1 ཨི༌སཱག༌ སྒས༌ ཡང༌ ཁོའེ༌ མིག༌ནེའང༌ ཐོང༌ང༌ མེད༌པིན༌, ཏེ༌ཏུས༌ལ༌ ཁོའེ༌ ཁོ༌རང༌ངི༌ བུ༌ཚ༌ ཆེན༌མོ༌ ཨི༌སུའ༌ བོད༌ཏེ༌ ཟེརས༌, "ངའེ༌ བུ༌ཚ༌།"

ཁོའེ༌ ལན༌ཏངས༌, "ཧ༌ ཨ༌བ༌ལེ༌།"

2 ཨི༌སཱག༌གི༌ ཟེརས༌, "ལྟོས༌སའང༌ ང༌ སྒས༌ཏེ༌ ཨིན༌ནོག༌ ཡང༌ ནམ༌ ཤི༌ཨིན༌ གྱུས༌མེད༌། 3 ཏེ༌བོའེ༌ཕིའ༌ ཁྱོ༌རང༌ ཞུ༌ དང༌ དའ༌ ཁུར༌ཏེ༌ ལིངས༌ལ༌ སོང༌ ཡང༌ ངའེ༌ ཕིའ༌ སེམས༌ཅན༌ཞིག༌ སད༌ཏེ༌ 4 ང༌ ཐད༌ཁན༌ནི༌ ཞིམ༌པོ༌ ཁར༌ཇི༌ སྐོལ༌ཏེ༌ ངའ༌ ཟའ༌ཅེས༌ལ༌ ཁྱོང༌། ཏེ༌བོ༌ ཟོས༌ཏེ༌ ངའེ༌ ང༌ ཤིའི༌ སང༌ སྔུན༌ལ༌ ཁྱོ༌རང༌ང༌ ཅིན༌ལབས༌ ཏང༌ཨིན༌།"

5 ཨི༌སཱག༌གི༌ ཨི༌སུའ༌ ཏེ༌གུན༌ ཟེར༌ ཟ༌ནེ༌, ར༌བེ༌ཀ༌ ཉན༌ཏེ༌ ཡོད༌པིན༌། ཏེ༌ནེ༌ ཨི༌སུ༌ སེམས༌ཅན༌ སད༌ཏེ༌ ཁྱོང༌ང༌ ལིངས༌ལ༌ ཆའ༌ཅིག༌, 6 ར༌བེ༌ཀའེ༌ ཁོ༌རང༌ངི༌ བུ༌ཚ༌ ཡ༌ཀོབ༌བ༌ ཟེརས༌, "ཉོ༌ནའང༌, ངའེ༌ ཁྱོ༌རང༌ངི༌ ཨ༌བའེ༌ ཨི༌སུ༌ ཟེར༌ཨིན༌ ཚོར༌, 7 'ངའེ༌ ཕིའ༌ སེམས༌ཅན༌ཞིག༌ སད༌ཏེ༌ ང༌ ཐད༌ཁན༌ནི༌ ཞིམ༌པོ༌ ཁར༌ཇི༌ སྐོལ༌ཏེ༌ ཁྱོང༌ ཏེ༌ནེ༌ ངའེ༌ ང༌ ཤིའི༌ སང༌ སྔུན༌ལ༌ ཡ༌ཝའེ༌ སྐུན༌དུན༌ལ༌ ཁྱོ༌རང༌ང༌ ཅིན༌ལབས༌ ཏང༌ཨིན༌།' 8 ཏ༌ ངའེ༌ བུ༌ཚ༌, ངའེ༌ ཁའ༌ཉན༌ཏེ༌ ངའེ༌ ཟེར༌ཁན༌བོ༌ ཅོས༌། 9 ངའ༌ ཁྱོ༌རང༌ངི༌ ཨ༌བ༌ ཐད༌ཁན༌ནི༌ ཞིམ༌པོ༌ ཁར༌ཇི༌ སྐོལ༌ཉན༌ཅེས༌ལ༌ ཁྱོ༌རང༌ ར༌མའེ༌ ཁྱུའི༌ ཕྲོའ༌ སོང༌ཏེ༌ རི༌གུ༌ ཆུ༌ངུན༌ གྱལ༌ལ༌ ཉིས༌ སད༌ཏེ༌ ཁྱོང༌། 10 ཏེ༌ནེ༌ ཨ༌བའེ༌ ཁྱོ༌རང༌ང༌ ཤི༌ སང༌ སྔུན༌ལ༌ ཅིན༌ལབས༌ ཏང༌ཅེས༌ལ༌ ཁྱོ༌རང༌ངི༌ ཏེ༌བོ༌ ཁོང༌ང༌ ཟའ༌ཅེས༌ལ༌ ཁྱེར༌།"

11 ཨིན༌ནའང༌ ཡ༌ཀོབ༌བི༌ ཁོ༌རང༌ངི༌ ཨ༌མ༌ ཟེརས༌, "ཨི༌སུའི༌ ཟུགས༌པོ༌ སྤུན༌ཇན༌ ཡང༌ ངའ༌ སྤུ༌ མེད༌ཁན༌བོ༌ ཉེ༌རང༌ང༌ གྱུས༌ཨིན༌ནོག༌། 12 ཨ༌བའེ༌ ངའ༌ ལག༌པ༌ རྩེ༌ན༌ ངའེ༌ ཁོང༌ང༌ གོབ༌སྐོར༌ ཏང༌ཁན༌བོ༌ ཧ༌གོ༌ཏེ༌ ངའེ༌ ང༌རང༌ངི༌ཀ༌ ཅིན༌ལབས༌སི༌ ཚབས༌ལ༌ ངན༌ ཁྱོང༌ཨིན༌།"

13 ཁོའེ༌ ཨ༌མའེ༌ ཟེརས༌, "ངའེ༌ བུ༌ཚ༌, ཁྱོ༌རང༌ང༌ ཏང༌ཁན༌ནི༌ ངན༌, ངའེ༌ཀ༌ བབས༌ཤིག༌། སོང༌ཏེ༌ ངའེ༌ ཟེར༌ཁན༌བོ༌ ཅོས༌། 14 ཏེ༌ནེ༌ ཁོ༌ སོང༌ ཡང༌ རི༌གུ༌གུན༌ནི༌ ཤ༌ ཁྱོངས༌ཏེ༌ ཨ༌མའ༌ ཏངས༌ ཡང༌ ཨ༌མའེ༌ ཨ༌བ༌ ཐད༌ཁན༌ནི༌ ཞིམ༌པོ༌ ཁར༌ཇི༌ སྐོལས༌། 15 ཏེ༌ནེ༌ ར༌བེ༌ཀའེ༌ ཁང༌པའེ༌ ནང༌ང༌ ཡོད༌ཁན༌ནི༌ ཨི༌སུའི༌ ཀོས༌ གྱལ༌ཤོག༌པོ༌ ཁྱོངས༌ཏེ༌ ཡ༌ཀོབ༌བ༌ སྐོནས༌། 16 ཡང༌ ཁོའེ༌ ལག༌པ༌ དང༌ ཇིང༌བ༌ རི༌གུའི༌ པགས༌པ༌ ཀབས༌། 17 ཏེ༌ནེ༌ ཡ༌ཀོབ༌བི༌ ལག༌ག༌ ཁར༌ཇི༌ སྐོལ༌ཁན༌ ཞིམ༌པོ༌ དང༌ ཏ༌གི༌ ཏངས༌།

18 ཡ༌ཀོབ༌ ཁོ༌རང༌ངི༌ ཨ༌བ༌ ཡོད༌ས༌ སོང༌ཏེ༌ ཟེརས༌, "ཨ༌བ༌ལེ༌།"

ཨ༌བའེ༌ ཟེརས༌, "ང༌ འི༌ཀ༌ནེ༌ ཡོད༌། ངའེ༌ བུ༌ཚ༌གུན༌ནི༌ ནང༌ནེ༌ ཀ༌བོ༌ ཨིན༌?"

19 ཡ༌ཀོབ༌བི༌ ལན༌ཏངས༌ "ང༌ ཉེ༌རང༌ངི༌ གོ༌སྐྱེས༌ བུ༌ཚ༌ ཨི༌སུ༌ ཨིན༌ལེ༌། ངའེ༌ ཉེ༌རང༌ངི༌ ཟེར༌ཁན༌ ནང༌ཞིན༌ ཅོས༌པིན༌། ཏ༌ ཞུགས༌ཏེ༌ ངའེ༌ སྐོལ༌ཁན༌ནི༌ ཤ༌ དོན༌ན༌ ཛད༌། ཏེ༌ནེ༌ ཉེ༌རང༌ངི༌ ངའ༌ ཅིན༌ལབས༌ སལ༌ ཉན༌ཨིན༌"

20 ཨི༌སཱག༌གི༌ བུ༌ཚའ༌ ཏྲིས༌, "ངའེ༌ བུ༌ཚ༌, ཁྱོ༌རང༌ང༌ འི༌ཟུག༌ གྱོགས༌པ༌ ཏེ༌བོ༌ ཀ༌ཟུག༌གི༌ ཐོབ༌?"

ཡ༌ཀོབ༌བི༌ ལན༌ཏངས༌, "ཡ༌ཝ༌ ཉེ༌རང༌ངི༌ དཀོན༌མཆོག༌གི༌ ཏེ༌བོ༌ ཐོབ༌ཅེས༌སི༌ ནང༌ང༌ ངའ༌ རོགས༌ ཛདས༌།"

21 ཨི༌སཱག༌གི༌ ཡ༌ཀོབ༌བ༌ ཟེརས༌, "ངའེ༌ བུ༌ཚ༌, ཁྱོ༌རང༌ དེན༌བའ༌ ཨི༌སུ༌ ཨིན༌ན༌ མན༌ ལག༌པ༌ རྩེས༌ཏེ༌ ཉུག༌ཅེས༌ལ༌ ངའེ༌ དུན༌ལ༌ ཡོང༌།"

22 ཡ༌ཀོབ༌ ཁོ༌རང༌ངི༌ ཨ༌བའེ༌ དུན༌ལ༌ སོང༌ ཡང༌ ཨི༌སཱག༌གི༌ ཉུགས༌ཏེ༌ ཟེརས༌, "ཁྱོ༌རང༌ངི༌ སྐད༌ ཡ༌ཀོབ༌ ཙོགས༌ ཨིན༌ནའང༌ ལག༌པ༌ ཨི༌སུའི༌ ཙོགས༌ རག༌།" 23 ཁོའེ༌ ལག༌པ༌ ཨི༌སུའི༌ ལག༌པ༌ ཙོགས༌ སྤུན༌ཇན༌ ཡོད༌ པ༌སང༌ ཨི༌སཱག༌ག༌ ཡ༌ཀོབ༌ ཨིན༌ཁན༌བོ༌ མ༌ཤེས༌ ཡང༌ ཁོའེ༌ ཁོའ༌ ཅིན༌ལབས༌ ཏང༌ཀི༌ ཡོད༌པིན༌། 24 ཨིན༌ནའང༌ ཡང༌སྐྱར༌ ཏྲིས༌, "ཁྱོ༌རང༌ དེན༌བའ༌ ཨི༌སུ༌ ཨིན༌ན༌?"

ཁོའེ༌ ལན༌ཏངས༌, "ང༌ ཨིན༌ལེ༌།"

25 ཨི༌སཱག༌གི༌ ཟེརས༌, "སྐོལ༌ཁན༌ནི༌ ཤ༌ ངའེ༌ དུན༌ལ༌ ཁྱོང༌, ཏེ༌བོ༌ ཟོས༌ཏེ༌ ངའེ༌ ཁྱོ༌རང༌ང༌ ཅིན༌ལབས༌ ཏང༌ཨིན༌།" ཡ༌ཀོབ༌བི༌ ཁྱོངས༌པ༌ ཁོ༌ ཟོས༌ ཡང༌ རྒུན༌ཆང༌ ཁྱོང༌ཁན༌བོའང༌ ཐུངས༌། 26 ཏེ༌ནེ༌ ཨ༌བའེ༌ ཁོའ༌ ཟེརས༌, "བུ༌ཚ༌ དུན༌ལ༌ ཡོང༌ཏེ༌ ངའ༌ པུག༌ཏོང༌།"

27 ཁོ༌ ཡོངས༌ཏེ༌ ཁོའ༌ པུག༌ ཏང༌ང༌ཅིག༌ ཨི༌སཱག༌གི༌ ཁོའེ༌ ཀོས༌ལག༌ག༌ ནུམས༌ཏེ༌ ཏན༌ཏན༌ ཅོས༌, ཏེ༌ནེ༌ ཁོའེ༌ ཁོའ༌ ཅིན༌ལབས༌ ཏངས༌ཏེ༌ ཟེརས༌,

30 ཨི༌སཱག༌གི༌ ཅིན༌ལབས༌ ཏང༌ ཚར༌ཏེ༌ ཨ༌བ༌ ཡོད༌ས༌ནེ༌ ཡ༌ཀོབ༌ ཅབ༌ བིངས༌ཏེ༌ ཆའ༌ཅིག༌ ཁོའེ༌ ཨ༌ཅོ༌ ཨི༌སུ༌ ལིངས༌ནེ༌ ལོགས༌ཏེ༌ ལེབ༌། 31 ཁོའེང༌ ཞིམ༌པོ༌ ཁར༌ཇི༌ སྐོལས༌ཏེ༌ ཨ༌བ༌ ཁྱེརས༌, ཡང༌ ཟེརས༌, "ཨ༌བ༌ལེ༌ ཞངས༌ཏེ༌ ངའ༌ ཅིན༌ལབས༌ སལ༌ཅེས༌སི༌ ཕིའ༌ ངའེ༌ སྐོལ༌ཁན༌ནི༌ ཁར༌ཇི༌ དོན༌ནའང༌།"

32 ཨི༌སཱག༌གི༌ ཁོའ༌ ཏྲིས༌, "ཁྱོ༌རང༌ སུ༌ ཨིན༌?"

ཁོའེ༌ ལན༌ཏངས༌, "ཉེ༌རང༌ངི༌ བུ༌ཚ༌ ཆེན༌མོ༌ ཨི༌སུ༌ ཨིན༌ལེ༌།"

33 ཨི༌སཱག༌ དར༌ཨིན༌ ཏྲིས༌, "ཏེ༌ནེ༌ སེམས༌ཅན༌ སད༌ཏེ༌ ངའ༌ ཟའ༌ལ༌ ཁྱོང༌ཁན༌བོ༌ སུ༌ ཨིན༌ནོག༌? ཁྱོ༌རང༌ ཡོང༌ངི༌ སང༌ སྔུན༌ལ༌ ཏེ༌བོ༌ ཟོས༌ཏེ༌ ངའེ༌ ཁོའ༌ ང༌རང༌ངི༌ ཅིན༌ལབས༌པོ༌ ཏངས༌པིན༌, ཡང༌ ཏེ༌བོ༌ ཁོ༌ ཉམ༌པོ༌ ལུས༌གོས༌།"

34 ཏེ༌བོ༌ ཚོར༌ར༌ཅིག༌ ཨི༌སུའི༌ སྲན༌ཏྲེ༌ ཀུ༌ཅོ༌ ཏངས༌ཏེ༌ ཟེརས༌, "ཨ༌བ༌ལེ༌ ངའང༌ ཉེ༌རང༌ངི༌ ཅིན༌ལབས༌པོ༌ སལ༌ལའང༌།"

35 ཨི༌སཱག༌གི༌ ལན༌ཏངས༌, "ཁྱོ༌རང༌ངི༌ ནོ༌ ཡོངས༌ ཡང༌ ངའ༌ གོབ༌སྐོར༌ཏེ༌ ཁྱོ༌རང༌ངི༌ ཅིན༌ལབས༌པོ༌ ཁྱེརས༌།"

36 ཨི༌སུ༌ ཟེརས༌, "ཁོའེ༌ མིང༌ང༌ ཡ༌ཀོབ༌ ཤེས༌ཏེ༌ ཏགས༌ཏེ༌ ཨིན༌ནོག༌ ཅིའ༌ཟེར༌ན༌ ཁོའེ༌ ལན༌ ཉིས༌ ངའ༌ གོབ༌སྐོརས༌། གོ༌མ༌ ངའེ༌ གོས༌ སྐྱེས༌སི༌ ཐོབ༌ཏང༌ ཡང༌ དག༌ས༌ ཉེ༌རང༌ངི༌ ངའ༌ སལ༌ཅེས༌ཅན༌ནི༌ ཅིན༌ལབས༌པོ༌, ཅི༌ ཉེ༌རང༌ངི༌ ངའེ༌ ཕིའ༌ ཅིན༌ལབས༌ ཉུ༌ངུན༌ཞིག༌གའང༌ སྲིས༌ཏེ༌ མ༌བོར༌པིན༌ན༌?"

37 ཨི༌སཱག༌གི༌ ལན༌ཏངས༌, "ངའེ༌ ཁོ༌ ཁྱོ༌རང༌ངི༌ཀ༌ སྤོན༌བོ༌ ཅོ༌ཚར༌ ཡང༌ ཁོའེ༌ ཉེན༌གྲུང༌ ཚང༌མ༌ ཁོའ༌ ཞབས༌ཏོག༌ ཅོ༌ཅེས༌ལ༌ ཏངས༌པིན༌། ངའེ༌ ཁོའ༌ གྲུ༌ དང༌ རྒུན༌ཆང༌ མང༌པོའེ༌ ཅིན༌ལབས༌ ཏང༌ཚར༌། ཏ༌ ཁྱོ༌རང༌ང༌ ཏང༌ཅེས༌ ངའ༌ ཅའང༌ ལུས༌ཏེ༌ མེད༌, བུ༌ཚ༌།" 38 ཨི༌སུའི༌ ཁོ༌རང༌ངི༌ ཨ༌བ༌ ཟེརས༌, "ཉེ༌རང༌ང༌ ཅིན༌ལབས༌ ཅིག༌ཅིག༌ མ༌ནེ༌ མེད༌ད༌? ངའང༌ ཅིན༌ལབས༌ སལ༌ལའང༌ ཨ༌བ༌ལེ༌།" ཏེ༌ནེ༌ ཨི༌སུ༌ སྲན༌ཏྲེ༌ ངུས༌།

39 ཏེ༌ནེ༌ ཁོའེ༌ ཨ༌བ༌ ཨི༌སཱག༌གི༌ ཟེརས༌,

41 ཨ༌བའེ༌ ཡ༌ཀོབ༌བ༌ ཅིན༌ལབས༌ ཏང༌ཅེས༌པོའེ༌ ཨི༌སུའི༌ ཡ༌ཀོབ༌བ༌ ནཕ༌རད༌ ཅོའད༌པིན༌། ཁོའེ༌ ཁོ༌རང༌ང༌ ཟེརས༌, "ཨ༌བ༌ ཤིའ༌ཅིག༌, ཉ༌ངན༌ ཅོས༌ཏེ༌ སྟིང༌ནེ༌, ངའེ༌ ཡ༌ཀོབ༌ སད༌ཨིན༌།"

42 ཨིན༌ནའང༌ ར༌བེ༌ཀ༌ ཨི༌སུའི༌ ཟེར༌ཁན༌བོ༌ ཚོར༌པ༌ ཁོའེ༌ ཡ༌ཀོབ༌བ༌ བོད༌ཏེ༌ ཟེརས༌, "ཉོན༌ ཁྱོ༌རང༌ངི༌ ཨ༌ཅོ༌ ཨི༌སུའི༌ ཁྱོ༌རང༌ སད༌ཅེས༌སི༌ ཐབས༌ལྡིང༌ དུག༌། 43 ཏ༌ བུ༌ཚ༌, ངའེ༌ ཅོས༌ ཟེར༌ཅེས༌པོ༌ ཅོས༌, དག༌ས༌རང༌ ཧ༌རན༌ནི༌ ནང༌ང༌ ངའེ༌ མིང༌བོ༌ ལ༌བན༌ ཡོད༌ས༌ ཤོར༌ཏེ༌ སོང༌། 44 ཡང༌ ཁྱོ༌རང༌ངི༌ ཨ༌ཅོའེ༌ སྲོ༌ ཞུ༌ཞུ༌ ཚག༌པ༌ ཁོ༌ ཉམ༌པོ༌ དུག༌། 45 ཁྱོ༌རང༌ངི༌ ཅོས༌ཁན༌གུན༌ ཞེད༌ཏེ༌ ཁོའེ༌ སྲོ༌ མེད༌ཁན༌ ཆའ༌ཅིག༌, ངའེ༌ ཁྱོ༌རང༌ང༌ ལོགས༌ཏེ༌ ཡོང༌ཅེས༌ལ༌ ལོན༌ ཀལ༌ཨིན༌། ངའེ༌ བུ༌ཚ༌ ཉིས༌ཀ༌ ཞག༌ ཅིག༌གི༌ ནང༌ང༌ ཅིའ༌ སྐྱལ༌གོས༌?"

46 ར༌བེ༌ཀའེ༌ ཨི༌སཱག༌ག༌ ཟེརས༌, "ངའ༌ ཨི༌སུའི༌ ཧེད༌པ༌ ན༌མ༌གུན༌ ཉམ༌པོ༌ ངལ༌ཏེ༌ རག༌, ཡ༌ཀོབ༌བིའང༌ ཧེད༌པ༌ བུ༌མོ༌ ཉམ༌པོ༌ ན༌མ༌ ཅོ༌ན༌ ངའ༌ སོན༌ཏེའ༌ ལུས༌ཏེ༌ ཅི༌ ཕན༌།"