6
Ọnu, Jiobu yeru
1 Tọbudu iya bụ; Jiobu yee
ọnu sụ:
2 Ọ dụ mu g'a sụ g'e wota
mgburwashị ẹhu mu
tụ̀a atụ̀tù g'a hụma
g'ọonyi-be ẹrwa.
Mbụ g'a tụko iphe-ẹhuka mu
chịru ye l'iphe,
aatụ̀je ẹrwa iphe.
3 Ọ tọ dụdu g'e meru g'ọ tọ ka
ẹja, nọ l'eze-ẹnyimu
anyị ẹrwa.
Ọ bụru iya kparụ iphe,
opfu mu adanụka
kpaakpaa.
4 Kẹle apfụ,
Ọkalibe-kangokọtaru-nụ
gbakashịru mu gugbaaru
mu eguru l'ẹhu.
Ụphu, ọophu mu nọdu alọ
mu ẹka lẹ meji;
mbụ lẹ Chileke eyeẹ mu
phọ ebvu mkpẹe-lanụ.
5 Nkapfụ-ịgara-ọswa ?ọoraje
ọ́rà mẹ ọ -nọdu ata
ẹswa?
Tọo eswi ?oogbuje ọ́rà mẹ nri,
oori dụkwadu?
6 ?Eerije nri, enwedu ụtso l'ẹbe
e ye iya únú?
Tọo ?ọ dụru ụtso, dụ l'ẹka
ono, achajẹ ụcha
l'ẹkwa-ọku,
e shiru eshishi ono?
7 Mu te ekwejedu iya edenyi
ẹka;
kẹle ẹgube nri ono abyajẹ
mu ẹgbo l'ọnu.
8 O gogo dụkwaru mu ree;
ọme ee-meru mu iphe,
mu epfu g'e meeru mu;
mbụ lẹ Chileke gege
akabẹnu nụ mu iphe,
mu ele ẹnya iya;
9 mbụ lẹ Chileke gege
atụkpoepho obu iya
onyo gwee mu uji;
g'ọ tụhakpoepho ẹka tụa
mu l'ẹhu kẹ paa;
mee gẹ mu chịhu lẹ mgboko.
10 Ọo ya bụ mẹ ọ bụkwanuru
iphe,
gege anọdu adụ mu obu;
mee g'ẹhu tsọkpoo mu
nụ l'iphe-a,
l'atakpọshi mu
g'ọotakposhi mu-a;
noo kẹle mu ta ahajẹduru
eme olu onye ono,
dụ nsọ ono.
11 ?Bụ ike gụnu bẹ mu
nwekwadụru
k'anọdu elekwadu ẹnya
iphe?
?Mu maru iphe, kpọ-chiru
ndzụ mu ishi ọphu mu
e-pfukwadu k'ata nshi?
12 Ọkpehu nkemu ?ọ bụ
ọkpehu
agbara-mkpuma?
Tọo anụ-ẹhu nkemu ?ọ bụ
akpọ-igwe?
13 ?Mu nwekwadụru ụvo,
mu e-gude yeru onwomu
ẹka
nta-a, a natawaru mu ike,
mu shi nweru-a?
14 Onye meji atọfu atọfu
gbakpọru g'ọ̀nyà iya
phẹ
anọdu aphụru iya
obu-imemini;
m'o betakpọ ọphu ọ
tsụhedu
Ọkalibe-kangokọtaru-nụ
ebvu.
15 Obenu l'unwune nkemu bẹ e
te gudedu ẹka.
Ẹphe dụ g'oke nggele, mini
tahụru l'ọnanwu;
ọle o -be l'udzumini;
ọ byaa utso tụko ẹkameka
sweta;
16 mẹ mini, dọru iya nụ,
shi hụkoo ahụko
dazeshihuẹpho;
ọ bụru iphe, swetaru iya
nụ bụ aka-mini-sunoo.
17 Ọle ọnanwu -chaẹpho l'ọ
tụko bụru sụtukumu.
Mbụ okpomọku
-kpoahaẹpho;
ọ tọ dụedu ọphu
a-dụkwadu l'ọgba iya.
18 Ndu ije aparu ụzo phẹ haa
lashịa l'okorobo-ẹgu
je anọdu l'ẹka ono bụru
ọla-l'iswi.
19 Ndu ije ọphu shi lẹ Tema
chọru mini ono
achọcho.
Ndu ije ọphu shi lẹ Sheba
lee ẹnya iya;
ọ bụru k'iphoro.
20 Iphere gudewaru phẹ;
kẹle ẹka ẹphe shi kpọru
obu yeru bẹ ẹphe
rwuru;
ọphu ọ dụdu g'ẹphe rịru.
21 Unubẹdua l'onwunu bya
egoshikwaphọ
l'o tọ dụdu urwu, unu aba.
Unu hụmaru iphe, eye ebvu;
unu tsụahaa ebvu.
22 ?Mu sụjekpooru g'e meeru
mu iphe-ọma?
Tọo ?o nweru onye mu sụjeru
g'o gude iphe,
o nweru je anụru mu
ụphalazu?
23 G'unu bya adzọta mu l'ẹka
ndu ọhogu mu;
ọzoo g'unu bya agbafụta
mu l'ẹka ndu ewebushi
akụrepho.
24 Zinaa mu iphe;
gẹ mu e-dobe ọnu doo!
Goshinu mu ẹka mu jeberu;
ụzo kpọ-swehu!
25 Lewarọ g'ire-lanụ emebeje
ẹhuka l'ẹhu!
Obenu lẹ-a; iphe-a,
unu epfu-a;
?o goshikpọru gụnu?
26 ?Bụ mba bẹ unu byaru mu
abarụ?
Mbụ-a; ?unu eme g'unu sụ
l'opfu onye ono,
ejegbu onwiya l'iphe-ẹhuka
ono bụ opfu,
larụ lẹ phẹrephere?
27 Ono dụ-a g'onye atụru
nwogbee,
enwedu nna ido;
bya abụru ere onye unu
l'iya eshi ọ̀nyà erere.
28 Ọle g'ọ dụ nta-a bụkwa lẹ-a;
aswarụ, unu a-swarụ mu
bụkwa g'unu
lekpọda mu nụ ọphu bụ
ẹnya;
kẹle-a; ?mu a-kabẹhunu
nọdu unu l'iphu
dzụa ụka?
29 Jikonu; unu tụnaa mgbeleke
nwanshịi;
hanaa eme iphe,
apfụduru-ọto!
Unu rị-phunu ọriri azụ;
kẹle apfụbekoto mu
dụekwapho g'ọ dụ.
30 ?O nweru iphe, apfụduru-ọto,
mu pfuru nta-a?
Tọo ?mu ta akabẹedu maru
teke mu pfuru ẹjo opfu?