5
Hay Ingkantan nan Lala'i:
1 “Wah tua' an ahawa' hitun galden,
ya ten gunna' ummal hi myrrh ya nan udum an bangbanglu',
ya gunna' uminum hi danum di alig, ya nan gatas, ya nan bayah.”
Hay Ingkantan nan Liligwan nan Babaid Jerusalem
“Da'yun nun'alhin ya nipaddung nan pamhodyuh ma'an,
at agayu ta idugahyuy ononyu ya inumonyu ta nangamung un ayu mahengla!”
Nan Miyapat an Kantada
Hay Ingkantan nan Babai:
2 “Hidin nolo'a' ya dengngol'u an mungkulkug hi ahawa' hinan pantaw.
Ya inalinay,
He"an ahawa' an pa'appohpohdo' an ay kalapatin mid nipaddungana,
ibughulmu ni' ti ten na'pot tun buu"uh dulnu!
3 Mu inali' di,
Ten inaan'uy gina'u', at unna' dan goh munlubung?
Ya ten inihua' di hu'i', at un'u mah goh lugiton?
4 Unat goh impahdun nan pa'appohpohdo' di ngamaynah
ya ma"am'amlong di le'na',
5 at immuya',
ya imbughul'u ta humigup an nalamuhan di ngamay'uh myrrh,
at nilamuh hidin da'ig di tangob.
6 Ya unat goh imbughul'u ta pahigupo' hi ahawa' mu mi'id an nakak!
At nidugah ahan di nunlungdayaa',
at immuy'u inanap, mu agguy'u inah'upan,
Ya gunna' immaya'ayag ay hiya, mu mi'id di tinumbal.
7 Ya inah'upana' hinan mumpun'adug hidin punle'le'dandah nan babluy.
At pinaguha',
ya nundinula',
ya ginuyudda din lo'ob an gun'u ihabedang.
8 At da'yun binabaid Jerusalem ya itulagyun ha"in
an wa ay ta ah'upanyuh ahawa' ya inaliyu ni' ay hiya an nundogoha'
an dumalat nan pamhod'un hiya!”
Hay Ingkantan nan Liligwan nan Babaid Jerusalem:
9 “He"an ma"apgohan an babai,
hay niyod'odolnaan ne han ahawam ya un nan udumna?
Ngadan di nun'abhiwandah nan udum an linala'i ta gahin ahan hi un ami mi'tulag?”
Hay Hinapit nan Babai:
10 “Nan ahawa' ya hiyay ma"ap'aphod ahan ya un nan himpuluy libun linala'i!
11 Ma"aphod di angahna an umat hi balitu',
ya nan buu'na ya nakulut ya ma"ang'angitit an umat hi gayang.
12 Nan matana ya umat hinan kalapati
an wah nan pingit di ginnaw an lumaniwligwa.
13 Nan tamelna ya umat hinan ma"aphod an galden an do'ol di nitanom,
ya hay hunghung di pingit di timidna an na'amunahan hi myrrh
ya umat hi hunghung di habhabung di ha'ha'lung.
14 Ma"aphod di odolna an umat hinan napa'tan an ivory* Hiya ya nan ma'alah nan ha'gud di elepante. an na'al'altian hi sapphire† Hay kololna ya blue.
ya ma"aphod di ngamayna an ay balitu' an nahenghengan hinan na'al'altian hi nanginan batu.‡ Heten nanginan batu ya ma'alih chrysolite, ya munlangta (unu green) di kololna.
15 Nan hu'ina ya ma'ikah an umat hinan tu'ud an marble§ Hiyah ne batu an moheng. an nipabun hinan namahmah an balitu'.
Ya ma"aphod di tigawna an nipaddung hinan amaphod nan duntug ad Lebanon,
ya ata'nang an umat hinan ayiw an cedar.
16 Ya ma"aphod goh di timidna,
ya an amin di atona ya umipa'amlong ay ha"in!
Umat hinay aat ahawa' an da'yun binabaid Jerusalem!”