ཀོ༌ལོ༌སིའི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌།
ཀོ༌ལོ༌སིའི༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌སི༌ སྐོར༌།
འི༌ ཆག༌བྲིས༌ དང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ གྱུད༌ཏེ༌, ང༌དང༌ང༌ འི༌ ཆག༌བྲིས༌པོ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ པ༌འུ༌ལུའི༌ བྲིའ༌ ཛད༌ཁན༌བོ༌ གྱུས༌ ཆའ༌ནོག༌།
ང༌དང༌གུན༌ལ༌ ཆོས༌སི༌ ཁས༌པ༌གུན༌ གྱུད༌ཏེ༌ འི༌ ཆག༌བྲིས༌པོ༌, ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 27 ནི༌ ཉེ༌ཁོར༌ལ༌ བྲིའ༌ ཛད༌ཁན༌བོ༌ གྱུས༌ ཆའ༌ནོག༌། འི༌བོ༌ རོམ༌མི༌ ནང༌ང༌ པ༌འུ༌ལུ༌ ཏང༌པོ༌རང༌ ཙོན༌ལ༌ ཀགས༌ཏེ༌ ཡོད༌ཏུས༌ བྲིའ༌ ཛད༌ཁན༌བོ༌ སམ༌མ༌ནོག༌།
ཀོ༌ལོ༌སིའི༌ ཆོས༌ཚོགས༌སི༌ ནང༌ང༌ ཏད༌པ༌ཅན༌གུན༌ནི༌ ཕྲོའ༌ གིརིས༌ དང༌ ཡ༌ཧུ༌དཱ༌ དྲེས༌ཁན༌ནི༌ ཟུས༌མའེ༌ ལབ༌ཞ༌གུན༌ བྱུངས༌ པ༌སང༌, པ༌འུ༌ལུའི༌ འི༌ ཆག༌བྲིས༌པོ༌ བྲིའ༌ ཛདས༌། ཁོང༌ངི༌ འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌གུན༌ ནི༌:-
1 ཁོང༌ངི༌ ཀོ༌ལོ༌སིའི༌ ཏད༌པ༌ཅན༌གུན༌ ཏད༌པའེ༌ ནང༌ང༌ ལྡན༌ཅུག༌ཅེས༌སི༌ དོད༌པ༌།
2 མ༌ཤི༌ཀ༌ ཚང༌མའེ༌སང༌ ཝང༌སྲུལ༌པ༌ ཇིགས༌པོ༌ ཨིན༌ཁན༌ དང༌ ཁོང༌ངི༌ ཛམ༌བུ༌ལིང༌ངི༌ ནང༌ང༌ ཡོད༌ཁན༌ ཚང༌མ༌ དང༌ ཆོས༌ཚོགས༌སི༌ཀ༌ ཝང༌སྲུལ༌ལ༌ ཛད༌ཁན༌བོ༌ ལབ༌ཅེས༌།
3 སྕོད༌པ༌ ངན༌པ༌ དང༌ ཟུས༌མའེ༌ ལབ༌ཞ༌གུན༌ནེ༌ སྤང༌པུད༌ཅེས༌།
4 དམ༌པ༌ མི༌ཚེ༌ཞིག༌ ཕུད༌ཅེས༌སི༌ ནང༌ང༌ སྤོས༌པ༌ ཏང༌ཅེས༌༎
1
པ༌འུ༌ལུའི༌ ཇུ༌ ཞུས༌།
1:1 ནེ༌ 2
1 དཀོན༌མཆོག༌གི༌ ཐུག༌གོངས༌ ནང༌ཞིན༌, ཡེ༌ཤུ༌ མ༌ཤི༌ཀའེ༌ སྐུ༌ཚབས༌ལ༌ ལྡམ༌མ༌ ཛད༌ཁན༌ པ༌འུ༌ལུ༌ དང༌ ང༌དང༌གུན༌ནི༌ སྤུན༌ ཏི༌མོ༌ཐི༌ གུན༌ནི༌ ཆོགས༌ནེ༌ 2 འི༌ ཨི༌གེ༌པོ༌ ཀོ༌ལོ༌སི༌ གྱལ༌སའེ༌ ནང༌ང༌ ཡོད༌ཁན༌ནི༌ མ༌ཤི༌ཀའེ༌ ནང༌ང༌ ཨིད༌ཤེས༌ཅན༌ དང༌ དམ༌པ༌ སྤུན༌གུན༌ལ༌ བྲིའད༌།
ང༌དང༌ངི༌ དཀོན༌མཆོག༌ ཡབ༌བི༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ཤིག༌།
པ༌འུ༌ལུའི༌ ཐུག༌རྗེ༌ཆེ༌ དང༌ མོས༌ལམ༌།
1:3 ནེ༌ 14
3 ཁྱོ༌ཞ༌གུན༌ནི༌ ཕིའ༌ མོས༌ལམ༌ ཞུ༌ ཟ༌ནེ༌, ང༌ཞའེ༌ ཏུས༌གྱུན༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌། 4 ཅིའ༌ཞུ༌ན༌ ཁྱོ༌ཞ༌གུན༌ནི༌ ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ དང༌ དཀོན༌མཆོག༌གི༌ དམ༌པ༌ མི༌ཚང༌མ༌ ཉམ༌པོ༌ ཅམས༌པ༌ ཅོ༌ཅེས༌པོ༌ ང༌ཞའེ༌ ཚོར༌། 5 ཏེ༌ ཏད༌པ༌ དང༌ ཅམས༌པ༌ གུན༌ ཁྱོ༌ཞ༌གུན༌ལ༌ ནམ༌ཁའེ༌ ནང༌ང༌ དཀོན༌མཆོག༌གི༌ བོར༌ར༌ ཛད༌ཁན༌ནི༌ སོལ༌རས༌སི༌ རེ༌ཝ༌བོའེ༌ ཀ༌ནེ༌ ཡོངས༌ཏེ༌ ཨིན༌ནོག༌། ཡང༌ ཏེ༌ རེ༌ཝ༌བོ༌ ཁྱོ༌ཞ༌གུན༌ནི༌ ནང༌ང༌ ཡོད༌པིན༌ ནམ༌, ཁྱོ༌ཞ༌གུན༌ལ༌ ཏང༌པོ༌རང༌ དེན༌བའེ༌ ལོན༌ གའ༌མོའེ༌ ནས༌ཚུལ༌བོ༌ ཚོར༌།
6 ཁྱོ༌ཞ༌གུན༌ལ༌ ཐོབ༌ཁན༌ནི༌ ཏེན༌ན༌ གའ༌མོའེ༌ ནས༌ཚུལ༌བོ༌ ཇིག༌རྟེན༌ གང༌པོའེ༌ ནང༌ང༌ ཚོར༌ཨིན༌, ཡང༌ བྲས༌བུ༌ མང༌པོ༌ཞིག༌ སྨིན༌ཏེ༌ ལྡན༌ཨིན༌ ཨིན༌ནོག༌, ཏེན༌ན༌ ཙོགས༌ ཁྱོ༌ཞ༌གུན༌ནི༌ མི༌ཚེའེ༌ ནང༌ངའང༌ ལས༌ ཅོ༌ཨིན༌ ཨིན༌ནོག༌, ནམ༌ ཁྱོ༌ཞའ༌ ཏང༌པོ༌རང༌ དཀོན༌མཆོག༌གི༌ ཐུག༌རྗེའེ༌ སྐོར༌ལ༌ དེན༌བ༌བོ༌ ཚོར༌ཏེ༌ ཧ༌གོ༌།
7 ཁྱོ༌ཞ༌གུན༌ནི༌ ཏེ༌ གའ༌མོའེ༌ ནས༌ཚུལ༌བོ༌ ང༌ཞའེ༌ ཅེས༌པ༌ ཞབ༌སྟོག༌པ༌ ཕྲོ༌པ༌ ཨེ༌པ༌ཕའ༌རས༌སི༌ ཀ༌ནེ༌ ཚོར༌ཏེ༌ ཨིན༌། ཁོ༌ མ༌ཤི༌ཀའེ༌ ཨིད༌ཤེས༌ཅན༌ནི༌ ཞབ༌སྟོག༌པ༌, ང༌ཞའེ༌ ཚབས༌ལ༌ ཁྱོ༌ཞའ༌ རོགས༌ ཅོ༌ཁན༌བོ༌ ཨིན༌། 8 ཡང༌ དམ༌པའེ༌ ཐུག༌ཉིད༌དི༌ ཁྱོ༌ཞའ༌ ཞན༌གུན༌ལ༌ ཅམས༌པ༌ ཅོ༌ཅེས༌སི༌ ཁྱུད༌ སལ༌ཁན༌བོའང༌ ཁོའེ༌ ང༌ཞའ༌ ཤདས༌།
9 ཏེན༌ན༌བོའེ༌ཕིའ༌ ང༌ཞའེ༌ ཁྱོ༌ཞ༌གུན༌ནི༌ སྐོར༌ལ༌ ཚོར༌པ༌ནེ༌ ཕར༌ལ༌, ཆད༌མེད༌ལ༌ ཁྱོ༌ཞ༌གུན༌ནི༌ ཕིའ༌ དཀོན༌མཆོག༌ག༌ མོས༌ལམ༌ ཞུའད༌། ཁྱོ༌ཞ༌གུན༌ལ༌ དཀོན༌མཆོག༌གི༌ ཁོང༌ངི༌ ཐུག༌གོངས༌པོ༌ གང༌པོ༌ ཧ༌གོ༌ཅེས༌, ཡང༌ སེམས༌ཉིད༌དི༌ ཐོག༌ནེ༌ ཤེས༌རབས༌ དང༌ ཧ༌གོ༌ སལ༌ལ༌ ཛད༌ཅེས༌ལ༌ ཞུའད༌། 10 ཏེ༌ནེ༌ ཁྱོ༌ཞ༌གུན༌ནི༌ ཅི༌ས༌ཐོག༌ནེ༌ གཙོ༌བོའ༌ ཐུགས༌ཐད༌ཅེས༌ དང༌ རྩི༌ཝ༌ ཁྱོང༌ཁན༌ནི༌ མི༌ཚེ༌ཞིག༌ ཕུད༌ཉན༌ཨིན༌། ཁྱོ༌ཞའེ༌ མི༌ཚེའེ༌, བྲས༌བུའི༌ རིགས༌ ཟང༌པོ༌ ཚང༌མ༌ སྨིན༌ཏེ༌ དཀོན༌མཆོག༌ ཤེ༌ཤེས༌སི༌ ནང༌ང༌ མང༌ངི༌ སང༌ མང༌ང༌ ལྡན༌ཨིན༌།
11 ང༌ཞའེ༌ མོས༌ལམ༌ ཞུའད༌, ཁྱོ༌ཞ༌གུན༌ལ༌ ཟོད༌པ༌ སྒོམ༌ཅེས༌ ཡང༌ རྡུག༌ངལ༌གུན༌ ཁུར༌ ཐུབ༌ཅེས༌སི༌ ཕིའ༌ དཀོན༌མཆོག༌གི༌ ཁྱོ༌ཞ༌གུན༌ནི༌ སེམས༌པོ༌ ཁོང༌ངི༌ ཧ༌ལས༌ཤེས༌སི༌ ཁྱུད༌ ཉམ༌པོ༌ ཤེད༌ཅན༌ ཅོའ༌ ཛད༌ཤིག༌། ཡང༌ མ༌ ཐད༌པོ༌ ཉམ༌པོ༌, 12 ང༌དང༌གུན༌ནི༌ ཡབ༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཤིག༌། ཁོང༌ངི༌ ཁྱོ༌ཞ༌གུན༌ལ༌, འོད༌དི༌ ནང༌ང༌ དུག༌ཁན༌ནི༌ ཁོང༌ངི༌ དམ༌པ༌ མི༌གུན༌ནི༌ ནོར༌སྐལ༌གུན༌ བགོས༌ཏེ༌ ཐོབ༌ཅེས༌ལ༌ ལྡམ༌མ༌ ཛད༌ཏེ༌ ཨིན༌ནོག༌། 13 དཀོན༌མཆོག༌གི༌ ང༌དང༌གུན༌ ཤེ༌ཏན༌ནི༌ མུན༌གྲིག༌ ཝང༌ནེ༌ ཐར༌ ཅུག༌ག༌ ཛད༌ཏེ༌, ཁོང༌རང༌ངི༌ ཅེས༌པའེ༌ སྲས༌སི༌ གྱལ༌སྲིད༌དི༌ ནང༌ང༌ ཁྱེར༌ར༌ ཛདས༌། 14 ཁོང༌ངི༌ སྲས༌སི༌ ཁོང༌རང༌ངི༌ སྲོག༌ སལ༌ཏེ༌ ང༌དང༌གུན༌ ཤེ༌ཏན༌ནི༌ ཝང༌ངི༌ ཀ༌ནེ༌ ཐར༌ ཅུག༌ག༌ ཛདས༌, ཡང༌ ང༌དང༌གུན༌ནི༌ སྡིག༌པ༌གུན༌ལ༌ ཤགས༌པ༌ སལ༌ལ༌ ཛདས༌།
མ༌ཤི༌ཀ༌ ནི༌ ཚང༌མའེ༌སང༌ ཇིགས༌པོ༌ ཨིན༌།
1:15 ནེ༌ 23
15 མ༌ཤི༌ཀ༌ ལྟས༌ཏེ༌, མ༌ནེ༌ མ༌ཐོང༌ཁན༌ནི༌ དཀོན༌མཆོག༌པོ༌ ཧ༌གོའ༌ནོག༌།
ཅི༌ཚང༌མ༌ ཆག༌ཤུག༌གི༌ སང༌ སྔུན༌ལ༌ མ༌ཤི༌ཀ༌ ཞུགས༌ཏེ༌ ཡོད༌པིན༌,
ཡང༌ ཁོང༌ང༌ ཅི༌ཚང༌མའེ༌ཀ༌ ཝང༌ ཡོད༌ཏེ༌ ཨིན༌ནོག༌།
16 ཁོང༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཅོའ༌ ཛདས༌:
ནམ༌ཁའ༌ དང༌ ཇིག༌རྟེན༌ནི༌ ནང༌ང༌ ཡོད༌ཁན༌ ཚང༌མ༌, ཐོང༌ཁན༌ དང༌ མི༌ཐོང༌ཁན༌,
ཁྲིས༌ ཡ༌, གྱལ༌སྲིད༌ ཡ༌, ཝང༌སྲུལ༌ ཡ༌ ཝང༌ ཡོད༌ཁན༌གུན༌,
ཏེ༌ ཚང༌མ༌ ཁོང༌ གྱུད༌ཏེ༌ ཡང༌ ཁོང༌ངི༌ ཕིའ༌ ཅོའ༌ ཛད༌ཏེ༌ ཨིན༌ནོག༌།
17 ཁོང༌ ཏེ༌གུན༌ ཆག༌ཤུག༌གི༌ སང༌ སྔུན༌ལ༌ ཞུགས༌ཏེ༌ ཡོད༌པིན༌།
ཡང༌ ཁོང༌ངི༌ ཞས༌ཏེ༌ འི༌ ཚང༌མ༌ ལུས༌ཏེ༌ ཨིན༌ནོག༌།
18 ཆོས༌ཚོགས༌ ནི༌ ཁོང༌ངི༌ སྐུ༌ཟུགས༌པོ༌ ཨིན༌ནོག༌།
ཡང༌ ཁོང༌ ཏེ༌ སྐུ༌ཟུགས༌པོའེ༌ ཨུ༌ ཨིན༌།
ཁོང༌ ནི༌ གོ༌ཟུགས༌པོ༌ ཞུགས༌ཏེ༌ ཨིན༌ནོག༌,
ཡང༌ ཤི༌ཏེ༌ སོན༌ཏེའ༌ ལངས༌ཁན༌ ཚང༌མའེ༌ ཕྲོ༌ནེ༌ ཁོང༌ ཀྲག༌ཤོག༌པོ༌ ཨིན༌།
ཏེ༌བོའེ༌ཕིའ༌ ཁོང༌ ཅི༌ཚང༌མའེ༌ ནང༌ང༌ ཏང༌པོ༌བོ༌ ཞུགས༌ཏེ༌ ཨིན༌།
19 མ༌ཤི༌ཀའེ༌ ནང༌ང༌ གང༌པོ༌ ནས༌ས༌ལ༌ དཀོན༌མཆོག༌ ཐུགས༌ཐད༌དད༌པིན༌།
20 ཡང༌ མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌
ཁོང༌རང༌ ཉམ༌པོ༌ ཐུན༌བྲེལ༌ལི༌ ནང༌ང༌ ཁྱོང༌ང༌ ཛདས༌།
དཀོན༌མཆོག༌གི༌ ཁོང༌རང༌ངི༌ སྲས༌སི༌ ཁྲག༌ རྐྱང༌ཤིང༌ངི༌ཀ༌ ཕོ༌ཅེས༌པོ༌ གྱུད༌ཏེ༌,
ཇིག༌རྟེན༌ དང༌ ནམ༌ཁའེ༌ ནང༌ང༌ ཡོད༌ཁན༌ ཚང༌མ༌,
ཁོང༌ ཉམ༌པོ༌ ཐུན༌བྲེལ༌ལི༌ ནང༌ང༌ ཁྱོང༌ང༌ ཛདས༌།
21 སྐབས༌ཤིག༌ག༌ ཁྱོ༌ཞ༌གུན༌ དཀོན༌མཆོག༌ནེ༌ མ༌ ཐག༌རིང༌ང༌ ཡོད༌པིན༌, ཡང༌ ཁྱོ༌ཞའེ༌ ཅོ༌ཚུལ༌ དང༌ སམ༌ཚུལ༌ ངན༌པ༌ གུན༌ནི༌ ཞས༌ཏེ༌ ཁྱོ༌ཞའ༌ དཀོན༌མཆོག༌གི༌ གྲ༌འོ༌ ཨིན༌པིན༌། 22 ཨིན༌ནའང༌ མ༌ཤི༌ཀའ༌ སྐུ༌ཟུགས༌སི༌ ནང༌ང༌ ཀྲོང༌ཤེས༌པོའེ༌ ཞས༌ཏེ༌ ཁྱོ༌ཞ༌གུན༌ དཀོན༌མཆོག༌ ཉམ༌པོ༌ ཐུན༌བྲེལ༌ལི༌ ནང༌ང༌ ཁྱོང༌ང༌ ཛད༌ཏེ༌ ཨིན༌། ཏེན༌ན༌བོའེ༌ ཞས༌ཏེ༌ དཀོན༌མཆོག༌གི༌ ཁྱོ༌ཞ༌གུན༌ དམ༌པ༌, རྩང༌མ༌ དང༌ སྐྱོན༌མེད༌ ཅོའ༌ ཛད༌ཏེ༌, ཁོང༌རང༌ངི༌ དུན༌ལ༌ ཁྱོང༌ང༌ ཛདས༌།
23 ཨིན༌ནའང༌ ཁྱོ༌ཞ༌གུན༌ འི༌ ནང༌ང༌ སྟན༌པོ༌ དུགས༌ཏེ༌ དེན༌བ༌ ཨིན༌ཁན༌བོ༌ ཏད༌པ༌ ཅོ༌གོས༌། ཁྱོ༌ཞ༌གུན༌ནི༌ གའ༌མོའེ༌ ནས༌ཚུལ༌ ཚོར༌ཏེ༌ ཏད༌པ༌ ཅོས༌ཁན༌བོའེ༌ ཀ༌ནེ༌ ཐག༌རིང༌ང༌ མ༌ཆ༌ཤིག༌, ཡང༌ ཏེ༌ གའ༌མོའེ༌ ནས༌ཚུལ༌བོ༌ ཇིག༌རྟེན༌ གང༌པོའེ༌ ནང༌ང༌ ཤད༌ཏེ༌ ཨིན༌ནོག༌། ང༌, པ༌འུ༌ལུ༌ ཏེ༌ གའ༌མོའེ༌ ནས༌ཚུལ༌ ཤད༌ཅེས༌ལ༌ དཀོན༌མཆོག༌གི༌ ཞབ༌སྟོག༌པ༌ ལྡམ༌མ༌ ཛད༌ཁན༌བོ༌ ཨིན༌།
ཆོས༌ཚོགས༌སི༌ ཕིའ༌ པ༌འུ༌ལུའི༌ ཞབ༌སྟོག༌།
1:24 ནེ༌ 2:5
24 ཏ༌ ཁྱོ༌ཞ༌གུན༌ནི༌ ཕིའ༌ ངའ༌ ནགས༌ ཐོང༌ཁན༌བོའ༌ ཐད༌པོ༌ རག༌, ཅིའ༌ཟེར༌ན༌ མ༌ཤི༌ཀའེ༌ ཁོང༌རང༌ངི༌ སྐུ༌ཟུགས༌, ཆོས༌ཚོགས༌སི༌ ཕིའ༌ རྡུག༌ངལ༌ ནམས༌ཁན༌བོའེ༌ ནང༌ང༌, ངེའང༌ ཁག༌ནེན༌ཨིན༌ ཨིན༌ནོག༌། 25 དཀོན༌མཆོག༌གི༌ ཁྱོ༌ཞ༌གུན༌ལ༌ ཁོང༌རང༌ངི༌ ལོན༌ གང༌པོ༌ ཤད༌ཏེ༌ ཁོང༌ངི༌ ཆོས༌ཚོགས༌གུན༌ལ༌ ཞབ༌སྟོག༌ ཞུ༌ཅེས༌སི༌ ཁག༌པོ༌ ངའ༌ ཀལ༌ལ༌ ཛདས༌། 26 ཏུས༌ཡུན༌རིང༌ དང༌ སྔུན༌མའེ༌ མིར༌གྱུད༌གུན༌ནི༌ ཀ༌ནེ༌ སྦས༌ཏེ༌ བོར༌ར༌ ཛད༌ཁན༌ནི༌ ཏེ༌ ལོན༌བོ༌ དག༌ས༌ དཀོན༌མཆོག༌གི༌ ཁོང༌རང༌ངི༌ མི༌ དམ༌པ༌གུན༌ལ༌ སྔོན༌ ཅུག༌ག༌ ཛདས༌། 27 དཀོན༌མཆོག༌གི༌ མ༌ཤི༌ཀའེ༌ ནོར༌ དང༌ སྤལ༌བོ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌ ཨིན༌ཁན༌བོ༌, ཁོང༌རང༌ངི༌ མི༌གུན༌ལ༌ ཧ༌གོ༌ཅུག༌ཅེས༌ལ༌ ཐུགས༌ཐད༌ད༌ནོག༌། དཀོན༌མཆོག༌གི༌ སང༌ཝ༌ ཐབས༌ལྡིངས༌ ནི༌, མ༌ཤི༌ཀ༌ ཁྱོ༌ཞའེ༌ ནང༌ང༌ ཞུགས༌ཏེ༌ ཡོད༌ཁན༌བོ༌ ཨིན༌, ཏེ༌བོའེ༌ ཁྱོ༌ཞ༌གུན༌ལ༌ ཁོང༌ངི༌ སྤལ༌ལི༌ ནང༌ང༌ ཐུས༌ཅེས༌སི༌ རེ༌ཝ༌བོ༌ ཏང༌ང༌ནོག༌།
28 དཀོན༌མཆོག༌གི༌ ང༌ཞའ༌ སལ༌ཁན༌ནི༌ ཤེས༌རབས༌ ཚང༌མ༌ ཉམ༌པོ༌ སྤང༌པུད༌ཨིན༌ ཡང༌ ལབ༌ཞ༌ ཏང༌ཨིན༌, ང༌ཞའེ༌ མ༌ཤི༌ཀའེ༌ སྐོར༌ལ༌ ཞན༌མ༌གུན༌ལ༌ ཤད༌དད༌། དཀོན༌མཆོག༌གི༌ དུན༌ལ༌ ཏེ༌གུན༌ མ༌ཤི༌ཀའེ༌ ནང༌ང༌ སམ༌བ༌ཅན༌ རིག༌ གྱུར༌ཏེ༌ ཕུལ༌ ཐུབ༌ཅེས༌ལ༌ ང༌ཞའ༌ དོད༌ད༌རག༌། 29 ཏེན༌ན༌བོའེ༌ཕིའ༌ མ༌ཤི༌ཀའེ༌ ངའ༌ སལ༌ལ༌ ཛད༌ཁན༌ནི༌ ཤེད༌ དང༌ ཁྱུད༌ ཚང༌མ༌ ཉམ༌པོ༌, ངའེ༌ ལས༌ མ༌སྲན༌ཏྲེ༌ ཅོའད༌།