1 Амфиполь пӑ Аполлония мŏхты мӑнман, ԓын Фессалоника воша йŏхәтсәтән, хŏта иудейәт пойәкщәты хот ус.

2 Павел, ԓўв уԓԓытаԓ щирәԓән, ԓыв хŏщайэԓа ԓŏӈәс пӑ хуԓәм шаббат хӑтәԓ и йўпийән Йэмәӈ Нэпек эԓты ԓыв пиԓԓаԓән пŏтәртәс,

3 ԓывиԓаԓа аԉиԓыман пӑ тŏрԓы йастәман, Христоса сŏрма питты пӑ нŏх ԓыԓәӈԓәты мосәс, пӑ йастәс: «Тӑм Христос - щит Иисус, Хŏй эԓты ма нынана пŏтәртԓәм».

4 Щӑԓта ԓыв эԓтыԓаԓ тухәԓԓаԓ эвәԓсәт пӑ Павел пӑ Сила пеԓа пайтәссәт, хŏты грекәт эԓты, Турәм пеԓа сӑмәӈ хŏйат щи арат ар, и щиты пӑ ԓӑтәӈа уԓты нэӈәт эԓты йӑм арат.

5 Туп ӑт эвԓәм иудейәт, шек нŏмәсән ԉикащман пӑ вош хӑри эԓты тухәԓ ӑт рӑхты хŏйатәт ўйман, похла ӑктәщсәт пӑ вош нŏх ԋŏхаԓтты питсэԓ пӑ, Иасон хот ԉэпа ӑратмеԓ кемән, ԓынан, мир хŏща ким туты урәӈән, кӑшсэԓ.

6 Ԓынан ӑт уйәтмеԓ йўпийән, ԓыв Иасон пӑ па эвәԓты хӑнам йох вош кущайәт хŏща хипԉәԓтсәԓаԓ, ўвман: «Тӑм мўв ԓŏватән уԓәпса шўкатты ŏтәт ты па йŏхәтсәт,

7 Иасон пӑ ԓывиԓаԓ вана ўсԓы, пӑ хŏԓыйэ ԓыв, па Ŏт, Иисус, хона тӑйман, кесарь партты щира ӑт уԓԓәт».

8 Щиӈәԋща щит хуԓәм мир пӑ вошәӈ кущайәт хурэпа пайәтсәԓаԓ.

9 Туп тӑмет, Иасон пӑ па ŏтәт эԓты тын ўйман, ԓывиԓаԓ эсәԓсәԓаԓ.

10 Хӑнам йохәт пӑ ищи мŏхты атәԓән Павел пӑ Сила Верия воша китсэԓ, хŏԓта ԓын йŏхәтман кемән, иудейәт пойәкщәты хота мӑтсәӈән.

11 Тӑта уԓты ŏтәт Фессалоника мŏхет эԓты йӑм нŏпсәӈшәкәт: ԓыв йасәӈ хŏԓ сӑмәӈа вана ўсэԓ, кашәӈ хӑтәԓ Йэмәӈ Нэпек ԓэрапман, тӑми а мўй тŏрԓы щиты.

12 Щӑԓта ԓыв эԓтыԓаԓ ар хŏйат эвԓәс, пӑ грек ԓӑтәӈ нэӈәт эԓты пӑ йох эԓты йӑм арат.

13 Туп хун Фессалоника иудейәт мŏштәсэԓ, Верия хŏща па Павелән Турәм йасәӈ туса, ԓыв щи па йŏхәтсәт пӑ мир нŏх кўрәтты пӑ нŏх ԋŏхаԓты питсэԓ.

14 Щишән хӑнам йох ищи мŏхты Павел китсэԓ, щарәс пеԓа шушты щира; Сила пӑ Тимофей щи вошән хӑщсәтән.

15 Павела мӑнты ԋотәм ŏтәт ԓўвеԓ Афины вош унты ԋŏтсэԓ. Ԓыв, Силайа пӑ Тимофейа мийәм партәпса йоша павәтмеԓ кемән, мӑтты ԓын сорашәк ԓўв хŏщайәԓ ат йŏхәтсәӈән, йŏхԓы мӑтсәт.

16 Павел мӑнты пиԓӈәԓаԓ ԓавәԓтаԓ эԓты Афины вош хуват шушиԓыйәс пӑ, тӑм вош тэԓыйэ ԓух тӑйтаԓ урәӈән, ԓўв нŏпсәԓ ўшмащәс.

17 Щиӈәԋща, ԓўв иудейәт пойәкщәты хотән иудейәт пиԓән пӑ Турәм сӑмәӈа тӑйты грек йох пиԓән, пӑ кашәӈ хӑтәԓ вош хӑрийән уйтантыԓыты хŏйатәт пиԓән нумәссәс.

18 Ԓўв пиԓәԓән тухәԓ эпикур пӑ стоик ашкуԓайәт эԓты уԓты нŏпсәӈ йох пŏтрэмәты питыԓысәт. Итԓаԓ иԋщәссәт: «Мўй пӑ щи авашты ŏт йастәты ԓӑӈхаԓ?», па ŏтәт пӑ: «Иԓампа, ԓўв па мўв хŏйатәт ԓуӈхәт эԓты утәԓтәԓ», ԓўв ԓывиԓаԓа Иисус пӑ нŏх ԓыԓәӈԓәты вер эԓты Йӑм Айкеԓ тус, щишән.

19 Щӑԓта, ԓўвеԓ пӑтән ўйман, Ареопаг нэмпи тӑхайа* 17:19 Ареопаг нэмпи тӑха - словарьән ванты; тусэԓ пӑ йастәԓәт: «Мўӈ а мўй верәтԓэв уйәтты, мўй щит щимәщ йӑԓәп утәԓтәпса, мўй эԓты нӑӈ пŏтәртсән?

20 Нӑӈ мŏԓты ŏшԓы-уйтԓы ŏт мўӈ паԓԓува хуԓмәԓтԓән. Щишән мўӈ уйәтты ԓӑӈхаԓув, мўй щит?»

21 Афины мŏхет пӑ хŏԓ пӑ ԓўв хŏщайэԓ уԓты па мўв хŏйатәт нэмәԓты щирән пŏрайэԓ ӑт хӑщәптыԓысәт, туп щиты, мŏԓты йӑԓәп вер эԓты ат хуԓәтса пӑ ат пŏтәртса.

22 Щӑԓта, Павел Ареопаг кўтпа ԓойман, йастәс: «Афины хŏйатәт! Ма иса ваттэмән, нын ԓўӈхәт эԓты нумәсты вер шек такан тӑйԓәԓән.

23 Нын йэмәӈ лотԓән вантыман йӑхман, ма и йирасты лот уйәтсәм, хŏта хӑшман уса: 'Ӑт уйәтты Турма'. Тӑман-щи, Хŏйтан нын, ӑт уйәтман, такан нумԓәԓән, ма нынана такан айәԓԓэм.

24 Турәм, уԓты-омәсты мир тыйәԓтәм Ŏт, Ԓўв, опәԉән пӑ мўвән Турәм Кущайа уԓман, ӑнта йошән верәм хотәтән уԓ

25 пӑ хŏйат йошән верты верәт ӑт вохәԓ, ищи мӑтты Ԓўвеԓ мŏԓты мосәԓ, Ԓўв кашәӈ ŏта уԓәпса пӑ ԓыԓ, пӑ мўй иса мӑԓ.

26 И кӑԓы эԓты Ԓўв аратәԓ хŏйат рут тыйәԓтәс, иса мўв ԓŏватән уԓты урәӈән, хŏта Ԓўв хŏԓ хŏйат рутәта мŏрт пŏра пӑ мŏрт уԓты тӑха ԓэщатәс.

27 Ԓыв Турәм ат кӑшсәт, Ԓўв уԓты щащәԓ ат мŏштәсәт пӑ Ԓўвеԓ ат уйәтсэԓ - щи кўш Ԓўв кашәӈ ŏтԓув пўӈәԓән ванән уԓ,

28 щиты ӑт уԓ, мўӈ Ԓўвеԓән уԓԓув пӑ ԋŏхаԓув, хŏты тухәԓ нын арәт верты мŏхиԓән пŏтәртысәт: 'Мўӈ Ԓўв пиԓәԓән и рут'.

29 Щиӈәԋща, Турәм рута уԓман, мўӈев щиты нумәсты ӑт мосәԓ, мӑтты Турәм сорԋи, мўй пӑ щелŏх, мўй пӑ хŏйат нŏмәс хўват хŏрасән верәм кев хŏрпи.

30 Щиӈәԋща, Турәм йӑна вер ӑт уйтәм пŏра хӑйман, Турәм ин хŏйатәта хŏԓ кашәӈ тӑхайән кӑрэк эԓты шӑнша керԓәты партәԓ,

31 Ԓўв хӑтәԓ ԓэщатәс, щишән, хун уԓты-омәсты турәм вещката сўтәтты питԓәԓы, Ԓўв щи кеша пŏнәм Хŏйатәԓ сӑхат, пӑрәм эԓты Ԓўвеԓ нŏх ԓыԓӈатман, мира иса, уйәтты урәӈән, ваттәԓтәсԓы».

32 Пӑрәм эԓты нŏх ԓыԓӈатәм вер хуԓмеԓ кемән, итԓаԓ ӑԓ хўләщсәт, киметԓаԓ пӑ йастәсәт: «Тӑм эԓты нӑӈен па ишән хуԓәтԓэв».

33 Щиӈәԋща, Павел ԓыв эԓтыԓаԓ мӑнәс.

34 Тухәԓ йох пӑ, ԓўв хŏщайәԓа рӑхәԓтысәт пӑ эвәԓсәт; ԓыв кўтэԓән Дионисий Ареопаг ху† 17:34 Ареопаг ху - сут йохәт эԓты ит; , Дамарь нэмпи нэ пӑ ԓыв пиԓԓаԓән па мŏхет усәт.