6
Hay Ingkantan nan Liligwan nan Babaid Jerusalem:
1 “Hay inayan ahawam
an he"an babain ma"apgohan hi an amin hinan abinabinabai
ta badanganmi he"an manganap ay hiya?”
 
Hay Ingkantan nan Babai:
2 “Ten un wah tuh awada' an ha"in nan mipaddung hi galdena
an nitamman di do'ol an ma"aphod di hunghungna,
at ten ma"amlong an gun ummal hitun paddungnay ha'ha'lung an wah tu.
3 Pa'appohpohdo' nan ahawa',
ya pa'appohpohdona' goh!
At te nongkay an nidugah di amlongnan mangngal hitun paddungnay ha'ha'lung an wan ha"in!”
 
Nan Miyaleman Kantada
Hay Ingkantan nan Lala'i:
4 “He"an ahawa' ya ma"apgohan'a ahan an umat'a ad Tirzah* Hay pohdon ten ngadan di babluy an ibaga ya mapgohan, hiyaat un nin pento' nan Alin hi Jeroboam I heten siudad ta hiyay mahhun an kapitulyudad Israel hi appit hi iggid hi un hagangon di buhu'an di algaw (I Ki. 14:17; 15:21; 16:23-24). ya ad Jerusalem!
Ma"aphod'a ahan an umat'ah nan titindalun munlinggun nanangdon hi bantiladan umipa'amlong hi tigon.
5 At adim i'ittig ay ha"in ti nen paddungnay ipalungtuya'!
Nan buu'mu ya maduyuh ya ma"ang'angitit
an umat hinan ma"ang'angitit an gandeng an mundadyuh nan dudunduntug ad Gilead!
6 Ya nan babam ya ma'appaha' nongkay an umat hinan pa'ammoh an kalnilu,
ya nundada"it an mi'id ah napengawan.
7 Nan nahu'yungan an tamelmun mumpepengla,
ya nipaddung nongkay hinan natomang an bungan di pomegranate.
8 Nan ali ya wadaday nanom hi a'ahawana,† Henen kalahin di a'ahawana ya aptan an ahawana an ma'alih queen.
ya nawaluy ibilangna goh hi a'ahawana,‡ Henen kalahin di udum an a'ahawana ya bo'on diday ma'alih aptan, ya bo'on diday queen ti na'ampay haadda.
ya do'ol goh di e'enghana,§ Henen kalahin di binabai ya ma'alih velhen, ya ta"on un diday bagin di ali mu agguyna pay enelo' dida ta mumbalindah aptan ahan an ahawana (unu queen) unu udum an ahawana an okod nan alih ma'at ay dida.
9 mu he"an ahawa' an umat hi kalapati ya mid di nipaddungam,
ya un'a anggay hi babain imbaluy inam an pa'appohpohdona.
Ya nan e'enghan nan ali ya umamlongdah un da'a tigon,
ya ta"on hi un nan a'ahawana ya nan ibilangnah a'ahawana ya iyamlong da'a goh!”
 
Hay Ingkantan nan Liligwan nan Babai:
10 “Anakkayah heten mahenhenagan an umat hinan mamigat an bittuan
an ma"apgohan an umat hinan ma"abnang an bulan ya nan patal di algaw!”
 
Hay Ingkantan nan Babai:
11 “Nundadyua' hinan wadan di nun'itanom an ayiw
ta tigo' nan munlutbu an nitanom hinan nundotal,
ya ta tigo' goh hi un mumballu nan tubun nan greyp,
unu munhabung mahkay nan ayiw an pomegranate.
12 Ya dumalat nan nidugah an pamhod'u ya hay nunle'na'
ya himbumagga ya inlugana' ay hiyah nan ohan kalesan Solomon!”
 
Hay Ingkantan nan Liligwan nan Babaid Jerusalem:
13 “Mumbangngad'a!
Mumbangngad'a an babain iShunem* Duway pohdon ten ngadan di babluy an ibaga: (1) nan oha ya pamhod, ya (2) nan oha ya nan ahawan Solomon ti nan hapit an Shunem ya ngadan di babai an ngadan Solomon. ta tigonmi he"a!”
 
Hay Ingkantan nan Lala'i:
“Anaad ahan ta pohdonyun tigon hi ahawa' an iShunem
an umat hinan maman'ol hinan migagwan manayaw ad Mahanaim?

*6:4 Hay pohdon ten ngadan di babluy an ibaga ya mapgohan, hiyaat un nin pento' nan Alin hi Jeroboam I heten siudad ta hiyay mahhun an kapitulyudad Israel hi appit hi iggid hi un hagangon di buhu'an di algaw (I Ki. 14:17; 15:21; 16:23-24).

†6:8 Henen kalahin di a'ahawana ya aptan an ahawana an ma'alih queen.

‡6:8 Henen kalahin di udum an a'ahawana ya bo'on diday ma'alih aptan, ya bo'on diday queen ti na'ampay haadda.

§6:8 Henen kalahin di binabai ya ma'alih velhen, ya ta"on un diday bagin di ali mu agguyna pay enelo' dida ta mumbalindah aptan ahan an ahawana (unu queen) unu udum an ahawana an okod nan alih ma'at ay dida.

*6:13 Duway pohdon ten ngadan di babluy an ibaga: (1) nan oha ya pamhod, ya (2) nan oha ya nan ahawan Solomon ti nan hapit an Shunem ya ngadan di babai an ngadan Solomon.

© 2018 WBT