108
Gitofo Kosegari Jebugari Da Banungariri.
1 Arie God, nanda tumondari nimokena jo nanjigo dadabae arira.
Nanda dubo isambuimi nindae sakai sise, yaru divarena.
2 Arie, nanda gita yukaghae* Afige, geka eni gita o uka dae gefusera, tuturo 33:2 duruda tege, garesa! erevu! Sifo nane karigaone!
3 Arie Bajari, na reighi isasambu da oro mendeni mendeni jokáda fetirise, nindae sakai sarena.
Na reighi isasambu da oro mendeni mendeni aikena nindae sakai sarena.
4 Ai resira amo, ninda dubo bari a kavevera amo, teriago bekári, utu viti darigedo irira.
Ninda beka gajari namanekena isambu kaifa eraesa, aimi aira utu tambudo irira.
5 Arie God, utuda ninda javo jighi erorurari, enda evia ninda duro aimi afurugedo ijuge, gaore!
Arie God, utuda ninda fakina a duró ava ijugururu!
6 Ninda natofo dubo buraesa ava ninda fakinaimi sonembe!
Namanenda benunu ningido, ninda fakinaimi namane gitofukena saghimbe bu darigaso
jebugari dae resena.
7 God nunda tafaroro kambo kakarago aminda irise sisira, “Reighi Sekem
nane sosighi e budo, tano ghoredo, nanda natofokena soro vesa arena.
Enda uvu ghajughu tevisa Sukot seraera, ábarago nane sosighi e budo, tano ghoredo, soro vesa arena.
8 Gilead frovensi mo, nandari, a kotugo Oro Manasseh ningiaminda anumbirera, ábarago nanda tofori.
Ephraim ondi mo, nanda jiro gagara ari kato da kaugori, kotugo Judah ondi mo, nane kotofu edo irena da tanogori.
9 O Moab mo, nanda uvu dimbu gutari agha dae ererurena.
A kotugo Edom aminda nanda ata anoso goroghari da vasari.
Ata anoso goroghusena amo, nanda yoyovari, aimi imbara ururono irarira.
Filistia embo da enda sosighi e ruruse, na sosighi e bari da kuvai koko fuge resena.”
10 Arie God, na mave giti bari ya reighi karo kinghari ominda terareni? Nanda giti mave bari Edom yareni?
11 Bajari, ni namane imboe fugutusesi, aĩ? Ni namanenda isoro embo unumbedo ya tataya aresa, aĩ?
12 Arie, sonembaso isoro ari dae resena, ai resira amo,
endada evetu genembokena sonemba bari eni tefori.
13 Sonemba God kena ruruse, isoro arera inono arira.
Namondeda gitofu nune de atai duboda fatarira.