62
Nan Nunluwaluan Isaiah hi ad Zion
1 Ya inali' an hi Isaiah an dumalat hinan ongol an namhod'un da'yun i'ibba' an iJerusalem
ya iluwalua' da'yu ta engganay un mipaphod di pangatyu
an paddungnay bumnang di amaphod di aatyu,
ya ta nan abaliwanyu ya umat hinan gun mundalang an hilaw.
2 At an aminday tatagu ya a'alih abablubabluy ya tigonday amaphod tu'u,
ya umat goh an hukatan Apo Dios hi balu nan ngadan an babluy tu'u,
3 at umat tu'uh nan ma"aphod an coronana.
4 Ya adi mahkay alyon di tataguy, “Ninganuy tu'u.”
Ya adida goh alyon di, “Nan babluy tu'u ya umat hinan babain ingnganuy nan ahawana.”
Mu hay alyonda mahkay ya, “Da'yuy pun'am'amlongan Apo Dios!”* Unu Hephzibah.
Ya alyonda goh hinan babluy tu'uy, “Inahawan Apo Dios!”† Unu Beulah.
ti ditu'un himpamabluy di paddungnay ahawanan pun'amlongana.
5 Ya nan linala'in holag tu'u ya mun'am'amlongdan mangipapto' hinan numbabluyan tu'u,
at umat hi pun'amlongan nan ungan lala'ih nan balahang an babain inahawana.
Ya umat hinay pun'am'amlongan Apo Dios ay ditu'u.
6 Ya ta"on hi un nan i'ibba' an propeta ya umatdah nan mumpun'adug hinan allup tu'u
ti abigabigat an ta"on hi un mahdom ya adida duminong
7 an mangipanomnom ay Apo Dios hinan ipaphodan tu'un
inalinah atona ta wan mi'id al'alin ditu'un tataguh abablubabluy.
8 Ti hay intulag Apo Dios ya inalinay,
“Adi' ahan mahkay iyabulut an nan buhulyu unu nan tataguh udum an babluy
di mangan hi inhabalyu ya manginum hi inyiwayu.
9 Mu da'yun nangihabal di mangan ta way i'ilogyun mundayaw ay Apo Dios,
ya da'yun nanalimun ya numpugah hinan greyp di manginum hinan behtah nan Timplu.”
10 At hiyaat un'u inalin hi Isaiah an da'yun i'ibba' hitud Jerusalem
ya umuy tu'u ipaphod nan kalata ta midadaan hi owon nan i'ibba tu'un mumbangngad!
At pun'aan tu'uy nihawan an batu,
ya intayun tu'uy bantila ta ta"on hi un nan Hentil ya way panginnilaandah owondan umanamut
11 ti ipa'innilan Apo Dios hinan tataguh nan abablubabluy an alyonay,
“Ipa'innilayuh nan holag Israel an na'uy hi Apo Dios an mamaliw ay da'yu
an initnudna din tatagun binaliwana.
Ya waday inta'inah idatnan dida.”
12 Ya hay pungngadan di udum an tatagun ditu'u ya,
“Da'yuy pento' Apo Dios hi tataguna!”
Ya alyonda goh di,
“Da'yuy tatagun Apo Dios an binaliwana!”
Ya hay pangalidad Jerusalem an babluy tu'u ya,
“Nan babluy an nabalul ahan ay Apo Dios!”
ya,
“Nan babluy an agguy mahkay ninganuy.”