1 Talu hari imbah Nabi Isa wapat, yaitu hari Ahad, baisukan banar, bubuhan babinian tulakan mambawa rarampahan handak manjarahi kuburan Nabi Isa. 2 Tapi, bubuhannya mandapati batu panutup kuburan* 24:2 Batu panutup dipakai ulih juriat Nabi Ibrahaim sakira mayat kada dicuntan urang atawa diganggu binatang. sudah taguling. 3 Pas bubuhannya masuk ka dalam guha kuburan tadi, sakalinya mayat Nabi Isa kadada lagi. 4 Rahatan bubuhannya taungut kahilangan mayat Nabi Isa, bakakajutan badiri dua ikung lalakian di parak bubuhannya. Baju kaduduanya mancarunung banar. 5 Lantaran katakutanan, bubuhan babinian tadi basujut.

“Kanapa maka bubuhan ikam mancari urang hidup di wadah urang mati?” ujar dua ikung lalakian tadi batakun. 6 “Sidin kadada lagi disini. Sidin sudah hidup pulang. Ingatakan ja pandiran Nabi Isa wayah Sidin masih takumpul wan bubuhan ikam di banua Galilea: 7 ‘Nang datang matan surga, cagaran disarahakan ka urang Roma, lalu dimatiꞌi di kayu bapalang. Tagal talu hari imbah dimatiꞌi, Sidin cagaran hidup pulang’ ” ujar lalakian nang bajunya mancarunung banar. 8 Lalu taingat ai bubuhan babinian wan pandiran Nabi Isa nang samalam tu. 9 Lalu babulik bubuhannya ka Yarusalem gasan mangisahakan samunyaan kajadian tadi lawan sabalas pangikut Nabi Isa wan pangikut pangikut Nabi Isa nang lain nang sudah takumpul di situ. 10 Babinian tadi nang mangisahakan habar tadi adalah Maryam Magdalena, Yuhana, Maryam nang umanya Yakub wan babinian lain nang taumpat jua. 11 Tapi bubuhan pangikut sidin nang mandangar kisah tadi kada parcaya. Dianggap omong kosong haja. 12 Biar nang kaya itu, Petrus badadas bangun lalu tulak bukah ka kuburan. Wayah inya babungkuk, inya bajinguk ka dalam. Tapi kain kafan haja nang talihat di situ. Hiran banar Petrus lalu bulik batakun dalam hati napa nang tajadi.

36 Wayah itu bubuhan pangikut Sidin lagi bapapandiran, sakalinya bakakajutan Nabi Isa badiri di tangah tangah bubuhannya.

“Assalamu alaikum” ujar Sidin sambil manyapa bubuhannya.

37 Bubuhannya kabuliangan sualnya dikira bubuhannya hantu nang bapandir tadi.

38 “Kanapa maka bubuhan ikam gair? Kanapa jua maka bubuhan ikam masih ragu-ragu amun aku sudah hidup pulang?” ujar Nabi Isa batakun. 39 “Ini nah Aku! Itihi ja bakas luka paku di tanganKu wan di batisKu. Japai ja nyaman bubuhan ikam parcaya. Amun hantu, kada badaging wan kada batulang nang kaya Aku ni!” ujar Sidin majalasakan pulang.

40 Wayah bapandir, Sidin manampaiakan tangan wan batis supaya kawa bubuhannya lihat. 41 Wayah itu bubuhannya baluman parcaya lantaran kahimungan wan kahiranan.

“Adalah baisian makanan di sini?” ujar Nabi Isa batakun ka bubuhannya. 42 Lalu dijulung sahiris iwak basanga. 43 Nabi Isa maambilnya lalu dimakannya di hadapan bubuhannya.

44 “Sabaluman Aku dimatiꞌi, sudah kupadahakan lawan bubuhan ikam hal hal nang tatulis tantang Aku dalam Kitab Suci Taurat, Kitab Suci Zabur, wan kitab nabi-nabi. Nah, samunyaan hal nang itu musti tajadi” ujar Nabi Isa manjalasakan. 45 Lalu isi kitab kitab tadi dijalasakan Sidin wan bubuhan pangikut Sidin sakira bubuhannya bujur bujur paham artinya. 46 Nabi Isa mangiau bubuhannya sakira mandangar, “Nang kaya tatulis dalam Kitab Suci, Al Masih tu musti mati. Tagal talu hari imbah dimatiꞌi, Al Masih tu cagaran hidup pulang. 47 Habar nang ini musti dihabarakan ka samunyaan suku suku: Amun urang batobat, baiman lawan Aku, inya cagaran diampuni dusanya wan cagaran dilapasakan matan hukuman dusanya lantaran napa nang sudah Kujalani. 48 Bubuhan ikam sudah manyaksiakan amun Aku disiksa wan dimatiꞌi tagal sudah hidup pulang. Makanya bubuhan ikam kusuruh mahabarakan nang ini. 49 Kaina cagar Kuutus Ruh Allah nang dijanjiakan Allah gasan bubuhan ikam. Maka hadangi ja di kuta Yarusalem sampai bubuhan ikam manarima kuasa Ruh Allah tu” ujar Nabi Isa manambahi. 50 Lalu Nabi Isa mambawa bubuhan pangikut Sidin matan kuta Yarusalem ka banua parak kuta Betani. Pas sampai di situ, Sidin maangkat kadua tangan gasan mambarkahi bubuhannya. 51 Rahatan Sidin mambarkahi bubuhannya, Sidin diangkat ka surga lalu tapisah wan bubuhannya. 52 Bubuhannya basujut manyambah Sidin lantaran kahimungan, lalu bulikan ka Yarusalem. 53 Lalu saban hari bubuhannya mamuji Allah di Bait Allah.