7
1 Nemadzụ ?tọ bụdu iphe,
ọ byadoru eliphe,
bụ ese akanya;
mbụ lẹ ndzụ, ọ nọ dụepho
gẹ ndzụ
onye e butaru g'o jee ozi.
2 Ọ dụ g'ohu, eje ozi, bụ iphe,
ọonoduje ele ẹnya iya bụ
gẹ nchi e-me jihu;
dụkwapho g'onye e butaru
ozi, bụ iphe,
ọonoduje ele ẹnya iya bụ
ụgwo, aa-pfụ iya.
3 Ọo ẹgube ono bẹ e meru
ọnwa l'ọnwa nọdu
abụkotajeru mu kẹ mmanụ.
Iphe, bụkpoo ẹnyashi nọdu
abụkotajeru mu
mgburwashị-ẹhu.
4 Mu -zẹe azẹe; mu echiru
l'ọriri sụ:
?Mu e-kukpọo mgbẹnya
ọwa-a jasụ teke ole?
Ẹnyashi nọdu anọduje akpụ
onwiya gọlogolo.
Mu nọdu echijeẹpho
gburugburu jasụ nchi
abọhu.
5 Inyi tụko mu ẹhu sweta;
ẹ̀kà nọdu atụ mu rikarika
l'ẹhu;
mbụ l'ẹhu mu l'ophu
kejashịhucharu
ekejashịhu;
ọ́nyá, nọ iya nụ nọdu atụ
rikarika.
6 Eswe ndzụ mu nọdu agba
warawara gẹ ngga,
e gude ekwe ẹkwa;
mbụ lẹ ndzụ mu eje
mgbabirishi l'ẹbe adụ iphe,
mu levuru ẹnya iya.
7 Jiko Chileke; nyatakwa lẹ
ndzụ mu ta adụdu
iphe ọzo,
ọ bụ gbahaa udzu-ọnu.
Ẹhu ta atsọbaedu mu ụtso lẹ
ndzụ mu ọwa-a ọzo.
8 Onye hụmaru mu nta-a
e-mechaa;
ọ tọo hụmabaedu mu ọzo;
mbụ l'ii-mechaa chọo mu
achọcho;
ọle ị tịi hụmabaedu mu.
9 Ọo g'igwe erwuje erwurwu
gbaka-a;
ọ tọo lwabaẹdu azụ-a
bụ g'onye e kpochiru l'ilu
ta alwajẹedu azụ ọzo;
10 mbụ l'onye ono ta
alwajẹbaedu azụ l'ụlo
iya ọzo;
ọphu unuphu ibe iya
ahụmajeedu iya
ẹnya ọzo.
11 “Noo g'o gude ọphu mu
edobedu ọnu doo.
Mu a-nọdu ata kpọokpookpo
gẹ mu ata-a.
Mu epfunu iya phọ gẹ mu
epfu iya-a.
Mu a-tụkonupho g'ooghube
obu mu gụ-gbua l'aphụ.
12 ?Mu bụ eze-ẹnyimu;
tọo ?mu bụ ẹjo-oke-agiyi;
k'ọphu unu yeru ndu nche;
a nọdu eche mu nche?
13 Mu gbẹ arị l'iphe-azẹe,
mu zẹ azẹe e-me g'ẹhu dụ
mu guu;
mbụ l'ẹtemu-anamu mu
e-me gẹ nggụmaphu
lwa mu alị.
14 Obenu l'i gudelẹ-a ẹjo nrwọ
eme gẹ ndzụ gụ mu;
bya egude ọphulenya eye
mu ebvu;
15 k'ọphu bụ l'aswị-gbu
onwonye byaru aka
mu ree.
Anwụhu ka mu ree eme l'ụdu
ndzụ ọwa-a, mu dzụ
nta-a.
16 Mu ta agụbeeduru ndzụ mu
iphe;
mbụ l'ọ tọ dụkpoedu mu
g'a sụ
lẹ mu nọ ndzụ anọno ophu jasụ
lẹ tuutuutuu lẹ mịimiimii.
Pakpọeru mu phọ haa;
lẹ ndzụ,
mu nọ nta-a bụwaa
iphe-mmanụ!
17 ?Nemadzụ bụ gụnu kẹ g'i
meje iya g'ọ ha shii?
?Kẹ g'ịikpojeru obu yeru iya?
18 ?Kẹ g'i lerweje iya ẹnya
elerwe
l'ụtsu mbọku-mbọku;
ahụ iya ama tekenteke?
19 ?Tịi-kabẹkpoda wofu mu
ẹnya;
ọzoo g'ị hakpọo mu nụ gẹ
mu nọo
nwẹkinyi mu nwanshịi
nwanshịi?
20 Ọ -bụru lẹ mu meru Chileke
iphe-ẹji;
?mu meru gụbedua gụnu?
mbụ gụbe onye eche
nemadzụ nche.
?Dẹnu g'o gude ọ bụru l'ẹhu
mu bẹ ẹnya ngu dụ?
?Mu anyịwa ngu ẹrwa tọo?
21 ?Dẹnukpoo g'o gude ọphu ị
kabẹkpodaa gụaru
mu nvụ l'ẹka mu
meswekpọoru;
mbụ pawarụnu haa
l'ẹjo-iphe ọbu, mu eme ọbu;
kẹle ọ tọ dụkwa
g'ọo-nọ-beru l'e kpochia
mu ẹja.
L'ị chọo mu nta chọo imo;
ị tịi hụmaedu mu.”