3
དཀོན༌མཆོག༌གི༌ ཨིད༌ཤེས༌།
3:1 ནེ༌ 9
1 ཅི༌ ཏེ༌ནེ༌ ཡ༌ཧུ༌དཱ༌པ༌ཞིག༌ ཨིན༌ཅེས༌པོའེ༌ ཕན༌ཐོགས༌ ཡོད༌ཏེ༌ ཨིན༌ནོག༌ག༌, ཡ༌ སུན༌ནད༌ ཅོ༌ཅེས༌པོའ༌ ཅི༌ རིན༌ཞིག༌ ཡོད༌ཏེ༌ ཨིན༌ནོག༌? 2 འོ༌ན༌, ཕན༌ཐོགས༌ མང༌པོ༌ ཡོད༌ཏེ༌ ཨིན༌ནོག༌། ཏང༌པོ༌རང༌ དཀོན༌མཆོག༌གི༌ ཁོང༌རང༌ངི༌ བཀའ༌གུན༌ ཡ༌ཧུ༌དཱ༌པ༌གུན༌ལ༌ སྟད༌ད༌ ཛདས༌།
3 གལ༌ཏེས༌ ཏེ༌གུན༌ནི༌ ཕྲོ༌ནེ༌ ཁ༌ཅིག༌ག༌ ཏད༌པ༌ མེད༌ན༌ ཅི༌ ཁོང༌གུན༌ལ༌ ཏད༌པ༌ མེད༌ཅེས༌པོའེ༌, དཀོན༌མཆོག༌གའང༌ ཨིད༌ཤེས༌ མེད༌ཁན༌ གྱུར༌ར༌ནོག༌ག༌? 4 མ༌ནེ༌ གྱུར༌ར༌ མ༌ནོག༌། ཚང༌མ༌ ཟུན༌ཇན༌ ཨིན༌ནའང༌, དཀོན༌མཆོག༌ ཁོང༌རང༌ངི༌ ཞལ༌ཆད༌གུན༌ནི༌ཀ༌ དྲང༌པོ༌ ཞུགས༌ས༌ནོག༌, ཀ༌ཟུག༌ དམ༌པའེ༌ སུང༌རབས༌སི༌ ནང༌ང༌ བྲིས༌ཏེ༌ ཨིན༌ནོག༌,
"ཉེ༌རང༌ངི༌ མོལ༌ཁན༌ ཚང༌མ༌ དྲང༌པོ༌ ཨིན༌ཁན༌ ལྟན༌ཨིན༌,
ཡང༌ ཉེ༌རང༌ང༌ ཁྲིམས༌ཁུང༌ངི༌ ནང༌ང༌ གྱལ༌ ཐོབ༌ཨིན༌། * 3:4 སུང༌གུར༌རི༌ སྤེ༌ཆའེ༌ 51:4 "
5 ཨིན༌ནའང༌ ཁ༌ཅིག༌གི༌ ཟེར༌སྲིད༌ཅེས༌ ཨིན༌ནོག༌, "ང༌དང༌ངི༌ སྡིག༌པའེ༌ ལས༌གུན༌ནི༌ དཀོན༌མཆོག༌ དྲང༌པོ༌ ཨིན༌ཁན༌བོ༌ མང༌ང༌ སལ༌པོ༌ ཅོས༌ཏེ༌ ལྟན༌ནད༌ན༌, ཏེ༌ནེ༌ ཁོང༌ངི༌ ང༌དང༌གུན༌ལ༌ ཆད༌པ༌ སལ༌ཅེས༌པོ༌ མི༌འོས༌པ༌ཞིག༌ མ༌ནོག༌ག༌?" ༼ཏེ༌གུན༌, མི༌ཞིག༌གི༌ སམ༌ཚུལ༌ ནང༌ཞིན༌ ཟེར༌ཏེ༌ ཨིན༌ནོག༌༽ 6 ཏན༌ཏན༌ མ༌ནོག༌། གལ༌ཏེས༌ མི༌འོས༌པ༌ ཨིན༌པིན༌ན༌, ཏེ༌ནེ༌ དཀོན༌མཆོག༌གི༌ ཇིག༌རྟེན༌པ༌གུན༌ལ༌ ཁྲིམས༌ཅད༌ ཀ༌ཟུག༌གི༌ ཛད༌ཨིན༌? 7 ཁ༌ཅིག༌གི༌ ཟེར༌རྒྱུ༌ ཏངས༌ཏེ༌ ཟེར༌སྲིད༌ཅེས༌ ཨིན༌ནོག༌, "གལ༌ཏེས༌ ངའེ༌ ངན༌པ༌ ཅོ༌ཅེས༌པོའེ༌, དཀོན༌མཆོག༌ དྲང༌པོ༌ ཨིན༌ཁན༌བོ༌ མང༌ང༌ སལ༌པོ༌ ཐོང༌ཏེ༌, ཁོང༌ང༌ སྤལ༌ ཐོབ༌བད༌ན༌, ཏེ༌ནེ༌ ཅིའ༌ དཀོན༌མཆོག༌གི༌ ངའ༌ སྡིག༌ཅན༌ ཨིན༌ཁན༌བོའེ༌ ཕིའ༌ ཤི༌ཅེས༌སི༌ ཁྲིམས༌ཅད༌ ཛད༌ད༌ནོག༌?" 8 ཡང༌ ཁ༌ཅིག༌གི༌, "ཟང༌པོ༌ མང༌ང༌ བྱུང༌ཅེས༌སི༌ ཕིའ༌ ངན༌པ༌ རིག༌ ཅོ༌ཤིག༌" ཟེར༌དུག༌ ཟེར༌ཏེ༌ ང༌ཞའེ༌ གྱབ༌གལ༌ལ༌ ཟུན༌ ཏང༌ང༌ནོག༌། ཏེ༌ཟུག༌ ཟེར༌ཁན༌གུན༌ལ༌ དཀོན༌མཆོག༌གི༌ ཆོགས༌ནེ༌ ཤི༌ཅེས༌སི༌ ཆད༌པ༌ ཐོབ༌ཅེས༌པོ༌ འོས༌པ༌ ཨིན༌ནོག༌།
མི༌སུ༌ཞིག༌གའང༌ དྲང༌པོ༌ མ༌ནོག༌།
3:9 ནེ༌ 20
9 ཏེ༌ནེ༌ དོར༌ལྡུས༌ཏེ༌ ཅི༌ ང༌དང༌ ཡ༌ཧུ༌དཱ༌པ༌གུན༌ ཞན༌མ༌གུན༌ནི༌ སང༌ གྱལ༌ལ༌ ཨིན༌ ཟེར༌ ཐུབ༌ཨིན༌ན༌? མན༌, མ༌ནེ༌ ཟེར༌ མི༌ཐུབ༌། ཅིའ༌ཟེར༌ན༌ ང༌ཞའེ༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ ཚང༌མའ༌, སྡིག༌པའེ༌ ཝང༌ངི༌ ཡོག༌ག༌ ཡོད༌ཁན༌བོ༌ ལྟན༌ཚར༌ཏེ༌ ཨིན༌། 10 ཀ༌ཟུག༌གི༌ དམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛདས༌,
"སུ༌ཞིག༌གའང༌ དྲང༌པོ༌ མ༌ནོག༌, ཅིག༌ཅིག༌གའང༌།
11 སུ༌ཞིག༌གིའང༌ ཧ༌གོ༌ཅེས༌སི༌ རྩོན༌གྲུས༌ མ༌ཅོའ༌ ཨིན༌ནོག༌,
སུ༌ཞིག༌གིའང༌ དཀོན༌མཆོག༌ དྲང༌པོ༌ ཤེས༌ཉིན༌ མེད༌ཏེ༌ ཨིན༌ནོག༌།
12 ཚང༌མའེ༌ དཀོན༌མཆོག༌ག༌ གྱབ༌གྱུར༌ཅེས༌པོའེ༌ ཚང༌མ༌ རིན༌མེད༌ གྱུར༌ཏེ༌ ཨིན༌ནོག༌།
སུ༌ཞིག༌གིའང༌ ཟང༌པོ༌ ཅོའ༌ མ༌ནོག༌, ཅིག༌ཅིག༌གིའང༌། † 3:12 སུང༌གུར༌རི༌ སྤེ༌ཆའེ༌ 14:1 ནེ༌ 3 དང༌ 53:1 ནེ༌ 3 དང༌ ལོབ༌པོན༌ ཟེར༌ཁན༌ནི༌ སྤེ༌ཆའེ༌ 7:20
13 ཁོང༌གུན༌ནི༌ སྤེ༌ར༌གུན༌, བེ༌ཏེ༌ ཡོད༌ཁན༌ནི༌ རོམ༌ཁང༌ངི༌
ནང༌ནེ༌ ཡོང༌ཁན༌ནི༌ ཏྲི༌ངན༌ ཙོགས༌ ཨིན༌ནོག༌།
ཁོང༌གུན༌ནི༌ ལྕེ༌གུན༌ ཟུན༌ནི༌ གངས༌ཏེ༌ ཡོད༌ཏེ༌ ཨིན༌ནོག༌། ‡ 3:13 སུང༌གུར༌རི༌ སྤེ༌ཆའེ༌ 5:9
ཏུག༌རུལ༌ལི༌ ཁལ༌པག༌ནེ༌ ཏུག༌ བུད༌ད༌ནོག༌། § 3:13 སུང༌གུར༌རི༌ སྤེ༌ཆའེ༌ 140:3
14 ཁོང༌གུན༌ནི༌ ཁའ༌, ངན༌ ཏབ༌ཅེས༌ དང༌ ཕོག༌ཅེས༌སི༌ སྤེ༌རའེ༌ གངས༌ཏེ༌ ཨིན༌ནོག༌། * 3:14 སུང༌གུར༌རི༌ སྤེ༌ཆའེ༌ 10:7
15 ཁོང༌གུན༌ མི༌སད༌ཅེས༌ལ༌ རིངས༌ས༌ནོག༌།
16 ཁྲེས༌སྟོར༌ ཅོ༌ཅེས༌ དང༌ རྡུག༌པོ༌ ཏང༌ཅེས༌ གུན༌
ཁོང༌གུན༌ནི༌ སྟིང༌རང༌ནེ༌ གྲུལ༌ལ༌ནོག༌།
17 ཁོང༌གུན༌ལ༌ ཞི༌དེ༌ ལམ༌བོ༌ ཤེས༌ས༌ མ༌ནོག༌། † 3:17 ཡེ༌ཤ༌ཡཱའེ༌ སྤེ༌ཆའེ༌ 59:7, 8 "
18 དཀོན༌མཆོག༌གི༌ ཇིགས༌ ཁོང༌གུན༌ནི༌ ནང༌ང༌ མ༌ནེ༌ མེད༌ཏེ༌ ཨིན༌ནོག༌།"‡ 3:18 སུང༌གུར༌རི༌ སྤེ༌ཆའེ༌ 36:1
19 ཏན༌ཏན༌ལ༌ ཁྲིམས༌པོ༌, ཁྲིམས༌ ཐོབ༌ཁན༌ནི༌ མི༌གུན༌ནི༌ ཕིའ༌ ཨིན༌ནོག༌། ཁྲིམས༌ སལ༌ཅེས༌སི༌ གྱུན༌ཚན༌བོ༌ ནི༌ མི༌གུན༌ལ༌ སྐྱོན༌ ཅོ༌ཅེས༌ནེ༌ སྒག༌ཅེས༌, ཡང༌ ཇིག༌རྟེན༌ གང༌མ༌ དཀོན༌མཆོག༌གི༌ སྐུན༌དུན༌ལ༌ ནོངས༌ཅན༌ ཨིན༌ཁན༌བོ༌ ལྟན༌ཅེས༌པོ༌ ཨིན༌ནོག༌། 20 ཅིའ༌ཟེར༌ན༌ སུ༌ཞིག༌གའང༌ ཁྲིམས༌སི༌ བཀའ༌ ནང༌ཞིན༌ ཅོ༌ཅེས༌ ཅིག༌པོ༌ནེ༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ གྱུར༌ར༌ མ༌ནོག༌། ཁྲིམས༌སི༌ ང༌དང༌གུན༌ ཙམ༌ཤིག༌ སྡིག༌ཅན༌ ཨིན༌ཁན༌བོ༌ སལ༌པོ༌ ཅོས༌ཏེ༌ ལྟན༌ན༌ནོག༌།
ཏད༌པ༌ གྱུད༌ཏེ༌ དྲང༌པོ༌ གྱུར༌ཅེས༌།
3:21 ནེ༌ 31
21 ཨིན༌ནའང༌ ཏ༌ དཀོན༌མཆོག༌གི༌ ང༌དང༌གུན༌ལ༌ ཁོང༌ངི༌ སྐུན༌དུན༌ལ༌ ཁྲིམས༌ གྱུད༌ཏེ༌ མན༌པ༌, དྲང༌པོ༌ གྱུར༌ཅེས༌སི༌ ཞན༌ལམ༌བོ༌ ལྟན༌ན༌ ཛདས༌, ཀ༌ཟུག༌ མོ༌ཟེས༌ དང༌ ལུང༌སྟོན༌པ༌གུན༌ནི༌ སྤེ༌ཆ༌གུན༌ནི༌ ནང༌ང༌ ཞལ༌ཆད༌ ཛད༌ཏེ༌ ཨིན༌ནོག༌། 22 ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ གྱུད༌ཏེ༌, ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེའ༌ཛད༌ཏེ༌ ཨིན༌ནོག༌། ཡང༌ ང༌དང༌ སུ༌རིག༌ ཨིན༌ནའང༌ ཅའང༌ ཁྱད༌ མེད༌པ༌ ཨིན༌ནོག༌།
23 མི༌ཚང༌མའེ༌ སྡིག༌པ༌ ཅོས༌ཏེ༌ ཨིན༌ནོག༌, ཡང༌ དཀོན༌མཆོག༌གི༌ ང༌དང༌ངི༌ ཕིའ༌ ཟིར༌རྗིད༌དི༌ ཐུགས༌དོད༌ ཡོད༌ཁན༌ནི༌ ཚད༌ ཚོག༌པ༌ ང༌དང༌ ལེབ༌ མ༌ཐུབ༌བ༌ ཨིན༌ནོག༌། 24 ཨིན༌ནའང༌ དཀོན༌མཆོག༌གི༌, ང༌དང༌གུན༌ལ༌ འོས༌པ༌ མན༌ཁན༌ནི༌ ཐུག༌རྗེ༌ གྱུད༌ཏེ༌ དྲང༌པོ༌ ཐེའ༌ ཛདས༌། ཁོང༌ངི༌ ཏེ༌བོ༌ ཅོའ༌ ཛདས༌, ནམ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ ང༌དང༌གུན༌ ང༌དང༌ངི༌ སྡིག༌པའེ༌ ཚེ༌ཡོག༌ནེ༌ ཐར༌ ཅུག༌ག༌ ཛདས༌། 25 དཀོན༌མཆོག༌གི༌ ཡེ༌ཤུ༌ སྡིག༌པའེ༌ ཏོན༌ལ༌ ཆོད༌པའེ༌ ཚུལ༌ལ༌ ཕུལ༌ལ༌ ཛདས༌། ཡེ༌ཤུའི༌ སྐུ༌སྲོག༌ ཆོད༌པ༌ ཕུལ༌ཏེ༌ ཁྲག༌ཕོའ༌ ཛད༌ཁན༌བོའེ༌ཀ༌ ཨིད༌ཤེས༌ ཅོ༌ཁན༌ནི༌ མི༌གུན༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེའ༌ ཛད༌ད༌ནོག༌། འི༌ ཆོད༌པ༌བོའེ༌ དཀོན༌མཆོག༌ འོས༌པ༌ ཛད༌ཁན༌བོ༌ ལྟན༌ན༌ནོག༌, ནམ༌ ཁོང༌ངི༌ སྔུན༌ལ༌ སྡིག༌པ༌ ཅོ༌ཁན༌གུན༌ལ༌ ཆད༌པ༌ མ༌སལ༌ལ༌ སྲན༌ཏེ༌ ཞུགས༌། 26 ཟོད༌པ༌ སྲན༌ཏྲེ༌ ཞས༌ཏེ༌ དཀོན༌མཆོག༌གི༌ ཏེ༌བོ༌ ཅོའ༌ ཛདས༌, ཨིན༌ནའང༌ ཏ༌ དག༌ས༌ ཁོང༌ངི༌ ང༌དང༌གུན༌ནི༌ སྡིག༌པའེ༌ ཏོན༌ལ༌ ཡེ༌ཤུ༌ སྲོག༌ཆོད༌ལ༌ ཕུལ༌ལ༌ ཛདས༌། ཏེ༌ཟུག༌ ཅོའ༌ ཛད༌ཅེས༌པོའེ༌, དཀོན༌མཆོག༌གི༌ ཁོང༌རང༌ དྲང༌པོ༌ ཨིན༌ཁན༌ དང༌ ཡེ༌ཤུའི༌ ནང༌ང༌ ཏད༌པ༌ ཅོ༌ཁན༌གུན༌ དྲང༌པོ༌ ཅོའ༌ ཛད༌ཁན༌བོ༌ ལྟན༌ན༌ ཛདས༌།
27 ཏེ༌ནེ༌ ཅི༌ གྱུན༌ཚན༌བོའེ༌ ཕིའ༌, ང༌དང༌ངི༌ ཕོ༌སོ༌ ཅོ༌ཨིན༌? ཅའང༌ངི༌ ཕིའང༌ ཅོ༌ མི༌ཉན༌, ཅིའ༌ཟེར༌ན༌ ང༌དང༌ སྡིག༌པ༌ མེད༌ཁན༌ ཐེའ༌ ཛད༌ཅེས༌པོ༌ ནི༌ ཁྲིམས༌ལ༌ ཁའ༌ཉན༌ཅེས༌ མན༌པ༌, ཏད༌པ༌ ཅོ༌ཅེས༌པོའེ༌ཀ༌ རག༌ལས༌ཏེ༌ ཨིན༌ནོག༌། 28 སོང༌པ༌སང༌ ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཁྲིམས༌ ཁའ༌ཉན༌ཅེས༌པོའེ༌ དྲང༌པོ༌ ཐེའ༌ མ༌ཛད༌ད༌, ཏད༌པ༌ ཅོ༌ཅེས༌པོའེ༌ དྲང༌པོ༌ ཐེའ༌ ཛདས༌། 29 ཅི༌, དཀོན༌མཆོག༌ ཡ༌ཧུ༌དཱ༌པ༌ ཅིག༌པོའེ༌ དཀོན༌མཆོག༌ ཞུགས༌ཏེ༌ ཨིན༌ནོག༌ག༌? ཁོང༌ ཡ༌ཧུ༌དཱ༌པ༌ མན༌ཁན༌གུན༌ནིའང༌ དཀོན༌མཆོག༌ ཞུགས༌ཏེ༌ མ༌ནོག༌ག༌? འོ༌ན༌, ཁོང༌ ཨིན༌ནོག༌། 30 དཀོན༌མཆོག༌ ཅིག༌ ཞུགས༌ཏེ༌ ཨིན༌ནོག༌, ཡང༌ ཁོང༌ངི༌ མི༌གུན༌ ཏད༌པ༌ ཅིག༌པོ༌ གྱུད༌ཏེ༌ ཁོང༌རང༌ངི༌ སྐུན༌དུན༌ལ༌ དྲང༌པོ༌ ཐེའ༌ ཛད༌ད༌ནོག༌, ཡ༌ཧུ༌དཱ༌པ༌ ཨིན༌གྲོ༌ ཡ༌ ཡ༌ཧུ༌དཱ༌པ༌ མན༌གྲོ༌། 31 ཅི༌ ཏེ༌ནེ༌ ང༌དང༌གུན༌ནི༌ ཏད༌པ༌བོ༌ ཁག༌ཅན༌ རྩིས༌པ༌, ཁྲིམས༌པོ༌ ཞེད༌ནའང༌ གྲིག༌ཏེ༌ ཨིན༌ནོག༌ག༌? མ༌ནེ༌ མ༌ནོག༌། ངོས༌པོའ༌ ཏད༌པ༌ ཡོད༌ པ༌སང༌, ང༌དང༌ངི༌ རང༌ཞིན༌ལ༌, ཁྲིམས༌པོ༌ དྲན༌དྲའ༌ གྲུབ༌ ཅུག༌ག༌ནོག༌།
*3:4 3:4 སུང༌གུར༌རི༌ སྤེ༌ཆའེ༌ 51:4
†3:12 3:12 སུང༌གུར༌རི༌ སྤེ༌ཆའེ༌ 14:1 ནེ༌ 3 དང༌ 53:1 ནེ༌ 3 དང༌ ལོབ༌པོན༌ ཟེར༌ཁན༌ནི༌ སྤེ༌ཆའེ༌ 7:20
‡3:13 3:13 སུང༌གུར༌རི༌ སྤེ༌ཆའེ༌ 5:9
§3:13 3:13 སུང༌གུར༌རི༌ སྤེ༌ཆའེ༌ 140:3
*3:14 3:14 སུང༌གུར༌རི༌ སྤེ༌ཆའེ༌ 10:7
†3:17 3:17 ཡེ༌ཤ༌ཡཱའེ༌ སྤེ༌ཆའེ༌ 59:7, 8
‡3:18 3:18 སུང༌གུར༌རི༌ སྤེ༌ཆའེ༌ 36:1