1 ཏ༌ ཀེ༌ནན༌ནི༌ ནང༌ང༌ མུ༌གེ༌བོ༌ མང༌ང༌ ཐུའ༌ སོང༌། 2 ཡ༌ཀོབ༌བི༌ ནང༌ཚང༌གུན༌ནི༌ ཨི༌ཇིབ༌ནེ༌ ཁྱོངས༌ཁན༌ནི༌ གྲུ༌ ཚང༌མ༌ ཟའ༌ ཚར༌ར༌ཅིག༌, ཡ༌ཀོབ༌བི༌ ཁོ༌རང༌ངི༌ བུ༌ཚ༌གུན༌ལ༌ ཟེརས༌, "ཡང༌སྐྱར༌ ཟའ༌ཅེས༌ ཉོའ༌ལ༌ ཨི༌ཇིབ༌བ༌ སོང༌།"

3 ཨིན༌ནའང༌ ཡ༌ཧུ༌དཱའེ༌ ཨ༌བའ༌ ཟེརས༌, "གྲུ༌ ཙོང༌ཁན༌ནི༌ མི༌བོའེ༌, ནོ༌ ཆུང༌ཤོག༌པོ༌ ཁྲིད༌ཏེ༌ མ༌ནེ༌ ཁོ༌ ཡོད༌ས༌ མི༌ཡོང༌ཅེས༌ལ༌ ང༌ཞའ༌ སྤང༌པུད༌ད༌ རག༌། 4 གལ༌ཏེས༌ ཉེ༌རང༌ངི༌ ང༌ཞའེ༌ ནོ༌ ང༌ཞ༌གུན༌ ཉམ༌པོ༌ ཀལ༌ན༌ ང༌ཞ༌གུན༌ ཉེ༌རང༌ངི༌ ཕིའ༌ ཟའ༌ཅེས༌ ཉོའ༌ལ༌ ཆེན༌། 5 ཨིན༌ནའང༌ ནོ༌ མ༌ཀལ༌ན༌ ང༌ཞ༌གུན༌ མི༌ཆ༌ ཅིའ༌ཟེར༌ན༌ ཏེ༌ མི༌བོའེ༌ ང༌ཞའ༌, ནོ༌ ཁྲིད༌ཏེ༌ མ༌ནེ༌ ཁོ༌ ཡོད༌ས༌ མ༌ཡོང༌ ཟེར༌ར༌རག༌།"

6 ཡ༌ཀོབ༌བི༌ ཟེརས༌, "ཁྱོ༌ཞའ༌ ནོ༌ ཡོད༌ཁན༌བོ༌ ཏེ༌ མི༌བོའ༌ ཤད༌ཏེ༌, ཅི༌ཕིའ༌ ཁྱོ༌ཞ༌གུན༌ནི༌ ངའ༌ ནགས༌ ལྟན༌ཏེ༌ ཨིན༌?"

7 ཁོང༌གུན༌ནི༌ ལན༌ཏངས༌, "མི༌བོའེ༌ ང༌ཞའ༌ དང༌ ང༌ཞའེ༌ ནང༌ཚངས༌སི༌ སྐོར༌ལ༌ ཏྲི༌ཨིན༌ དུགས༌། ཁོའེ༌ ཏྲིས༌ 'ཁྱོ༌རང༌གུན༌ནི༌ ཨ༌བ༌ སོན༌ཏེའ༌ ཡོད༌ད༌? ཁྱོ༌རང༌གུན༌ལ༌ ཡང༌ ནོ༌ ཡོད༌ད༌?' ང༌ཞའེ༌ ཁོའེ༌ ཏྲི༌ཝ༌གུན༌ལ༌ ལན༌ཏངས༌པིན༌། ཁོའེ༌, ཁྱོ༌ཞའེ༌ ནོ༌ ཁྲིད༌ཏེ༌ ཁྱོང༌ ཟེར༌ཅེས༌པོ༌ ང༌ཞ༌གུན༌ལ༌ ཅི༌གྱུས༌?"

8 ཡ༌ཧུ༌དཱའེ༌ ཁོ༌རང༌ངི༌ ཨ༌བ༌ ཟེརས༌, "བུ༌ཚ༌བོ༌ ང༌ ཉམ༌པོ༌ ཀོལ༌ ཡང༌ ང༌ཞ༌གུན༌ དག༌ས༌རང༌ བེས༌ལ༌ བིང༌ཨིན༌། ཏེ༌ནེ༌ ཉེ༌རང༌, ང༌ཞའ༌ དང༌ ང༌ཞའེ༌ ཕྲུ༌གུ༌གུན༌ སྟོག༌རིའ༌ མི༌ཤི༌། 9 ཁོའེ༌ སྲུང༌སྐྱོབ༌བི༌ དམ༌ཆའ༌ ངའེ༌ ཅོའད༌, ཏེ༌ ཁག༌པོ༌ ངའེ༌ ཁུར༌རད༌། གལ༌ཏེས༌ ངའེ༌ ཁོ༌ ཉེ༌རང༌ ཡོད༌ས༌ ལོགས༌ཏེ༌ མ༌ཁྱོང༌ན༌ ཏུས༌གྱུན༌ནི༌ ཕིའ༌ ངའེ༌ཀ༌ ཏེ༌ སྐྱོན༌བོ༌ ཀལ༌ལ༌ ཛད༌། 10 གལ༌ཏེས༌ ང༌དང༌ངི༌ ཏུས༌པོ༌ གོད༌ལ༌ མ༌ ཏངས༌པིན༌ན༌ ང༌ཞ༌གུན༌ ཏེ༌རུ༌ སོང༌ཏེ༌ ལན༌ཕོག༌ ཉིས༌ ལོག༌ཏེ༌ ཡོང༌ ཚར༌ཏེ༌ ཡོད༌གྲོ༌།"

11 ཏེ༌ནེ༌ ཁོང༌གུན༌ནི༌ ཨ༌བ༌ ཡ༌ཀོབ༌བི༌ ཟེརས༌, "གལ༌ཏེས༌ ཏེ༌བོ༌ ཅོ༌གོས༌ན༌ ཅོ༌ཤིག༌, ཡང༌ ང༌དང༌ངི༌ ས༌ཆའེ༌ ཀ༌ནེ༌ ཐོང༌ཁན༌ ཀྲག༌ཤོག༌པོ༌ ལོན༌པོའ༌ སྟགས༌ལ༌ ཁྱེར༌, ཏྲི༌ཞིམ༌ཅན༌ནི༌ མར༌ནག༌, རང༌རྩི༌, མ༌ས༌ལའ༌ དང༌ མའེར༌, པིས༌ཏ༌ དང༌ བ༌དམ༌། 12 པེ༌ནེ༌ ཉི༌ལྡབ༌ ཁུར༌ ཅིའ༌ཟེར༌ན༌ ཕ༌ཙའེ༌ ཁེ༌ཐོག༌ག༌ ཡོད༌ཁན༌ནི༌ པེ༌ནེ༌གུན༌ ལོགས༌ཏེ༌ ཁྱེར༌གོས༌། ཅི༌གྱུས༌ ཏེ༌བོ༌ ནོར༌ཏེ༌ ཨིན༌གྲོ༌། 13 ཁྱོ༌ཞ༌གུན༌ ནོ༌ ཁྲིད༌ཏེ༌ དག༌ས༌རང༌ ཏེ༌ མི༌བོའེ༌ཀ༌ ལོགས༌ཏེ༌ སོང༌། 14 ངའེ༌ མོས༌ལམ༌ ཞུའད༌, ཀུན༌ཝང༌ དཀོན༌མཆོག༌གི༌ ཏེ༌ མི༌བོའ༌ ཁྱོ༌ཞ༌གུན༌ནི༌ཀ༌ སྙིང༌རྗེ༌ སྐྱེ༌ཅུག༌ག༌ ཛད༌ཏེ༌ ཁྱོ༌ཞ༌གུན༌ནི༌ ཨ༌ཅོ༌ དང༌ བེན༌ཡཱ༌མིན༌ ཁྱོ༌ཞའ༌ ཉམ༌པོ༌ ལོགས༌ཏེ༌ ལམ༌ཅུག༌ སྲིད༌ཅེས༌ ཨིན༌ནོག༌། ཨིན༌ནའང༌ གལ༌ཏེས༌ ངའེ༌ ཕྲུ༌གུ༌གུན༌ ལོགས༌ཏེ༌ མ༌ ལེབ༌ན༌ ངའེ༌ཀ༌ ཏེ༌བོ༌ བྱུང༌གོ༌ཤེས༌ ཡོད༌ཏེ༌ ཨིན༌ནོག༌།"

15 ཏེ༌ནེ༌ བུ༌ཚ༌གུན༌ནི༌ སྐྱེས༌གུན༌ དང༌ པེ༌ནེ༌ ཉི༌ལྡབ༌ ཁུརས༌ ཡང༌ ཨི༌ཇིབ༌བ༌ བེན༌ཡཱ༌མིན༌ ཁྲིད༌ཏེ༌ སོང༌, ཡང༌ ཁོང༌གུན༌ ཡོ༌སེབ༌ ཡོད༌ས༌ ལེབ༌། 16 ཡོ༌སེབ༌བི༌ ཁོང༌གུན༌ ཉམ༌པོ༌ བེན༌ཡཱ༌མིན༌ ཐོང༌ང༌ཅིག༌ ཁོའེ༌ ཁོ༌རང༌ངི༌ ཁང༌པའེ༌ ལྟ༌སྟོག༌ ཅོ༌ཁན༌བོའ༌ ཟེརས༌, "འི༌ མི༌གུན༌ ངའེ༌ ཁང༌པ༌ ཁྱེར༌, སེམས༌ཅན༌ སད༌ཏེ༌ ཁར༌ཇི༌ གྲལ༌གྲིག༌ ཅོས༌, ཁོང༌གུན༌ ང༌ ཉམ༌པོ༌ ཛ༌ར༌ ཟའེན༌།"

17 ཡོ༌སེབ༌བི༌ བཀའ༌ ཏང༌ཁན༌ ནང༌ཞིན༌ ཡོག༌པོའེ༌ ཅོས༌ ཡང༌ ཁོང༌གུན༌ ཡོ༌སེབ༌བི༌ ཁང༌པ༌ ཁྱེརས༌། 18 ཨིན༌ནའང༌ ཁང༌པ༌ ཁྱེར༌ར༌ཅིག༌ ཁོང༌གུན༌ སྲན༌ཏྲེ༌ ཇིགས༌ ཡང༌ སམ༌, "ང༌དང༌གུན༌ནི༌ ཕ༌ཙའེ༌ ནང༌ང༌ པེ༌ནེ༌ ལོགས༌ཏེ༌ ཏངས༌ཏེ༌ ཡོད༌ཅེས༌པའེ༌ ང༌དང༌གུན༌ འི༌ཀ༌ ཁྱོངས༌ཏེ༌ ཨིན༌ནོག༌། ཁོའེ༌ ང༌དང༌གུན༌ ཟུམས༌ཏེ༌ ང༌དང༌གུན༌ ཡོག༌པོ༌ ཅོ༌ཅེས༌ ཡང༌ ང༌དང༌ངི༌ བུང༌བུ༌གུན༌ ཁྱེར༌ཅེས༌ ཨིན༌ནོག༌།"

19 ཏེ༌ནེ༌ ཡོ༌སེབ༌བི༌ ཁང༌པའེ༌ སྒོའེ༌ དུན༌ལ༌ ལེབ༌བ༌ཅིག༌ ཁོང༌གུན༌ནི༌ ཡོག༌པོ༌ ཁག༌ཁུར༌པ༌བོའ༌ ཟེརས༌, 20 "སྤོན༌བོ༌ལེ༌, ང༌ཞ༌གུན༌ སྔུན༌ལ༌ གྲུ༌ ཉོའ༌ལ༌ ཨི༌ཇིབ༌བ༌ ཡོངས༌པིན༌། 21 ཨིན༌ནའང༌ ལམ༌མ༌ ངལ༌ཚོ༌སའེ༌ཀ༌ ང༌ཞའེ༌ ཕ༌ཙའེ༌ ཁའ༌ ཕེའ༌ཅིག༌ རང༌རང༌ངི༌ པེ༌ནེ༌ སྒི༌གུ༌གུན༌ ཐོང༌། ང༌ཞའེ༌ ཏེ༌ པེ༌ནེ༌གུན༌ ལོགས༌ཏེ༌ ཁྱོངས༌ཏེ༌ ཡོད༌ལེ༌། 22 གྲུ༌ ཉོ༌ཅེས༌ལ༌ ང༌ཞ༌གུན༌ནི༌ མུལ༌ལི༌ པེ༌ནེ༌ ཐེ༌བ༌ ཁྱོངས༌ཏེ༌ ཡོད༌། ང༌ཞའེ༌ ཕ༌ཙའེ༌ ནང༌ང༌ པེ༌ནེ༌ སྒི༌གུ༌གུན༌ སུའི༌ བོརས༌ ང༌ཞའ༌ གྱུས༌མེད༌ ལེ༌།"

23 ཡོག༌པོའེ༌ ཟེརས༌, "ཇིགས༌ མ༌ཇིགས༌, ཁྱོ༌ཞའ༌ དང༌ ཁྱོ༌ཞའེ༌ ཨ༌བའེ༌ དཀོན༌མཆོག༌གི༌ ཁྱོ༌ཞའ༌ ནོར༌ སལ༌ལ༌ ཛད༌ཏེ༌ ཨིན༌ནོག༌། ངའ༌ གྲུའི༌ རིན༌ནི༌ པེ༌ནེ༌ དྲན༌དྲའ༌ ཐོབས༌།" ཏེ༌ནེ༌ ཁོའེ༌ སི༌མོན༌ ཁོང༌གུན༌ནི༌ ཕིའ༌ ཙོན༌ཁང༌ནེ༌ ཕིངས༌ཏེ༌ ཁྱོངས༌།

24 ཏེ༌ནེ༌ ཡོག༌པོའེ༌ ཁོང༌གུན༌ ཁང༌པའེ༌ ནང༌ང༌ ཁྱེར༌ཏེ༌ ཆུ༌ ཏངས༌ ཡང༌ ཁོང༌གུན༌ནི༌ རྐང༌པ༌ ཁྲུ༌། ཁོའེ༌ ཁོང༌གུན༌ནི༌ བུང༌བུ༌གུན༌ལ༌ རྩའ༌ ཏངས༌། 25 ཁོང༌གུན༌ནི༌ ཡོ༌སེབ༌བ༌ སྟགས༌གུན༌ ཏང༌ཅེས༌ལ༌ གྲལ༌གྲིག༌ ཅོས༌ ཅིའ༌ཟེར༌ན༌ ཁོང༌གུན༌ ཉམ༌པོ༌ ཡོ༌སེབ༌ ཛ༌ར༌ དོན༌ཅེས༌ལ༌ སྐྱོད༌ཨིན༌ ཟེར༌ཏེ༌ ཡོག༌པོའེ༌ ཤདས༌།

26 ཡོ༌སེབ༌ ཁང༌པ༌ ལེབ༌བ༌ཅིག༌ ཁོང༌གུན༌ནི༌ སྟགས༌ ཁྱོང༌ཁན༌གུན༌ ཁོའ༌ ཕུལ༌ཏེ༌ གོ༌ ས༌ ཐུག༌ ཅུགས༌ཏེ༌ སྒུས༌། 27 ཁོའེ༌ ཁོང༌གུན༌ལ༌ ཁམ༌ཟང༌ ཨིན༌ན༌ ཟེར༌ཏེ༌ ཏྲིས༌ ཡང༌ ཟེརས༌, "ངའ༌ མི༌ རྒད༌པོའེ༌ སྐོར༌ལ༌ ཤད༌ཁན༌ ཁྱོ༌ཞའེ༌ ཨ༌བ༌ ཁམ༌ཟང༌, སོན༌ཏེའ༌ ཡོད༌ད༌?"

28 ཁོང༌གུན༌ནི༌ ལན༌ཏངས༌, "ང༌ཞ༌གུན༌ནི༌ ཨ༌བ༌ ཉེ༌རང༌ངི༌ ཡོག༌པོ༌ ཁམ༌ཟང༌ དང༌ སོན༌ཏེའ༌ ཡོད༌ལེ༌།" ཏེ༌ནེ༌ ཁོང༌གུན༌ནི༌ གོ༌ སྒུས༌ཏེ༌ ཀུས༌པ༌ སྟནས༌།

29 ཡོ༌སེབ༌བི༌ ལྟའ༌ཅིག༌ ཁོའ༌ ཁོ༌རང༌ངི༌ ནོ༌, ཨ༌མ༌ ཅིག༌གི༌ བུ༌ཚ༌ བེན༌ཡཱ༌མིན༌ ཐོང༌ ཡང༌ ཏྲིས༌, "ཁོ༌ ཁྱོ༌ཞ༌གུན༌ནི༌ ནོ༌ ཆུང༌ཤོག༌པོ༌ ཨིན༌ན༌ ཀ༌བོའེ༌ སྐོར༌ལ༌ ཁྱོ༌ཞའེ༌ ངའ༌ ཤད༌? ངའེ༌ བུ༌ཚ༌, ཁྱོ༌རང༌ང༌ དཀོན༌མཆོག༌གི༌ ཅིན༌ལབས༌ སལ༌ཤིག༌།" 30 ཁོ༌རང༌ངི༌ ནོའེ༌ ཕིའ༌ ཤ༌ཚ༌ སྐྱེས༌ཏེ༌ ཁོའ༌ ངུ༌ཅེས༌ ཡོངས༌པ༌ ཡོ༌སེབ༌ གྱོགས༌པ༌ ཁོ༌རང༌ངི༌ ནང༌ང༌ སོང༌ ཡང༌ ངུས༌།

31 ཏེ༌ནེ༌ ཁོའེ༌ ཁོ༌རང༌ངི༌ ལྡོང༌ ཁྲུས༌ཏེ༌ ལོགས༌ཏེ༌ ཡོངས༌ ཡང༌ རང༌སེམས༌ ཅུན༌ཏེ༌ ཁོའེ༌ དོན༌ཏང༌ ཁྱོང༌ཅེས༌ལ༌ བཀའ༌ ཏངས༌།

32 ཡོ༌སེབ༌བ༌ ཅོག༌ཙེ༌ ཅིག༌གི༌ཀ༌ ཡང༌ ཁོའེ༌ ཨ༌ཅོ༌ནོ༌གུན༌ལ༌ ཞན༌ ཅོག༌ཙེ༌ ཞིག༌གི༌ཀ༌ ཡང༌ ཁོ༌ ཉམ༌པོ༌ དོན༌ཁན༌ནི༌ ཨི༌ཇིབ༌པ༌གུན༌ལ༌ སོ༌སོ༌ ཅོག༌ཙེ༌ཀ༌ དོན༌ཏང༌ ཏངས༌ ཅིའ༌ཟེར༌ན༌ ཨི༌ཇིབ༌པ༌གུན༌ ཨིབ༌རི༌པ༌གུན༌ ཉམ༌པོ༌ ཟའ༌ ཆོགས༌ས༌ མེད༌པིན༌, ཏེ༌བོ༌ ཁོང༌གུན༌ནི༌ ཕིའ༌ ཚི༌ཏུའེ༌ ལས༌ ཨིན༌པིན༌། 33 ཅོག༌ཙེ༌ཀ༌ ཡོ༌སེབ༌བི༌ ཨ༌ཅོ༌ནོ༌གུན༌ ལོ༌ ནང༌ཞིན༌ ཚིར༌ལ༌ དུག༌ཅུགས༌ པ༌སང༌ ཧ༌ལས༌ཏེ༌ ཁོང༌གུན༌ནི༌ ཅིག༌ དང༌ ཅིག༌ག༌ ལྟས༌། 34 ཁོང༌གུན༌ལ༌ ཡོ༌སེབ༌བི༌ ཅོག༌ཙེ༌ ཀ༌ནེ༌ ཁར༌ཇི༌ ཏངས༌ ཨིན༌ནའང༌ བེན༌ཡཱ༌མིན༌ནི༌ སྐལ༌ལ༌ ཞན༌གུན༌ནི༌ སང༌ རྔ༌ ལྡབ༌ མང༌ང༌ ཡོད༌པིན༌། ཁོང༌གུན༌ནི༌ ཉན༌ཉན༌ ཟའེན༌ ཐུང༌ཨིན༌ ཡོ༌སེབ༌ ཉམ༌པོ༌ སྐྱིད༌པོ༌ ཅོས༌།