10
Ẹtu, Sólomọnu nmashịru
1 Ndu ọwa-a bụ ẹtu,
Sólomọnu nmashịru:
Nwata maru iphe emejekwa
g'ẹhu tsọo nna,
nwụru iya nụ ụtso.
Obenu lẹ nwa, eme eswe
bụ aphụ tsọru ne iya.
2 Ẹku, a kparụ ẹjo akpakpa
ta adụkwa urwu, ọ barụ.
Obenu l'apfụbekoto adzọtaje
nemadzụ l'ẹka ọnwu.
3 Chipfu ta ahajẹkwa onye
pfụberekoto g'ẹgu
mee ya.
Obenu l'onye ẹjo-iphe bẹ
o to kwejedu g'iphe,
agụ iya nụ rwube iya ẹka.
4 Eme ẹnyiru emejekwa amadụ
g'ọ daa ụkpa.
Obenu l'ẹka e gude ese
akanya emeje g'a baa
ụba.
5 Onye kpatarụ iphe, ọ kọru
dokọbe edokọbe l'ọnanwu
bụ onye kwarụ ẹnya.
Obenu l'onye anọduje eku
mgbẹnya teke eemeta iphe,
e meberu l'alị bụkwa
onye-eswe bẹ ọ bụ.
6 Ọnu-ọma bụ okpu-eze,
onye pfụberekoto kpu
l'ishi.
Obenu l'iphe, jiru ọnu
onye ẹjo-iphe bụ eme
nemadzụ mkpawere.
7 Anyata, a nyatarụ onye
pfụberekoto abụjeru
onye nyatarụ iya nụ
iphe-ekweru.
Obenu l'ẹpha onye ẹjo-iphe
a-chịhu.
8 Onye maru iphe l'ime obu
iya emeje iphe, a sụru g'e meje.
Obenu l'onye epfu
jogojogojogo alajẹ l'iyi.
9 Onye ụta adụdu lẹ ndzụ iya
bẹ obu shihuru ike.
Obenu l'onye eshi ụzo,
dụ nggọdogo nggọdogo
bẹ ee-mechanụ-a hụma.
10 Onye ebvu ẹnya ẹhuka ẹhuka
bụ aphụ bẹ ọokpatsu.
Tẹme onye epfu jogojogojogo
nọdu alajẹ l'iyi.
11 Ọnu onye pfụberekoto bụ ishi
nggele mini ndzụ.
Obenu l'iphe, jiru ọnu
onye ẹjo-iphe bụ
iphe-kpangangaa.
12 Ndụmashi akpatsu esemopfu.
Obenu lẹ n-yemobu
ekpuchije iphe-ẹji g'ọ ha.
13 Ọnu onye iphe edoje ẹnya
bụ mmamiphe eshije
iya afụshi.
Obenu l'onye enwedu
egomunggo bụ
ẹchachi nọ swiru iya.
14 Ndu mmamiphe bẹ ewojeru
iphe, ẹphe maru kwakọbe.
Obenu l'ọnu ndu eswe bụ
ọla-l'iswi bẹ ẹphe anọduje
eku oku.
15 Ụba onye nweru iphe bụ
mkpụkpu, ọ kpụru
kpụshia ya ike.
Ụkpa bụkwanuru iya
emebyishije onye enwedu
iphe.
16 Ụgwo ozi, aapfụ onye
pfụberekoto emeje gẹ
ndzụ dụ iya.
Obenu l'okpoga, onye
ẹjo-iphe akpata bẹ emeje g'o
mee iphe-ẹji.
17 Onye angabẹje nchị lẹ mba,
aabarụ iya bụkwa ụzo ndzụ
bẹ ooshi.
Obenu l'onye abụjeru;
a -nọdu ahụ̀ iya ahụ̀hù
l'ọ dụ iya ashị
l'edusweshije ndu ọzo
ụzo.
18 Onye domiru ndụmashi
l'obu bẹ adzụ ụka dụ
l'ogbogboromọnu.
Tẹme onye asụ asụlasu
bụru onye-eswe.
19 Opfu -paa igwerigwe bẹ
iphe-ẹji haakwaru bahụ iya.
Obenu l'onye adụje ike sede
ire iya bẹ kwarụ ẹnya.
20 Ire onye pfụberekoto bụ
ọkpobe mkpọla-ọchaa.
Obenu l'iphe, shi l'obu onye
ẹjo-iphe ta adụdu urwu,
ọ kwatarụ baa.
21 Olu-opfu onye pfụberekoto
azụjije ndu dụ
igwerigwe ẹpho.
Obenu lẹ ndu eswe anwụhuje
lẹ b'enwe egomunggo.
22 Ọnu-ọma kẹ Chipfu l'emeje g'e
nweru iphe.
Ọphu ọ dụdu iphe-ẹhuka,
ooyeje iya.
23 Onye eswe bụ iphe,
adụje iya ree bụ
ẹjo-ememe.
Obenu l'onye iphe edoje
ẹnya bụ iphe,
adụje iya ree bụ mmamiphe.
24 Iphe, onye ẹjo-iphe atsụ
ebvu; a -nọnyaa o mee ya;
e-mekọta iya kpamu.
Iphe, agụkwanu onye
pfụberekoto g'e meeru
iya bẹ ee-mekọtaru iya.
25 Ọo gẹ oke-phẹrephere
ezije tuutuutuu zighata-a
bụ g'onye ẹjo-iphe
achịhuje.
Obenu l'onye pfụberekoto
eshihuje dụngudungu
jasụ l'ojejoje.
26 Ọo gẹ mẹe-venịga adụje
l'eze-a; mbụ g'ẹnwuru-ọku
adụje l'ẹnya-a bụ g'onye
ẹnyiru adụje onye ezi
iya ozi.
27 Atsụ Chipfu ebvu akpọriberu
ndzụ.
Obenu lẹ ndzụ onye
ẹjo-iphe bẹ eegbuje
mkpirikpu.
28 Iphe, onye pfụberekoto
ele ẹnya iya bụ ẹhu-ụtso.
Obenu l'iphe, onye
ẹjo-iphe daru ngabẹru
emechajẹ bụru
iphe-mmanụ.
29 Eshi ụzo Chipfu bụ iphe,
edomije ndu pfụberekoto
bya abụkwanuru iphe,
etsupyashịje ndu emeje iphe,
adụdu ree.
30 Onye pfụberekoto bẹ a ta
abyakwa enwubata
enwubata.
Obenu lẹ ndu ẹjo-iphe tee
buduru l'alị ono.
31 Ọnu onye pfụberekoto bụ
iphe, eshije iya nụ bụ
mmamiphe.
Obenu l'ire, apfụduru-ọto
bẹ ee-mechaa sebufu.
32 Ọnu onye pfụberekoto maru
iphe, bụ: e -pfua ya l'ọ
dụ nhamụnha.
Obenu l'ọnu onye ẹjo-iphe
bụ iphe,
ọ maru kpoloko bụ iphe,
dụ nggọdogo
nggọdogo.