མད༌ཐཱའེ༌ བྲིའ༌ཛད༌ཁན༌ནི༌ གའ༌མོའེ༌ ནས༌ཚུལ༌།
མད༌ཐཱའེ༌ སྤེ༌ཆའེ༌ སྐོར༌།
གོ༌མའེ༌ ཆོས༌ཚོགས༌སི༌ འུ༌སྐྱོང༌གུན༌ནི༌, འི༌ སྤེ༌ཆ༌བོ༌ གཙོ༌བོ༌ ཡེ༌ཤུའི༌ སྐུ༌ཚབས༌ ཅུག༌ཉིས༌སི༌ ནང༌ནེ༌ ཅིག༌, མད༌ཐཱའེ༌ བྲིས༌ཏེ༌ ཨིན༌ཁན༌བོའེ༌ སྤང༌པོ༌ ཏང༌ང༌ནོག༌། མད༌ཐཱ༌ ཁྲལ༌ནེན༌ཁན༌ཞིག༌ ཨིན༌པིན༌, ཡེ༌ཤུའི༌ ཏུས༌ལ༌ ཁོ༌ ཨིས༌ར༌ཨེལ༌ལི༌ ནང༌ང༌ ཡོད༌པིན༌, ཀ༌བོའ༌ ཡེ༌ཤུའི༌ ངའེ༌ གྱབ༌ནེ༌ བྲངས༌ཏེ༌ ངའེ༌ སྐུ༌ཚབས༌གུན༌ནི༌ ནང༌ནེ༌ ཅིག༌ གྱུར༌ མོལས༌།
འི༌ སྤེ༌ཆ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 17 ནི༌ ཉེ༌ཁོར༌ལ༌ བྲིའ༌ ཛད༌ཏེ༌ ཨིན༌ནོག༌། འི༌ སྤེ༌ཆ༌བོ༌ མད༌ཐཱའེ༌ ཁག༌ཅན༌ ཅོས༌ཏེ༌ མང༌ཆེའ༌ ཡ༌ཧུ༌དཱ༌པ༌, ཏེ༌ནེ༌ ཡ༌ཧུ༌དཱ༌པའེ༌ ཆོས༌ ཤེས༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའ༌ བྲིའ༌ ཛད༌ཏེ༌ ཨིན༌ཁན༌བོ༌ སལ༌པོ༌ ཧ༌གོའ༌ནོག༌།
མད༌ཐཱའེ༌ དོད༌པ༌ ནི༌, སུང༌རབས༌ སྙིང༌པའེ༌ ནང༌ང༌ དཀོན༌མཆོག༌གི༌ མ༌ཤི༌ཀ༌, སྐྱབ༌གོན༌ དང༌ གྱལ༌པོ༌ སྐྱོད༌ཅེས༌སི༌ ལུང༌སྟན༌ ཛད༌ཁན༌བོ༌, ཡེ༌ཤུ༌ ཁོང༌རང༌ ཨིན༌ཁན༌ སིལ༌ཁན༌གུན༌ལ༌ ཧ༌གོ༌ཅུག༌ཅེས༌ ཨིན༌ནོག༌།
མད༌ཐཱའེ༌, ཡེ༌ཤུའི༌ ཤི༌ཁན༌གུན༌ སོན༌ཏེའ༌ ལང༌ཅུག༌ཅེས༌, ནད༌པ༌གུན༌ ཕན༌ཅུག༌ཅེས༌, རྡུད༌ ཞུགས༌ཁན༌གུན༌ ཕིང༌ཅེས༌ དང༌, ལུང༌ཚུབ༌ ཆད༌ཅུག༌ཅེས༌སི༌ ཆག༌ལས༌གུན༌ ཛད༌ཏེ༌ དཀོན༌མཆོག༌ ཙོགས༌སི༌ ཝང༌ཆ༌ དང༌ ཤེད༌ ཡོད༌ཁན༌བོ༌ ང༌དང༌གུན༌ལ༌ ལྟན༌ན༌ནོག༌། ཨིན༌ནའང༌ ཁོང༌ངི༌ ཆག༌ལས༌ ཀྲག༌ཤོག༌པོ༌ མི༌གུན༌ སྡིག༌པའེ༌ ཀ༌ནེ༌ ཐར༌ཅུག༌ཏེ༌ གྱལ༌ཁམས༌ཞིག༌ ཅོའ༌ ཛད༌ཅེས༌པོ༌ ཨིན༌, ཀ༌གུན༌ དཀོན༌མཆོག༌ ཉམ༌པོ༌ ནམ༌ཁའེ༌ ནང༌ང༌ ཏུས༌གྱུན༌ དུག༌ཨིན༌།
འི༌ སྤེ༌ཆའེ༌ ཇུག༌པོའེ༌ཀ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཇིག༌རྟེན༌ནི༌ ཁག༌ ཚང༌མ༌ སོང༌ཏེ༌ མི༌གུན༌ལ༌ ཡེ༌ཤུའི༌ཀ༌ ཏད༌པ༌ ཅོས༌ཏེ༌ བྲང༌ཤེས༌ལ༌ ཆོས༌ ཤོད༌ ཟེར༌ཏེ༌ སྟིང༌ཇུག༌གི༌ བཀའ༌བོ༌ སལས༌།།
1
གཙོ༌བོ༌ ཡེ༌ཤུའི༌ ཕ༌མེས༌པོ༌གུན༌།
1:1 ནེ༌ 17
1 འི༌བོ༌ ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཕ༌མེས༌པོ༌གུན༌ནི༌ ཐོ༌ཨིན༌, ཁོང༌ གྱལ༌པོ༌ དཱ༌བིད༌ དང༌ ཨབ༌ར༌ཧམ༌མི༌ པུར༌གྱུད༌ ཨིན༌ནོག༌།
2 ཨབ༌ར༌ཧམ༌ ནི༌ ཨི༌སཱག༌གི༌ ཨ༌བ༌ ཨིན༌པིན༌།
ཨི༌སཱག༌ ནི༌ ཡ༌ཀོབ༌བི༌ ཨ༌བ༌ ཨིན༌པིན༌།
ཡ༌ཀོབ༌ ནི༌ ཡ༌ཧུ༌དཱ༌ དང༌ ཁོའེ༌ ཨ༌ཅོ༌ནོ༌ ཚང༌མའེ༌ ཨ༌བ༌ ཨིན༌པིན༌།
3 ཡ༌ཧུ༌དཱ༌ ནི༌ ཕེ༌རེས༌ དང༌ ཟེ༌རཧ༌ གུན༌ནི༌ ཨ༌བ༌,
ཡང༌ ཁོང༌གུན༌ནི༌ ཨ༌མ༌ ནི༌ ཐ༌མར༌ ཨིན༌པིན༌།
ཕེ༌རེས༌ ནི༌ ཧེས༌རོན༌ནི༌ ཨ༌བ༌ ཨིན༌པིན༌།
ཧེས༌རོན༌ ནི༌ རམ༌མི༌ ཨ༌བ༌ ཨིན༌པིན༌།
4 རམ༌ ནི༌ ཨམ༌མི༌ན༌དབ༌བི༌ ཨ༌བ༌ ཨིན༌པིན༌།
ཨམ༌མི༌ན༌དབ༌ ནི༌ ན༌ཧ༌ཤོན༌ནི༌ ཨ༌བ༌ ཨིན༌པིན༌།
ན༌ཧ༌ཤོན༌ ནི༌ སལ༌མོན༌ནི༌ ཨ༌བ༌ ཨིན༌པིན༌།
5 སལ༌མོན༌ ནི༌ བོ༌ཨཟ༌ཟི༌ ཨ༌བ༌,
ཡང༌ ཁོའེ༌ ཨ༌མ༌ ནི༌ ར༌ཧབ༌ ཨིན༌པིན༌།
བོ༌ཨཟ༌ ནི༌ ཨོ༌བེད༌དི༌ ཨ༌བ༌,
ཡང༌ ཁོའེ༌ ཨ༌མ༌ ནི༌ རུད༌ ཨིན༌པིན༌།
ཨོ༌བེད༌ ནི༌ ཡེ༌ཤེའེ༌ ཨ༌བ༌ ཨིན༌པིན༌།
6 ཡེ༌ཤེ༌ ནི༌ གྱལ༌པོ༌ དཱ༌བིད༌དི༌ ཨ༌བ༌ ཨིན༌པིན༌།
དཱ༌བིད༌ ནི༌ སོ༌ལོ༌མོན༌ནི༌ ཨ༌བ༌,
ཡང༌ ཁོའེ༌ ཨ༌མ༌ ནི༌ ཨུ༌རི༌ཡཱའི༌ ན༌མ༌ བད༌ཤི༌བ༌ ཨིན༌པིན༌།
7 སོ༌ལོ༌མོན༌ ནི༌ རེ༌ཧབ༌བོ༌འམ༌མི༌ ཨ༌བ༌ ཨིན༌པིན༌།
རེ༌ཧབ༌བོ༌འམ༌ ནི༌ ཨ༌བི༌ཡཱའེ༌ ཨ༌བ༌ ཨིན༌པིན༌།
ཨ༌བི༌ཡཱ༌ ནི༌ ཨ༌སའེ༌ ཨ༌བ༌ ཨིན༌པིན༌།
8 ཨ༌ས༌ ནི༌ ཡེ༌ཧོ༌ཤ༌ཕད༌དི༌ ཨ༌བ༌ ཨིན༌པིན༌།
ཡེ༌ཧོ༌ཤ༌ཕད༌ ནི༌ ཡེ༌ཧོ༌རམ༌མི༌ ཨ༌བ༌ ཨིན༌པིན༌།
ཡེ༌ཧོ༌རམ༌ ནི༌ ཨུཟ༌ཟི༌ཡཱའི༌ ཨ༌བ༌ ཨིན༌པིན༌།
9 ཨུཟ༌ཟི༌ཡཱ༌ ནི༌ ཡོ༌ཐམ༌མི༌ ཨ༌བ༌ ཨིན༌པིན༌།
ཡོ༌ཐམ༌ ནི༌ ཨ༌ཧ༌ཟིའི༌ ཨ༌བ༌ ཨིན༌པིན༌།
ཨ༌ཧ༌ཟི༌ ནི༌ ཧི༌ཟི༌ཀི༌ཡའི༌ ཨ༌བ༌ ཨིན༌པིན༌།
10 ཧི༌ཟི༌ཀི༌ཡ༌ ནི༌ མ༌ན༌ཤེའེ༌ ཨ༌བ༌ ཨིན༌པིན༌།
མ༌ན༌ཤེ༌ ནི༌ ཨ༌མོན༌ནི༌ ཨ༌བ༌ ཨིན༌པིན༌།
ཨ༌མོན༌ ནི༌ ཡོ༌ཤི༌ཡཱའི༌ ཨ༌བ༌ ཨིན༌པིན༌།
11 ཡང༌ མག༌གི༌ སྟིང༌ནེ༌ ཡ༌ཧུ༌དཱ༌པ༌གུན༌ བ༌བེ༌ལོན༌ལ༌ ཁྱེར༌རི༌ ཏུས༌ ཡོ༌ཤི༌ཡཱ༌ ནི༌ ཡེ༌ཀོ༌ནི༌ཡཱ༌ དང༌ ཁོའེ༌ ཨ༌ཅོ༌ནོ༌གུན༌ནི༌ མེ༌མེ༌ གྱུར༌།
12 བ༌བེ༌ལོན༌ལ༌ ཁྱེར༌ཏེ༌ སྟིང༌ནེ༌
ཡེ༌ཀོ༌ནི༌ཡཱ༌ ནི༌ ཤའལ༌ཏི༌ཡེལ༌ལི༌ ཨ༌བ༌ ཨིན༌པིན༌།
ཤའལ༌ཏི༌ཡེལ༌ ནི༌ ཟེ༌རུཔ༌བ༌བེལ༌ལི༌ མེ༌མེ༌ ཨིན༌པིན༌།
13 ཟེ༌རུཔ༌བ༌བེལ༌ ནི༌ ཨ༌བི༌ཧུད༌དི༌ ཨ༌བ༌ ཨིན༌པིན༌།
ཨ༌བི༌ཧུད༌ ནི༌ ཨེ༌ལི༌ཡ༌ཀིམ༌མི༌ ཨ༌བ༌ ཨིན༌པིན༌།
ཨེ༌ལི༌ཡ༌ཀིམ༌ ནི༌ ཨ༌ཟོར༌རི༌ ཨ༌བ༌ ཨིན༌པིན༌།
14 ཨ༌ཟོར༌ ནི༌ ཟ༌དོག༌གི༌ ཨ༌བ༌ ཨིན༌པིན༌།
ཟ༌དོག༌ ནི༌ ཨ༌ཀིམ༌མི༌ ཨ༌བ༌ ཨིན༌པིན༌།
ཨ༌ཀིམ༌ ནི༌ ཨེ༌ལི༌ཧུད༌དི༌ ཨ༌བ༌ ཨིན༌པིན༌།
15 ཨེ༌ལི༌ཧུད༌ ནི༌ ཨེ༌ལི༌འ༌ཟར༌རི༌ ཨ༌བ༌ ཨིན༌པིན༌།
ཨེ༌ལི༌འ༌ཟར༌ ནི༌ མད༌ཐན༌ནི༌ ཨ༌བ༌ ཨིན༌པིན༌།
མད༌ཐན༌ ནི༌ ཡ༌ཀོབ༌བི༌ ཨ༌བ༌ ཨིན༌པིན༌།
16 ཡ༌ཀོབ༌ ནི༌ ཡོ༌སེབ༌བི༌ ཨ༌བ༌ ཡང༌ ཡོ༌སེབ༌བི༌ ན༌མ༌ ནི༌ མིར༌ཡམ༌ ཨིན༌པིན༌, ཁོའ༌ ཡེ༌ཤུ༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ལྟམས༌།
17 ལྡུས༌ཏེ༌ ཞུ༌ན༌ ཨབ༌ར༌ཧམ༌ནེ༌ གྱལ༌པོ༌ དཱ༌བིད༌དི༌ པར༌ལ༌ མི༌རབས༌ 14, ཡང༌ གྱལ༌པོ༌ དཱ༌བིད༌དི༌ ཏུས༌ནེ༌ ཡ༌ཧུ༌དཱ༌པ༌གུན༌ བ༌བེ༌ལོན༌ནི༌ ཡུལ༌ལ༌ ཁྱེར༌ཁྱེར༌ ཚག༌པ༌ མི༌རབས༌ 14, ཡང༌ ཡ༌ཧུ༌དཱ༌པ༌གུན༌ བ༌བེ༌ལོན༌ལ༌ ཁྱེར༌ཁན༌ནི༌ ཏུས༌ནེ༌ མ༌ཤི༌ཀའེ༌ ཏུས༌ ཚག༌པ༌ མི༌རབས༌ 14 ཡོད༌ཏེ༌ ཨིན༌ནོག༌།
ཡེ༌ཤུ༌ མ༌ཤི༌ཀ༌ ཁྲུངས༌ཚུལ༌།
1:18 ནེ༌ 25
18 གཙོ༌བོ༌ ཡེ༌ཤུ༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀའེ༌ ཁྲུང༌ ཚུལ༌ ནི༌ འི༌ཟུག༌གི༌ བྱུངས༌ཏེ༌ ཨིན༌པིན༌, ཁོང༌ངི༌ ཨ༌མ༌ མིར༌ཡམ༌མི༌ ཡོ༌སེབ༌ ཉམ༌པོ༌ ན༌མ༌ ཅོ༌ཅེས༌ལ༌ ཁའ༌ཆམས༌ཏེ༌ ཨིན༌པིན༌། ཨིན༌ནའང༌ ཁོང༌གུན༌ ཛོམས༌ཏེ༌ ཉམ༌པོ༌ དུག༌གི༌ སང༌ སྔུན༌ལ༌ དམ༌པའེ༌ ཐུག༌ཉིད༌དི༌ མིར༌ཡམ༌ སྐྱེ༌ཅེས༌མ༌ཞིག༌ གྱུར༌ཅུགས༌། 19 ཁོ༌ ན༌མ༌ ཏྲི༌ཁན༌ ཡོ༌སེབ༌, མི༌ དྲང༌པོ༌ཞིག༌ ཨིན༌པ༌, མིར༌ཡམ༌མ༌ མི༌གུན༌ནི༌ དུན༌ལ༌ ཁྲེལ༌བ༌ ཆ༌ མི༌ཅུག༌ སམས༌ཏེ༌, ཁོ༌རང༌ངི༌ སམ༌བའེ༌ ནང༌ང༌ སང༌ཝའེ༌ ཐོག༌ནེ༌ མིར༌ཡམ༌ ཉམ༌པོ༌ ན༌མ༌ མི༌ཅོ༌ སམས༌ཏེ༌ ཐག༌ཅདས༌།
20 ཏེ༌ཟུག༌ ཐག༌ཅད༌ཏེ༌ སྟིང༌ནེ༌, ཡོ༌སེབ༌བི༌ ཉི༌ལམ༌མི༌ ནང༌ང༌ དཀོན༌མཆོག༌གི༌ ཕོ༌ཉའེ༌ འི༌ཟུག༌ མོལ༌ཨིན༌ ཇལ༌, "གྱལ༌པོ༌ དཱ༌བིད༌དི༌ པུར༌གྱུད༌ ཡོ༌སེབ༌, མིར༌ཡམ༌མ༌ ན༌མ༌ ཅོས༌ཏེ༌ ཁྱེར༌ཅེས༌ལ༌ ཇིགས༌ མ༌ཇིགས༌, མིར༌ཡམ༌མི༌ ནང༌ང༌ ཆགས༌ཁན༌ནི༌ ཕྲུ༌གུ༌བོ༌ དམ༌པའེ༌ ཐུག༌ཉིད༌དི༌ ཞས༌ཏེ༌ ཨིན༌། 21 མིར༌ཡམ༌མ༌ བུ༌ཚ༌ཞིག༌ སྐྱེ༌ཨིན༌, ཡང༌ ཁྱོ༌རང༌ངི༌ ཁོང༌ངི༌ ཚན༌ལ༌ ཡེ༌ཤུ༌ * 1:21 ཡེ༌ཤུའི༌ ཏོན༌ ནི༌ "གཙོ༌བོ༌ དཀོན༌མཆོག༌གི༌ སྐྱོབ༌བ༌ ཛད༌ད༌ནོག༌" ཏག༌གོས༌ ཅིའ༌ཟེར༌ན༌ ཁོང༌ངི༌ ཁོང༌རང༌ངི༌ མི༌གུན༌ ཁོང༌གུན༌ནི༌ སྡིག༌པའེ༌ ཀ༌ནེ༌ སྐྱོབ༌བ༌ ཛད༌ཨིན༌།"
22 ལུང༌སྟོན༌པ༌ ཡེ༌ཤ༌ཡཱ༌ གྱུད༌ཏེ༌ དཀོན༌མཆོག༌གི༌ མོལ༌ཁན༌ ཚང༌མ༌ གྲུབ༌ཅེས༌སི༌ ཕིའ༌ ཏེ༌ ཚང༌མ༌ བྱུངས༌ཏེ༌ ཨིན༌ནོག༌། ཡེ༌ཤ༌ཡཱའེ༌ བྲིས༌ཁན༌བོ༌ ནི༌,
23 "ལྟོས༌ ན༌ཆུང༌, བུ༌ཚ༌ ཉམ༌པོ༌ བྲེལ༌ མ༌ཆའ༌ཁན༌ ཞིག༌གི༌ ནང༌ང༌
ཕྲུ༌གུ༌ ཆགས༌ཏེ༌ བུ༌ཚ༌ཞིག༌ ཇོར༌ཨིན༌,
ཡང༌ ཁོང༌ངི༌ ཚན༌ལ༌ ཨེམ༌མ༌ནུ༌ཨེལ༌ ཞུ༌ཨིན༌,† 1:23 ཡེ༌ཤ༌ཡཱའེ༌ སྤེ༌ཆའེ༌ 7:14, 8:8, 8:10
ཀ༌བོའེ༌ ཏོན༌ཏག༌པོ༌ ནི༌ "དཀོན༌མཆོག༌ ང༌དང༌ ཉམ༌པོ༌" ཨིན༌ནོག༌།
24 ཡོ༌སེབ༌བ༌ ཉིད༌ཚད༌ད༌ཅིག༌, གཙོ༌བོའེ༌ ཕོ༌ཉའེ༌ མོལ༌ཁན༌ ནང༌ཞིན༌ མིར༌ཡམ༌ ཉམ༌པོ༌ ན༌མ༌ ཅོས༌ཏེ༌ ཁོ༌རང༌ངི༌ ཁང༌པ༌ ཁྱོངས༌། 25 ཨིན༌ནའང༌ སྲས༌པོ༌ ཇོར༌ཇོར༌ ཚོག༌པ༌ ཡོ༌སེབ༌བི༌ མིར༌ཡམ༌ ཉམ༌པོ༌ ལུས༌བྲེལ༌ མ༌ནེ༌ མ༌བོརས༌, ཡང༌ སྲས༌པོའེ༌ ཚན༌ལ༌ ཡོ༌སེབ༌བི༌ ཡེ༌ཤུ༌ ཏག༌ག༌ ཛདས༌།།