109
God Gitofu Dari Ambare Dae Benunu Sisira.
1 Arie God, na sakai nindae seraena. Erá beka gote tauntaungheose!
2 Ai resira amo, ari ekoko embo, nandae osogo use, geka gungubo nanda javoda sesegerera.
3 Nandae jijivu ekoko beká resuterera. Na eko eni jo ae ava, susu tefo resera.
4 Na ne dubo ruruse, nemoá sonembaso dae banungedo ghuseni.
Avata, na gofono dae sise, unongu seraera.
5 Na ne dubo ruruse, nendae ari eveva beká urureono,
ne mino namoá imboe use, namokena ari ekoko beká ava eraera.
6 Genembo eko eni gatege, nundae aji sare! Unongu sari kato eni dirigaoro ya, numoa kotoda fitare!
7 Koto sifoda nu gofaetira. Nunda benunu seraira barago, ijujari katoimi gungubo sariá sise, sari gofarira.
8 Genembo amo oroko nembo ambaeti! Nunda saramana da vasa ava, genembo eniimi baeti!
9 Nu ambari, nunda sasingu babate aoro, noaro rori baetira.
10 Nunda sasingu nati do bayaudae benunu sise deinghaore!
Evetu genembo mendenimi ne ondoro, numamo da kambo bunununghari ava do darigaore!
11 Nu mavekena moni benunu se bambudo, jo mutae usira aimi, numoa koto use nunda gugua soesa baeti!
Teana emboimi nunda gugua ghayafa korai use budo irira ava, soesa barera.
12 Nundae mave enimi jo joka ae aetira. Kotugo mave enimi nunda sasingu babatedae
kavevera itako jo ae aetira.
13 Nunda sasingu amboro dae resena. Amingaoro, nunda oro manje tefo aeti.
14 Numamo nombua mane da ari ekoko usera, kotugo noi da ari eko ava,
erá Bajari kote doyeure dae sise resena, evovodae kotise irare!
15 Genembo ainda natofo da ari ekoko ava Bajari sifo ghousa kotise,
ne dari amboro, nenda binó barago ya dadabaeti.
16 Ai resira amo, genembo amo nu evetu genembo mendeni dae joka ari berefori,
evetu genembo tofo irae embo ava, evetu genembo gugua roera dae jarutuse irera ava,
nemokena mema bouvu futuse detiri sirivuseri.
17 Giti nu evetu genembo mendeni girivaita ari ava uju beká edo ghusira, avori,
nunda girivaita ari aimi tofo numoa bare. Nu esimbugari da emboro imboe usira,
ágido numokena esimbugari eni erá siroreure!
18 Nu evetu genembo mendeni girivaita ari ava nembo use irei, eveva mo uvá gae baseari,
fisi yaya eraira aminga ava, nunda girivaita aimi tofo nunda tamonda gambare!
19 Kotugo, nunda girivaita aimi tofo numokena asuge, kikifu edo evovodae irare!
20 Bajari, nanda gitofu namokena osogo use, jijivu seraera,
ainda beká ava jovereghe nemokena ururaso, ghamo baore dae resena.
21 Arie Bajari God, ni nange sonembari beka gagojusesa ava use, na sonembe!
Ni na dubo bu goghombuse, kavevera eraesa aindae, na sonembaso jebugari dae resena.
22 Na tofo iraede kotugo makasi bekári, nanda janje joka mema ai jaruterena.
23 Kau ungobu use, reighi tutumbe geraira, na amingari gerena.
Kau sisi ambari yaurai fuseari ya gheraira, amingari gerena.
24 Uvu bayau tefo etiri, na kaubo roroghoterira, na kau irae, gevei etu yavarara geteni.
25 Evetu genembo na sifo reda garera, namoa dere jise, nandae gifua gitorotoro use, gegha jiraera.
26 Arie Bajari God, na dubo buraesa aindae, na sonembaso dae resena.
27 Arie Bajari, nisuka nine na sonembedo, sanghimbeoso jebugeraena ava ijugaso,
nandae osogo ari kakato kasama aore!
28 Ne namoa girivaita arera amo, namoa esimbugaresa.
Evetu genembo namokena ari eko arera ava, sosighi aso itatama arera.
Amingururaso, ninda saramana kato, dubo jama arira.
29 Mave namokena gitofu eraera ava aso, meka gaeteri. Mekavata meka garera.
30 O namo, taká koko fuge Bajari kena aiyakoe sise, nundae sakai sarena,
nunda natofo tafaroro ari dae totorugarera ainda jokáda fete, nunda javo jighono erarira.
31 Ainda susu mo, tofo irae embo ava nune soreraira,
kotugo mave gitofuimi daoro amboro dae seraera ava, nune sanghimbe beari jebugeraera.