13 Imbah itu, Hupnor Pilatus mangumpulakan imam imam kapala, pamimpin pamimpin bangsa, wan rakyat lalu bacaramah. 14 “Bubuhan ikam mambawa urang ini ka aku wan baucap bahwa urang nang ini manyasatakan urang. Wayah ini, hanyar inya kupariksa dihadapan bubuhan ikam. Tapi kadada alasan Aku gasan mahukum Inya. 15 Kaya itu jua pandapat Hirudis sualnya inya gin mangirimnya bulik ka mari. Ingatakan ja, urang nang ini kada pantas amun dihukum mati. 16 Jadi, inya kucambuk haja. Lalu, kulapas” ujar Pilatus manjalasakan. 17 Satiap tahun, wayah hari raya Paskah, Hupnor Pilatus biasanya malapasakan saikung tahanan gasan bubuhan juriat Nabi Ibrahim. 18 Urang banyak sudah bakumpulan di situ.

“Matiꞌi ja inya. Lapasakan si Barabas gasan kami!” ujar bubuhannya bakakarasan. 19 Barabas sudah dipanjaraakan lantaran inya sudah mambunuh urang wan inya sudah maulah tumbur di kuta.

20 “Urang nang ini kada basalah,” ujar Pilatus baucap sakira sidin kawa malapas Nabi Isa. 21 “Matiꞌi ja inya di kayu bapalang! Matiꞌi ja inya di kayu bapalang!” ujar bubuhannya bakuciakan.

22 “Napa garang kasalahan inya?” ujar Pilatus batakun, “Urang nang ini kada pantas amun dihukum mati. Jadi, inya kucambuk haja. Lalu, kulapas.”

23 Tagal bubuhannya bakuciakan pulang sing nyaringan mamaksa Pilatus sakira mahukum mati Nabi Isa. Kaputingannya kahandak bubuhannya nang manang. 24 Jadi Pilatus mamutusakan gasan manulusakan kahandak bubuhannya tadi, gasan mahukum mati Nabi Isa wan 25 malapasakan si Barabas nang dipanjaraakan lantaran mambaruntak wan mambunuh urang. Imbah itu, Nabi Isa disarahakan ka anak buah Pilatus gasan dimatiꞌi.

26 Wayah Nabi Isa dihirit gasan dimatiꞌi, prajurit prajurit malihat Simun, urang Kirene, nang hanyar handak masuk kuta. Simun ditahan lalu disuruh manyahan kayu bapalang tu di bahunya sambil bajalan mairingi Nabi Isa. 27 Banyak banar urang nang umpat mairingi Nabi Isa tamasuk babarapa ikung babinian. Babinian-babinian nang itu manangisi wan maratapi Sidin. 28 Nabi Isa manulih ka bubuhannya wan baucap, “Babinian Yarusalem. Aku kada usah ditangisi. Tagal tangisi ja diri ikam wan kakanakan ikam, 29 lantaran kaina urang cagar baucap, ‘Bauntunglah babinian-babinian nang kada suah batianan, wan nang kada suah baranak wan nang kada suah manyusui anak!’ 30 Wayah itu, urang cagaran baucap lawan gunung-gunung ‘Runtuhlah, tindihi ja kami’ wan lawan bukit-bukit, ‘Timbuni ja kami!’* 23:30 Wayah itu urang cagar bapandir kaya itu lantaran kamatian cagar dianggap labih baik pada pandaritaan nang itu. 31 Sualnya amun urang nang saleh gin marasai hukuman Allah, maginnya ai urang nang badusa.”† 23:31 Teks asli: Sabab amun tahadap kayu nang masih hidup, urang sudah baulah kayaini, napa lagi nang pacang diulah bubuhannya tahadap kayu nang sudah karing!

32 Ada dua ikung urang lain nang dihirit baimbai lawan Nabi Isa gasan dimatiꞌi jua. Kaduduanya panjahat. 33 Pas sampai di bukit nang bangaran Tangkurak, tangan wan batis Nabi Isa dipakui di kayu bapalang. Dua ikung panjahat tadi dipakui jua. Saikung di subalah kanan Nabi Isa. Saikungnya lagi disubalah kiwa. 34 “Abah, ampuni bubuhan nang mamatiꞌi Ulun ni. Sualnya bubuhannya kada tahu napa nang dilakuakannya” ujar Nabi Isa badoa. 35 Urang nang banyak tu badiri wan manyaksiakan samunyaan kajadiannya. Sadangkan pamimpin-pamimpin agama mahuhuluti Sidin sambil baucap:

“Urang lain Inya salamatakan. Amun inya bujur bujur Al Masih matan Allah artinya nang dipilih Allah, biar haja inya manyalamatakan dirinya saurang.” 36 Prajurit-prajurit gin mahuhuluti Sidin. Banyu anggur asam ditawari ka Nabi Isa. 37 “Amun ikam Raja bubuhan Yahudi salamatakan diri ikam!” ujar bubuhan prajurit tadi.

38 Di bagian atas tihang kayu bapalang nang itu diandak tulisan nang ini: “Inilah Raja bubuhan juriat Nabi Ibrahim.”

39 “Amun ikam tu Al Masih, salamatakan pang diri ikam saurang wan kami” ujar panjahat nang di subalah Nabi Isa mahuluti.

40 Tapi panjahat nang saikungnya managur. “Ikam tu dihukum mati” ujarnya. “Ikam kada takutankah lawan Allah? 41 Amun kita ni, pantas haja dihukum mati lantaran kita ni bujur bujur basalah. Tapi Sidin ini kada basalah. Sidin saharusnya kada dihukum mati nang kaya kita ni” ujarnya pulang manjalasakan. 42 “Nabi Isa, ganang ulun lah, wayah Pian datang bakuasa kaina” ujarnya wan Nabi Isa. 43 “Sabujurnya hari ini jua, ikam cagar ada di Firdaus lawan Aku” ujar Nabi Isa manyahut.

44 Wayah itu, kira kira pukul dua balas siang, harinya talihat bakakajutan kadap di saluruh banua tu sampai pukul tiga kamarian. 45 Sualnya matahari kada bacahaya. Lalu kain pahalat Bait Allah tabalah dua.‡ 23:45 Kain pahalat bait Allah manggambarakan tapisahnya urang biasa matan hadirat Tuhan. Wayah kainnya tabalah, artinya urang biasa kada tapisah lagi matan hadirat Tuhan.

46 “Abah, lawan Pian Ulun sarahakan panyawaan Ulun” ujar Nabi Isa sambil badoa lawan suara nyaring.

Imbah itu, Sidin langsung wapat. 47 Wayah malihat kajadian nang itu tadi, kapala prajurit nang ada di situ mamuji Allah.

“Dasar bujur urang nang ini urang nang saleh” ujarnya. 48 Imbah malihat wapatnya Nabi Isa, urang banyak nang bakumpulan di situ bulikan wan basadih banar. 49 Tapi samunyaan kakawalan Nabi Isa, tamasuk babinian-babinian nang maumpati Sidin matan banua Galilea, badiri jauh manyaksiakan samunyaan paristiwa paristiwa nang itu.

50 Wayah itu ada saikung urang matan kuta Arimitia di banua Yudea. Ngarannya Yusup. Sidin tu urang nang saleh wan takwa. 51 Sidin lagi mahadangi kadatangan karajaan Allah. Biar sidin angguta Makamah Agama, sidin kada akur lawan kaputusan Makamah tu gasan mahukum mati Nabi Isa. 52 Jadi sidin mainta ijin lawan Pilatus gasan mangubur mayat Nabi Isa. Imbah itu, diijinakannya ai. 53 Lalu, Yusup lawan anak buahnya manurunakan mayat Nabi Isa matan kayu bapalang. Imbah itu, mayat Nabi Isa dikafaninya nang kaya adat juriat Nabi Ibrahim, lalu dirabahakan ka dalam guha batu ulahan nang ditabuk gasan kuburan. Urang lain kada suah dikuburakan di sana. 54 Hari itu tamasuk hari parsiapan sualnya hari Sabat (hari istirahat wan sambahyang gasan juriat Nabi Ibrahim) sudah parak. 55 Babinian-babinian nang datang baimbai lawan Nabi Isa matan banua Galilea, umpat jua lawan Yusup, lalu malihat kuburan Nabi Isa. Bubuhanya malihat jua kaya apa mayat Nabi Isa diandak didalam kubur. 56 Imbah itu bubuhanya bulikan lalu manyiapakan rarampahan wan banyu wangi gasan maminyaki mayat Nabi Isa.

Pas tuntung basiap-siap gasan hari Sabat, bubuhannya istirahat lantaran manaati hukum agama.