9
Ọnu, Jiobu eye
1 Tọbudu iya bụ;
Jiobu bya eyee ọnu sụ:
2 Tororo bụ ishi opfu bụ lẹ mu
maru l'ọo eviya.
Obenu lẹ-a; ?dẹnu gẹ
gwọpya-gwọpya iphe-a,
bụ nemadzụ-a e-me
pfụbe-ẹka-ọto l'iphu Chileke?
3 Onye ọ dụ gẹ yẹe Chileke tụa
ya bẹ ọo-jịkwa
ụnu-kụru-ụnu ajị;
ọ tọo zadụ g'ọ ka mma
l'ọo nanụ.
4 Ọ maru iphe maghee ya
amaghe;
bya adụ ọkpehu dụ-ghee
ya adụ-ghe.
?Bụ onye kwefujeru iya ike;
e mechaa;
ọ dụru iya lẹ ree?
5 Úbvú bẹ oonwuribẹjeru;
úbvú ta amakpọdanu l'e
nwuribẹru iya;
ọ nọdu egudeje ẹhu-eghu
ghaa ya ịgharaphu.
6 Mgboko l'ophu bẹ
ọonmaghuje anmaghu
mee itso, e gude kpọbe iya
g'o tee kpaakpaakpaa.
7 Ẹnyanwu bẹ oopfujeru opfu
yeru; l'o chibuhu;
ìphóró, dụ lẹ kpokpode bụ
iya byanyịbotaru iya.
8 Ọ bụru yẹbedua kpoloko
sụsaru akpaminigwe
g'ọ sụsaru ono;
bya abụru iya bụ onye ahajẹ
ọkpa l'eli akparamini,
atụ l'echi eze-ẹnyimu.
9 Ọo ya meshiru oke kpokpode
kpokpode,
dụgbaa nụ;
mbụ kpokpode, bụ bịye;
yẹe orayọnu;
waa peleyadesu;
mẹwaro eze kpokpode
kpokpode,
nọgbaa l'ụzo ndọhali.
10 Oomeje iphe, dụ biribiri,
adụdu ẹtu, iya dụ nụ;
tẹme iphe-ọhumalenya
nkiya bụru agụta agụta.
11 Ọobujeru; a -nọnyaa
l'ọ bya aghata mu;
mu ta ahụmadu iya;
teke ooje l'iphu l'iphu mu
ta amadụ.
12 Ọ -nata nemadzụ iphe;
?bụ onye a-sụ iya g'o
to meshi?
?Bụ onye sụru g'ọo-jị iya sụ:
?Bụ gụnu bẹ iime ẹgube
ono?
13 Ẹhu -nọdu eghu Chileke eghu
bẹ o too selajẹkwa ẹka
azụ;
mbụ lẹ ndu ojọgu Réhabu
daru kpurumu
lẹ mgboru ọkpa iya.
14 ?Dẹnu gẹ mu e-jeje gẹ mu
l'iya je eme opfu?
?Mu doberu ọnu l'awe kẹ gẹ
mu l'iya bya
awata atụ ẹgo opfu?
15 O -betakpọnu ọphu ọ dụdu
iphe, mu meru;
mu te ejekwa iya asarụ
opfu.
Iphe, mu a-nọduekwapho
eme bụkwa gẹ mu
rwọnupho yẹbe onye-ikpe
mu ono g'ọ phụaru mu
obu-imemini.
16 Mu -kukpọo ya nụ oku;
ọ -za mu ẹnu bẹ mu ta
arịkpokwanu l'oo-yeru
mu ọnu.
17 Ọo oke phẹrephere bẹ
oo-gude bya bya egwee
mu arakabya; bya emee ọ́nyá,
tụkoru mu ẹhu-a ka shii
l'ẹbe adụ iphe, mu
meru.
18 O too kwedu g'unme rwua
mu ọhu-ẹpho.
Ọ chia mkpawere bẹ oo-gude
tsụa ndzụ mu ntsụgiji.
19 Ọ -bụru l'iphe,
eepfu bụ k'ọkpehu;
ọ bụ onye ike dụ shii.
Teke ọ bụ k'ikpe;
?bụ onye sụru iya eku
ikpe?
20 O -betakpọnu ọphu ọ dụdu
iphe,
mu meru bẹ opfu,
shi mu l'ọnu anmalẹ
mu-a ikpe.
Iswi -dụkpoo mu nụ mma;
l'ọ sụle-a l'ikpe nmarụ
mu.
21 A makwarụ-a l'ọ tọ dụdu
iphe, mu meru;
ọle mu ta ayọdu ọshi
onwomu.
Ndzụ mu dụwaa mu ashị.
22 Mbụ l'ọ tụkoru bụru iphe
lanụ;
ọ bụru iphe ono meru g'o
gude mu sụ:
“Oomebyishije ndu adụdu
iphe, ẹphe meru;
yẹe ndu bụ ndu ẹjo-iphe.”
23 Eze-iphe-ẹhuka -dapfuta ndu
adụdu iphe,
ẹphe meru;
meahaa g'ọ pyị-gbua phẹ;
k'ọphu meji tọfuaharu phẹ
atọfu;
bụle-a ọchi bẹ ọonoduje
achị phẹ.
24 Mgboko dabarụ l'ẹka ndu
ẹjo-iphe.
O gude ẹka pyị-chishia
ndu-ikpe iya ẹnya.
Ọ -bụdu iya eme iya ?bụhunu
onye bẹ eme iya nụ?
25 “Eswe ndzụ mu kakwa onye
maru ọso eme ẹgwa.
Oophegbaẹpho
phaaphaaphaa
epheghashị;
ọphu ọ dụdu g'ọ ka mma
l'ọo nwa ẹhu-ụtso,
ha nwanshịi, dụ iya nụ.
26 Oochikọtaje bụruru chighaa
g'ụgbo,
e meru l'ọwa-ụda;
zia phaa zighaa g'ugo,
ephe ejepfu iphe, oo-ri.
27 Mu -sụ gẹ mu zọhaa k'agụ
aphụ
bụ iphe, mu e-me bụ gẹ mu
gbanwee iphu
wata anwụja ọnu-ọchi.
28 Obenu l'iphe-ẹhuka,
mu eje bẹ mu
atsụkwadu-a ebvu;
kẹle mu maru l'ị tị byadu
ekwe l'ọ tọ dụdu iphe,
mu meru.
29 Eshinu a nmawaru mu ikpe;
?mu a-yọbahunaa ọshi
k'ole?
30 Ọ tọ dụkwa m'obeta mu saa
onwomu dụ g'eberugo;
bya egude ncha kwọo ẹka
mu; ọ nọdu ama mma
31 bẹ ịi-patalẹkwa mu-a chie
wuu l'ime iduma,
echi bụruru bụtubu;
k'ọphu bụ l'uwe, mu yeru
l'ẹhu bẹ mu a-dụchaa
ashị.
32 Chileke ta bụkwa nemadzụ
gẹ mu bụ-a;
mẹ mu eyekwaaru iya-a ọnu;
mẹ mu l'iya eje edogbabẹ
iya l'ụlo-ikpe.
33 Ọphu ọ dụkwanu onye
egbogbo g'o gbokahụ
anyi,
bụ onye e-seta anyi l'ẹka
doshiaru anyi opfu;
34 mbụ onye a-nafụ Chileke
ẹchachi ono,
ọowa mu l'ẹhu g'ọowa mu
iya-a;
k'ọphu ebvu, ooye mu
a-kabẹ lwa mu alị l'ẹhu.
35 Noo teke mu e-pfu g'ọnu ha
mu;
mu ta atsụhedu iya ebvu.
Obenu g'ọ dụ nta-a bẹ mu ta
adụkwa ike epfugbu
g'ọnu ha mu.