4
Mmamiphe kachaa ree
1 Sụ-a; ụnwu mu; unu
ngabẹkpodaru mu phọ nchị
g'unu angabẹjeru nna unu;
mẹ ọ -nọdu alọ unu ẹka
lẹ nchị.
Unu kpaa iphe lẹ nchị;
g'iphe edoje unu ẹnya.
2 Iphe, mu ezi unu bụ
ọkpobe mmamiphe.
Ọo ya bụ; unu te wokwaru
iya nmaa phulaphula.
3 Teke mu bụ nwokoro buru
l'ibe nna mu;
mbụ teke mu bụkwadu
ọgbo lanụ;
bya abụru nwa lanụ,
ne mu nwụtaru
4 bẹ nna mu ziru mu iphe
sụ mu:
“Gudekwa obu ngu g'ọ ha
gbakụa ẹka l'opfu-ọnu
mu!
Meje iphemiphe, mu sụru
g'i meje g'ịinodu ndzụ!
5 Makwarụ iphe;
g'iphe dojekwa ngu ẹnya!
Ta azọhajekwa opfu-ọnu mu;
ọphu i shikwa iya kpọo
gẹgege kpọfu!
6 Te ewokwaru mmamiphe
nmaa phulaphula;
ọo ya bụ g'ooleta ngu
ẹnya.
Yee ya obu; ọo ya bụ
g'oocheje ngu echeche
g'ọ tọ dụ iphe, e-me ngu nụ.
7 Ọo mmamiphe bụ ishi;
ọo ya bụ g'ị chọo
mmamiphe!
Obetakpọo o je ephu ngu
gụnu;
ta ahakwa achọ
nkwamẹnya!
8 Kutsee ya; g'ọopalia
ngu ephekerephe!
Nma iya akpa;
g'ọokwabeje ngu ùbvù!
9 Oo-woru okpulishi,
e-me g'ị dụ ùbvù l'ẹnya
kpube ngu;
bya eworu okpu-eze,
dụ akpabiri sẹe ngu l'ishi.”
10 Ngabẹkpodapho nchị
nwa mu; g'iphe,
mu epfu bahụkwa ngu
lẹ nchi;
g'eswe ndzụ ngu akabaa
igwerigwe!
11 Ọ kwa ụzo mmamiphe bẹ mu
ziru ngu.
Ọ bụru gbororo, pfụru
nhamụnha bẹ mu duru
ngu shia;
12 K'ọphu bụ ị -nọdu eje ije;
ọ tọ dụdu iphe,
akpọshi ngu ahata ọkpa.
Teke ịigba ọso;
ụpfu ta adụdu ngu l'ọkpa.
13 Gudeshia ahụ̀hù, a hụ̀ru ngu
ike; ba hakwa iya
g'ọ gbala!
Letakwa iya ẹnya ree;
kẹle ọ kwa iya bụ ndzụ,
ị dzụ.
14 Ta atụkwa ọkpa atụtu ophu
l'ụzo ndu ẹjo-iphe;
ọphu i shikwa ụzo ndu
eme ẹjo ememe.
15 Gbangoo ya; be shikwa iya
eshishi ophu.
Gbakụtaru ụzo ono azụ;
shia ụzo ọzo jeshia iphe,
iije.
16 Kẹle ẹphe te ekujedu
mgbẹnya;
m'ẹphe emedụru ẹjo-ememe;
ọphu mgbẹnya eshitajẹdu
phẹ ẹnya eshita ophu;
gbahaa l'ẹphe meadaru gẹ
nemadzụ daa.
17 Iphe, abụjeru nri phẹ bụ eme
ẹjo-iphe.
Mẹe, ẹphe angụje bụru eme
iphe-ike.
18 Ụzo, ndu pfụberekoto
etso adụje g'ìphóró
gẹregere ụtsu,
l'atọje nwẹhu abọhu gbiriri
jasụ nchi asafụ.
19 Obenu l'ụzo ndu ẹjo-iphe
adụje gẹ tsụkiribaa
ọchii;
k'ọphu bụ l'ẹphe ta amadụ
iphe,
ẹphe evukotajẹ daa iko.
20 Nwa mu; ngabẹkwa nchị
l'iphe, mu epfu.
Gbobe nchị egbobe
l'opfu-ọnu mu.
21 B'ekwekwa g'ẹphe lụfu ngu
l'iphu.
Dobe phẹ l'ime ọkpoma ngu.
22 Kẹle ẹphe bụ ndzụ l'ẹhu ndu
hụmaru phẹ nụ;
bya emeje g'ẹhu amadụ
l'ophu wekọrohu.
23 Ọphu kachakpọonu bụ g'i
cheje obu ngu nche;
kẹle ọo ya bụ ẹka ndzụ shi.
24 Tụkokpo iphe, gberu nggọ
wofukọta l'ọnu ngu.
G'ire ngu te epfujekwa opfu,
apfụduru nhamụnha.
25 G'ẹnya ngu dụkwa l'iphu.
Tabẹkpoepho ẹnya l'atatiphu
ngu nhamụnha
nhamụnha.
26 Lerwejeadakwa ẹnya l'ụzo
tẹme l'iitsojeru iya.
G'ụzo, ii-tsoru bụjekwaru
ọkpobe ụzo, shihuru ike.
27 Te etsokwaru ụzo ẹkutara;
ọphu i shikwa ẹkicha.
Wofutakwa ọkpa l'ẹjo ememe;
kwasẹekwarupho
nhamụnha.