22
Elifazu ebo iya Jiobu ọzo
1 Tọbudu iya bụ; Elifazu onye
Temanu bya eyee ọnu sụ-a:
2 ?Bụ Chileke bẹ nemadzụ
abarụ urwu?
Mbụ-a; onye maru iphe;
?ọo-bakpọru iya nụ urwu?
3 ?Bụ ụdu ẹhu-utso gụnu bẹ
oo-meru nụ
Ọkalibe-kangokọtaru-nụ
m'ọ bụru l'ị bụ onye
pfụberekoto?
?Bụ gụnu bẹ oo-rita iya;
ọme ọo kẹ g'a sụ l'ọ tọ
dụdu ụta, dụ ngu l'ẹhu?
4 ?Bụ l'ị bụ onye atsụje iya
ebvu bẹ ọobaru ngu
mba iya?
?Bụ iya bẹ o gude kua ngu
ikpe tọo?
5 Ọo ẹjo-iphe ngu pakpọoru
ẹka apaa.
Iphe-ẹji, iimeshi bụ agụta agụta.
6 Mkpalẹka, iipfu g'unwune
ngu naa ngu te nwekwa ishi.
Gụbe onye atọtaje ndiphe ẹkwa,
ẹphe nma l'upfu gbabẹ
phẹ ọto.
7 Onye ike bvụru bẹ i ti
chebeduru mini.
Ị parụ nri domiaru onye ẹgu
agụ g'o to ri iya.
8 Ọle ị bụkwa oke amadụ,
nweru alị ẹka ngu;
bya abụru onye aakwabẹ
ùbvù buru l'alị ọbu.
9 Ụnwanyi, ji phẹ anọedu
-gbapfuta ngu l'i chiphu
phẹ azụ; gbabẹ phẹ ẹka ọto;
tẹme ị nọdu emeje g'ike
bvụ ndu enwedu nna.
10 Ọo iphe ono meru g'o gude
a gbaa ọ́nyà gbaphee
ngu mgburugburu.
Ọtulupfu, eye ngu ebvu nọdu
atsụ ngu l'ẹhu.
11 Ọo iphe ono meru g'o gude
ẹkameka gbahụkota ngu
ọchii; k'ọphu ọ tọ dụedu
iphe, ịihumaje.
Ọ bụru iphe ono meru g'o gude
utso gbawa gbamia ngu.
12 Ẹka Chileke nọ bụkwa ẹka
kachaa ephekerephe l'imigwe.
Hụmawaro gẹ kpokpode
nọ-be ephekerephe!
13 Ị gbẹ sụ: “Chileke ?ọ maru
ole?
?Ọogbeje l'ẹka agba ọchii
ẹgube ono ekpe ikpe?
14 ?Mbụ l'oke urwukpu
sọpyaberu iya;
k'ọphu ọ tọo hụmajedu
anyi ẹnya m'ọ nọdu
aghaphe lẹ mgbaka igwe
yẹe alị.”
15 ?Bụ ụzo, ịi-nọdu eshi bụ
akahụ ụzo ono,
bụ ụzo, ndu ẹjo-iphe tọru?
16 Ndu ono bẹ a
kpọ-kwofukwaru
akpọ-kwofu;
ẹphe laa teke o teke
agbadu phẹ k'alala.
Ukporo-mini bya avụa phẹ
l'ọgbarabvu.
17 Ẹphe sụ Chileke: “Parụ anyi
haa!
?Bụ gụnu bẹ
Ọkalibe-kangokọtaru-nụ
e-me anyi?”
18 Ọle ọ kwa iya vukọru iphe,
dụ ree vujia ụlo phẹ evuji.
Noo ẹka mu gude ọphu mu
ayịdu l'ìdzù, ndu
ẹjo-iphe achị.
19 Ndu pfụberu-ẹka-ọto
ahụmaje iyi, yiru phẹ
nụ tee ẹswa.
Ndu iswi dụ mma achịa phẹ
ọchi sụ:
20 Tororo; ndu ọhogu anyi
bẹ a kabẹkwa mebyishia.
Ọku tsuakwaru ẹku phẹ.
21 Sụ-a; woduruphọ onwongu
sẹe asẹe l'ẹka Chileke;
k'ọphu gụ l'iya a-dụ lẹ ree.
Ọo ya bụ g'oojehuru ngu.
22 Natadụpho anma ọkwa,
shi iya l'ọnu.
Woru opfu iya doo giriri
l'ọkpoma ngu.
23 L'ị -lwaphuta azụ
lwapfuta
Ọkalibe-kangokọtaru-nụ
bẹ oo-dophu ngu azụ
l'ọnodu ngu.
Ị -tụko ẹjo-iphe, dụ l'ibe ngu
woshikọta;
24 bya eworu mkpọla-ododo
ngu l'ophu rwụa lẹ ntụ;
mbụ tụko mkpọla-ododo
Ofi ngu je achịru ye l'ọgba
g'ọ bụru mkpuma
nọ lẹ mini;
25 noo teke
Ọkalibe-kangokọtaru-nụ
a-bụru mkpọla-ododo ngu;
bụru mkpọla-ọchaa,
kakọta ree, i nweru;
26 noo teke
Ọkalibe-kangokọtaru-nụ
atsọaha ngu ụtso;
l'ị paliaha iphu lee Chileke.
27 Teke ono bẹ ii-pfuru nụ
Chileke; l'ọ nụma olu ngu;
tẹme l'i mekwaaru iya phọ
iphe, i kweru ukwe iya.
28 Ịi-tọje ọkpa iphe; l'e mee ya
g'ị tọru iya.
Ìphóró abya adụru ngu l'ụzo,
iishi.
29 Teke e wozeru nemadzụ alị;
ị -sụ g'e wolia onye ono eli;
Chileke adzọo onye ono,
e wozeru alị ono;
30 mbụ l'ọo-dzọ ndu iswi
adụdu mma.
Ọ bụru iphe, oo-gude dzọo
phẹ bụ lẹ gụbedua
l'onwongu dụ chịriri.