10
1 Anọdu ndzụ dụkwaa mu
ẹnyiru.
Ọo ya bụ lẹ-a;
gẹ mu bya evushia
mgburwashị-ẹhu mu kụbe;
mbụ lẹ mu e-pfugbuẹpho
g'ooghube mu l'obu.
2 Mu a-sụ Chileke: Ta
anmashịnu mu ikpe!
Gụshichiaru mu iphe,
bụ iphe,
ịisu l'ọo ya bụ iphe,
mu meru!
3 Tọo ?bụkpoepho iphe,
dụ ngu ree
bụ g'i mee mu mkpawere;
g'ị gbuphua iphe,
i gude ẹka ngu mee;
ọle idzu, ndu ẹjo-iphe
chịru bẹ bụle-a ọnu-ọchi
bẹ ịinwujajeru iya?
4 ?Bụ ẹnya nemadzụ mmanụ
bẹ i nweru?
Mbụ ?bụ gẹ nemadzụ eleje
iphe ẹnya bụ gẹ
gụbedua eleje?
5 ?Bụ gẹ nemadzụ anọ-bejeru
bụ gẹ ịi-nọ-beru?
Mbụ ?bụ apha ole,
nemadzụ anọje bẹ
ịi-nọkwapho?
6 mbụkwanu meru g'o gude ị
nọdu avọkpoepho
achọ ẹka o deru mu;
akpa ishi iphe,
mu meru ngu ẹji.
7 Ole ị makwarụ l'ikpe ta
anmadụru mu;
tẹme ọphu ọ dụdu onye
a-nafụta mu l'ẹka ngu.
8 Ọo ngu gude ẹka ngu mee
mu gẹ mu dụ-a.
?Ịi-bya aghakọbe nta-a bya
emebyishiẹhukwa mu
phọ?
9 Nyatakwa l'ị kpụru mu
g'eegudeje ụrwa kpụa
iphe.
?Ịi-bya bya egwee mu uji
ọzo tọo?
10 ?Tọbudu g'aawụje ẹra-eswi-a
bụ g'ị wụru mu ye;
bya emee mu; mu daa adada
g'ọhu-manụ?
11 Ị bya eworu akpọ-ẹhu
yẹe anụ-ẹhu yee mu
g'onye yeru uwe;
bya egude ọkpu yẹe
ụmi-ọkpu dzepfua
mu nanụ.
12 Ọo ngu meru; mu nọdu ndzụ;
tẹme ị nọdu egoshi l'i yeru
mu obu.
Ọ bụru g'i gude ehe mu meru
g'o gude ị nọdu eche ndzụ
mu nche.
13 Ọle i wolẹru-a iphe-a domia
l'ime ọkpoma ngu;
mbụ lẹ mu maru-a
l'ọo iphe,
ị tụru atụ̀tù dobe l'ime
obu ngu;
14 lẹ mu -mee iphe-ẹji bẹ
ịi-nọdukpoepho ege mu ngge;
ọphu ịigujeduru mu nvụ
mẹ mu meswee.
15 Ikpe -nmaa mu;
bẹ ọ bụkwapho aphụ
tsọru mu!
Iswi -dụkpoo mu nụ mma;
mu ta apalidu ishi apali;
kẹle iphere dụshi mu ike;
tẹme iphe-ẹhuka,
mu eje ripyabẹwa mu.
16 Mu -woru ishi ngakobe;
l'ị chịaha nta mu g'ẹka
oduma achị nta iphe,
oo-ri;
l'i woru ọkpehu ngu ono,
dụ biribiri ono tukoshi mu.
17 Tekenteke bẹ ịichikobeje
ndu a-nọdu agba mu ekebe;
tẹme ị nọdu anọduje avụru
mu ọvuma.
Ndu ojọgu ngu nọdu atụ
kpereree abya mu etso ọgu.
18 Mbụ-a; ?bụnaa gụnu meru
g'o gude i kufuta mu l'ophu
l'ophu l'ẹpho ne mu?
Ọ dụ mu g'a sụ lẹ nemadzụ
-byaru ahụma mu ẹnya;
mu nwụhuwaa.
19 O gege aka mu ree;
ọme mu ta adụjekpodarunu
adụdu ophu;
ọzoo ọme a nwụru mu paa
mu eli eli jeye l'ilu.
20 Nwujiku olemole, mu nweru;
?tọo bvụada?
Wofunu iphu l'ẹka mu nọ;
k'ọphu ẹhu a-tsọkpo mu
nwa ililekpọo;
21 tẹme mu alashịwaro ẹka
bụ: a -laa; a lwagụ azụ;
ẹka agba ọchii bya adụ
tsụkiribaa;
22 ẹka ẹnyashi nkiya bụ
abalị-ishi;
ẹka bụ iphe, dụ iya nụ
bụ tsụkiribaa;
iphemiphe, dụ iya nụ
ghalashịhu aghalashịhu;
ẹka nwiphe, dụ g'ìphóró,
dụ iya nụ dụ g'ẹka ọchii
agba l'ibiya-a.”