1 Ԓўв Дервия пӑ Листра вошӈән унты йŏхтәс. Пӑ щита и мŏԓты утәԓтыты ху ус, нэмәԓән Тимофей. Ԓўв аԋԏэԓ эвԓәм иудей нэ, ащеԓ пӑ – грек ху,

2 пӑ ԓўв эԓтэԓ Листрайән пӑ Иконияйән уԓәм хӑнам йох йӑма йастыԓысәт.

3 Павел ԓўвеԓ пӑтән ўты нŏмәс верәс; пӑ, ўймаԓ кемән, щи тӑхайәтән уԓәм иудейәт урәӈән, эвәтты верән версәԓы; ԓўв ащеԓ грека уԓты вер хŏԓыйэ хŏйатәтән уйәтса, щишән.

4 Вошәт сӑхат мӑнман, ԓыв эвәԓты мŏхет апостоләтән пӑ ун икетән Иерусалимән ԓэщатәм мŏрт щирәт хўват уԓты партсәт.

5 Пӑ пойәкщәты актәщәм мŏхет кашәӈ тӑхайән эвәԓты верән такамтыԓәт пӑ кашәӈ хӑтәԓ арамәԓәт.

6 Фригия пӑ Галатия мўв сӑхат мӑнман, Йэмәӈ Ԓыԓән Асия мўвән ԓыв Йӑм айкеԓ туты ӑт эсәԓсайәт.

7 Мисия мўв унты йŏхәтмеԓ йўпийән, Вифиния мўва мӑнты ўтщиԓысәт; туп Йэмәӈ Ԓыԓ ԓывиԓаԓ тŏхи ӑт эсәԓсәԓы.

8 Мисия хӑйман, пӑ ԓыв Троада воша охәԓсәт.

9 Щӑԓта атәԓән Павела ватты щир ус: и мŏԓтты ху, Македония мўвәӈ ху, этәс. Ԓўв ԓойәс пӑ ԓўвеԓ вохԓәԓы: «Македонияйа йŏхта пӑ мўӈева ԋоты».

10 Щи вантәпса йўпийән ищи пўԉаӈ мўӈ Македонияйа мӑнты нŏмәс версув, нумәсман, Турәм Куща мўӈев щита Йӑм Айкеԓ тутԓыты вохсәԓы.

11 Щиӈәԋща, Троада вош эԓты нык хўвԓәмеԓ йўпийән, мўӈ тŏрԓы Самофракия пухәр мўва йŏхәтсув, кимет хӑтәԓ пӑ Неаполь воша,

12 щиԓта пӑ Филлиппы воша йŏхәтсув: Македония мўв щуӈән мет оԓәӈ вош, Рим пеԓа питәм вош. Тӑм вошән мўӈ кӑмәтса хӑтәԓ усув.

13 Шаббат хӑтәԓән пӑ мўӈ вош шӑнша йŏхан пеԓа этсув, хŏта, уԓтыйән, пойәкщәты тӑха ус, пӑ, иԓ омәсман, щита ӑктәщәм имет пиԓән пŏтәртсув.

14 Ԓыв кўтэԓән Фиатир вош эԓты Лидия нэмпи и нэ ус, ԓўв тынәӈ питы ўрты щӑшканәт тыныйәс. Лидия Турәм пеԓа сӑмәӈа ус, пӑ Павел мўй пŏтәртәс, Турәм Кущайән ԓўв сӑмәԓ щи пеԓа пел пўшса.

15 Хун пӑ ԓўв йиӈка ԓŏӈәԓтыса пӑ ԓўв йŏԓән уԓты мŏхиԓаԓ па, мўӈев ԓўв хŏщайәԓ вохсәԓы, пŏтәртман: «Нын мӑнэм Турәм Куща пеԓа тŏрԓы уԓты верэм йӑнайа ԓўӈәтсәԓԓән ки, ма хотэма ԓŏӈаты пӑ ма хŏщайэм уԓаты». Пӑ мўӈев эвԓәптәсԓы.

16 Щиты ус, хун мўӈ пойәкщәты тӑхайа мӑнмевән, и митнэ пиԓән уйтатсув, ԓўв кўԉ сŏхән катәԓман уса, аԉисыты щирәԓ хўват ԓўв кущайԓаԓа ар ŏх йŏхтәптыйәс.

17 Павел йўпийән пӑ мўӈ йўпевән шушман, ԓўв ўвәс, пŏтәртман: «Тӑм хŏйатәт – Нўм Турма рупитты йохәт, мўӈева нŏх пайтәсты йуш аԉԓәт».

18 Щиты ԓўв ар хӑтәԓ верыԓыйәс. Павел, ԉикащман, кўԉ сŏх пеԓа карэмәс пӑ йастәс: «Иисус Христос нэмән нӑӈен ԓўв ԓыпеԓ эԓты ким этты партԓэм». Пӑ атәм ԓыԓ ищи кумат ким этәс.

19 Щиӈәԋща ԓўв кущайԓаԓ, ваттэԓән, ԓыв ŏх йиты тӑхайэԓ хŏԓас, Павел пӑ Сила ԋӑрэмәсайӈән пӑ мир кущайәт хŏща вош хӑрыйа хŏрӈәԓтсайӈән.

20 Щӑԓта, ԓынан рим кущайӈән хŏща тўвман, йастәсәт: «Тӑм хŏйатӈән, иудейәта уԓман, мўӈ вошев уԓәпса ԓыԓԓәты щир этәԓтәԓтән

21 пӑ щимәщ щирәт эԓты пŏтәртԓәтән, мўй мўӈева, Рим хŏйатәта, вана ўты пӑ верты ӑт мосәԓ».

22 Мир ищиты ԓын пеԓайән эԓԓәс, рим кущайӈән пӑ ԓын эԓтайән сŏхԓән хŏԓт мӑшман йўпийән, ԓынан йўхән сэкты партсәԓән

23 пӑ ԓын, артан йўхән кўтәртыйәмӈән йўпийән, касна хота вŏщкисайӈән, касна хот шавиты хŏйата такан шавиты партсайӈән.

24 Щимәщ партәпса йоша павәтмаԓ йўпийән, ԓўв ԓынан ԓыпи касна хот йӑта вŏщкәсԓы пӑ ԓын кўрԓән йўх сэсыйа сэксәԓы.

25 Ат кўтәп кемән Павел пӑ Сила, пойәкщәман, Турәм, арыман, ишәксәԓән; касна хота питәм ŏтәт пӑ ԓынан хуԓәтсәт.

26 Шӑмкап мўв такан тӑриты питәс, щиӈәԋща касна хот пӑты ԋŏхԓәс; и щишән овәт хŏԓыйэ пелки пўншатсәт, пӑ хŏԓыйэ хŏйатәт хŏща сэсэт лыԋа йисәт.

27 Касна хот шавиты хŏйат пӑ, нŏх верԓәмаԓән, касна хот овәт пелки пуншәм шийаԓәмаԓ кемән, аԓты кешеԓ ким лакемәсԓы пӑ ԓўвеԓ ԓўв пӑратты ўтщисԓы, ԓўв нумәсәԓ, опсәм хŏйатәт хŏнтасәт.

28 Туп Павел сыйәӈ тўрән такан йастәс, пŏтәртман: «Нӑӈена нэмәԓтты атәм аԓ вера, мўӈ хŏԓ тӑта уԓԓув».

29 Ԓўв тўт такан вохәс, касна хот ԓыпийа хухәԓмәс пӑ тӑриман Павел пӑ Сила хŏща керәптыйәс,

30 пӑ, ԓынан ким этәԓтәман, йастәс: «Ма кущайӈәԓам! Мўй мӑнэм верты мосәԓ, нŏх пайтәсты урәӈән?»

31 Ԓын пӑ йастәсӈән: «Турәм Куща Иисус Христоса эвԓа, пӑ нӑӈ нŏх пайәтԓайән, нӑӈ хот тэԓэн па».

32 Щӑԓта Турәм Куща йасәӈ ԓўвеԓа пӑ хŏԓ, ԓўв хотәԓән уԓәм ŏтәта, пŏтәртса.

33 Пӑ ԓўв, ԓынан атәԓән ўймаԓ кемән, ԓын ԋўләмԓән нŏх ԉŏхәтсәԓы пӑ ищи мŏхты ԓўв йиӈка ԓŏӈәԓтыса пӑ ԓўв хотәӈ мŏхиԓаԓ па.

34 Щӑԓта, ԓынан йŏхи хотәԓа тўвмаԓ йўпийән, ԓэты пӑсана вохсәԓы пӑ хŏт тэԓәԓ пиԓән амтәс, Турма эвәԓмаԓ урәӈән.

35 Хун пӑ хӑтԓа йис, рим кущайӈән вошәӈ мит йохӈән йастәты китсәтән: «Щи хŏйатӈән эсԓаԓән».

36 Касна хот шавиты хŏйат щит эԓты Павела такан йастәс: «Рим кущайӈән нынан эсәԓты партсәтән; щиӈәԋща, ин ким этатән пӑ йӑм нŏмәсән мӑнатән».

37 Туп Павел ԓын пеԓайәна йастәс: «Минэмән, Рим хŏйатӈән, сўт такԓы хŏԓ мир сурән сэксәԓән пӑ касна хота вŏщкәсԓән, ин пӑ хӑԋайән эсәԓԓаймән? Ӑнта, ты ат йŏхәтԓәтән пӑ минэмән ԓын ким ат этәԓтәԓԓән».

38 Вошәӈ мит йохӈән щи йасӈәт рим кущайӈәна йастәсԓән, пӑ щитӈән, Рим йŏха уԓты вер хуԓман кемән, хŏԓт пӑԓтәмәсӈән.

39 Щӑԓта, щи йŏхәтсәтән, ԓын пеԓайән пойкащсәтән пӑ, ким этәԓтәман йўпийән, вош эԓты ким мӑнты партсәԓән.

40 Ԓын пӑ, касна хот эԓты ким этман йўпийән, Лидия хŏща йŏхәтсәӈән пӑ, хӑнам йохԓән шийаԓәман кемән, ԓывиԓаԓ утәԓтәсԓән, пӑ йэԓԓы мӑтсәӈән.