6
Ọnu, Jobu eye
1 Tọ dụ iya bụ; Jobu abya eyee ọnu; sụ:
2 “Ọ dụ iya t'e wota áphụ́,
nọ iya l'obu tụ̀a átụ̀tù;
phụ ẹge ọonyi-be ẹra.
Mbụ t'a achịko iphe-ẹhuka iya
chịru ye l'iphe,
eegudeje átụ̀ ẹra iphe.
3 Ọ kafụtaje ẹja,
nọ l'eze ẹnyimu ọnyi ẹra.
Yọ bụru iya meru iphe
olu mu ada njiji-ọnwu njiji-ọnwu.
4 Kẹle akfụ
Ọkaribe-Kakọta-Ike
ngụtsuaru mu angụru l'ẹhu.
Ọku, ọohu mu alọ mu ẹka lẹ meji.
Iphe Nchileke gude eye mu
egvu kpẹru mkpẹe lanụ.
5 Nkakfụ-ịgara-ọswa;
?ọoraje ọra teke ọota nri.
Tọo eswi; ?oogbuje ọra
mẹ nri, oori nọdukwadu?
6 ?Eerije nri, ẹ-te nwedu
ụtso l'ẹ be eye iya únú.
Ẹke ono, achajẹ ụcha l'ẹkwa-ọku ono;
?o nweru ẹge ọotsoje tọo.
7 Mu te edenyijedu iya ẹka;
kẹle egbe nri ono
anọduje ahụ mu ẹgbo.
8 Ọ g'a dụkwanu mu mma;
m'ọ -bụru lẹ Nchileke
a-nụ iphe mu ekfu;
meeru mu iphe, mu ele ẹnya iya.
9 Mbụ lẹ Nchileke a-tụ obu; gwee mu uji;
mbụ sefu mu ẹka;
tẹ mu chịhu lẹ mgboko-a.
10 Yo nwekwanuru nwiphe
a-nọdu adụ mu ike;
ẹhu akabẹ tsọo mu ẹna
l'ẹhu-ụphu ọwaa,
ta adazitadu mu adazita-wa;
kẹle mu ta jịkakwa ome
iphe onye ono, dụ nsọ ono kfuru.
11 ?Nanụkwadu ụvo, nọ mu nụ
k'ole ẹnya ngụnu?
?Bụkwanu ole bụ kẹ ọta nshi;
l'ẹ b'ọ dụ iphe aanọ ndzụ anọ-kfuru?
12 Ike, nọ mu nụ;
?ọ bụ kẹ mkpuma tọo?
Tọo anụ-ẹhu mu;
?ọ bụ ope tọo?
?ọ bụ ope tọo?
13 ?Mu nwekwaduru ụvo, mu
e-gude agbaru onwomu
mkpu nta-a ike, mu shi nweru gvụwaru-a.
14 Onye ụzo chihuru gbakwaru
tẹ ndu ọ̀nyà iya gbaaru iya
mkpu; m'o -ruhuru;
ọ bụru l'ẹ tọ tsụhedu
Ọkaribe-Kakọta-Ike egvu.
15 Obenu l'unwunne mu phẹ
bụ ndu ẹregede l'ọ bụ eyii.
Ẹphe dụ l'ọ bụ utso nggele,
gudeje ọso l'awụ.
16 Teke mini jiru ejiji;
nmụkoo anmụko;
yọ bụru lẹ mini suno,
adazeshihu nụ; b'o shi.
17 O -rua l'ọnanwu; yọ tashịhu.
Okpomọku -byalẹphu;
mini ono agwụ l'ọgba iya.
18 Mu dụakwa l'ọ bụ onye ije, ẹkwo-njị jịru;
yo phua ụzo l'ẹke ọocho mini.
Yo je abaa l'alị,
anwụ-chigburu-ịnya;
laa l'iyi.
laa l'iyi.
19 Ndu ije, shi Téma achọ mini;
ndu ije, shi Sheba achịru ẹnya dobe l'ụzo.
20 Ẹphe rịru l'ẹphe a-phụ mini l'ẹke ono.
Ẹphe erua; t'ọ dụhe l'ẹge ẹphe rịru iya.
21 Ọ bụ ẹge ono b'ọ dụ mu l'ẹke unu nọ.
Unu phụru ẹge ọ byaru mu;
wata ọtsu egvu.
22 ?O nweru iphe mu rọjeru unu?
?O nweru onye mu sụjeru
t'o wota iphe o nweru
je anụru mu nggalazu?
23 ?O nweru onye mu sụjeru
t'ọ bya agbafụta mu
l'ẹka ndu ọhogu mu;
m'ọ bụ l'ẹka ndu ẹjo madzụ.
24 Unu koshinu mu ẹke mu hasweru ọkpa;
tẹ mu dobe ọnu ndo.
25 Ọ bụ oswi-okfu l'ire-lanụ ahụje ọku;.
Ọbu; ?bụkpoo ngụnu;
bẹ unu a-sụ l'unu gude ẹka
ekfu iphe-wa, unu ekfu-wa.
26 ?Bụ kẹle mu ta mahẹdu
ẹge mu e-me iya; meru iphe
unu a-rị l'okfu mu bụ mkpọkoro okfu.
27 Ọ bụ ndu dụ l'ọ bụ unu
atụje ẹnwa t'e je eree nwogbe,
ẹ-te nwedu nna;
mbụ gude obutobu ẹphe kpaa ẹku.
28 Unu palinua ẹnya apali
lee mu nta-a.
?Mu a-kabẹ nọdu unu l'ifu
adzụru unu ẹjo-ire tọo?
29 Unu hẹe. Unu ba ebohenu
mu ibo ịnyigirinyi.
L'ọ kwa ẹpha mu;
bẹ unu emebyishi emebyishi.
30 ?Mu a-dzụru unu ẹjo-ire tọo.
?Ọ bụ lẹ mu ta kabẹdu maru
iphe, dụ iche l'ire-lanụ yẹle ẹjo-ire tọo?”