21
Jiobu epfu gẹ ndu ẹjo-iphe ababeje ụba
1 Jiobu bya eyee ọnu sụ:
2 Unu ngabẹkwa nchị
ree l'opfu-a, mu epfu-a.
G'ono bụkpoorunu obu unu
dụa mu iya.
3 Unu takpọepho nshi haa gẹ
mu pfughee.
Mu -pfuchaa; unu emeahawa
mu rọ sukusuku ọbu.
4 Aphụ, mu agụ; ?bụ nemadzụ
bẹ mu agụru iya?
?Dẹnu ẹka mu e-gude taa nshi?
5 Unu lee mu ẹnya ree;
hụma l'unu a-kpọ beru.
Unu woru ẹka hua l'ọnu.
6 Ọobujeru; mu -rịnyaa iphe-a;
ndzụ agụaha mu;
ẹhu aphụkota mu
kpaakpaakpaa.
7 ?Dẹnu g'o gude ndu ẹjo-iphe
nọdu anọduje ndzụ;
kaa nka; ẹphe abụru ndu
ike dụ?
8 Ẹphe anọdu hụma;
ụnwu phẹ ekofutachaa
bya ebuchaaru shihu ike
nọ-phee phẹ mgburugburu.
Ẹphe anọdu gude ẹnya phẹ
hụmachaa nwanwanwaranwa
phẹ nno kwaphọ.
9 Unuphu ibe phẹ adakọta jii;
ọ tọ dụdu ndzụ-agụgu,
adụ iya nụ; ọphu Chileke
echidu phẹ ẹchachi.
10 Oke-eswi ibe phẹ eyeẹpho
eswi ime l'o rwuberu iya.
Eswi phẹ ono atsụepho ime eje;
ọ tọ dụdu ọphu ekwo nwa.
11 Ẹphe anọdu azụshi ụnwu
g'ikpoto atụru.
Ụnwegirima ono -teru ebvu
shia ẹkiya-a;
ẹphe eteru iya shia ẹkiya-a.
12 Ẹphe egude ogumogu gude
une agụ ntụmatu.
Ẹphe eme ẹmereme egbu opu
eye iya.
13 Ẹphe eria gwọogwoo;
tụsaru ẹhu jasụ g'ẹphe
a-nọ-beru.
Mbọku, ẹphe a-nwụhu;
ẹphe anwụhuepho lẹ
nchị-odoo.
14 Ẹphe asụje Chileke g'ọ parụ
phẹ haa;
l'ọ tọo gụdu phẹ ẹgu amaru
ụzo iya.
15 Ẹphe asụ: ?Bụ onye bẹ
Ọkalibe-kangokọtaru-nụ bụ
kẹ g'ẹphe jeeru iya ozi?
?Bụ gụnu bẹ ẹphe erita l'epfu
anụ iya?
16 Ọphu ẹphe amadụ l'ajàjà,
ẹphe jàru ta abụdu phẹ
bẹ o shi l'ẹka.
Noo ẹka mu gude ọphu mu
ayịdu l'ìdzù, ndu ẹjo-iphe
achị.
17 Ọle ọ bụ; ?ọ dụkpooru teke
aaphụnyije ọku ndu ẹjo-iphe?
?Ọ dụkpooru teke eze
iphe-ẹhuka abyapfutajẹ phẹ;
bụ iya bụ obunggo ono,
Chileke egudeje ẹhu-eghu
bua ono?
18 ?Ọ dụkpooru teke aanọnyaje;
ẹphe adụ g'ẹswa ọkponku,
a kụberu l'ẹka phẹrephere ezi;
mbụ ẹphe adụ g'ẹswa ereshi,
oke phẹrephere ezikashị?
19 A sụkwaru lẹ Chileke
ewojeru iphe, o gogo me
nemadzụ doberu ụnwu iya.
Ọle ọ bụ; g'o wojeru iphe ọbu
mee onye meru iya nụ;
k'ọphu onye ono a-maru
l'ọola ụla iphe, o meru.
20 G'o gude ẹnya iya hụma
ọla-l'iswi, a-byapfuta iya nụ.
G'oke ẹhu-eghu
Ọkalibe-kangokọtaru-nụ
tukokwaru iya l'ishi.
21 Kẹle nwa ọnwa olemole,
a nụru iya l'eliphe-a -bvụwa.
?Ọ kpakwadụ ishi ndu
ọ harụ l'eliphe mẹ ọ tọwaa azụ?
22 Sụ-a; ?ọ dụru onye sụru
g'oo-zi Chileke mmamiphe;
eshinu ọ bụ iya ekpeje ndu
kakọta shii ikpe?
23 A -nọnyaa; nwoke
agbakwohu nwụhu;
onye ẹhu dụ guu;
ọphu ọ dụdu iphe,
atsụ iya l'ẹhu;
24 onye ẹhu dụebe nwa
pukalapukala;
ụmi tsụru iya l'ọkpu.
25 Onye ọzo ejekpọepho
iphe-ẹhuka tẹme l'ọonwuhuje;
mbụ l'ẹhu teke atsọ-swee
ya ụtso.
26 E -mechaa l'a tụko phẹ libe
l'alị;
ẹ̀kà atụko phẹ ripyabẹ.
27 Iphe, unu arị dokwaru mu
ẹnya ree;
mbụ iphemiphe ono,
unu gude ọriri kpakọo bo
mu onoya.
28 Unu pfuru sụ: ?Bụ awe bẹ ụlo
oke amadụ nọhunu;
mbụ ụlo ono, ndu ẹjo-iphe
shi bugbaaru onoya?
29 ?Unu teke ajị-swekpọo ndu
ije ajị?
?Unu teke atọ-swee nwẹhu
gbua igo l'iphe, ẹphe gude
ọnu phẹ akọ?
30 Sụ l'oke iphe-ẹhuka byaru ọha;
ọphu ọ dụdu iphe,
o meru onye ẹjo-iphe.
Chileke bya atụ-koshi ndiphe
oke ẹhu-eghu iya;
ọphu ọ dụdu iphe,
o meru onye ẹjo-iphe.
31 ?Bụ onye apfụjeru iya l'iphu
gbaa ya iphe, oome?
?Bụ onye apfụje iya ụgwo iphe,
o meru?
32 Eelije iya l'ilu lirwee elirwe.
A gbẹnu eche ilu iya echeche
g'ọ tọ dụ iphe, e-me iya nụ.
33 Ẹja, shi lẹ nsụda a-dụ iya ree
l'ẹhu.
Ndiphe l'ophu awụ etso iya l'azụ;
tẹme ndu ọphu bụ agụta
agụta vuwaru iya ụzo
wụru jeshia.
34 “Sụ-a; ?bụ mkpọkoro opfu
ono, unu epfu ono bụ obu,
unu nọdu adụ mu iya nta-a
tọo?
Kẹle iphe, bụ ọnu, unu eye ta
adụkwa iphe, dụ iya nụ,
abụdu ụka bẹ unu adzụshi.”