2
སྡིག༌པ༌ ཅོ༌ཅེས༌པོའེ༌ཀ༌ དཀོན༌མཆོག༌གི༌ ཁྲིམས༌ཅད༌།
2:1 ནེ༌ 16
1 ཁྱོ༌ཞའེ༌ ཏེ༌ སྡིག༌པ༌ ཅོ༌ཁན༌ནི༌ མི༌གུན༌ལ༌ སྐྱོན༌རྗོད༌ ཅོ༌ ཉན༌ན༌ནོག༌ སམ༌མ༌ནོག༌, ཨིན༌ནའང༌ ཁྱོ༌ཞའང༌ ཏེ༌གུན༌ ཙོགས༌ སྡིག༌ཅན༌ ཨིན༌ནོག༌, ཡང༌ དཀོན༌མཆོག༌གི༌ ཁྲིམས༌ཅད༌ནེ༌ ཐར༌མི༌ཐུབ༌། ཁྱོ༌ཞའེ༌ ཞན༌མ༌གུན༌ལ༌ ཁྲིམས༌ཅད༌ ཏང༌ ཟ༌ནེ༌ ཁྱོ༌ཞའེ༌ ཁྱོ༌ཞ༌རང༌ང༌ སྐྱོན༌རྗོད༌ ཅོས༌ཏེ༌ ཨིན༌ནོག༌, ཅིའ༌ཟེར༌ན༌ ཁྱོ༌ཞེའང༌ ཏེན༌ན༌ ཙོགས༌ ལས༌ ཅོས༌ཏེ༌ ཨིན༌ནོག༌། 2 དཀོན༌མཆོག༌གི༌ དྲང༌པོ༌ ཁྲིམས༌ཅད༌དི༌ ནང༌ང༌, ཏེ༌ཙོགས༌ ལས༌ ཅོ༌ཁན༌གུན༌ལ༌ ཆད༌པ༌ སལ༌ལ༌ ཛད༌ཅེས༌པོ༌ ང༌དང༌གུན༌ལ༌ གྱུས༌ཨིན༌ནོག༌། 3 ཞན༌མ༌ ཏེ༌ཟུག༌ ལས༌ ཅོ༌ཁན༌གུན༌ལ༌ སྐྱོན༌རྗོད༌ ཅོ༌ཁན༌, ཁྱོ༌ཞ༌གུན༌ནི༌ཀ༌ དཀོན༌མཆོག༌གི༌ ཁྲིམས༌ཅད༌ མི༌བབས༌ ཅིའ༌ སམ༌མ༌རག༌, ནམ༌ ཁྱོ༌ཞེའང༌ ཏེན༌ན༌ ཙོགས༌ ལས༌ ཅོའད༌? 4 དཀོན༌མཆོག༌ ནི༌, ཁྱོ༌ཞ༌གུན༌ ཉམ༌པོ༌ ཙམ༌ཤིག༌ ཀའ༌ཀྲིན༌ཅན༌, ཟོད༌སེམས༌ཅན༌ དང༌ ཟོད༌པ༌ཅན༌ ཨིན༌ཁན༌བོ༌ ཁྱོ༌ཞ༌གུན༌ལ༌ ཐོང༌ང༌ མི༌དུག༌ག༌? ཁོང༌ངི༌ ཀའ༌ཀྲིན༌ནི༌ གྱུན༌ཚན༌བོ༌ ནི༌, ཁྱོ༌ཞའ༌ སྡིག༌པ༌གུན༌ནི༌ ཀ༌ནེ༌ གྱུར༌ཏེ༌ གྱོད༌པ༌ ཅོ༌ཅེས༌ལ༌ ཁྲིད༌ཅེས༌པོ༌, ཁྱོ༌ཞ༌གུན༌ལ༌ ཧ༌གོའ༌མེ༌རག༌ག༌?
5 ཨིན༌ནའང༌ ཁྱོ༌ཞའ༌ སྐྱོང༌པོ༌ དང༌ ཁྱོ༌ཞ༌རང༌ངི༌ སྡིག༌པའེ༌ ཀ༌ནེ༌ གྱུར༌ཏེ༌ གྱོད༌པ༌ མི༌ཅོ༌ཅེས༌པོའེ༌, ཁྱོ༌ཞའེ༌ ཁྱོ༌ཞ༌རང༌ངི༌ཀ༌ ཇིགས༌ནང༌ཅན༌ནི༌ ཆད༌པ༌གུན༌ སག༌ཨིན༌ ཨིན༌ནོག༌། དཀོན༌མཆོག༌གི༌ ཐུགས༌སྲོའེ༌ ཞག༌པོ༌ ལེབ༌ཨིན༌ ནམ༌ དཀོན༌མཆོག༌གི༌ དྲང༌པོའེ༌ ཁྲིམས༌ཅད༌པོ༌ སྔོན༌ཨིན༌། 6 དཀོན༌མཆོག༌གི༌ "མི༌ རེ༌རེའ༌ རང༌རང༌ངི༌ ལས༌ ནང༌ཞིན༌ ཁྲིམས༌ཅད༌ ཛད༌ཨིན༌། * 2:6 སུང༌གུར༌རི༌ སྤེ༌ཆའེ༌ 62:12 དང༌ ཏམ༌སྤེའེ༌ སྤེ༌ཆའེ༌ 24:12" 7 དཀོན༌མཆོག༌གི༌ སལ༌ལ༌ ཛད༌ཅེས༌སི༌ སྤལ༌, རྩི༌ཝ༌ དང༌ མ༌ནེ༌ མི༌ཤི༌ཅེས༌སི༌ ཟུགས༌པོ༌, ཟོད༌པ༌ ཉམ༌པོ༌ ལས༌ ཟང༌པོ༌ ཅོ༌ཨིན༌, ཙལ༌ཁན༌གུན༌ལ༌ ཁོང༌ངི༌ ཐའ༌མེད༌པའེ༌ མི༌ཚེ༌བོ༌ སལ༌ལ༌ ཛད༌ཨིན༌། 8 ཨིན༌ནའང༌ རང༌ངི༌ ཕིའ༌ མི༌ཚེ༌ ཕུད༌ཨིན༌, དེན༌བ༌བོ༌ ཕངས༌ཏེ༌, ངན༌པའེ༌ གྱབ༌ནེ༌ གྲུལ༌ཁན༌གུན༌ལ༌, དཀོན༌མཆོག༌གི༌ ཐུགས༌སྲོ༌ དང༌ ཆད༌པ༌ གུན༌ ཕོག༌ཨིན༌། 9 ངན༌པ༌ ཅོ༌ཨིན༌ དུག༌ཁན༌གུན༌ལ༌, ནགས༌ དང༌ རྡུག༌ངལ༌ལི༌ ཆད༌པ༌ ཕོག༌ཨིན༌, སྔུན༌ལ༌ ཡ༌ཧུ༌དཱ༌པ༌གུན༌ལ༌ ཏེ༌སྟིང༌ནེ༌ ཡ༌ཧུ༌དཱ༌པ༌ མན༌ཁན༌གུན༌ལའང༌། 10 ཨིན༌ནའང༌ ཟང༌པོ༌ ཅོ༌ཁན༌ ཚང༌མ༌ལ༌ དཀོན༌མཆོག༌གི༌ ཆོགས༌ནེ༌ སྤལ༌, རྩི༌ཝ༌ དང༌ ཞི༌དེ༌ གུན༌ ཐོབ༌ཨིན༌, སྔུན༌ལ༌ ཡ༌ཧུ༌དཱ༌པ༌གུན༌ལ༌ ཏེ༌སྟིང༌ནེ༌ ཡ༌ཧུ༌དཱ༌པ༌ མན༌ཁན༌གུན༌ལའང༌, 11 ཅིའ༌ཟེར༌ན༌ དཀོན༌མཆོག༌གི༌ སུའང༌ ཆོགས༌རིས༌ ཅོའ༌ ཛད༌ད༌ མ༌ནོག༌།
12 མོ༌ཟེས༌སི༌ ཁྲིམས༌སི༌ ཡོག༌ག༌ མེད༌ཁན༌ ཡ༌ཧུ༌དཱ༌པ༌ མན༌ཁན༌ སྡིག༌པ༌ ཅོ༌ཁན༌ ཚང༌མ༌ དཀོན༌མཆོག༌གི༌ ཆད༌པ༌ སལ༌ལ༌ ཛད༌ཨིན༌། ཡང༌ མོ༌ཟེས༌སི༌ ཁྲིམས༌སི༌ ཡོག༌ག༌ ཡོད༌ཁན༌ ཡ༌ཧུ༌དཱ༌པ༌ སྡིག༌པ༌ ཅོ༌ཁན༌ ཚང༌མའང༌ ཁྲིམས༌ ནང༌ཞིན༌ ཁོང༌ངི༌ ཁྲིམས༌ཅད༌ སལ༌ལ༌ ཛད༌ཨིན༌། 13 ཁྲིམས༌ ཉན༌ཅེས༌ ཅིག༌པོ༌ མན༌པ༌, ཏེ༌གུན༌ནི༌ཀ༌ ལག༌ལེན༌ ཅོ༌ཁན༌གུན༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེའ༌ ཛད༌ཨིན༌། 14 དཀོན༌མཆོག༌གི༌ ཁྲིམས༌ མེད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ རང༌ཞིན༌ལ༌ ཁྲིམས༌ ནང༌ཞིན༌ སྒོས༌དོམ༌མི༌ ལས༌གུན༌ ཅོ༌ ཟ༌ནེ༌, ཞན༌ ཁོང༌གུན༌ལ༌ དཀོན༌མཆོག༌གི༌ ཆོགས༌ནེ༌ ཁྲིམས༌པོ༌ མ༌ཐོབ༌བ༌ ཨིན༌ནའང༌, ཏེ༌གུན༌, ཁོང༌གུན༌ནི༌ ཕིའ༌ ཁྲིམས༌ཤིག༌ ཨིན༌ནོག༌། 15 ཏེ༌གུན༌ནི༌ སྙིང༌ངི༌ ནང༌ང༌ དཀོན༌མཆོག༌གི༌ ཁྲིམས༌པོ༌ བྲིས༌ཏེ༌ ཡོད༌ཁན༌ ལྟན༌ན༌ནོག༌, ཅིའ༌ཟེར༌ན༌ ཁོ༌རང༌གུན༌ནི༌ སེམས༌ དང༌ སམ༌ཚུལ༌ གུན༌ནི༌ ཁོང༌གུན༌ལ༌ སྐྱོན༌ཇན༌ ཡ༌ སྐྱོན༌མེད༌ ཨིན༌ཁན༌བོ༌ ལྟན༌ན༌ནོག༌། 16 ཡང༌ འི༌ ལོན༌བོ༌ ངའེ༌ ཤད༌དད༌, ཏེ༌ ཞག༌པོ༌ ལེབ༌ཨིན༌, ནམ༌ དཀོན༌མཆོག༌གི༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ མི༌ཚང༌མའེ༌, སང༌ཝའེ༌ སམ༌ཚུལ༌གུན༌ལ༌ ཁྲིམས༌ཅད༌ ཛད༌ཨིན༌།
ཡ༌ཧུ༌དཱ༌པ༌གུན༌ དང༌ ཁྲིམས༌།
2:17 ནེ༌ 29
17 ཁྱོ༌ཞ༌རང༌ང༌ ཡ༌ཧུ༌དཱ༌པ༌ ཟེར༌ཁན༌གུན༌ནི༌, དཀོན༌མཆོག༌གི༌ ཁྲིམས༌པོའེ༌ཀ༌ ཨིད༌ཤེས༌ ཅོས༌ཏེ༌ དཀོན༌མཆོག༌ ཉམ༌པོ༌ མིག༌སལ༌ལི༌ བྲེལ༌ཡོད༌ ཟེར༌ཏེ༌ ཕོ༌སོ༌ ཅོའ༌ནོག༌། 18 ཁོང༌ངི༌ ཐུག༌གོངས༌གུན༌ ཡང༌ འོས༌པ༌ ཨིན༌ཁན༌བོ༌, ཁྱོ༌ཞ༌གུན༌ལ༌ གྱུས༌ཡོད༌ ཟེར༌ཏེ༌ ཕོ༌སོ༌ ཅོའ༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ལ༌ ཁོང༌ངི༌ ཁྲིམས༌པོ༌ ལབས༌ཏེ༌ ཨིན༌ནོག༌། 19 ཁྱོ༌ཞའེ༌ ཏན༌ཏན༌ལ༌ ཁྱོ༌ཞའ༌ ཞ༌ར༌གུན༌ལ༌ ལམ༌ལྟན༌ཁན༌, མུན༌གྲིག༌གི༌ ནང༌ང༌ ཡོད༌ཁན༌གུན༌ལ༌ འོད༌ ཨིན༌, སམ༌མ༌ནོག༌། 20 ཁྱོ༌ཞའེ༌ སམ༌བ༌ མེད༌ཁན༌ བུང༌བུ༌གུན༌ལ༌ ལབ༌ཞ༌ ཏང༌ཁན༌, ཕྲུ༌གུ༌ ཙོགས༌ ཅོ༌ཁན༌གུན༌ནི༌ ཕིའ༌ གེར༌གན༌ ཨིན༌ སམ༌མ༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ མོ༌ཟེས༌སི༌ ཁྲིམས༌པོ༌ གྱུད༌ཏེ༌ ཁྱོ༌ཞ༌གུན༌ལ༌ ཡོན༌ཏན༌ དང༌ དྲང༌པོ༌ ཆ༌ཚང༌ ཡོད༌ཏེ༌ ཨིན༌ སམ༌མ༌ནོག༌།
21 ཏེ༌ནེ༌ ཞན༌མའ༌ ལབ༌ཁན༌, ཁྱོ༌ཞ༌གུན༌ནི༌, ཁྱོ༌ཞ༌རང༌ངི༌ ལབ༌ཞ༌གུན༌ ཅིའ༌ ཉན༌ན༌མེད༌? ཞན༌མ༌གུན༌ལ༌ རྐུ༌མ༌རྐུ༌ ཟེར༌ཏེ༌ ལབ༌དུག༌, ཅི༌ ཁྱོ༌ཞ༌རང༌གུན༌ནི༌ རྐུའ༌ད༌? 22 ཁྱོ༌ཞའེ༌ ཟེར༌ར༌ནོག༌, མི༌གུན༌ནི༌ རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ བོར༌ མ༌གོས༌, ཅི༌ ཁྱོ༌ཞ༌གུན༌ནི༌ ཞན༌མ༌ ཉམ༌པོ༌ ལུས༌བྲེལ༌ བོར༌ར༌ད༌? ཁྱོ༌ཞ༌གུན༌ནི༌ སྐུན༌དྲ༌ ཅོལ༌ཅེས༌ལ༌ ནཕ༌རད༌ ཅོའ༌ནོག༌, ཅི༌ ཁྱོ༌ཞའེ༌ ཏེ༌ སྐུན༌དྲའ༌ བོར༌སའེ༌ ཆོད༌ཁང༌གུན༌ནེ༌ རྐུའ༌ད༌? 23 ཁྲིམས༌ ཤེས༌སད༌ ཟེར༌ཏེ༌ མངས༌ཏེའང༌ ཕོ༌སོ༌ ཅོ༌ཁན༌ ཁྱོ༌ཞ༌གུན༌ནི༌ ཁྲིམས༌པོ༌ ཅག༌ཅེས༌ གྱུད༌ཏེ༌ དཀོན༌མཆོག༌ག༌ རྩི༌ཝ༌ མ༌ཅོའ༌ ཨིན༌ནོག༌། 24 དམ༌པའེ༌ སུང༌རབས༌སི༌ ནང༌ང༌, "ཁྱོ༌ཞའེ༌ ཞས༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ནི༌ དཀོན༌མཆོག༌ག༌ དད༌ལོག༌ ཞུས༌ཏེ༌ ཨིན༌ནོག༌ † 2:24 ཡེ༌ཤ༌ཡཱའེ༌ སྤེ༌ཆའེ༌ 52:5 དང༌ འི༌ཟི༌ཀེལ༌ལི༌ སྤེ༌ཆའེ༌ 36:22 " མོལ༌ཏེ༌ ཡོད༌ཁན༌བོའ༌ ངའ༌ ཧ༌ལས༌ས༌ མེ༌རག༌།
25 ཡ༌ཧུ༌དཱ༌པའེ༌ ལུག༌སྲོལ༌ ནང༌ཞིན༌ སུན༌ནད༌ ཅོ༌ཅེས༌པོའེ༌ ཕན༌ཐོགས༌ མེད༌ཏེ༌ ཨིན༌ནོག༌ ནམ༌ཚོག༌པ༌ དཀོན༌མཆོག༌གི༌ ཁྲིམས༌གུན༌ ཁའ༌ མི༌ཉན༌། ཨིན༌ནའང༌ གལ༌ཏེས༌ ཁྱོ༌ཞའེ༌ ཁྲིམས༌པོ༌ ཅག༌གད༌ན༌, ཁྱོ༌ཞའ༌ དང༌ སུན༌ནད༌ མ༌ཅོ༌ཁན༌ནི༌ ཡ༌ཧུ༌དཱ༌པ༌ མན༌ཁན༌ གུན༌ནི༌ པར༌ལ༌ ཅའང༌ ཁྱད༌ མེད༌ཏེ༌ ཨིན༌ནོག༌། 26 ཡང༌ གལ༌ཏེས༌ སུན༌ནད༌ མ༌ཅོ༌ཁན༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཁྲིམས༌པོ༌ ཁའ༌ཉན༌ནད༌ན༌, ཅི༌ དཀོན༌མཆོག༌གི༌ ཁོང༌གུན༌ ཁོང༌རང༌ངི༌ མི༌ ཨིན༌ མི༌མོལ༌ལ༌? 27 ཏན༌ཏན༌ལ༌, སུན༌ནད༌ མ༌ཅོ༌ཁན༌ ཡ༌ཧུ༌དཱ༌པ༌ མན༌ཁན༌གུན༌ནི༌, ཁྲིམས༌ལ༌ ཁའ༌ཉན༌ཅེས༌པོའེ༌, ཁྱོ༌ཞ༌གུན༌ལ༌ སྐྱོན༌རྗོད༌ ཅོས༌ཏེ༌ ཨིན༌ནོག༌, ཀ༌གུན༌ལ༌ ཁྲིམས༌ ཐོབ༌, ཨིན༌ནའང༌ ཁའ༌ མ༌ཉནས༌།
28 ཁྱོ༌ཞའ༌ ཟུགས༌སི༌ ཐོག༌ནེ༌ ཡ༌ཧུ༌དཱ༌པའེ༌ ཕ༌མ༌ནེ༌ སྐྱེས༌ཏེ༌ ཨིན༌ཅེས༌ ཡ༌, ཁྱོ༌ཞ༌གུན༌ལ༌ ཡ༌ཧུ༌དཱ༌པའེ༌ ལུག༌སྲོལ༌ ནང༌ཞིན༌ སུན༌ནད༌ ཅོ༌ཅེས༌པོའེ༌, ཁྱོ༌ཞ༌གུན༌ དེན༌བའེ༌ ཡ༌ཧུ༌དཱ༌པ༌ རིག༌ གྱུར༌ར༌ མ༌ནོག༌། 29 ཨིན༌ནའང༌ དཀོན༌མཆོག༌ ཉམ༌པོ༌ དྲང༌པོ༌ བྲེལ༌ ཡོད༌ཁན༌བོ༌ ནི༌, དེན༌བའེ༌ ཡ༌ཧུ༌དཱ༌པ༌ཞིག༌ ཨིན༌ནོག༌། ཡང༌ དེན༌བའེ༌ སུན༌ནད༌ ཅོ༌ཅེས༌ ནི༌, ཁྲིམས༌ལ༌ ཁའ༌ཉན༌ཅེས༌པོ༌ མན༌པ༌, རང༌ངི༌ སྙིང༌ངི༌ ནང༌ང༌ གྱུར༌ཇ༌ ཁྱོང༌ཅེས༌པོ༌ ཨིན༌ནོག༌། ཡང༌ གྱུར༌ཇ༌ ཡོང༌ཁན༌ནི༌ མི༌ཞིག༌གི༌, མི༌གུན༌ནེ༌ མན༌པ༌, དཀོན༌མཆོག༌གི༌ སྟོད༌པ༌ ཙལ༌ལ༌ནོག༌།