1 ལོ༌ ཁ༌ཅིག༌གི༌ སྟིང༌ནེ༌, ཞག༌ཤིག༌ ཡ༌ཀོབ༌ དང༌ ལི༌ཨའེ༌ བུ༌མོ༌ དི༌ནཱ༌ ཏེ༌ ནས༌སའེ༌ ནང༌ང༌ དུག༌ཁན༌ བུ༌མོ༌གུན༌ལ༌ ཐུག༌ག༌ སོང༌། 2 ཨིན༌ནའང༌ ཏེ༌ ནས༌སའེ༌ ནང༌ང༌ ཝང༌སྲུལ༌ཁན༌ ཧིཝ༌པ༌ ཧ༌མོར༌རའི༌ བུ༌ཚ༌ ཤེ༌ཅེམ༌མི༌ དི༌ནཱ༌ ཐོང༌ང༌ཅིག༌, ཁོའེ༌ ཁོ༌ ཟུམས༌ཏེ༌ ཝང༌ ཉམ༌པོ༌ ལུས༌བྲེལ༌ ཅོས༌། 3 ཁོའེ༌ སེམས༌ དི༌ནཱའེ༌ཀ༌ སོང༌ཏེ༌ ཁོ༌ ཁོའེ༌ཀ༌ མ༌སྲན༌ཏྲེ༌ ཐད༌ ཡང༌ སྤེ༌ར༌ ལྡེ༌མོ༌ ཉམ༌པོ༌ ཁོའེ༌ ཡ༌ཤ༌ ཐོབ༌ཅེས༌སི༌ རྩོན༌གྲུས༌ ཅོས༌། 4 ཁོའེ༌ ཁོ༌རང༌ངི༌ ཨ༌བ༌ ཧ༌མོར༌ལ༌ ཟེརས༌, "འི༌ བུ༌མོ༌བོ༌ ངའ༌ ན༌མའ༌ ཁྱོང༌།"

5 ཡ༌ཀོབ༌བ༌ ཁོའེ༌ བུ༌མོ༌ ཉམ༌པོ༌ ངན༌པ༌ ཆའ༌ཁན༌བོ༌ གྱུས༌སོང༌, ཁོའེ༌ བུ༌ཚ༌གུན༌ སེམས༌ཅན༌གུན༌ ཉམ༌པོ༌ ཕི༌ལོག༌ག༌ ཡོད༌ པ༌སང༌ ཁོང༌གུན༌ ལོགས༌ཏེ༌ ཡོང༌ཡོང༌ ཚོག༌པ༌ ཁོའེ༌ སུའང༌ ཅའང༌ མ༌ཟེརས༌།

6 ཤེ༌ཅེམ༌མི༌ ཨ༌བ༌ ཧ༌མོར༌ ཡ༌ཀོབ༌བ༌ སྤེ༌ར༌ ཏང༌ང༌ལ༌ ཡོངས༌། 7 ཡ༌ཀོབ༌བི༌ བུ༌ཚ༌གུན༌ ཞིང༌ནེ༌ ལེབས༌ཏེ༌ སྲིང༌མོ༌ ཉམ༌པོ༌ ངན༌པ༌ ཆའ༌ཁན༌བོ༌ ཚོར༌ར༌ཅིག༌ ཁོང༌གུན༌ལ༌ མ༌སྲན༌ཏྲེ༌ སྲོ༌ ཡོངས༌ ཅིའ༌ཟེར༌ན༌ ཤེ༌ཅེམ༌མི༌ ཝང༌ ཉམ༌པོ༌ ཁོང༌ངི༌ སྲིང༌མོའ༌ ལུས༌བྲེལ༌ ཅོས༌ཏེ༌ ཡ༌ཀོབ༌བི༌ ནང༌ཚངས༌སི༌ཀ༌ ཁྲེལ༌བ༌ ཁྱོངས༌ཏེ༌ ཨིན༌པིན༌, ཏེ༌ཟུག༌ ལས༌ ཅོ༌ཅེས༌པོ༌ འོས༌པ༌ མན༌པིན༌།

8 ཧ༌མོར༌རི༌ ཁོང༌གུན༌ལ༌ ཟེརས༌, "ངའེ༌ བུ༌ཚ༌ ཤེ༌ཅེམ༌མི༌ ཉེ༌རང༌ངི༌ བུ༌མོའ༌ སྙིང༌ནེ༌ ཡ༌ཤ༌ ཅོ༌རུག༌། ཐུག༌རྗེ༌ ཛད༌ཏེ༌ ཁོའ༌ དི༌ནཱ༌ ཉམ༌པོ༌ བག༌སྟོན༌ ཅོ༌ཅུག༌ག༌ ཛད༌། 9 ང༌ཞའེ༌ བུ༌མོ༌གུན༌ ཁྱོ༌ཞའེ༌ བུ༌ཚ༌གུན༌ ཉམ༌པོ༌ ཡང༌ ཁྱོ༌ཞའེ༌ བུ༌མོ༌གུན༌ ང༌ཞའེ༌ བུ༌ཚ༌གུན༌ ཉམ༌པོ༌ བག༌སྟོན༌ ཅོ༌ཅུག༌། 10 ཉེ༌ཞའ༌ ང༌ཞའེ༌ ཡུལ༌ལ༌ དུག༌ནའང༌ གྲིག༌, འི༌ ས༌ཀྱད༌པོ༌ ཉེ༌ཞའེ༌ ཕིའ༌ ཕེས༌ཏེ༌ ཨིན༌ ཉེ༌ཞའ༌ ཀ༌རུ༌ ཐད༌ནའང༌ དུགས༌ཏེ༌ ཉོབ༌ཚོང༌ ཏོང༌ ཡང༌ ཁྱོ༌ཞ༌རང༌ངི༌ ཕིའ༌ གྱུ༌ནོར༌ ཅོས༌།"

11 ཤེ༌ཅེམ༌མི༌ དི༌ནཱའེ༌ ཨ༌བ༌ དང༌ མིང༌བོ༌གུན༌ལ༌ ཟེརས༌, "འི༌ ཐུག༌རྗེ༌བོ༌ ངའེ༌ཀ༌ ཛད༌ ཡང༌ ངའེ༌ ཉེ༌ཞའེ༌ ཅི༌ཏོང༌ མོལ༌ནའང༌ ཏང༌ཨིན༌། 12 ན༌མའེ༌ རིན༌ ཅོའད༌ ཡང༌ རིན༌ཅན༌ སྐྱེས༌ ངའ༌ ཁྱོང༌ ཟེར༌ཁན༌གུན༌ ངའེ༌ ཁྱོང༌ཨིན༌། ངའ༌ ན༌མ༌ ཅོ༌ཅེས༌ལ༌ དི༌ནཱ༌ ཅིག༌པོ༌ སལ༌།"

13 ཤེ༌ཅེམ༌མི༌ ཁོང༌གུན༌ནི༌ སྲིང༌མོའ༌ ངན༌པ༌ ཅོས༌ཏེ༌ ཨིན༌ པ༌སང༌ ཡ༌ཀོབ༌བི༌ བུ༌ཚ༌གུན༌ནི༌ ཤེ༌ཅེམ༌ དང༌ ཁོའེ༌ ཨ༌བ༌ ཧ༌མོར༌ལ༌ གོབ༌སྐོར༌ཏེ༌ ལན༌ཏངས༌། 14 ཁོང༌གུན༌ནི༌ ཁོང༌གུན༌ལ༌ ཟེརས༌, "ང༌ཞའེ༌ སྲིང༌མོ༌ སུན༌ནད༌ མ༌ཅོ༌ཁན༌ནི༌ མི༌ཞིག༌ག༌ མི༌ཏང༌། ཏེ༌བོ༌ ང༌ཞའེ༌ ཕིའ༌ ཁྲེལ༌བ༌ ཨིན༌ནོག༌། 15 ཨིན༌ནའང༌ ཁྱོ༌ཞ༌ དང༌ ཁྱོ༌ཞའེ༌ བུ༌ཚ༌གུན༌ནི༌ སུན༌ནད༌ ཅོས༌ཏེ༌ ང༌ཞའ༌ ཙོགས༌ གྱུར༌ན༌, ཁྱོ༌རང༌ངི༌ ཁོ༌ ཉམ༌པོ༌ བག༌སྟོན༌ ཅོ༌ནའང༌ གྲིག༌། 16 ཏེ༌ནེ༌ ང༌ཞའེ༌ བུ༌མོ༌གུན༌ ཁྱོ༌ཞའ༌ ཏང༌ཉིན༌ ཡང༌ ཁྱོ༌ཞའེ༌ བུ༌མོ༌གུན༌ ཉམ༌པོ༌ ང༌ཞའེ༌ བག༌སྟོན༌ ཅོ༌ཨིན༌། ཡང༌ ང༌ཞ༌གུན༌ ཁྱོ༌ཞའ༌ ཉམ༌པོ༌ དུགས༌ཏེ༌ ང༌དང༌གུན༌ གྱལ༌ཁག༌ ཅིག༌ གྱུར༌ཨིན༌། 17 ཨིན༌ནའང༌ གལ༌ཏེས༌ ཁྱོ༌ཞ༌ སུན༌ནད༌ ཅོའ༌ མ༌ཐད༌ན༌ ཏེ༌ནེ༌ ང༌ཞའ༌ ང༌ཞ༌རང༌ངི༌ སྲིང༌མོ༌ ཁྲིད༌ཏེ༌ འི༌ ས༌ཀྱད༌པོ༌ ཕངས༌ཏེ༌ ཆེན༌།"

18 ཁོང༌གུན༌ནི༌ ཟེར༌ཁན༌བོ༌ ཧ༌མོར༌ དང༌ ཁོའེ༌ བུ༌ཚ༌ ཤེ༌ཅེམ༌མ༌ འོས༌པ༌ ཚོར༌། 19 ཤེ༌ཅེམ༌ ཡ༌ཀོབ༌བི༌ བུ༌མོའ༌ མ༌སྲན༌ཏྲེ༌ ཐད༌པ༌ ཏུས༌ གོད༌ལ༌ མ༌ཏང༌ང༌ ཁོང༌གུན༌ནི༌ ཟེར༌ཁན༌བོ༌ ཅོ༌ཅེས༌ལ༌ ཁའ༌ ཆམས༌། ཁོ༌ ཁོ༌རང༌ངི༌ ནང༌ཚངས༌སི༌ ཚང༌མའེ༌ སང༌ ཀུས༌པ༌ཅན༌ནི༌ བུ༌ཚ༌བོ༌ ཨིན༌པིན༌། 20 ཏེ༌ནེ༌ ཧ༌མོར༌ དང༌ ཁོའེ༌ བུ༌ཚ༌ ཤེ༌ཅེམ༌ གྱལ༌སའེ༌ གྱས༌སྒོའེ༌ཀ༌ སོང༌ ཡང༌ གྱལ༌སའེ༌ འུ༌སྐྱོང༌གུན༌ ཉམ༌པོ༌ སྤེ༌ར༌ ཏངས༌། ཁོང༌གུན༌ནི༌ ཟེརས༌, 21 "འི༌ མི༌གུན༌ནི༌ ཀ༌ནེ༌ ང༌དང༌གུན༌ལ༌ ཅའང༌ ཇིགས༌པོ༌ མི༌དུག༌, ཁོང༌གུན༌ནའང༌ ང༌དང༌ངི༌ ས༌ཀྱད༌དི༌ཀ༌ དུག༌ཅུགས༌ཏེ༌ ཚོང༌ ཅོ༌ཅུག༌ཨིན༌, འི༌ ས༌ཆ༌བོའེ༌ ནང༌ང༌ ཁོང༌གུན༌ནའང༌ ཆུད༌ཅེས༌ དུག༌། ཡང༌ ང༌དང༌གུན༌ནི༌ ཁོང༌ངི༌ བུ༌མོ༌གུན༌ ཉམ༌པོ༌ ཡང༌ ཁོང༌གུན༌ནི༌ ང༌དང༌ངི༌ བུ༌མོ༌གུན༌ ཉམ༌པོ༌ བག༌སྟོན༌ ཅོ༌ཉན༌ཅེས༌ ཨིན༌ནོག༌། 22 ཨིན༌ནའང༌ ང༌དང༌གུན༌ནི༌ ང༌དང༌ངི༌ བུ༌ཚ༌ ཚང༌མའེ༌ སུན༌ནད༌ ཅོས༌ཏེ༌ ཁོང༌གུན༌ ཙོགས༌ གྱུར༌ཏེ༌ མ༌ནེ༌ ཁོང༌ ང༌དང༌གུན༌ ཉམ༌པོ༌ གྱལ༌ཁག༌ ཅིག༌ མི༌གྱུར༌ ཟེར༌དུག༌། 23 ཁོང༌གུན༌ནི༌ སེམས༌ཅན༌ དང༌ གྱུ༌ནོར༌ ཚང༌མ༌ ང༌དང༌གུན༌ནི༌ མི༌གྱུར༌ར༌? ཏེ༌བོའེ༌ཕིའ༌ ང༌དང༌གུན༌ནི༌ ཁའ༌ ཆམས༌ཏེ༌ ཁོང༌གུན༌ ང༌དང༌ངི༌ ཕྲོའ༌ དུག༌ཅུག༌ཨིན༌།"

24 ཧ༌མོར༌ དང༌ ཤེ༌ཅེམ༌མི༌ ཟེར༌ཁན༌བོའེ༌ཀ༌ ཡུལ༌པ༌ ཚང༌མ༌ ཁའ༌ ཆམས༌ཏེ༌ བུ༌ཚ༌ ཚང༌མའེ༌ སུན༌ནད༌ ཅོ༌ཅུགས༌།

25 ཞག༌ སུམ༌པའེ༌ ཞག༌ག༌ བུ༌ཚ༌གུན༌ནི༌ སུན༌ནད༌ ཅོ༌ཁན༌ནི༌ མ༌ཁའ༌ མ༌གྱལ༌ལ༌ ཡོད༌ཏུས༌ ཡ༌ཀོབ༌བི༌ བུ༌ཚ༌ ཉིས༌ སི༌མེ༌འོན༌ དང༌ ལི༌ཝི༌, དི༌ནཱའེ༌ ཨ༌ཅོ༌གུན༌ནི༌ ར༌འི༌ ཁུར༌ཏེ༌ ཧུན༌མེད༌ལ༌ གྱལ༌སའེ༌ཀ༌ སྤུང༌གོལ༌ ཅོས༌ཏེ༌ བུ༌ཚ༌ ཚང༌མ༌ སདས༌། 26 ཁོང༌གུན༌ནི༌ ཧ༌མོར༌ དང༌ ཁོའེ༌ བུ༌ཚ༌ ཤེ༌ཅེམ༌མའང༌ སདས༌ ཡང༌ ཁོའེ༌ ཁང༌པ༌ནེ༌ དི༌ནཱ༌ ཁྲིད༌ཏེ༌ སོང༌། 27 ཁོང༌གུན༌ནི༌ སྲིང༌མོའ༌ ངན༌པ༌ ཅོ༌ཁན༌བོའེ༌ ལན༌ཏངས༌ཏེ༌ ཡ༌ཀོབ༌བི༌ ཞན༌ བུ༌ཚ༌གུན༌ནི༌ གྱལ༌ས༌བོ༌ ཅོམས༌། 28 ཁོང༌གུན༌ནི༌ ར༌ལུག༌ དང༌ བ༌ལང༌ངི༌ ཁྱུ༌, བུང༌བུ༌གུན༌ ཡང༌ གྱལ༌ས༌ དང༌ ཞིང༌ངི༌ཀ༌ ཡོད༌ཁན༌ ཚང༌མ༌ ཁྱེརས༌། 29 ཁོང༌གུན༌ནི༌ ཁང༌པའེ༌ ནང༌ང༌ ཡོད༌ཁན༌ གྱུ༌ནོར༌, བུ༌མོ༌ དང༌ ཕྲུ༌གུ༌ ཚང༌མ༌ ཅོམས༌ཏེ༌ ཁྱེརས༌། 30 ཡ༌ཀོབ༌བི༌ སི༌མེ༌འོན༌ དང༌ ལི༌ཝི༌ ཟེརས༌, "ཁྱོ༌ཞའེ༌ ངའེ༌ཀ༌ ནགས༌ ཁྱོངས༌ཏེ༌ ཨིན༌ནོག༌། ཀེ༌ནན༌པ༌, པེ༌རིཟ༌པ༌ དང༌ འི༌ ནས༌སའེ༌ ནང༌ང༌ དུག༌ཁན༌ ཚང༌མའེ༌ ང༌དང༌ང༌ ནཕ༌རད༌ ཅོ༌རུག༌། ང༌དང༌གུན༌ མང༌པོ༌ཞིག༌ མེད༌ཏེ༌ ཨིན༌ནོག༌། གལ༌ཏེས༌ ཁོང༌ ཚང༌མའ༌ ང༌དང༌ངི༌ གྱབ༌གལ༌ལ༌ ཅིག༌ སོང༌ཏེ༌ ང༌དང༌ངི༌ཀ༌ སྤུང༌གོལ༌ ཅོ༌ན༌ ང༌དང༌ངི༌ ནང༌ཚངས༌ ཚང༌མ༌ མེད༌ཁན༌ ཆེན༌།"

31 ཨིན༌ནའང༌ ཁོང༌གུན༌ནི༌ ལན༌ཏངས༌, "ཁོའེ༌ ང༌ཞའེ༌ སྲིང༌མོའ༌ ཟུགས༌ཙོང༌མ༌ ཙོགས༌ ཅོ༌གོས༌ས༌?"