34
Nan Igad ad Canaan
1 Ya inalin goh Apo Dios ay Moses di, 2 “Tugunom nan holag Israel ta alyom ay diday, Wa ay ta umatam ayud Canaan an hiyah ne midat ta banohyu ya hiya hatuy aat di igadna:
3 An hay igad hi appit di agwan hi un hagangon di buhu'an di algaw ya mete"ah nan Mapulun an Zin ta nangamung hinan igad ad Edom. Ya minaynayun an umuy hi appit di buhu'an di algaw ta nangamung hinan pogpog nan Ma'ahin an Baybay.* Unu nan Natoy an Lobong (unu Dead Sea). 4 Ya nan igadyu ya elikkakunah nan Buludna an Akrabbim† Hay pohdonan ibaga ya ipi'ipit, ya hay ngadanah English ya Scorpion Pass. ta lauhanah nan Mapulun an Zin. Ya minaynayun ta nangamung hinan appit di agwan hi un hagangon di buhu'an di algaw hi ad Kadesh Barnea. Ya minaynayun an umuy hi ad Hazar Addar ta engganad Azmon. 5 Ya nipi'ut nan igad hi ad Azmon ta nangamung bumuhu' hinan Wangwang an Nile hi ad Egypt ta miho'gad hinan Baybay an Mediterranean.
6 Ya hay pogpog nan igad hi appit nan alimuhan di algaw ya nan pingit di Baybay an Mediterranean.
7 Ya hay pogpog nan igad hi appit hi iggid hi un hagangon di buhu'an di algaw ya mete"ah nan Baybay an Mediterranean ta nangamung umatam hinan Duntug an Hor. 8 Ya mete"ah nan Duntug an Hor ta engganad Lebo Hamath. Ya minayun nan igad ad Hamath ta nangamung miyatam ad Zedad. 9 Ya minaynayun nan igad ta nangamung ad Ziphron, ya minayun ta engganah un umatam ad Hazar Enan. Hiyah ne igadyuh appit hi iggid hi un hagangon di buhu'an di algaw.
10 Ya hay igad hi appit di buhu'an nan algaw ya mete"ad Hazar Enan ta nangamung umatam hi ad Shepham. 11 Ya mundadyu ta nangamumg ad Riblah hi appit di buhu'an nan algaw hi ad Ain. Ya minayun an mundadyu ta nangamung miyatam hinan Lobong an Kinnereth.‡ Unu Lobong an Galilee. 12 Ya minaynayun henen igad an mundadyuh nan Wangwang an Jordan ta ibuhu'nah nan Ma'ahin an Baybay.
Hiyanay pogpog di lutayu ya igad hi nunlene'woh.”
13 Ya minandal goh Moses nan holag Israel an inalinay, “Hiyah te nan lutan banohyu an nagogodwan midat ay da'yu ti hiyah ne immandal Apo Dios hi midat hinan hiyam ta godwan himpangapu. 14 Ti danen holag Reuben, ya holag Gad, ya danen godwan holag Manasseh ya nidatandah nan lutan banohda. 15 At nalpah an nidatandah banohdah dih nan appit hi buhu'an di algaw hinan Wangwang an Jordan hinan dammang ad Jericho.”
Nan A'ap'apun Mangodwagodwah nan Luta
16 Ya inalin goh Apo Dios ay Moses di, 17 “Hiyatuy ngadan nan linala'in mangodwa ya mangipiyapong hinan lutan banohyu an da Eleazar an Nabagtun Padi ya hi Joshua an imbaluy Nun. 18 Ya pot'om goh di ohah mumpapto' hinan hinohhan himpangapun holag Israel ta way bumadang an mangodwah nan lutan banohyu. 19 At hiyatuy ngadan danen linala'i:
Hi Caleb an hina' Jephunneh an nalpuh nan himpangapun holag Judah,
20 ya hi Shemuel an hina' Ammihud an nalpuh nan himpangapun holag Simeon,
21 ya hi Elidad an hina' Kislon an nalpuh nan himpangapun holag Benjamin,
22 ya hi Bukki an hina' Jogli an nalpuh nan himpangapun holag Dan,
23 ya hi Hanniel an hina' Ephod an nalpuh nan himpangapun holag Manasseh,
24 ya hi Kemuel an hina' Shiphtan an nalpuh nan himpangapun holag Ephraim,
25 ya hi Elizaphan an hina' Parnak an nalpuh nan himpangapun holag Zebulun,
26 ya hi Paltiel an hina' Azzan an nalpuh nan himpangapun holag Issachar,
27 ya hi Ahihud an hina' Shelomi an nalpuh nan himpangapun holag Asher,
28 ya hi Pedahel an hina' Ammihud an nalpuh nan himpangapun holag Naphtali.”
29 Ya didanay linala'in immandal Apo Dios hi pot'on Moses ta diday mangodwah nan lutad Canaan ta mipiyapong hinan holag Israel ta banohda.