngwari, “Äny gwaꞌti lïngïdï guru nggee!”

73 Gwooko no a ngwüjï ngwanni ngwüdünädï ngeno, aar elada Butrujing aar ci, “ꞌDidanu, nga gwuru gwanni gwujaar Yicunga le, ndi ari nga gwondaja lingla legen.”

74 A Butruj ꞌdïꞌrï ngwari aar nyi gu ꞌtäjï ngwünyü ngwuje mïꞌrïcï yiꞌrany ngwari, “Äny gwaꞌti lïngïdï guru nggee.” Kaji nggoo, a gokto urra. 75 A be Butruj diwayini ngwujaꞌri ngwudi Yicu ngwanni ngwucung ngwe ndi ari, “Gwerre gwerre ndi gokto urri, nga gwuny nyïꞌrïnï yomonanu täꞌrïl.” Ngwüꞌtü poor ngwari aring gwuꞌralu jicir.