9
Mmamiphe eku oku;
emeswe nọdu eku
emeswe nọdu eku
1 Mmamiphe gbẹshiru je
eworu itso ẹsaa kpọbe gude
mee ụlo iya.
2 Ọ bya egbua anụ shia dobe
bya agwaa mẹe dobe;
bya eshia ite dobe;
3 bya ezia ụnwumgboko,
ejeru iya ozi;
ẹphe je apfụru eku oku.
Ẹka bụ ẹka kachaa l'eli lẹ
mkpụkpu bẹ ẹphe pfụru
eku oku sụ:
4 “G'iphe, bụkpoo ndu amazidu
iphe bata l'ụlo l'ẹka-a!”
O be lẹ ndu enwedu
egomunggo; ọ sụ phẹ:
5 “Unu bya eria nri,
mu shiru dobe; ngụa mẹe,
mu gwarụ dobe.
6 Unu haa b'e nwe egomunggo
ono bya anọdu ndzụ!
G'iphe dojenụ unu ẹnya!
7 Onye abarụ onye mgbọnu
mba bụkwa onye e-phu
iya iphu bẹ ọocho.
Onye alọkwanu onye ẹjo-iphe
ẹka lẹ nchị bụkwarupho
ọkonu bẹ ooku oku.
8 Ta abajẹkwaru onye mgbọnu
mba; ọdumeka bẹ
ọokpokwa ngu ashị.
Bachịru onye maru iphe mba;
hụma l'oo-ye ngu obu.
9 Lọoru onye maru iphe ẹka lẹ
nchị hụma l'ọo-kabaa
amaru iphe eje.
Zia onye pfụberekoto iphe
hụma l'oo-yekwabaa
iphe l'iphe, ọ maru.
10 L'ọ kwa atsụ Chipfu ebvu bụ
egbube ishi mmamiphe.
Amaru onye ono, dụ nsọ ono
bụru iphe edo ẹnya.
11 Kẹle ọo mụbe mmamiphe
e-me g'ị kaa nka.
Mbụ-a; mu e-me g'e
yekwabaaru ngu apha
l'apha olemole i gege
anọ l'eliphe-a.
12 Ị -maru iphe; mmamiphe ngu
ono ebua ngu nggo.
Teke ị bụkwanu onye
mgbọnu;
l'ọ bụru gụbedua l'onwongu
e-je iphe-ẹhuka iya.”
13 Olu kẹ nwanyị ono,
bụ iya bụ eme-eswe nọdu
adakwaphọ adashị ike.
Ọ bụ onye a hụ̀duru ahụ̀hù;
tẹme ọphu ọ madụ iphe.
14 Yẹbedua je anọdu l'ọnu-abata
ibe iya;
mbụ l'okposhi, o doberu
l'ẹka kakọta l'eli
lẹ mkpụkpu.
15 Noo ẹka ọ nọ eku iphe,
bụkpoo ndu aghata
aghata;
ndu pfụberuro ije phẹ
nhamụnha eje iphe,
ẹphe eje.
Ọ sụ phẹ:
16 “G'iphe, bụkpoo ndu amazidu
iphe bata l'ụlo l'ẹka-a!”
O be lẹ ndu enwedu
egomunggo; ọ sụ phẹ:
17 “Mini, e zitaru l'oshi
adụjekwa ree.
Ọ bụru nri, e riru lẹ mpya
kachaa ụtso!”
18 Ọphu ẹphe amaswetakpọdaa
amama ophu l'ụnwu-maa
dọru l'ẹka ono;
lẹ ndu byaru iya ẹbyaa
nọwaa l'alị-maa
anọno.