5
Anma ọkwa eri ogori
1 Nwa mu; kwata ngabẹru
mmamiphe nkemu nchị.
Woru nchị pfube epfube
nụma opfu nkwamẹnya,
mu epfu anụ ngu;
2 k'ọphu ịi-maru eye ọnu l'o
rwuberu iya; tẹme opfu,
shi ngu l'ọnu egoshi l'ị
maru iphe.
3 Kẹle opfu, shi nwanyị,
eme ẹji l'ọnu bẹ anọduje
atsọ gẹ manụ-ẹnwu;
mbụ l'ọokwo tẹretere
gẹ manụ-ụrwazi.
4 Ọle o -rwuẹpho l'ikpazụ
iya l'ọ tsọahaa g'age;
tsụahaa nkọ g'ogu,
atsụ nkọ iphu labọ.
5 Onye tsoru iya nụ laakwaru
maa.
Ụzo iya edubajẹ nemadzụ
l'ilu.
6 Ọ tọo kpajẹdu ishi etsoru
ụzo ndzụ.
Ụzo iya l'ophu dụkotaepho
nggọdogo nggọdogo;
ọphu ọ madụ.
7 Noo g'o gude mu sụ unubẹ
ụnwu mu g'unu
ngabẹru mu nchị.
G'ọ tọ dụkwa teke unu a-ha iphe,
mu pfuru meahaa ọzo.
8 G'ụzo, ịi-nọdu eshi bụkwaru
ụzo, nọ iya ụzenya.
B'e shiswetakwa ụzo
ọnu-mgbo ụlo ibe iya;
9 a -nọnyaa i woru ùbvù,
rwuberu ngu nụ haarụ
ndu ọzo;
bya eworu ndzụ ngu
tọgboru onye enwedu
obu-imemini;
10 mbụ a -nọnyaa ndiphe
bya ebvukaa ẹku ngu;
ọo ya bụ; akanya,
i seru awụru laa ibe onye
ọzo.
11 Tẹme ndzụ ngu bvụjeepho l'ị
tsụahaa ude;
mbụ teke akpọ-ẹhu ngu
mẹ ogwẹhu ngu
a-gbajọshihukota.
12 Noo teke ịi-sụ: “?Dẹnuanu
g'o gude e shi alọ mu ẹka
lẹ nchị;
ọphu mu agụbejedu
iya iphe;
mbụ e shi abajẹru mu mba;
ọphu o rwujedu mu l'ẹhu?
13 Ndu ezi mu iphe bẹ mu
jịkaru lẹ mu te emedu iphe,
ẹphe shi ezi mu;
ọphu mu eshidu eyeje
ọnu yeru onye shi
akpọ-zijeru mu ụzo.
14 Nta-a bẹ mu abyawaa
abụru onye larụ l'iyi
l'edzudzu-ọha.”
15 Mbụ-a; gẹ nyee ngu bụru
ngu obvu-mini,
a-bụru nkengu kpoloko.
Mbụ mini, agba kẹ tọritori,
shi lẹ wẹlu,
ị tụru l'onwongu.
16 ?Dẹnu g'ii-shi parụ ọgba,
a nwụshiru ngu mini
haa g'ọ sọo gborogboro
lẹ gbororo?
?Mbụ parụ okpuru ngu
haa g'ọ sọru je adọru l'echi
edupfu?
17 Mee ya g'ọ bụru nkengu kẹ
nwẹkinyi ngu.
G'unu lẹ ndiphe ta
agbakwarụ iya mgba.
18 G'e kebekwa ẹnya ẹka iikuje
mini l'ọma!
G'ẹhu tsọkwa gụ lẹ nwanyị,
ị lụru l'okorọbya ụtso!
19 G'ọ dụkwa g'umoro-ẹnyimu,
ama ntụmatu.
G'ẹra iya mejekwa g'ẹhu tsọo
ngu ụtso.
Gẹ n-yemobu iya
sepyabẹjekwa ngu
l'unuphu.
20 ?Dẹnu g'ọ nwụru umere
nwanyị, eme ẹji anọduje
agba ngu igiri; nwa mu?
?Dẹnu g'o gude ọ bụru
ụtapfu nyee onye ọzo
bẹ ịinoduje arwaphu
onwongu?
21 Kẹle ụzo, onyemonye eshi
bẹ Chipfu makọtakwaru.
Tẹme ọ nọdu atụkojeepho
iphemiphe, oome egbu igo.
22 Ẹjo-ememe, onye ẹjo-iphe
eme l'anmajẹkwa iya
g'ọ́nyà; mbụ l'iphe-ẹji,
oome adụjekwa g'ụdo
kee ya kpụkpurukpu.
23 Ọ bụru iphe, e-gbu iya nụ bụ
ahụ̀hù, a hụ̀duru iya;
tẹme eswe eswe ono,
oome ono je eme iya l'ọ
bụru ọla-l'iswi.