1 ཏེ༌ནེ༌ ཨི༌སུ༌ ཁོ༌རང༌ངི༌ མི༌ ཞིབ༌གྱ༌ ཉམ༌པོ༌ ཡོང༌ང༌ལ༌ ཡ༌ཀོབ༌བི༌ ཐོང༌། ཁོའེ༌ ཕྲུ༌གུ༌གུན༌ ལི༌ཨ༌ དང༌ རེ༌ཅལ༌ གུན༌ནི༌ པར༌ལ༌ གོས༌ ཡང༌ ཚེ༌ཡོག༌ ན༌མ༌ ཉིས༌ཀོའང༌། 2 ཁོའེ༌ ཚེ༌ཡོག༌ ན༌མ༌ ཉིས༌ཀོ༌ དང༌ ཁོང༌གུན༌ནི༌ ཕྲུ༌གུ༌གུན༌ ཚང༌མའེ༌སང༌ དུན༌ལ༌, ཏེ༌ནེ༌ ལི༌ཨ༌ དང༌ ཁོའེ༌ ཕྲུ༌གུ༌གུན༌ ཡང༌ རེ༌ཅལ༌ དང༌ ཡོ༌སེབ༌ སྟིང༌ཇུག༌པོའེ༌ཀ༌ བོརས༌། 3 ཡ༌ཀོབ༌ ཁོང༌གུན༌ནི༌ སྔུན༌ལ༌ སོང༌ ཡང༌ ཨ༌ཅོའེ༌ ཉེ༌མོའ༌ ལེབ༌བ༌ཅིག༌ རྩི༌ཝ༌ ཅོས༌ཏེ༌ ཁོའེ༌ དུན༌ལ༌ ལེབ༌ལེབ༌ ཚག༌པ༌ ཡ༌ཀོབ༌བི༌ ལན༌ རྡུན༌ གོ༌ ས༌ ཐུག༌ ཅུགས༌ཏེ༌ སྒུས༌།

4 ཨིན༌ནའང༌ ཨི༌སུ༌ བང༌ཏངས༌ཏེ༌ ཁོའ༌ ཐུག༌ག༌ལ༌ ཡོངས༌ ཡང༌ ཁོའ༌ ཁྲིལ༌ཏེ༌ པུག༌ ཏངས༌། ཁོང༌ ཉིས༌ཀོ༌ ངུས༌། 5 ཨི༌སུའི༌ གོ༌ སྟགས༌ཏེ༌ ལྟའ༌ཅིག༌ ཁོའ༌ བུ༌མོ༌ དང༌ ཕྲུ༌གུ༌གུན༌ ཐོང༌ ཡང༌ ཁོའེ༌ ཏྲིས༌, "ཁྱོ༌རང༌ ཉམ༌པོ༌ ཡོད༌ཁན༌གུན༌ སུ༌ ཨིན༌?

ཡ༌ཀོབ༌བི༌ ཟེརས༌, "དཀོན༌མཆོག༌གི༌ ཉེ༌རང༌ངི༌ ཡོག༌པོའ༌ ཐུག༌རྗེའེ༌ ཛད༌ཏེ༌ སལ༌ཁན༌ནི༌ ངའེ༌ ཕྲུ༌གུ༌གུན༌ ཨིན༌། 6 ཏེ༌ནེ༌ ཚེ༌ཡོག༌ ན༌མ༌གུན༌ དང༌ ཁོང༌གུན༌ནི༌ ཕྲུ༌གུ༌གུན༌ ཡོངས༌ ཡང༌ ཁོ༌རང༌གུན༌ནི༌ གོ༌ ས༌ ཐུག༌ ཅུགས༌ཏེ༌ སྒུས༌། 7 ཏེ༌ སྟིང༌ནེ༌ ལི༌ཨ༌ དང༌ ཁོའེ༌ ཕྲུ༌གུ༌གུན༌ ཡང༌ སྟིང༌ཇུག༌ག༌ ཡོ༌སེབ༌ དང༌ རེ༌ཅལ༌ ཡོངས༌ཏེ༌ ཁོ༌རང༌གུན༌ནི༌ གོ༌ ས༌ ཐུག༌ ཅུགས༌ཏེ༌ སྒུས༌།

8 ཨི༌སུའི༌ ཏྲིས༌, "ངའ༌ ཐུག༌ག༌ལ༌ ཀལ༌ཁན༌ནི༌ མི༌ དང༌ སེམས༌ཅན༌ གུན༌ནི༌ ཏོན༌ ཅི༌ ཨིན༌?"

ཡ༌ཀོབ༌བི༌ ལན༌ཏངས༌, "སྤོན༌བོ༌, ཉེ༌རང༌ངི༌ ཆོགས༌སྐྱོར༌ ཐོབ༌ཅེས༌ལ༌ ཨིན༌ལེ༌།"

9 ཨིན༌ནའང༌ ཨི༌སུའི༌ ཟེརས༌, "ངའ༌ ང༌རང༌ང༌ མ༌མང༌པོ༌ ཡོད༌། ནོ༌, ཁྱོ༌རང༌ངི༌ ཨིན༌ཁན༌གུན༌ རང༌ངི༌ ཕིའ༌ བོར༌།"

10 ཡ༌ཀོབ༌བི༌ ཟེརས༌, "མན༌, ཇུ༌ཇུ༌ གལ༌ཏེས༌ ཉེ༌རང༌ངི༌ ངའ༌ ཆོགས༌སྐྱོར༌ ཛད༌ཏེ༌ ཨིན༌ན༌ འི༌ སྟགས༌གུན༌ ལེན༌ན༌ ཛད༌། ཉེ༌རང༌ངི༌ ཞལ༌དོང༌ ཐོང༌ཅེས༌པོ༌ ནི༌ དཀོན༌མཆོག༌གི༌ ཞལ༌དོང༌ ཇལ༌ཁན༌ ཙོགས༌ ཨིན༌ནོག༌ ཅིའ༌ཞུ༌ན༌ ཉེ༌རང༌ངི༌ ངའེ༌ཀ༌ ཐུག༌རྗེ༌ ཛད༌ཏེ༌ ཨིན༌ནོག༌། 11 ཇུ༌ཇུ༌ ངའེ༌ ཉེ༌རང༌ང༌ ཁྱོང༌ཁན༌ནི༌ སྟགས༌གུན༌ ནམས༌ས༌ ཛད༌ ཅིའ༌ཞུ༌ན༌ དཀོན༌མཆོག༌གི༌ ངའེ༌ཀ༌ ཐུག༌རྗེ༌ ཛད༌ཏེ༌ ངའ༌ སྒོས༌དོམ༌ ཚང༌མ༌ སལས༌།" ཡ༌ཀོབ༌བི༌ འུ༌ཙུག༌ ཏངས༌པ༌ ཨི༌སུའི༌ ཏེ༌གུན༌ ལེནས༌།

12 ཨི༌སུའ༌ ཟེརས༌, "ང༌དང༌ངི༌ བེས༌པོ༌ ཡང༌སྐྱར༌ གོ༌ཟུག༌ ཨིན༌ ཡང༌ ང༌ ཁྱོ༌རང༌ ཉམ༌པོ༌ ཆེན༌།"

13 ཡ༌ཀོབ༌བི༌ ཟེརས༌, "ངའེ༌ སྤོན༌བོ༌, ཕྲུ༌གུ༌གུན༌ འུ༌ཐུགས༌ ཡང༌ ཕྲུ༌གུ༌གུན༌ལ༌ འོ༌མ༌ སྟེར༌ཁན༌ནི༌ ལུག༌ དང༌ བ༌ལང༌ གུན༌ནི༌ ཕིའ༌ ང༌ སམ༌བ༌ ཏང༌ གོ༌ཤེས༌པོ༌ ཉེ༌རང༌ངི༌ ཧ༌གོའ༌ནོག༌། གལ༌ཏེས༌ ཏེ༌གུན༌ ཞག༌ཅིག༌གའང༌ གྱོགས༌པ༌ སྲུལ༌ན༌ ཏེ༌གུན༌ ཤི༌ཨིན༌། 14 ཇུ༌ཇུ༌ ཉེ༌རང༌ ངའེ༌ སང༌ སྔུན༌ལ༌ སྐྱོད༌། ང༌ ཕྲུ༌གུ༌གུན༌ དང༌ ཀྲུད༌ཏྲོའེ༌ ཁྱུ༌ ཉམ༌པོ༌ ཀུ༌ལེ༌ ཀུ༌ལེའ༌ སི༌ཨར༌ལ༌ ལེབ༌ལེབ༌ ཚག༌པ༌ ཉེ༌རང༌ངི༌ སྟིང༌རང༌ནེ༌ ཡོང༌ཨིན༌།"

15 ཨི༌སུའི༌ ཟེརས༌, "ང༌ ངའེ༌ མི༌ ཁ༌ཅིག༌ ཁྱོ༌རང༌ ཉམ༌པོ༌ བོར༌ཅུག༌།"

ཡ༌ཀོབ༌བི༌ ལན༌ཏངས༌, "ཏེ༌ཟུག༌ མ༌ཛད༌། ངའེ༌ ཕིའ༌ ཉེ༌རང༌ངི༌ ཐུག༌རྗེ༌བོ༌ ཙམ༌ ཐད༌ཐད༌ ཨིན༌།"

16 ཏེ༌ནེ༌ ཨི༌སུ༌ ཏེན༌ན༌ ཞག༌ག༌ ལོགས༌ཏེ༌ ཁོ༌རང༌ངི༌ ལམ༌མི༌ཀ༌ སི༌ཨར༌ ཆོགས༌ལ༌ སོང༌། 17 ཨིན༌ནའང༌ ཡ༌ཀོབ༌ སུ༌ཀོད༌ལ༌ སོང༌ ཀ༌རུ༌ ཁོའེ༌ ཁོང༌རང༌ངི༌ ཕིའ༌ ཁང༌པ༌ རྩིགས༌ ཡང༌ སེམས༌ཅན༌ ཚང༌མ༌ ཕིའ༌ དུགས༌ས༌ ཅོས༌། ཏེན༌ན༌བོའེ༌ཕིའ༌ ཏེ༌ ས༌ཀྱད༌པོའེ༌ མིང༌ང༌ སུ༌ཀོད༌ * 33:17 ཨིབ༌རི༌པའེ༌ སྐད༌དི༌ ནང༌ང༌ སུ༌ཀོད༌དི༌ ཏོན༌ "དུག༌སའེ༌ རིབས༌" ཨིན༌ནོག༌། ཟེར༌ར༌ནོག༌། 18 པ༌དན༌ ཨ༌རམ༌ནེ༌ བིང༌ཏེ༌ ཡ༌ཀོབ༌ ཀེ༌ནན༌ ཡུལ༌ཇོངས༌སི༌ ཤེ༌ཅེམ༌ གྱལ༌སའ༌ ཁམ༌ཟང༌ ལེབ༌ ཡང༌ གྱལ༌ས༌ དང༌ ཉེ༌མོའ༌ ཀུར༌གུན༌ ཙུགས༌ཏེ༌ དུགས༌། 19 ཡ༌ཀོབ༌བི༌ ཁོང༌ དུག༌སའེ༌ ས༌ཀྱད༌པོ༌ ཤེ༌ཅེམ༌མི༌ ཨ༌བ༌ ཧ༌མོར༌རི༌ པུར༌གྱུད༌གུན༌ནི༌ ཀ༌ནེ༌ མུལ༌ལི༌ པེ༌ནེ༌ 100 ཉོས༌། 20 ཁོའེ༌ ཏེ༌ཀ༌ ཆོད༌ཁྲི༌ཞིག༌ རྩིགས༌ཏེ༌ ཏེ༌བོའ༌ ཨེལ༌ ཨེ༌ལོ༌ཧི༌ ཨིས༌ར༌ཨེལ༌ ༼ཡང༌ན༌ དཀོན༌མཆོག༌, ཨིས༌ར༌ཨེལ༌པའེ༌ དཀོན༌མཆོག༌༽ ཟེར༌ཏེ༌ མིང༌ ཏགས༌།