12
ཡེ༌ཤུའི༌ ཞབས༌སི༌ཀ༌ ཏྲི༌ཞིམ༌ཅན༌ནི༌ མར༌ ལུགས༌།
12:1 ནེ༌ 11
1 པེ༌སག༌གི༌ ཏུས༌ཆེན༌ནི༌ སང༌ ཞག༌ དྲུག༌གི༌ སྔུན༌ལ༌, སོན༌ཏེའ༌ ལང༌ང༌ ཛད༌ཁན༌ ལ༌ཟར༌རས༌སི༌ ཁང༌པ༌ བེད༌ཐཱ༌ནི༌ གྲོང༌ཁྱེར༌ལ༌ གཙོ༌བོ༌ ཡེ༌ཤུ༌ སྐྱོདས༌། 2 ཏེ༌རུ༌ གཙོ༌བོ༌ ཡེ༌ཤུའི༌ རྩི༌ཝའེ༌ ནང༌ང༌ གོང༌ཟན༌ནི༌ གྲལ༌གྲིག༌ ཅོས༌ཏེ༌ མར༌ཐཱའེ༌ ཞབ༌སྟོག༌ ཞུའད༌པིན༌, ཡེ༌ཤུ༌ ཉམ༌པོ༌ དོན༌ཏང༌ དོན༌ཁན༌གུན༌ནི༌ ཕྲོའ༌ ལ༌ཟར༌རས༌སའང༌ ཡོད༌པིན༌། 3 ཏེ༌ ཏུས༌ མིར༌ཡམ༌མི༌ མ༌ ཀུས༌པོ༌ ཏྲི༌ཞིམ༌ཅན༌ནི༌ མར༌ནག༌ ལི༌ཀྲར༌ ཕེད༌ ཟམ༌ཤིག༌ ཡེ༌ཤུའི༌ ཞབས༌སི༌ཀ༌ ལུགས༌ཏེ༌ ཁོ༌རང༌ངི༌ སྲ༌ ཉམ༌པོ༌ ཕིས༌, ཏེ༌ནེ༌ ཁང༌པ༌ གང༌པོ༌ ཏྲི༌ཞིམ༌མི༌ གང༌།
4 ཨིན༌ནའང༌ ཁོང༌ངི༌ ལོབ༌ཕྲུགས༌གུན༌ནི༌ ཕྲོ༌ནེ༌ ཡུ༌དཱ༌ ཀར༌ཡོད༌པའེ༌ ༼ཀ༌བོའེ༌ སྟིང༌ནེ༌ ཡེ༌ཤུའ༌ ངོ༌ལོག༌ ཅོས༌༽ མིར༌ཡམ༌མ༌ ཟེརས༌, 5 "འི༌ ཏྲི༌ཞིམ༌མི༌ མར༌བོ༌ ཙོངས༌ཏེ༌ པེ༌ནེ༌ ཉལ༌བ༌ཅན༌གུན༌ལ༌ ཅིའ༌ མ༌ཏང༌ང༌ ཨིན༌ཧེ༌? འི༌བོའ༌ ལོ༌ ཅིག༌གི༌ ལ༌ཆ༌ ཟམ༌ཤིག༌ རི༌ཅེས༌ དུག༌།" 6 ཉལ༌བ༌ཅན༌གུན༌ནི༌ ཕིའ༌ ཚེར༌ཁ༌ ཡོད༌ཏེ༌ མན༌པ༌ ཁོ༌རང༌ རྐུན༌མ༌ ཨིན༌ པ༌སང༌ ཁོའེ༌ ཏེ༌བོ༌ ཟེརས༌། ལོབ༌ཕྲུགས༌གུན༌ནི༌ ཀོལ༌ཅེས༌སི༌ པེ༌ནེ༌ ཁོ༌མགས༌, ཁོའེ༌ ལག༌ག༌ བོར༌ཁན༌བོའེ༌ ནང༌ནེ༌ ཁོའེ༌ རྐུའད༌པིན༌།
7 ཡེ༌ཤུའི༌ མོལས༌, "ཁོ༌ ཚེར༌ཁ༌ མ༌ལྟན༌, ཁོའེ༌ འི༌བོ༌ ཅོས༌ཏེ༌ ངའེ༌ ཟུགས༌པོ༌ སྤུར༌ཁང༌ང༌ ཁྱེར༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ ཨིན༌། 8 ཉལ༌བ༌ཅན༌གུན༌ ཏུས༌གྱུན༌ ཁྱོ༌ཞའ༌ ཉམ༌པོ༌ ལུས༌ཨིན༌, ཨིན༌ནའང༌ ང༌ ཁྱོ༌ཞའ༌ ཉམ༌པོ༌ ཏུས༌གྱུན༌ མི༌ལུས༌།"
9 ཏེན༌ན༌ ཏུས༌ལ༌ ཡ༌ཧུ༌དཱ༌པའེ༌ མི༌ཚོགས༌ ཆེན༌མོའ༌ ཡེ༌ཤུ༌ ཏེ༌རུ༌ ཡོད༌ཁན༌བོ༌ གྱུས༌སོང༌པ༌ ཁོང༌གུན༌ ཡོངས༌, ཅིའ༌ཟེར༌ན༌ ཁོང༌གུན༌ལ༌ ཡེ༌ཤུ༌ ཐུག༌ཅེས༌ ཅིག༌པོ༌ མན༌པ༌, ཁོང༌ངི༌ སོན༌ཏེའ༌ ལང༌ང༌ ཛད༌ཁན༌ནི༌ ལ༌ཟར༌རས༌ལའང༌ ལྟ༌ཉིན༌ ཡོད༌པིན༌། 10 ཏེ༌ནེ༌ བླ༌མ༌ འུ༌སྐྱོང༌གུན༌ནི༌ ལ༌ཟར༌རས༌སའང༌ སད༌ཅེས༌སི༌ ཅུས༌ངན༌ ལྡིངས༌ 11 ཅིའ༌ཟེར༌ན༌ ལ༌ཟར༌རས༌ལ༌ བྱུང༌ཁན༌བོའེ༌ ཡ༌ཧུ༌དཱ༌པ༌ མང༌པོ༌ཞིག༌གི༌ བླ༌མ༌གུན༌ ཕངས༌ཏེ༌ ཡེ༌ཤུའི༌ཀ༌ ཏད༌པ༌ ཁྱོང༌ངད༌པིན༌།
གཙོ༌བོ༌ ཡེ༌ཤུའ༌ གྱལ༌པོའེ༌ ཚུལ༌ལ༌ གའ༌སུས༌ ཞུས༌།
12:12 ནེ༌ 19
12 སྟིང༌མ༌ཞག༌པོ༌ ཏུས༌ཆེན༌ལ༌ ཡོངས༌ཁན༌ནི༌ མི༌ཚོགས༌ ཆེན༌མོའེ༌ གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌མ༌ སྐྱོད༌དུག༌ ཟེར༌ཏེ༌ ཚོར༌པ༌, 13 ཁོང༌གུན༌ནི༌ ཁ༌སོར༌ ལྕང༌མའེ༌ ཡལ༌ག༌ ཁུར༌ཏེ༌ ཁོང༌ང༌ གའ༌སུས༌ ཞུའ༌ལ༌ བིང༌ཏེ༌ ཀུ༌ཅོ༌ ཏང༌ཨིན༌ ཟེརས༌,
"སྟོད༌པ༌ ཕུལ༌ཤིག༌།
གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌བོ༌ ཅིན༌ལབས༌ཅན༌།
ཨིས༌ར༌ཨེལ༌ལི༌ གྱལ༌པོ༌ ཅིན༌ལབས༌ཅན༌།"
14 ཡེ༌ཤུའི༌ བུང༌སར༌ཞིག༌ ཟིགས༌པ༌ ལུང༌སྟན༌ དྲན༌དྲ༌ གྲུབ༌ཅེས༌སི༌ ཕིའ༌ ཁོང༌ ཏེ༌ཀ༌ ཞོན༌ན༌ ཛདས༌, ཀ༌བོ༌ ནི༌,
15 "ཡེ༌རུ༌ཤ༌ལེམ༌པ༌གུན༌* 12:15 གིརིས༌སི༌ སྐད༌དི༌ ནང༌ང༌ འི༌ ཚིགས༌པོ༌ ནི༌ "རི༌ ཟི༌ཡོན༌ནི༌ བུ༌མོའ༌ ཏ༌ མ༌ཇིགས༌ཤིག༌" བྲིས༌ཏེ༌ དུག༌། མ༌ཇིགས༌ཤིག༌།
ལྟོས༌སའང༌ ཁྱོ༌ཞའེ༌ གྱལ༌པོ༌,
བུང༌སར༌རི༌ཀ༌ ཞོན༌ཏེ༌ སྐྱོད༌ད༌ལ༌། † 12:15 ཟ༌ཀར༌ཡཱའེ༌ སྤེ༌ཆའེ༌ 9:9"
16 ཏེ༌ཏུས༌ ལོབ༌ཕྲུགས༌གུན༌ལ༌ ཁོང༌ངི༌ ཛད༌ཁན༌གུན༌ ཅའང༌ ཧ༌མ༌གོ༌, ཨིན༌ནའང༌ ཡེ༌ཤུའ༌ སྤལ༌ ‡ 12:16 སྤལ༌ ཏོན༌ནི༌ ཡེ༌ཤུ༌ ཀྲོངས༌ཏེ༌ སྐུ༌ སོན༌ཏེའ༌ ཞངས༌ཏེ༌ ནམ༌ཁའ༌ ཁྱེར༌ར༌ ཛད༌ཅེས༌པོ༌ ཨིན༌། ཐོབ༌ཏེ༌ སྟིང༌ནེ༌, ཁོང༌ངི༌ཀ༌ ཏེ༌ བྱུང༌ཁན༌ ཚང༌མ༌ དམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ ཡོད༌ཁན༌བོ༌ ཁོང༌གུན༌ལ༌ ཧ༌གོ༌།
17 ཡེ༌ཤུའི༌ ལ༌ཟར༌རས༌ལ༌ སྤུར༌ཁང༌ནེ༌ བོད༌ད༌ ཛད༌ཏེ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ ཟ༌ནེ༌, ཏེ༌རུ༌ ཡོད༌ཁན༌ནི༌ མི༌ཚོགས༌པོའེ༌ ཏེ༌ ནས༌ཚུལ༌བོ༌ ཀ༌ནེ༌ཀ༌རུ༌ ཁྱེབ༌ཤུག༌གད༌པིན༌། 18 ཡེ༌ཤུའི༌ ཏེ༌ ཧ༌ལས༌ཤེས༌སི༌ ཛད༌པ༌ ཛད༌ཁན༌བོ༌ ཚོར༌ཏེ༌ མི༌ མང༌པོ༌ ཡེ༌རུ༌ཤ༌ལེམ༌ནེ༌ ཁོང༌ང༌ ཐུག༌ག༌ལ༌ ཡོངས༌། 19 ཕ༌རུ༌ཤི༌པ༌གུན༌ནི༌ ཅིག༌ དང༌ ཅིག༌ག༌ ཟེརས༌, "ལྟོས༌ཤིག༌གའང༌ ང༌དང༌གུན༌ནི༌ ཐབས༌པོ༌ ཀ༌རུའང༌ ལེབ༌ མི༌ཅུག༌གོག༌, ཚང༌མ༌ ཁོའེ༌ སྟིང༌རང༌ནེ༌ ཆའ༌ལ༌།"
གཙོ༌བོ༌ ཡེ༌ཤུའི༌ ཁོང༌ ཀྲོང༌ཤེས༌པོ༌ ལུང༌སྟན༌ ཛདས༌།
12:20 ནེ༌ 36
20 ཏ༌ ཏུས༌ཆེན༌ནི༌ ཏུས༌ དཀོན༌མཆོག༌ག༌ ཅོལ༌ལ༌ ཡོང༌ཁན༌གུན༌ནི༌ ཕྲོའ༌ ཡ༌ཧུ༌དཱ༌པ༌ མན༌ཁན༌ ཁ༌ཅིག༌གའང༌ ཡོད༌པིན༌། 21 གཱ༌ལིལ༌ལིའི༌ ཡུལ༌ཇོངས༌ བེད༌སའི༌ད༌ནེ༌ ཨིན༌ཁན༌གུན༌, ཕི༌ལིབ༌བི༌ཀ༌ ཡོངས༌ཏེ༌ ཁོའ༌ ཞུ༌ཝ༌ ཕུལས༌, "སྤོན༌བོ༌ལེ༌, ང༌ཞ༌གུན༌ལ༌ གཙོ༌བོ༌ ཡེ༌ཤུ༌ ཇལ༌ ཉིན༌རག༌།" 22 ཕི༌ལིབ༌ ཨེན༌གྲིརུ༌ ཤད༌ད༌ལ༌ སོང༌, ཡང༌ ཁོང༌ ཉིས༌ཀོ༌ སོང༌ཏེ༌ ཡེ༌ཤུའ༌ ཤདས༌།
23 ཡེ༌ཤུའི༌ ལན༌སལས༌, "མི༌རིགས༌སི༌བུའ༌ དཀོན༌མཆོག༌གི༌ ཆོགས༌ནེ༌ སྤལ༌ ཐོབ༌ཅེས༌སི༌ ཏུས༌ ལེབ༌ ཚར༌། 24 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ནམ༌ཚོག༌པ༌ ཀྲོའེ༌ ས༌འོན༌ སའེ༌ ནང༌ང༌ བུད༌ཏེ༌ ཤི༌ མི༌ཤི༌ ཏེ༌བོ༌ ཀྲོ༌ ཅིག༌ག༌ ལུས༌ས༌ནོག༌, ཨིན༌ནའང༌ ཤི༌ཏེ༌ སྟིང༌ནེ༌ སྨིན༌ཏེ༌ ཏེ༌བོའ༌ བྲས༌བུ༌ མང༌པོ༌ ཆགས༌ས༌ནོག༌། 25 ང༌ སང༌ མང༌ང༌ རང༌ངི༌ སྲོག༌ག༌ ཡ༌ཤ༌ ཅོ༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ རང༌ངི༌ སྲོག༌གི༌ སང༌ མང༌ང༌ ངའ༌ ཡ༌ཤ༌ ཅོ༌ཁན༌གུན༌ནི༌ ཁོ༌རང༌ངི༌ སྲོག༌པོ༌ ཐའ༌མེད༌པའེ༌ མི༌ཚེའེ༌ ཕིའ༌ སྐྱོབ༌ཨིན༌། 26 ངའ༌ ཞབ༌སྟོག༌ ཞུ༌ཁན༌གུན༌ ངའེ༌ གྱབ༌ནེ༌ བྲངས༌གོས༌, ང༌ ཡོད༌ས༌ ངའེ༌ ཡོག༌པོ༌གུན༌ནའང༌ དུག༌ཨིན༌། ངའ༌ ཞབ༌སྟོག༌ ཞུ༌ཁན༌གུན༌ལ༌ ངའེ༌ ནམ༌ཁའ༌ ཞུགས༌ཁན༌ནི༌ ཡབ༌བིའང༌ རྩི༌ཝ༌ ཛད༌ཨིན༌།"
27 "ངའེ༌ སེམས༌ལ༌ མ༌སྲན༌ཏྲེ༌ ནགས༌ རག༌། ཏེ༌ནེ༌ ཅི༌ ངའེ༌ ཟེར༌ར༌, 'ཀྱེ༌ ངའེ༌ ཡབ༌, ཏ༌ ང༌ འི༌ རྡུག༌ངལ༌ལི༌ ཏུས༌པོ༌ནེ༌ སྐྱོབ༌བ༌ ཛད༌?' མ༌ནེ༌ མི༌ཟེར༌ ཅིའ༌ཟེར༌ན༌ ང༌ འིན༌ན༌ གྱུན༌ཚན༌བོའེ༌ ཕིའ༌ ཡོངས༌ཏེ༌ ཨིན༌། 28 ཀྱེ༌ ཡབ༌, ཉེ༌རང༌ངི༌ ཚན༌ལ༌ སྤལ༌ ཐོབ༌ ཅུག༌ག༌ ཛད༌།"
ཏེ༌ནེ༌ ནམ༌ཁའ༌ནེ༌ སུང༌སྐད༌ཅིག༌ ཚོར༌, "ངའེ༌ སྤལ༌ ཏངས༌ཏེ༌ ཨིན༌, ཏ༌རུང༌ངའང༌ སྤལ༌ ཏང༌ཨིན༌།" 29 ཏེ༌རུ༌ ཡོད༌ཁན༌ མི༌ཚོགས༌ སུང༌སྐད༌ ཚོར༌ཁན༌གུན༌ནི༌ བྲུག༌ལྡིར༌ར༌ རག༌ ཟེརས༌, ཡང༌ ཁ༌ཅིག༌གི༌ ཟེརས༌, "ཕོ༌ཉའེ༌ ཁོང༌ང༌ ཞལ༌ཏ༌ སལ༌ཏེ༌ ཨིན༌ནོག༌།"
30 ཡེ༌ཤུའི༌ མོལས༌, "འི༌ སུང༌སྐད༌པོ༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌, ངའེ༌ ཕིའ༌ མན༌། 31 ཏ༌ འི༌ ཇིག༌རྟེན༌པ༌གུན༌ལ༌ ཁྲིམས༌ཅད༌ཅེས༌སི༌ ཏུས༌ ལེབས༌ཏེ༌ ཨིན༌, འི༌ ཇིག༌རྟེན༌ནི༌ ཏད༌པ༌ མེད༌ཁན༌གུན༌ནི༌ ཝང༌སྲུལ༌པ༌ ཤེ༌ཏན༌, ཕི༌ལོག༌ག༌ ཕིང༌ང༌ ཛད༌ཨིན༌། 32 ཡང༌ ང༌ ཀེན༌ལ༌ སྟག༌ ཟ༌ནེ༌ ངའེ༌ མི༌ཚང༌མའེ༌ སེམས༌ ང༌རང༌ ཆོགས༌ལ༌ ཁྱོང༌ཨིན༌།" 33 ཡེ༌ཤུའི༌ ཏེ༌ཟུག༌ མོལ༌ཏེ༌ ཁོང༌ ཀྲོངས༌ཚུལ༌བོ༌ སྔོན༌ ཅུག༌ག༌ ཛདས༌།
34 མི༌ཚོགས༌སི༌ ཟེརས༌, "ང༌ཞའེ༌ དམ༌པའེ༌ སུང༌རབས༌སི༌ ནང༌ནེ༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཏུས༌གྱུན༌ ཞུགས༌ཨིན༌ ཟེར༌ཏེ༌ ཚོར༌། ཏེ༌ནེ༌ ཉེ༌རང༌ངི༌ ཀ༌ཟུག༌ག༌ མོལ༌ལད༌, 'མི༌རིགས༌སི༌བུ༌ ཐོན༌པོ༌ སྟག༌གོས༌?' འི༌ མི༌རིགས༌སི༌བུ༌ སུ༌ ཨིན༌ནོག༌?"
35 ཡེ༌ཤུའི༌ མོལས༌, "ངའེ༌ འོད༌པོ༌ ཁྱོ༌ཞ༌གུན༌ ཉམ༌པོ༌ ཏུས༌ ཉུ༌ངུན༌ཞིག༌གི༌ ཕིའ༌ ལུས༌ཨིན༌། མུན༌གྲིག༌གི༌ ཁྱོ༌ཞ༌གུན༌ནི༌ཀ༌ ཝང༌ མི༌སྲུལ༌ཅེས༌སི༌ ཕིའ༌ ཏེ༌ འོད༌ ཡོད༌ཡོད༌པོ༌ ཏེ༌ནང༌ང༌ གྲུལ༌ཤིག༌། མུན༌གྲིག༌གི༌ ནང༌ང༌ གྲུལ༌ཁན༌གུན༌ལ༌ ཀ༌རུ༌ ཆ༌ཅེན༌ ཅའང༌ གྱུས༌ མེད༌ཀྱག༌། 36 ཁྱོ༌ཞ༌གུན༌ ཉམ༌པོ༌ འོད༌ ཡོད༌དི༌ ཏུས༌ལ༌ ཁྱོ༌ཞ༌གུན༌ ཏེ༌ འོད༌དི༌ ཕྲུ༌གུ༌ གྱུར༌ཅེས༌སི༌ ཕིའ༌ ཏེ༌ འོད༌པོའེ༌ཀ༌ ཏད༌པ༌ ཁྱོང༌གོས༌།" ཏེ༌བོ༌ མོལ༌ཏེ༌ སྟིང༌ནེ༌ ཡེ༌ཤུ༌ ཏེ༌ཀ༌ནེ༌ བིངས༌ཏེ༌ སྐྱོདས༌ ཡང༌ ཁོང༌གུན༌ནེ༌ ཨིབ༌བ༌ ཛདས༌།
མི༌གུན༌ནི༌ ཏ༌རུང༌ངའང༌ ཏད༌པ༌ མ༌ཅོས༌།
12:37 ནེ༌ 50
37 གཙོ༌བོ༌ ཡེ༌ཤུའི༌ ཧ༌ལས༌ཤེས༌སི༌ ལྟས༌གུན༌ ལྟན༌ཏེའང༌ མི༌ མང༌ཆེའ༌ ཁོང༌ངི༌ཀ༌ ཏད༌པ༌ མ༌ཁྱོངས༌། 38 འི༌བོ༌ ལུང༌སྟོན༌པ༌ ཡེ༌ཤ༌ཡཱའེ༌ མོལ༌ཁན༌བོ༌ དྲན༌དྲ༌ གྲུབ༌ཏེ༌ ཨིན༌,
"ཉེ༌རང༌ངི༌ ཁྱུད༌ཅན༌ ཆག༌ལས༌གུན༌ སྔོན༌ཅུགས༌ཏེའང༌,
གཙོ༌བོ༌ལེ༌, སུའི༌ ང༌དང༌ངི༌ ལོན༌བོའ༌ ཨིད༌ཤེས༌ ཅོས༌།"
39 ཏེན༌ན༌ གྱུན༌ཚན༌བོའེ༌ ཕིའ༌ ཁོང༌གུན༌ནི༌ ཏད༌པ༌ མ༌ཁྱོངས༌། དམ༌པའེ༌ སུང༌རབས༌སི༌ ཡང༌ ཁག༌ཤིག༌གི༌ཀ༌ ལུང༌སྟོན༌པ༌ ཡེ༌ཤ༌ཡཱའེ༌ མོལ༌ཏེ༌ དུག༌,
40 "ཁོང༌ངི༌ ཁོང༌གུན༌ནི༌ མིག༌གུན༌ ཞ༌ར༌ དང༌
སྙིང༌གུན༌ སྐྱོང༌པོ༌ ཅོའ༌ ཛད༌ པ༌སང༌
ཁོང༌གུན༌ནི༌ མིག༌ནེ༌ མི༌ཐོང༌
ཡང༌ སྙིང༌གུན༌ལ༌ ཧ༌གོ༌ མི༌ཐུབ༌,
ཏེ༌ མན༌ནེ༌ ཁོང༌གུན༌ནི༌ གྱོད༌པ༌ ཅོས༌ཏེ༌
ངའེ༌ ཁོང༌གུན༌ ཕན༌ཅུགས༌ཏེ༌ ཡོད༌གྲོ༌། § 12:40 ཡེ༌ཤ༌ཡཱའེ༌ སྤེ༌ཆའེ༌ 6:10"
41 ལུང༌སྟོན༌པ༌ ཡེ༌ཤ༌ཡཱའེ༌ ཡེ༌ཤུའི༌ སྤལ༌བོ༌ ཐོང༌ པ༌སང༌, ཁོང༌ངི༌ སྐོར༌ལ༌ ཏེ༌གུན༌ མོལ༌ཏེ༌ ཨིན༌པིན༌།
42 ཏེ༌ཏུས༌ལ༌ མི༌ མང༌པོ༌ཞིག༌གི༌ ཀ༌བོའེ༌ ཕྲོའ༌ ཡ༌ཧུ༌དཱ༌པའེ༌ འུ༌སྐྱོང༌ ཁ༌ཅིག༌གའང༌ ཡོད༌པིན༌, ཡེ༌ཤུའི༌ ནང༌ང༌ ཏད༌པ༌ ཁྱོངས༌, ཨིན༌ནའང༌ སུའང༌ མ༌ཤདས༌, ཅིའ༌ཟེར༌ན༌ ཕ༌རུ༌ཤི༌པ༌གུན༌ནི༌ ཁོང༌གུན༌ ཆོས༌ཚོགས༌སི༌ ཕྲོ༌ནེ༌ ཕིངས༌ ཏང༌ང༌ནོག༌ སམ༌ཏེ༌ ཇིགས༌སད༌པིན༌། 43 ཁོང༌གུན༌ནི༌ དཀོན༌མཆོག༌གི༌ སྟོད༌པའེ༌ སང༌ མི༌ཆོགས༌སི༌ སྟོད༌པ༌ རིན༌ཆེའ༌ ཚོར༌རད༌པིན༌།
44 ཏེ༌ནེ༌ ཡེ༌ཤུའི༌ ཀུ༌ཅོ༌ སལ༌ཏེ༌ མོལས༌, "ང༌ ཏད༌པ༌ ཅོ༌ཁན༌གུན༌ནི༌ ང༌ ཅིག༌པོ༌ མན༌པ༌ ང༌ ཀལ༌ལ༌ ཛད༌ཁན༌བོའང༌ ཏད༌པ༌ ཅོའ༌ནོག༌། 45 ཡང༌ ང༌ ཐོང༌ཁན༌གུན༌ནི༌ ང༌ ཀལ༌ལ༌ ཛད༌ཁན༌ནི༌ ཡབ༌ ཇལ༌ཏེ༌ ཨིན༌ནོག༌། 46 ངའེ༌ཀ༌ ཏད༌པ༌ ཁྱོང༌ཁན༌གུན༌ མུན༌གྲིག༌གི༌ ནང༌ང༌ མི༌ལུས༌ཤེས༌སི༌ ཕིའ༌ ང༌ ཇིག༌རྟེན༌ནི༌ ནང༌ང༌ འོད༌དི༌ ཚུལ༌ལ༌ ཡོངས༌ཏེ༌ ཨིན༌།"
47 ངའེ༌ སྤེ༌ར༌གུན༌ ཉན༌ཏེ༌ ལག༌ལེན༌ མ༌ཅོ༌ཁན༌གུན༌ལ༌ ངའེ༌ སྐྱོན༌ མི༌ཀལ༌, ཅིའ༌ཟེར༌ན༌ ང༌ ཇིག༌རྟེན༌པ༌གུན༌ལ༌ སྐྱོན༌ ཀལ༌ལ༌ མན༌པ༌ ཐར༌པ༌ ཏང༌ང༌ ཡོངས༌ཏེ༌ ཨིན༌། 48 ང༌ ཕངས༌ཏེ༌ ངའེ༌ སྤེ༌ར༌གུན༌ མ༌ཉན༌ཁན༌ ཚང༌མའ༌ ངའེ༌ ཟེར༌ཁན༌ ཏེན༌ན༌ སྤེ༌ར༌གུན༌ནི༌ ཐའ༌མའེ༌ ཞག༌ག༌ ཁོང༌གུན༌ལ༌ ཤགས༌ ཅད༌ཨིན༌། 49 ངའེ༌ ང༌རང༌ངི༌ ཝང༌ངི༌ ནང༌ང༌ ཟེར༌ར༌མེད༌, ཨིན༌ནའང༌ ང༌ ཀལ༌ལ༌ ཛད༌ཁན༌ ནམ༌ཁའ༌ ཞུགས༌ཁན༌ནི༌ ཡབ༌བི༌ ང༌ ཅི༌ ཟེར༌ཅེས༌ དང༌ ཀ༌ཟུག༌གི༌ ཟེར༌ཅེས༌ལ༌ བཀའ༌ སལ༌ལ༌ ཛད༌ཏེ༌ ཨིན༌། 50 ཁོང༌ངི༌ བཀའེ༌ ཐའ༌མེད༌པའེ༌ མི༌ཚེའེ༌ ནང༌ང༌ ཁྲིད༌ད༌ ཛད༌ཅེས༌པོ༌ ངའེ༌ ཤེས༌སད༌། ཏེན༌ན༌བོའེ༌ཕིའ༌ ངའེ༌ ཡབ༌བི༌ ངའ༌ ཟེར༌ཅེས༌སི༌ བཀའ༌ སལ༌ཁན༌བོ༌ ངའེ༌ ཟེར༌རད༌།