21
ཡེ༌ཤུའ༌ གྱལ༌པོའེ༌ ཚུལ༌ལ༌ གའ༌སུས༌ ཞུས༌།
21:1 ནེ༌ 11
1 ཡེ༌རུ༌ཤ༌ལེམ༌མི༌ གྱལ༌སའེ༌ ཉེ༌མོའ༌ ཨོ༌ལིཝ༌ཝི༌ རི༌ཀ༌ * 21:1 འི༌ རི༌བོའི༌ཀ༌ ཨོ༌ལིཝ༌ཝི༌ ལྕང༌མ༌ མང༌པོ༌ སྐྱེས༌ཏེ༌ ཡོད༌པ༌ འི༌བོའ༌ ཨོ༌ལིཝ༌ཝི༌ རི༌ ཟེར༌རད༌པིན༌། ཡོད༌ཁན༌ བེད༌ཕ༌གེའེ༌ གྲོང༌སེབ༌བ༌ ལེབ༌ཀྱིས༌ ཡོད༌ད༌ཅིག༌, གཙོ༌བོ༌ ཡེ༌ཤུའི༌ ལོབ༌ཕྲུགས༌ ཉིས༌ སྔུན༌ལ༌ ལམ༌ཅུག༌ག༌ ཛད༌ཏེ༌ 2 མོལས༌, "འ༌ གྲོང༌སེབ༌བི༌ ནང༌ང༌ སོང༌, ཏེ༌རུ༌ ལེབ༌བ༌ཅིག༌ བུང༌བུ༌ཞིག༌ ཁོ༌རང༌ངི༌ བུང༌སར༌ ཉམ༌པོ༌ ཏགས༌ཏེ༌ ཐོང༌ཅེན༌། ཏེ༌གུན༌ ཀྲོལ༌ཏེ༌ ང༌ ཡོད༌ས༌ ཁྱོང༌། 3 གལ༌ཏེས༌ སུ༌ཞིག༌གི༌ ཅི༌ ཅོའད༌ ཟེར༌ཏེ༌ ཏྲི༌ན༌, 'གཙོ༌བོའ༌ སྒོས༌དོམ༌ དུག༌' ཟེར༌། ཏེན༌ན༌མལ༌ལ༌ ཁོའེ༌ ཁྱོ༌ཞའ༌ ཏེ༌གུན༌ ཁྱེར༌ ཅུག༌ག༌ནོག༌།"
4 ལུང༌སྟོན༌པ༌ གྱུད༌ཏེ༌ དཀོན༌མཆོག༌གི༌ མོལ༌ཁན༌བོ༌ དྲན༌དྲ༌ གྲུབ༌ཅེས༌སི༌ ཕིའ༌, ཏེ༌བོ༌ བྱུངས༌ཏེ༌ ཨིན༌ནོག༌,
5 "ཡེ༌རུ༌ཤ༌ལེམ༌པ༌གུན༌ལ༌† 21:5 གིརིས༌སི༌ སྐད༌དི༌ ནང༌ང༌ འི༌ ཚིགས༌པོ༌ "རི༌ ཟི༌ཡོན༌ནི༌ བུ༌མོའ༌ ཟེར༌" བྲིས༌ཏེ༌ དུག༌། ཟེར༌,
ལྟོས༌སའང༌, ཁྱོ༌ཞའེ༌ གྱལ༌པོ༌ ཁྱོ༌ཞའ༌ ཡོད༌ས༌ ཡོང༌དུག༌,
ཁོང༌ ནི༌ ཉམ༌ཤུང༌, བུང༌སར༌རི༌ཀ༌ ཞོན༌ཏེ༌ ཡོང༌དུག༌།"
6 ལོབ༌ཕྲུགས༌གུན༌ སོང༌ཏེ༌ ཡེ༌ཤུའི༌ བཀའ༌ སལ༌ཁན༌ ནང༌ཞིན༌ ཅོས༌། 7 ཏེ༌ནེ༌ ཁོང༌གུན༌ནི༌ བུང༌བུ༌ དང༌ བུང༌སར༌བོ༌ ཁྱོངས༌ཏེ༌ ཁོང༌རང༌གུན༌ནི༌ ཀོས༌ ཏེ༌གུན༌ནི༌ཀ༌ སྡདས༌ ཡང༌ ཡེ༌ཤུ༌ བུང༌སར༌རི༌ཀ༌ ཞོན༌ན༌ ཛདས༌།
8 མི༌ཚོགས༌སི༌ ནང༌ནེ༌ མང༌ཆེའ༌བོའེ༌ རང༌རང༌ངི༌ ཀོས༌ ཡེ༌ཤུ༌ སྐྱོད༌སའེ༌ ལམ༌མི༌ཀ༌ ཏིངས༌ ཡང༌ ཞན༌གུན༌ནི༌ ལྕང༌མའེ༌ ཡལ༌ག༌ ཅད༌ཏེ༌ ཏིངས༌། 9 ཡེ༌ཤུའི༌ དུན༌ནེ༌ གྲུལ༌ཁན༌ ཡང༌ གྱབ༌ནེ༌ ཡོང༌ཁན༌ནི༌ མི༌ཚོགས༌སི༌ ཀུ༌ཅོ༌ ཏང༌ཨིན༌ ཟེརས༌,
"གྱལ༌པོ༌ དཱ༌བིད༌དི༌ པུར༌གྱུད༌དི༌ ཕིའ༌ དཀོན༌མཆོག༌ག༌ སྟོད༌པ༌ ཕུལ༌,
གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌བོ༌ ཅིན༌ལབས༌ཅན༌།
ནམ༌ཁའ༌ ཞུགས༌ཁན༌ནི༌ དཀོན༌མཆོག༌ག༌ སྟོད༌པ༌ ཕུལ༌།"
10 ཡེ༌རུ༌ཤ༌ལེམ༌མི༌ ནང༌ཀུག༌ག༌ ལེབ༌བ༌ཅིག༌, གྱལ༌ས༌ གང༌པོའེ༌ ནང༌ང༌ ཧི༌ལིངས༌ ཤོར༌ ཡང༌ མི༌གུན༌ནི༌ ཅིག༌ དང༌ ཅིག༌ག༌ ཏྲིས༌, "འི༌ མི༌བོ༌ སུ༌ ཨིན༌ནོག༌།"
11 ཡེ༌ཤུ༌ ཉམ༌པོ༌ ཡོད༌ཁན༌ནི༌ མི༌ཚོགས༌སི༌ ལན༌ཏངས༌, "ཁོང༌ ནི༌ ལུང༌སྟོན༌པ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌ ན༌ཙ༌རེད༌ནེ༌ ཨིན༌ནོག༌།"
ཚོང༌པ༌གུན༌ ཆོད༌ཁང༌ངི༌ ནང༌ནེ༌ ཕིང༌ང༌ ཛདས༌།
21:12 ནེ༌ 17
12 གཙོ༌བོ༌ ཡེ༌ཤུ༌, ཆོད༌ཁང༌ང༌ སྐྱོད༌ཏེ༌ སྲོག༌ཆོད༌ལ༌ ཕུལ༌ཅེས༌སི༌ སེམས༌ཅན༌ ཙོང༌ཁན༌ དང༌ ཉོ༌ཁན༌ གུན༌ ཕིང༌ང༌ ཛདས༌། པེ༌ནེ༌ ཞེབ༌ཁན༌ནི༌ ཅོག༌ཙེ༌གུན༌ དང༌ ཕུར༌གོན༌ ཙོང༌ཁན༌ནི༌ ཕོས༌སྟག༌གུན༌ ལོག༌ག༌ ཛདས༌། 13 ཡེ༌ཤུའི༌ ཁོང༌གུན༌ལ༌ མོལས༌, "དམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, 'ངའེ༌ ཁང༌པའ༌ མོས༌ལམ༌ ཞུས༌སེ༌ ཁང༌པ༌ ཟེར༌ཨིན༌,' ཨིན༌ནའང༌ ཁྱོ༌ཞ༌གུན༌ནི༌ ཏེ༌བོ༌ ཅག༌པ༌གུན༌ནི༌ བའོ༌ ཅོས༌ཏེ༌ དུག༌།"
14 ཆོད༌ཁང༌ངི༌ ནང༌ང༌ ཡེ༌ཤུ༌ ཡོད༌ས༌ ཞ༌ར༌ དང༌ ཞ༌འོ༌ གུན༌ ཡོངས༌པ༌ ཁོང༌ངི༌ ཁོང༌གུན༌ ཕན༌ཅུག༌ག༌ ཛདས༌། 15 ཨིན༌ནའང༌ བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཡེ༌ཤུའི༌ ཧ༌ལས༌སི༌ ཛད༌པ༌ ཛད༌ཁན༌ ཡང༌ ཕྲུ༌གུ༌གུན༌ནི༌ ཆོད༌ཁང༌ངི༌ ནང༌ང༌, "གྱལ༌པོ༌ དཱ༌བིད༌དི༌ པུར༌གྱུད༌དི༌ ཕིའ༌ དཀོན༌མཆོག༌ག༌ སྟོད༌པ༌ ཕུལ༌" ཟེར༌ཨིན༌ ཀུ༌ཅོ༌ ཏང༌ང༌ ཐོང༌པ༌, ཁོང༌གུན༌ལ༌ མ༌སྲན༌ཏྲེ༌ སྲོ༌ ཡོངས༌།
16 ཁོང༌གུན༌ནི༌ ཡེ༌ཤུའ༌ ཏྲིས༌, "ཁྱོ༌རང༌ང༌ ཚོར༌ར༌, འི༌ ཕྲུ༌གུ༌གུན༌ནི༌ ཅི༌ ཟེར༌ར༌རག༌?"
ཡེ༌ཤུའི༌ ལན༌སལས༌, "ཚོར༌། དམ༌པའེ༌ སུང༌རབས༌སི༌ ནང༌ང༌ 'དཀོན༌མཆོག༌གི༌ ཁོང༌རང༌ང༌ སྟོད༌པ༌ ཏང༌ཅེས༌ལ༌ འོམ༌ཐུང༌ དང༌ ཞན༌ ཕྲུ༌གུ༌གུན༌ གྲལ༌གྲིག༌ ཛདས༌' བྲིའ༌ ཛད༌ཁན༌བོ༌ ཁྱོ༌ཞའེ༌ མ༌སིལ༌པིན༌ན༌?" 17 ཏེ༌ སྟིང༌ནེ༌ ཡེ༌ཤུ༌ བེད༌ཐཱ༌ནི༌ གྲོང༌སེབ༌བ༌ སྐྱོདས༌ ཡང༌ ཚན༌ལ༌ ཏེ༌རུ༌ ཞུགས༌།
ཕིག༌ ཁ༌ཟས༌སི༌ ལྕང༌མ༌ སྐམས༌།
21:18 ནེ༌ 22
18 ང༌ཏོག༌ ང༌མོ༌ གྱལ༌ས༌ ལོགས༌ཏེ༌ སྐྱོད༌ཨིན༌ ཡོད༌ ཟ༌ནེ༌ ལམ༌མ༌ ཡེ༌ཤུ༌ སྟོགས༌ས༌ ཛདས༌། 19 ལམ༌མི༌ ཐའ༌མ༌ ཁོང༌ངི༌ ཕིག༌ ཁ༌ཟས༌སི༌ ལྕང༌མ༌ཞིག༌ ཟིགས༌, ཁོང༌ ཏེ༌ ལྕང༌མ༌ ཡོད༌ས༌ སྐྱོདས༌ ཨིན༌ནའང༌ ཏེ༌ཀ༌ ལོ༌མ༌ མ༌ནེ༌ ཁ༌ཟས༌ མེད༌ཁན༌བོ༌ ཟིགས༌པ༌ ཁོང༌ངི༌ ལྕང༌མའ༌ མོལས༌, "ཁྱོ༌རང༌ང༌ ཡང༌སྐྱར༌ ཁ༌ཟས༌ མ༌ནེ༌ མི༌ཆགས༌།" ཏེན༌ན༌མལ༌ལ༌ ལྕང༌མ༌བོ༌ སྐམས༌།
20 ཕིག༌གི༌ ཁ༌ཟས༌སི༌ ལྕང༌མ༌ སྐམས༌ས༌ལ༌ ཐོང༌ཏེ༌ ལོབ༌ཕྲུགས༌གུན༌ ཧ༌ལས༌ ཡང༌ ཡེ༌ཤུའ༌ ཏྲིས༌, "འི༌ཟམ༌ གྱོགས༌པ༌ ཕིག༌གི༌ ལྕང༌མ༌བོ༌ ཀ༌ཟུག༌གི༌ སྐམས༌ཏེ༌ ཨིན༌ནོག༌?"
21 ཡེ༌ཤུའི༌ མོལས༌, "ངའེ༌ ཁྱོ༌ཞའ༌ དེན༌བ༌ ཟེར༌རད༌, གལ༌ཏེས༌ ཐེ༌ཚོམས༌ མེད༌པ༌ དཀོན༌མཆོག༌ག༌ ཏད༌པ༌ ཅོ༌ན༌, ཁྱོ༌ཞའེ༌, ངའེ༌ ཕིག༌གི༌ ལྕང༌མའ༌ ཅོ༌ཁན༌བོ༌ མ༌ཚད༌ འི༌ རི༌བོའ༌, 'སོང༌, ཁྱོ༌རང༌ གྱ༌ཚོའེ༌ ནང༌ང༌ ཕོང༌' ཟེར༌ན༌ ཏེ༌བོ༌ ཅོའ༌ ཛད༌ཨིན༌། 22 གལ༌ཏེས༌ ཏད༌པ༌ ཅོས༌ཏེ༌ ཁྱོ༌ཞའེ༌ མོས༌ལམ༌མི༌ ནང༌ང༌ ཅི༌ཞིག༌ ཞུ༌ནའང༌ ཁྱོ༌ཞ༌གུན༌ལ༌ ཐོབ༌ཨིན༌།"
ཡེ༌ཤུའ༌ ཝང༌ཆའེ༌ སྐོར༌ལ༌ ཏྲི༌ཝ༌ ཏྲིས༌།
21:23 ནེ༌ 27
23 གཙོ༌བོ༌ ཡེ༌ཤུ༌ ཆོད༌ཁང༌ངི༌ ནང༌ང༌ སྐྱོདས༌ ཡང༌ ལབ༌ཞ༌ སལ༌ཨིན༌ ཡོད༌ཏུས༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཡོངས༌ཏེ༌ ཏྲིས༌, "ཀ༌ ཝང༌ཆ༌ ཉམ༌པོ༌ ཁྱོ༌རང༌ངི༌ འི༌གུན༌ ཅོའད༌ ཡང༌ ཁྱོ༌རང༌ང༌ འི༌ ཝང༌ཆ༌ སུའི༌ ཏངས༌?"
24 ཡེ༌ཤུའི༌ ཁོང༌གུན༌ལ༌ མོལས༌, "ངེའང༌ ཁྱོ༌ཞ༌གུན༌ལ༌ ཏྲི༌ཝ༌ཞིག༌ ཏྲི༌ཨིན༌, གལ༌ཏེས༌ ཁྱོ༌ཞའེ༌ ལན༌ཏང༌ན༌, ཏེ༌ནེ༌ ངེའང༌ ཀ༌ ཝང༌ཆ༌ གྱུད༌ཏེ༌ འི༌གུན༌ ཅོའད༌ ཁྱོ༌ཞའ༌ ཤད༌ཨིན༌།" 25 "ཡོ༌ཧཱ༌ནན༌ལ༌ ཁྲུས༌སལ༌ཅེས༌སི༌ ཝང༌ཆ༌ དཀོན༌མཆོག༌གི༌ ཆོགས༌ནེ༌ ཐོབ༌ཏེ༌ ཨིན༌ནོག༌ག༌ ཡ༌ མི༌ ཆོགས༌ནེ༌?"
ཁོང༌གུན༌ནི༌ ཁོ༌རང༌གུན༌ནི༌ ཕྲོའ༌ སྤེ༌ར༌ ཏངས༌ཏེ༌ ཟེརས༌, "གལ༌ཏེས༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌ ཟེར༌ན༌ ཁོའེ༌ ང༌དང༌ང༌, ཁྱོ༌ཞའེ༌ ཁོའེ༌ཀ༌ ཨིད༌ཤེས༌ ཅིའ༌ མ༌ཅོས༌པིན༌ ཟེར༌ཨིན༌། 26 ཨིན༌ནའང༌ གལ༌ཏེས༌ མིའི༌ ཆོགས༌ནེ༌ ཨིན༌ནོག༌ ཟེར༌ན༌, མི༌ཚོགས༌ལ༌ སྲོ༌ ཡོང༌ཨིན༌, ཅིའ༌ཟེར༌ན༌ ཁོང༌གུན༌ནི༌ ཡོ༌ཧཱ༌ནན༌ལ༌ ལུང༌སྟོན༌པ༌ རྩིའད༌པིན༌།" 27 ཏེ༌བོའེ༌ཕིའ༌ ཁོང༌གུན༌ནི༌ ཡེ༌ཤུའ༌ ལན༌ཏངས༌, "ང༌ཞའ༌ གྱུས༌མེད༌།"
ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, "ངེའང༌ མི༌ཤད༌, སུའི༌ ཝང༌ཆའེ༌ ནང༌ང༌ ངའེ༌ འི༌གུན༌ ཅོའད༌།"
བུ༌ཚ༌ ཉིས༌སི༌ སྐོར༌ལ༌ རུངས༌།
21:28 ནེ༌ 32
28 གཙོ༌བོ༌ ཡེ༌ཤུའི༌ མོལས༌, "ཁྱོ༌ཞའེ༌ ཅི༌ སམ༌མ༌རག༌? མི༌ཞིག༌ག༌ བུ༌ཚ༌ ཉིས༌ ཡོད༌པིན༌། ཁོ༌ བུ༌ཚ༌ ཆེན༌མོ༌ ཡོད༌ས༌ སོང༌ཏེ༌ ཟེརས༌, 'བུ༌ཚ༌, ཁྱོ༌རང༌ དི༌རིང༌ རྒུན༌ཚས༌སི༌ ནང༌ང༌ ལས༌ ཅོའ༌ལ༌ སོང༌།' 29 ཁོའེ༌ ཟེརས༌, 'ང༌ ཆ༌མེད༌' ཨིན༌ནའང༌ སྟིང༌ནེ༌ སེམ༌བ༌ གྱུར༌ཏེ༌ ལས༌ ཅོའ༌ སོང༌། 30 ཏེ༌ནེ༌ ཨ༌བ༌ བུ༌ཚ༌ ཆུ༌ངུན༌ ཡོད༌ས༌ སོང༌ཏེ༌ ཏེན༌ན༌ ཙོགས༌ ཟེརས༌པ༌ ཁོའེ༌, 'འོ༌ ཨ༌བ༌ལེ༌ ང༌ ཆེན༌' ཟེརས༌ ཨིན༌ནའང༌ མ༌སོང༌།"
31 "ཁོང༌ ཉིས༌ཀོའེ༌ ནང༌ནེ༌ ཨ༌བའེ༌ ཁའ༌ སུའི༌ ཉནས༌?"
ཁོང༌གུན༌ནི༌ ཟེརས༌, "བུ༌ཚ༌ ཆེན༌མོའེ༌།"
ཡེ༌ཤུའི༌ མོལས༌, "ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྲལ༌ནེན༌ཁན༌གུན༌ དང༌ ཟུགས༌ཙོང༌མ༌གུན༌ ཁྱོ༌ཞའེ༌ སང༌ སྔུན༌ལ༌ ནམ༌ཁའེ༌ གྱལ༌སྲིད༌དི༌ ནང༌ང༌ ལེབ༌ཨིན༌ ཨིན༌ནོག༌། 32 དྲང༌པོ༌ མི༌ཚེ༌ ཕུད༌ཅེས༌སི༌ ལམ༌ལྟན༌ན༌ལ༌ ཡོ༌ཧཱ༌ནན༌ ཁྱོ༌ཞའ༌ ཡོད༌ས༌ ཡོངས༌ཏེའང༌, ཁྱོ༌ཞ༌གུན༌ནི༌ ཏད༌པ༌ མ༌ཅོས༌, ཨིན༌ནའང༌ ཁྲལ༌ནེན༌ཁན༌གུན༌ དང༌ ཟུགས༌ཙོང༌མ༌གུན༌ནི༌ ཏད༌པ༌ ཅོས༌། ཁྱོ༌ཞའེ༌ ཏེ༌གུན༌ ཐོང༌ཏེའང༌ ཁོའེ༌ ལོན༌བོའེ༌ ནང༌ང༌ ཏད༌པ༌ ཅོས༌ཏེ༌ གྱོད༌པ༌ མ༌ཅོས༌།"
རྒུན༌ཚས༌ ཤས༌ལ༌ ཏང༌ཁན༌ནི༌ རུངས༌།
21:33 ནེ༌ 46
33 གཙོ༌བོ༌ ཡེ༌ཤུའི༌ མོལས༌, "ཡང༌ རུངས༌ཤིག༌ ཉོན༌, ཞིང༌ངི༌ དག༌པོའེ༌ ཁོ༌རང༌ངི༌ ཞིང༌ང༌ རྒུན༌ ཙུགས༌ཏེ༌ གྱང༌སྐོར༌ ཏངས༌། རྒུན༌ ཙིར༌སའེ༌ ནས༌ས༌ བྲུས༌, ཡང༌ རྒུན༌ཚས༌ལ༌ ལྟ༌ཅེས༌སི༌ ཕིའ༌ པི༌འུ༌ རྩིགས༌། ཏེ༌ནེ༌ རྒུན༌ཚས༌པོ༌ ཞན༌ ཞིང༌བད༌པ༌གུན༌ལ༌ ཤས༌ལ༌ ཏང༌ཏེ༌ ཁོ༌རང༌ ཞན༌ཡུལ༌ཞིག༌ག༌ དུག༌ག༌ སོང༌། 34 སྟོན༌ཐོག༌གི༌ ཏུས༌པོ༌ ཉེ༌མོའ༌ ལེབ༌བ༌ཅིག༌, དག༌པོའེ༌ ཤིང༌ཏོག༌གི༌ སྐལ༌ལ༌ ལེན༌ན༌ལ༌ ཁོ༌རང༌ངི༌ ཡོག༌པོ༌གུན༌ ཤས༌ལ༌ ཏང༌ཁན༌གུན༌ནི༌ཀ༌ ལམ༌ཅུགས༌། 35 ཤས༌པ༌གུན༌ནི༌ ཡོག༌པོ༌གུན༌ ཟུམས༌ཏེ༌, ཅིག༌ག༌ རྡུངས༌, ཅིག༌ སདས༌, ཡང༌ ཅིག༌ག༌ རྡོའ༌ གྱབས༌། 36 ཏེ༌ནེ༌ དག༌པོའེ༌ སྔུན༌ནི༌ སང༌ མང༌ང༌ ཡོག༌པོ༌ ལམ༌ཅུགས༌, ཨིན༌ནའང༌ ཁོང༌གུན༌ནི༌ ཁོང༌གུན༌ལའང༌ ཏེན༌ན༌ ཙོགས༌ ངན༌པ༌ ཅོས༌།"
37 "སྟིང༌ཇུག༌པོའེ༌ཀ༌ ཁོའེ༌ ཁོ༌རང༌ངི༌ བུ༌ཚ༌ ལམ༌ཅུགས༌ཏེ༌, 'ཁོང༌གུན༌ནི༌ ཏན༌ཏན༌ལ༌ ངའེ༌ བུ༌ཚའ༌ རྩི༌ཝ༌ ཅོའ༌ནོག༌' སམ༌།"
38 "ཨིན༌ནའང༌ ཤས༌པ༌གུན༌ནི༌ བུ༌ཚ༌ ཐོང༌ང༌ཅིག༌, ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, 'འི༌ ཞིང༌ ནོར༌སྐལ༌ལ༌ ཐོབ༌ཅེས༌ཅན༌བོ༌ ཡོང༌ང༌ལ༌, ཡོང༌ཤིག༌, ཁོ༌ སད༌ཏེ༌ ང༌དང༌ངི༌ ཁོའེ༌ ནོར༌སྐལ༌བོ༌ ཀོག༌ཨིན༌།' 39 ཏེ༌བོའེ༌ཕིའ༌ ཁོང༌གུན༌ནི༌ ཁོ༌ ཟུམས༌ཏེ༌ རྒུན༌ཚས༌ནེ༌ ཕི༌ལོག༌ག༌ ཕིངས༌ཏེ༌ སདས༌།"
40 ཡེ༌ཤུའི༌ ཡ༌ཧུ༌དཱ༌པའེ༌ སྤོན༌བོ༌གུན༌ལ༌ ཏྲིའ༌ ཛདས༌, "ཏ༌ རྒུན༌ཚས༌སི༌ དག༌པོ༌ ཡོང༌ང༌ཅིག༌, ཁོའེ༌ ཤས༌པ༌གུན༌ལ༌ ཅི༌ ཅོ༌ཨིན༌?"
41 ཁོང༌གུན༌ནི༌ ལན༌ཏངས༌, "ཁོའེ༌ ཏེ༌ མི༌ངན༌གུན༌ལ༌ ནགས༌ སྲན༌ཏྲེ༌ ལྟན༌ཏེ༌ སད༌ཨིན༌ ཡང༌ རྒུན༌ཚས༌པོ༌ ཁོའ༌ སྟོན༌ཐོག༌གི༌ སྐ༌ལ༌ ཏང༌ཁན༌ནི༌ ཞན༌ ཞིང༌བད༌པ༌ རིག༌ག༌ ཤས༌ལ༌ ཏང༌ཨིན༌།"
42 ཡེ༌ཤུའི༌ ཁོང༌གུན༌ལ༌ མོལས༌, "དམ༌པའེ༌ སུང༌རབས༌སི༌ ནང༌ང༌ བྲིས༌ཏེ༌ ཡོད༌ཁན༌བོ༌ ཁྱོ༌ཞའེ༌ མ༌སིལ༌པིན༌ན༌?
ཀ༌ རྡོའ༌བོ༌ ཁང༌པ༌ རྩིག༌ཁན༌གུན༌ནི༌ ཕན༌མི༌ཐོགས༌ ཐེས༌,
ཏེན༌ན༌ རྡོའ༌བོ༌ ཁང༌པའེ༌ ཀྲུ༌རྡོའ༌བོ༌ གྱུར༌
ཀ༌བོ༌ ཚང༌མའེ༌སང༌ ཁག༌ཅན༌ རྡོའ༌བོ༌ ཨིན༌ནོག༌།
འི༌བོ༌ གཙོ༌བོའེ༌ ཅོའ༌ ཛད༌ཏེ༌ ཨིན༌ནོག༌,
ཏེ༌བོ༌ ཐོང༌ཏེ༌ ང༌དང༌ མ༌ ཧ༌ལས༌ཨིན༌། ‡ 21:42 སུང༌གུར༌རི༌ སྤེ༌ཆའེ༌ 118:22,23
43 "ཏེ༌བོའེ༌ཕིའ༌ ངའེ༌ ཁྱོ༌རང༌གུན༌ལ༌ ཟེར༌རད༌, ཏ༌ ནམ༌ཁའེ༌ གྱལ༌སྲིད༌དི༌ ནང༌ང༌ ལེབ༌ཅེས༌སི༌ སྐབས༌ ཁྱོ༌ཞ༌གུན༌ནི༌ ཀ༌ནེ༌ ཁྱེར༌ར༌ ཛད༌ཨིན༌ ཡང༌ ནམ༌ཁའེ༌ གྱལ༌སྲིད༌དི༌ བྲས༌བུ༌ ཟང༌པོ༌ སྐྱེ༌ཁན༌ མི༌གུན༌ལ༌ སལ༌ལ༌ ཛད༌ཨིན༌། 44 ཏེ༌ རྡོའེ༌ཀ༌ སྒག༌གྱབ༌ཁན༌གུན༌ ཏུམ༌པ༌ཏུམ༌པའེ༌ ནང༌ང༌ ཆག༌ཨིན༌, ཨིན༌ནའང༌ ཏེ༌ རྡོའ༌བོ༌ ཁོང༌གུན༌ནི༌ཀ༌ བུད༌ན༌, ཁོང༌གུན༌ མེད༌ཁན༌ ཆེན༌།"§ 21:44 སྔུན༌མའེ༌ གིརིས༌སི༌ སྤེ༌ཆ༌ ཁ༌ཅིག༌གི༌ ནང༌ང༌ འི༌ 21:44 བྲིས༌ཏེ༌ མེད༌ཏེ༌ ཨིན༌ནོག༌།
45 བླ༌མ༌ འུ༌སྐྱོང༌གུན༌ དང༌ ཕ༌རུ༌ཤི༌པ༌གུན༌ནི༌ རུངས༌པོ༌ ཚོར༌ར༌ཅིག༌, ཡེ༌ཤུའི༌ ཁོང༌གུན༌ནི༌ སྐོར༌ལ༌ མོལ༌ཁན༌བོ༌ ཧ༌གོ༌། 46 ཁོང༌གུན༌ནི༌ ཡེ༌ཤུ༌ ཟུམ༌ཅེས༌སི༌ དོད༌པ༌ ཡོད༌པིན༌, ཨིན༌ནའང༌ ཁོང༌གུན༌ མི༌གུན༌ལ༌ ཇིགས༌ ཅིའ༌ཟེར༌ན༌ མི༌གུན༌ནི༌ ཡེ༌ཤུའ༌ ལུང༌སྟོན༌པ༌ རྩིའད༌པིན༌།
*21:1 21:1 འི༌ རི༌བོའི༌ཀ༌ ཨོ༌ལིཝ༌ཝི༌ ལྕང༌མ༌ མང༌པོ༌ སྐྱེས༌ཏེ༌ ཡོད༌པ༌ འི༌བོའ༌ ཨོ༌ལིཝ༌ཝི༌ རི༌ ཟེར༌རད༌པིན༌།
†21:5 21:5 གིརིས༌སི༌ སྐད༌དི༌ ནང༌ང༌ འི༌ ཚིགས༌པོ༌ "རི༌ ཟི༌ཡོན༌ནི༌ བུ༌མོའ༌ ཟེར༌" བྲིས༌ཏེ༌ དུག༌།
‡21:42 21:42 སུང༌གུར༌རི༌ སྤེ༌ཆའེ༌ 118:22,23
§21:44 21:44 སྔུན༌མའེ༌ གིརིས༌སི༌ སྤེ༌ཆ༌ ཁ༌ཅིག༌གི༌ ནང༌ང༌ འི༌ 21:44 བྲིས༌ཏེ༌ མེད༌ཏེ༌ ཨིན༌ནོག༌།