5
1 “Jobu; kunua oku nta-a;
t'a maru; ?m'o nweru onye a-za ngu nụ.
?Nanụ ụnwu-imigwe ono
onye ọphu ịi-gbaru dakobe?
2 Iwe-'agvụ-l'obu egbujekwa onye eswe;
ẹnya-kfụrukfuru l'ewofuje
onye mmamiphe pehuru.
3 Mbẹdua gudekwa ẹnya mu
phụ ẹke onye eswe agbabẹ ọgvu.
T'a bya ele ẹnya;
bẹ mu tụwaru ufu iya ọnu.
4 Ụnwu iya akwata l'awa awawa;
aatsụje ẹphe ụtsuruku l'ụlo-ikpe;
to nwe onye agbataru ẹphe.
5 Ọ bụ ndu ẹgu agụ erije iphe,
ọ kpataru l'ẹgu iya;
ẹphe egwoje gwoo ọphu nọ l'iku ogvu.
Ndu ẹhu achị ọku
avụje ẹku iya avụvu;
6 kẹ l'iphe-ọtsu-l'ẹhu
te shijedu l'ẹja;
ọphu iphe-ẹhuka
'eshijedu l'ime alị mifuta.
7 Obenu lẹ madzụ b'a mụru ye
l'iphe-ẹhuka ẹge ono, abụje: ẹkoroku gbaa;
ọku iya ephekashihu ono.
8 Ndẹge ọ -bụ l'ọo mu bụ nggụbedua;
iphe, mu ga e-me bụ
tẹ mu raku Nchileke;
wota ẹge ọ dụru mu kọkotaru iya.
9 Nchileke emeje iphe-biribiri,
ẹ ta adụjedu ike ọtu ọnu iya;
mbụ iphe, dụ egvu, 'agụta agụta.
10 Oomeje tẹ mini chịa
lẹ mgboko.
Yo mee tẹ mini ono tsọo
tsọ-rutsua l'ẹgu.
11 Oomelije ndu laru alị;
l'edutaje ndu agụ aphụ
dobe l'ẹke ẹ ta dụdu iphe, eme ẹphe.
12 Idzu ndu ẹregede bẹ oomeje; yo chikashihu;
k'ọphu bụ l'ẹ t'ọ dụdu iphe,
ẹphe emefuje ọnya.
13 Ndu maru iphe;
bẹ oogudeje ẹregede,
ẹphe agba nmata l'ọnya.
Ẹge ono bẹ ọochikashije
mmamiphe ndu ntuphu-ire.
14 Nchi ejikfuje ẹphe
l'echi oke-eswe; ẹphe
atsọ-kpulahaa atsọ-kpu
l'echi oke-eswe l'ọ bụ onye eje l'ọchi.
15 Ndu ẹ ta dụdu ẹge
ọ haru ẹphe;
bẹ ọodzofutaje.
Ọodzofutaje ẹphe l'ẹka ndu ike.
16 Ọo ya bụ lẹ ndu ụkpa
ele ẹnya l'ee-mekochaa dzọfuta ẹphe.
Teke ono; ọnu abụru iya
shịkpiriki dụngu;
kẹ l'ụzo iya ta kfụduru akfụru.
17 Ọnu-ọma bụ k'onye
Nchileke ahụ̀je àhụ̀hù.
Ọo ya bụ; ba akpọkwa ẹka,
Ọkaribe-Kakọta-Ike
alọ ngu lẹ nchị ẹbo-ẹbo-l'afụ.
18 Oomekaje madzụ iphe;
ọbule oomeje t'o shi kfụru.
Ọ bụ ẹchachi b'ọ bụ;
ọbule ẹka iya emeje t'a ka mma.
19 Iphe-ẹhuka a-byaru ngu mbyapyabẹ;
yọ dzọkota ngu;
m'o -ruhuru; ọ ha ịhagha.
20 Teke ẹjo-ẹgu byaru;
bẹ ọo-gbafụta ngu t'ẹgu be egbu ngu.
L'ògè ọgu;
bẹ oo-me t'ẹ b'ị la l'ọgu.
21 Ẹ too kwedu t'ẹjo okfu rua ngu l'ẹhu;
ọphu ịitsudu egvu ọ-la-l'iyi.
22 Ọ -bụru iyi byaru; bụru
ẹjo-ẹgu byaru; bụlee ọchi
bẹ ịi-nọdu achị iya;
ọphu ịitsudu anụ-ẹgu-ẹgbudu egvu;
23 kẹle nggu lẹ mkpuma,
nọ l'ẹgu a-gba ndzụ;
anụ, bu l'ẹgbudu abụru ọnya ngu.
24 Ịi-ma l'ẹ to nwedu iphe,
eme ufu ngu; iphe, bụ iphe,
i nweru enweru;
bẹ ịi-gụ ọgu;
tọ dụ ọphu aachọ achọcho.
25 Ịi-ma l'ụnwu ngu dụ l'igwe;
awa ngu a-zaa l'ọ bụ ẹswa, furu l'alị.
26 Ịi-la l'oge nka-ezekuna nke ngu;
nggu adụ l'ọ bụ akpe,
e gburu l'ògè iya.
27 Ayi leekwaru iphe-a ẹnya;
phụ l'ọ bụ oswi-okfu.
Nụkwaa iphe mu ekfu;
gude iya meru iphe!”